Fèɖópĩ̀à 1 - Ɓǎsɔ́ɔ̀ Báɓòɔ̀

Nyíɔún-zà-zà

¹ Céè-ɖɛ̀ nìà kɛ sɔ̀ mɔ̄ Pɔ́ɔ̀ gbo. Ḿ kè Tímétè mɔ̀à Kɛ́ɖɛ́ì Jízɛ̀ɛ̀ gbo-nì-nyɔ̀ ɓěɛɛ zà ɓě mɔ̀à Gèɖèpɔ́ɔ̀-nyɔ̀ séín ɓě nìà ɖé Kɛ́ɖɛ́ì Jízɛ̀ mú ɖé Féɖópà-hwɔ̀ɖɔ̀ɔ̀ múɛ kè cɔ́cìɔ̀ kɔ̃in-gmɔìn-nyɔ̀ ɓěɔ̀ ɔ kè ɔ gbo-nì-nyɔ̀ ɓěɔ̀ nyíɔún.

² Gèɖèpɔ́ɔ̀ mɔ̀à à Ɓǎ kɛ kè Bounɓo Jízɛ̀ Kɛ́ɖɛ́ì mɛ po ɓě mana kɔ̃, ɓɛ́ wa ké ɓě gìɖìǐ nyí.

Pɔ́ɔ̀ ɓaà ɓó Féɖópà-nyɔ̀ ɓěɔ̀ jè

³ Ti séín ɓɛ́ ɓě jè dyi ḿ hwìɖǐiɛɛ, ḿ po ní Gèɖèpɔ́ɔ̀ zùo.

⁴ Ké ti séín ɓaɖa ɓɛ́ ḿ ɓaà ɓó ɓě jèɛɛ, ḿ ɓaà ɖé múà mú,

⁵ sepóɛɖé ɓě ɖǎ ḿ gbo kpá ɓó bɔ̃̌ nɔ̀mɔ̀ dyíinɔ̀ kũ̀à mú nyùìn jè, sɔ̀ìn ɖé wé kĩ́ín-kĩ́ínɔ̀ gbo, ɓɛ́ ɔ ké ti nìà kɛ gbo dyiɛ.

⁶ Ké ḿ dyuò kà ɖɛ ní muà cɛ̃ìn nyɛɛ mɔ̀ jǎà jɛ́ɛ́ kɛ. Ɔ mɔ̀, kà ɓɛ́ Gèɖèpɔ́ɔ̀ mɔ̀ nyɔ dèà kũ̀à nìà kɛ gbɔ ɖé ɓě múɛɛ, ɔ muɛ dyúa kpaùn tee ɓɛ́ ɔ ké hwɛ̀ ɖé Jízɛ̀ Kɛ́ɖɛ́ì nììn wéɔ̀ múɛ.

⁷ Ɓě jè kpɔ̃ ḿ hwòɖǒ mìɔ. Ɔ jèɛɛ, ɔ sɛ́ɖɛ́ìn dyí ɓɛ́ ḿ ké kà ná ɓě jè hwìɖǐi poìn. Sepóɛɖé ḿ kè ɓě ɖǎ mana-ɖɛ̀ ɓɛ́ Gèɖèpɔ́ɔ̀ ɖǎà ḿ nyíɛɛ mú peɖeìn, kà ɓɛ́ ḿ nìà kpɔɖɔ ɖeín kàǔn wɛ̃, ɔ kè ti ɓɛ́ ḿ zaìn bɔ̃̌ nɔ̀mɔ̀ dyíinɔ̀ jè kɔ̃in, ké ḿ kùìn ɔ dyiɛ.

⁸ Gèɖèpɔ́ɔ̀ dyuò kà ɓěɛ̀ tó nyu ḿ mìɔ kɛ, ké ɖɛ nìà kɛ sɔ̀ìn ɖé Kɛ́ɖɛ́ì Jízɛ̀ mìɔùn mú.

⁹ Ɖɛ kɔ̃̀ jè ḿ ɓaà kɛɛ, ɔ kɛ. Ɔ mɔ̀, ɓɛ́ ɓěɛ̀ ɖɛ̀ɓɛ̀ǐn-ɖɛ̀ɓɛ̀ǐnɔ̀ kè ɓěɛ̀ ɖɛ-dyí-dyuò-dyuòɔ̀ ɔ kè ɓěɛ̀ ɖɛ séín múin-wɔ̃́-wɔ̃́ɔ̀ ké kɔ̃ kpáuń nì tee,

¹⁰ ɓɛ́ ɓě ké ɖɛ mɔ̀ ɖɛ nɔ̀mɔ̀ dyíin nyɛɛ dyí dyuòɛ̀ ɓɛ́ìn. Nìí, bɛ̃̌ kè kɛɛ ɖò se ɓě bũ̌ nìɛ̌ mu ɖé Kɛ́ɖɛ́ì nììn wéɔ̀ mú.

¹¹ Dyí-sɛ́ɖɛ́ìn-ɖɛ̀ ɓě nyu-nyu ɓɛ́ ɔ dyììn ɖé Jízɛ̀ Kɛ́ɖɛ́ì múɛɛ mu ɖé ɓě mú bãùn mìɔ, ɓɛ́ Gèɖèpɔ́ɔ̀ ké dĩ́ín-dĩ̀ìn kè ɓàìn-ɓàìn ɓéɖé.

Kɛ́ɖɛ́ì jè kpa ɖɛ ɖé Pɔ́ɔ̀ gbo

¹² Ḿ ɖíí ɓě, ḿ mɔ́ ɓɛ́ ɓě kéɛ dyuò kà ɖɛ ɓě ɓɛ́ wa ɖǎ ḿ gbo kpáa, wa ɖǎ bɔ̃̌ nɔ̀mɔ̀ dyíinɔ̀ gbo kpá jɛ́ɛ́, ɓɛ́ ɔ ké dyúa muɛ.

¹³ Sójà séín ɓě gmɔ̀à gɔ̌mànà vɛ̀nɛ̀ɔ̀ gbǒɔ̀ dyíɛ ɔ kè nyɔ tɔ̀ɔ̀ séín ɓě nìà nɔ̄ kɛɛ dyuò kà ḿ nì kpɔɖɔ ɖeín ɓó Kɛ́ɖɛ́ì jèɛ.

¹⁴ Ní kpɔɖɔ ɖeín kpá jèɔ̀ nyuɛ ké à ɖíí ɓěɔ̀ pàɖǎ dè Bounɓoɔ̀ hwòɖǒ kɔ̃ mìɔ, ké wa ɓéɖé gàa-hwòɖò-dyùà, ɓɛ́ wa ké se fɛ̃̀ìn, ɓɛ́ wa ké Gèɖèpɔ́ɔ̀-wùɖùɔ̀ cɛ̃.

¹⁵ Wa ɖíɛ́ ɓě nì Kɛ́ɖɛ́ì jè cɛ̃iń, sepóɛɖé wa kpá hwɛ̀nɛ̌ǐn, ké wa mɔ̀ zàǔn-zàǔn-nyɔ̀ ɓě jǎà. Kɛɛ wa ɖíɛ́ ɓě ɓéɖé hwòɖǒ nɔ̀mɔ̀ dyíin, ké wa cɛ̃ ɔ jè.

¹⁶ Ɖɛ̀ɓɛ̀ǐn-ɖɛ̀ɓɛ̀ǐn nyuɛ ké nyɔ ɓě nìà kɛ nyuɛ náa, sepóɛɖé wa dyuòɛ̀ dyí kà Gèɖèpɔ́ɔ̀ ɖǎ ḿ kũ̀à mɔ̀à bɔ̃̌ nɔ̀mɔ̀ dyíinɔ̀ kɔ̃in zaìn jèɛɛ ḿ nyíɛ.

¹⁷ Nyɔ tɔ̀ɔ̀ ɓěɔ̀ se Kɛ́ɖɛ́ì jèɔ̀ zio po ɖé hwòɖǒ wáɖáá mú, kɛɛ wa nyuɛ, sepóɛɖé wa vɔ̃ wa mìɔùn jè. Wa poìn hwìɖǐi kà ɓɛ́ wa mu ḿ bìì fũ̀à-fṹá-ɖɛ̀ pàɖǎ nyuùn kà ḿ nìà kpɔɖɔ ɖeín keɛ.

¹⁸ Ɖɛ́ ɔ kpáún wɛ̃́? Ɖɛ kɔ̃̀ jè wa cɛ̃à ɔ jèɛɛ, kɛbì ɔ mɛ jǔ jǎà, mɔ̀ɔ̀ ɔ mɛ se jǎà kɛɛ, wɛ̃́ɛ́ kɛɛ, nyɔǔn cɛ̃ Kɛ́ɖɛ́ì jè ɖé hwìè séín mú. Ké ḿ kpá múàǔn ɓóɛ jè. Ké ní mu múàǔn kpáùn kánáá pū,

¹⁹ sepóɛɖé ḿ dyuò kà ɓěɛ̀ ɓaà-wùɖùɔ̀ kè gbo-kpá-kpá ɓɛ́ ɔ sɔ̀àìn ɖé Jízɛ̀ Kɛ́ɖɛ́ì Zùùɔ̀ múɛɛ muɛ nyuùn ɓɛ́ ḿ ké póɛ.

²⁰ Sepóɛɖé ɖɛ kpɔ̃ ḿ hwòɖǒ mìɔ kɛ kè ɖɛ ḿ dè hwòɖǒ kɔ̃ɛɛ, ɔ mɔ̀, ɓɛ́ dɛ̃ ké se ḿ nyu ɖé ɖɛ ɖò mú, ɓɛ́ ḿ ké se fɛ̃̀ìn fɔɔ ɓó kàǔn ɔ kè ti séín ɓaɖa, ɓɛ́ Kɛ́ɖɛ́ì ké dya-dè-dè ɓéɖé dyììn ɖé ḿ mìɔùn mú, kɛbì ḿ mɛ cĩ́ mɔɔ ḿ mɛ mɛ́ɛ.

