Ɛsɔ́ɖɔ́ 1 - Ɓǎsɔ́ɔ̀ Báɓòɔ̀

Kã́á Àhàzúwàɖàà gmàà Vásítà po ɔ sóɖó

¹ Kã́á Àhàzúwàɖà kɔ̃̀ ma ɓóɖó ɓɛ́ ɔ ɓéɖé ma gbɛ̌ɛ̀ hɔ̃dɛ̀ɖɛ̀ ɖò kè kpáɖá-nyɔ sè mɛ̀nɛ̌ìn-sɔ̃́ kɛɛ wuɖuí. Ɓóɖó ɔ kɔ̃̀ ma kà wuɖuíɛɛ síìn ma ɖé Índìà-ɓòɖòɔ̀ kɔ̃, ké ɔ nyini ɖé Kúsì-ɓòɖòɔ̀ kɔ̃.

² Ti ɓɛ́ Àhàzúwàɖà nì ma ɖé ɔ zèèɔ̀ kɔ̃ ɖé ɓóɖóɔ̀ dìɓà-hwɔ̀ɖɔ̀ kɔ̃̀ nyɛ́nɛ́ mɔ̀ Súsà kɛ múɛɛ,

³ ɔ pa ma hwɔ vɛ̀nɛ̀ ɖò ɖé ɔ ɓóɖó-wuɖuí-kɔ̃̀-zɔ̃̀ɔ̀ tã nììnɔ̀ xwíníín ɓó ɔ gɔ̌mànà-nyɔ̀ vɛ̀nɛ̀ ɓěɔ̀ bìì. Ɔ hwɔìn kà Míì kè Pɔ́sìà-ɓòɖòɔ̀ cu-kpà ɓě kè sójà-nàìn-nyɔ̀ ɓě ɔ kè ɓóɖóɔ̀ gbɛ̌ɛ̀ ɖò-ɖò ɓěɔ̀ wuɖuí-kɔ̃̀-nyɔ̀ ɓě.

⁴ Kã́áɔ̀ kè ɔ nyɔ ɓěɔ̀ gã̀ ma hwɔɔ̀ pauń dyi tee ɓó dɛ̀nɛ̀ mɛ̀nɛ̌ìn-ɖò xwíníín. Hwɔɔ̀ ɓá ɔ kã́á-ɓòɖòɔ̀ dĩ́ín-dĩ̀ìnɔ̀ kè ɔ kɔ́mɔ́ séínɔ̀ nyɔǔn dyí tɛ̀mɛ̀ìn jè dyí.

⁵ Sɔ̀ìn ɓóɛ gboɛɛ, kã́áɔ̀ pa ma wé-mɛ̀nɛ̌ìn-sɔ̃́-hwɔ̀ ɖò ɖe ɖé kɔ̃̀pã́ùnɔ̀ kɔ̃, dɛ̀ ɓɛ́ ɔ ɓáá-ɖɛ̀ ɓě nì ma kɛ. Ɔ ɖá ma dyú mɛ́nɛ́ɛ́ kè vɛ̀nɛ̀ séín nì ma ɖé Súsà-hwɔ̀ɖɔ̀ɔ̀ múɛɛ hwɔɔ̀ kɔ̃.

⁶ Faà ɓɛ́ wa cɛ̃ ma ɖé kɔ̃̀pã́ùnɔ̀ kɔ̃ɛɛ mɔ̀ ma ɖénì-ɖɔ̀ ɓɛ́ ɔ ɓéɖé dyéɖé púú kè dyéɖé ɖàɓàìn kpèɛ̀ kɛ. Ɖúú ɓɛ́ wa sã̀ìn ma ɖɔ ɓě ɓá ma kà dyiíɛɛ mɔ̀ ma ɖénì-dyèě ɖàɓàìn kpèɛ̀ nɔ̀mɔ̀ dyíin, ké wa ɓáa ma séɓàɖà-ɖɛ̀ hìɖìì ɓě dyí, ké séɓàɖà-ɖɛ̀ hìɖìì ɓěɔ̀ ɓá ma sɔ́ɔ́-púú-kpa-ɖɛ-cùè-ɓò ɓě dyí. Kɔ̃-kò-ɖɛ̀ ɓě ɓɛ́ wa nyùìn góò kè séɓàɖà kɛɛ deìn ma ɖé kɔ̃̀pã́ùnɔ̀ kɔ̃ dyi. Wa dè ma ɖé sɔ́ɔ́ kpa ɖɛ ɓéɖé dyéɖé kò-kò ɓěɛɛ ɓíɖíi dyi.

⁷ Wa dyi ma nyɔ ɓěɔ̀ wã́ìn dyíɛ mu ní, wa nyíɛ̀n ma wa góò-kòpò mú. Kópò ɓěɔ̀ ɓéɖé ma kòɛ̌n ɖò-ɖò séín. Ké wã́ìn ɓɛ́ kã́áɔ̀ tò ma kɛɛ zi ma dyí vòɛ̌n mìɔ cá.

⁸ Nyɔ séín ná ma wã́ìn jĩ̀ kà ɔ mɔ́ náa dyiɛ, sepóɛɖé kã́áɔ̀ cɛ̃ɛ ma ɔ gbo-nì-nyɔ̀ séín ɓěɔ̀ gbo, ɓɛ́ wa ké wã́ìn jĩ̀ kà ɓɛ́ nyɔ ɖò-ɖò séín mɔ́ náa dyiɛɛ ɔ nyí.

⁹ Ɓó ti dyúáɖòɔ̀ xwíníín nyɛɛ, Kã́á Àhàzúwàɖàà gmàà kɔ̃̀ nyɛ́nɛ́ mɔ̀ Vásítà kɛɛ mɔ̀ùn nì ma hwɔ ɖò pauń ɖé kã́áɔ̀ gbǒɔ̀ dya ɓó màa ɓěɔ̀ mɔ̀ùn bìì ɖekè.

¹⁰ Ