Hàbákù 1 - Ɓǎsɔ́ɔ̀ Báɓòɔ̀

¹ Wuɖu ɓɛ́ Bounɓoɔ̀ dèìn ma Hàbákù ɓɛ́ ɔ mɔ̀ ma kpáá-ɖɛ̀-cɛ̃-nyɔ̀ kɛɛ wĩín dyììn ɖé dyí-tɛ̀mɛ̀ìn-ɖɛ̀ múɛɛ kɛà kɛ̀.

Hàbákùɛ̀ ka-wùɖù ɓá se-dyí-sɛ́ɖɛ́ìn-ɖɛ̀ jè dyíɛ

² Bounɓo, ti jĩ̀ xwɛ̌ ḿ mɛ ɖá m̀ hwɛ̀ ɓɛ́ m̀ ké ḿ gbo ɖùǔ tò, ɓɛ́ m̀ ké ḿ gbo kpáá? Tiɔ̀ nyɛ́ nì mu ḿ ɖɛ-gbà-nyu-nyɔ̀ ɓě xwaún póìn nyɛ́?

³ Ɖɛ́ kɔ̃̀ jè m̀ nyuɛ ɓɛ́ ḿ dyià ɖɛ gbà dyéɛ́? Ɖɛ́ kɔ̃̀ jè m̀ táà dyi, ɓɛ́ nyɔǔn dyià ḿ fũ̀à-fṹá nyùìn nyɛ́? Mú-gbɔɔ̀-gbɔɔ̀ kè ɖɛ gbà gbǎìn ḿ wɔ̃. Ɖɛín-zà-zà kè vɔ̃-vɔ̃ nì ḿ ɖei.

⁴ Ɔ jèɛɛ, gmaɔ̀ ɖǎ ɓíɖíi dyi kpá, ké jǎà ɖò se nìɛ̀ ɓɛ́ìn ɖe. Ɖɛ-gbà-nyu-nyu vò dyí ké ɔ zi dyí-sɛ́ɖɛ́ìn-ɖɛ̀ nyu-nyu dyí jèɛɛ, nyɔ ɖò ní nyu ɖɛ sɛ́ɖɛ́ìn dyíɛɛ ɖe.

Bounɓoɔ̀ jǔ Hàbákù gɔ̃̌

⁵ Hwɛ̀ ké Bounɓoɔ̀ jǔ ma Hàbákù gɔ̃̌, ké ɔ ɖá, “Ɓě gmɔ̀ ɓóɖó-dù ɓěɔ̀ dya, ɓɛ́ ɓě ké dyi giniìn, sepóɛɖé ní mu ɖɛ ɖò nyuùn ɓó ti ɓě nìà cĩ́ɛń nyɛ, ké ɓě seɛ jǎà poɛ́ mu, kɛbì wa mɛ cɛ̃ ɔ jè ɓě gboɛ.

⁶ Gmɔ̀ nɔ̄, ní mu Báɓèɖɔ́ùn-nyɔ̀ ɓě mɔ̀à kpeɖeín-nyìnììn-nyɔ̀ kè hwòɖǒ-fṹà-nyɔ̀ ɓěɛɛ kpé nyíìn. Wa mɔ̀ nyɔ ɓě nìà ɓóɖó-kpà gànáà gboi ziɛń, ɓɛ́ wa kéà nyɔ ɓě cĩ́-naín ɓě ɓɛ́ wa se kɔ̃̀ɛɛ xwa zà kɛ.

⁷ Wa po nyɔǔn fã̀àǔn, ké wa nyuɛ ké hwòɖǒ ɓaɖa nyɔǔn xwíníín dyi. Wa ní kpɔ̃ gma ɖò dyi, ké wa cɛ̃ wa mìɔùn nììn dya dè jè.

⁸ “Báɓèɖɔ́ùn-nyɔ̀ ɓěɔ̀ sǒ ɓěɔ̀ fɛ̃́ìn xwa ké ɔ zi ji dyí, ké wa ɓéɖé dyoɖo ké ɔ zi kpɔ̃ɔ-nìmìì ɓɛ́ mɔ́ nyuɛɛ dyí. Waà sǒ-nàìn-nyɔ̀ ɓě sɔ̀ ɓóɖó vɛ̃in ɓě kɔ̃, ké waà sǒ ɓěɔ̀ ɓo-jĩ̌ dyi gìɖì-gìɖì. Sǒ-nàìn-nyɔ̀ ɓěɔ̀ po to wàɖà kà ke bǎà ɖɛ ɓíɖíiɛ.