²¹ Sepóɛɖé ɖé ḿ gboɛɛ, ɔ nì kà ḿ kè Kɛ́ɖɛ́ìɛ̀ fɛ̀ɛ̀ɔ̀ gmaìnɔ̌ kà dyíɛ. Ké ḿ dyi mɛ́ín, nìí, ɔ mɔ̀ ní kpánáa.

²² Kɛɛ ɔ jǔ ké ní ɓóɖó-kpàà kɔ̃-sè-sèɔ̀ xwíníín dyi ɓɛ́ ḿ ké kũ̀à ɖò nyu, ɓɛ́ ḿ kéɛ pɛ́ɛ̀-ɖɛ̀ kɔ̃ún dyéín, nìí, ḿ se nyɔ ɓɛ́ ḿ ké gãa dyuò.

²³ Ɖɛ sɔ̃́ kpɔ̃ ḿ hwòɖǒ. Ḿ mɔ́ ɓɛ́ ní fɛ̀ɛ̀ɔ̀ ké ḿ mú sɔ̀, ɓɛ́ ḿ ké ɖé Kɛ́ɖɛ́ì gbo nì. Ɔ mɔ̀ ɖɛ zi dyíin nɔ̀mɔ̀ǔn wɛ̃.

²⁴ Kɛɛ ɓó ɓě jè, ɔ nɔ̀mɔ̀ dyíin mìɔ ɓɛ́ ní fɛ̀ɛ̀ɔ̀ ké ḿ mú nì.

²⁵ Ḿ dè ɖɛa hwòɖǒ kɔ̃. Ɔ jèɛɛ, ḿ dyuòɛ̀ dyí kà ní mu hwèɖèìn nyɛ. Ní mu nɔ̄ ɓě séín gbo nììn, ɓɛ́ ɓě ké dyúa mu, ɓɛ́ ɓě ké múà ɓéɖé ɖé hwìɖǐǐ-taɓa-ɖɛ̀ ɓěɔ̀ mú.

²⁶ Ɔ nì ná, ɓɛ́ ḿ dyi ɖé ɓě gbo dyi ɖe ní, ɓě ké ɖɛ kɔ̃̀ jè ɓě ké ɓɔ́ɖɔ́ mìɔ ɖé ɓěɛ̀ cĩ́-cĩ́ ɓɛ́ ɓě cĩ́à ɖé Kɛ́ɖɛ́ì Jízɛ̀ múɛɛ ɓéɖé ɓó ní jè.

²⁷ Ɖɛ dyúáɖò ɓě mɛ nyuɛɛ, ɔ mɔ̀, ɓě mɛ cĩ́ kà Kɛ́ɖɛ́ìɛ̀ bɔ̃̌ nɔ̀mɔ̀ dyíinɔ̀ nyuà cɛ̃ɛ kɛ, ɓɛ́ kɛbì ḿ mɛ dyi ɓɛ́ ḿ ké ɓě dyé, mɔɔ ɓɛ́ ḿ ké se dyiɛɛ, ḿ mɛ wɔ̃́ ɖé ɓě gbo bɔ̃̌ kà ɓɛ́ ɓě ɓéɖé hwòɖǒ dyúáɖò, ké ɓě nyànà dyi gãun-gãun wɛ̃, ɔ kè kà ɓɛ́ ɓě séín wɔ̃́, ké ɓě vɔ̃ ɓó bɔ̃̌ nɔ̀mɔ̀ dyíinɔ̀ hwìɖǐǐ-taɓa-ɖɛ̀ ɓěɔ̀ jèɛ.

²⁸ Ɓěǐn ɖá ɓɛ́ ɓě ké ɓěɛ̀ gbo-vɔ̃-nyɔ̀ ɓěɔ̀ dyi fɛ̃̀ìn fɔɔ. Ɖɛ nìà kɛ mu dyí-tɛ̀mɛ̀ìn-ɖɛ̀ ɖò jǔùn ɖé wa gbo, kà ɓɛ́ wa mu mú gbɔɔ̀ùn wɛ̃. Kɛɛ ɔ mɔ̀ dyí-tɛ̀mɛ̀ìn-ɖɛ̀ kà ɓɛ́ ɓě mɔ̀ùn mu póùn wɛ̃, ké Gèɖèpɔ́ɔ̀ mɔ̀ nyɔ muɛ nyuùn.

²⁹ Ɖɛ nɔ̀mɔ̀ dyíin ɓɛ́ ɓě ɖǎà dyé kɛɛ, ɔ se Kɛ́ɖɛ́ì hwìɖǐǐ taɓa jè ɖòùn, kɛɛ ɔ mɔ̀, ɓɛ́ ɓě ké gǎ dyé ɓó ɔ jè ɖekè.

³⁰ Ḿ kè ɓě nì to dyúáɖòɔ̀ vɔ̃uń. Ɔ mɔ̀ to ɓɛ́ ɓě dyé ma kà ḿ vɔ̃ɔ kĩ́ín, ké ɔ mɔ̀ nyɔ ḿ nìà vɔ̃uń ke kɔ̃̀ bɔ̃̌ ɓě wɔ̃́à kɛ.