⁹ “Waà to-vɔ̃-nyɔ̀ ɓěɔ̀ kpa ɖɛ dyíin nyìnìɛ̀n, ké nyɔǔn séín hwòɖǒ tɛɖɛ wa xwíníín dyi ɔ jǔ ké wa dyi dyiɛń nìǐn. Ké wa kpɔ̃ nyɔ ɓáún-ɓáún se zɛɖɛɛ ɓɛ́ìn nyɛɛ ɖé waà toɔ̀ gbo.

¹⁰ Ké wa zàìn kã́á ɓě zùǔn, ké wa ɓaɖa ɓóɖó-nàìn-nyɔ̀ ɓě dyɔ́. Wa se hwɔɖɔ cɛ̃̀ìn gmɔ ɖei ɖɛ ɖá. Wa poìn ɓóɖó-kòò dyí ɖé hwɔɖɔɔ̀ gmɔɔ̀ ɖei, ké wa ɖuɛ toún.

¹¹ Ɔ ɖǎ ná nìǐn, nìí, wa zi wàɖà kà dìì nyuà kɛ. Wa mɔ̀ nyɔ ɓě ɓɛ́ zaa ɖǎ kpɔ̃ɛ. Wa ɖú wa mìɔùn nììn kpéɔ̀ dyí, ɓɛ́ ɔ ké waà gèɖèpɔ́ɔ̀ jǔ.”

Hàbákùɛ̀ ka-wùɖù ɓá se-dyí-sɛ́ɖɛ́ìn-ɖɛ̀ jè dyíɛɛ sɔ̃́ nììnɔ̀

¹² Bounɓo, hwɛ̀ ɓóɖó-kpàà kéó zɔ̃̌ɔ̀ gbɔ dèɛɛ, m̀ mɔ̀ Gèɖèpɔ́ɔ̀. M̀ mɔ̀ ní Gèɖèpɔ́ɔ̀, ké m̀ hwɛ̀ mú, ké m̀ cĩ́ kánáá pū. Óó ní dyí-gmɔ̀ìn-sɔ̀ɔ̌-kpò, m̀ ɖǎ Báɓèɖɔ́ùn-nyɔ̀ ɓěɔ̀ gã, ké m̀ ɖǎ wa kpé nyí, ɓɛ́ wa ké à gǎ kɔ̃ dyà.

¹³ Bounɓo, nì dyéɖéɔ̀ zi mú hwɛ̀ǐn mìɔ, ké ɔ se ɖɛ gbà dyi dyéɛ ɓɛ́ìn, ké mɔ̀ǔn táà ɖɛ-gbà-nyu-nyu dyi, ɓɛ́ ɔ ké dyúa mu. Kà ɔ nìà náa, nìí, ɖɛ́ kɔ̃̀ jè m̀ nìà ɖɛ-gbà-nyu-nyɔ̀ ɓěɛ̀ dyi táàǔn wɛ̃́? Ɖɛ́ kɔ̃̀ jè m̀ nìà gìɖìǐ, ɓɛ́ hwòɖǒ-kɔ̃in-nyìnììn-nyɔ̀ ɓěɛ̀ dyià nyɔ ɓě sɛ́ɖɛ́ìn dyí ké ɔ zi wa mɔ̀ùn dyíɛɛ kpã mànàìn nyɛ́?

¹⁴ M̀ nyu nyɔǔn-dyù kà zimii ɓě kè ɓíɖíi-dyi-nà-ɖɛ̀ ɓě ɓɛ́ wa seà nàìn-nyɔ̀ ɖò ɓéɖéɛɛ nìà kɛ.

¹⁵ Báɓèɖɔ́ùn-nyɔ̀ ɓěɔ̀ dyi, ké wa zà wa séín xwɛ̃ɛ́ dyí, mɔɔ wa kpɔ̃̀ìn wa kpéɖé mú, mɔɔ wa kpɔ̃̀ìn wa ɖé waà kpéɖé vɛ̀nɛ̀ɔ̀ mú. Ɔ ɖǎ ná nìǐn, nìí, wa hwòɖǒ dè dyi, ké wa kpá múàǔn.

¹⁶ Sɔ̀ìn ɓóɛ gboɛɛ ní, wa nyu sáa-zàìn-ɖɛ̀ ɓě, ké wa fɔ̃ nyɔ́ún-nɔ̀mɔ̀-ɖɛ̀ ɓě ɓó waà kpéɖé ɓěɔ̀ bìì, sepóɛɖé waà kpéɖé ɓěɔ̀ mɔ̀ nyɔ nyuɛ ké wa cĩ́ bã-kà, ké wa ɖi ɖɛín-ɖɛ̀.

¹⁷ Wa mu waà kpéɖé ɓěɔ̀ dyí ɖúùn, ɓɛ́ wa ké ɓóɖó-dù ɓěɔ̀ mú gbɔɔ̀ kpa kànàǎ-kà kánáá pūù?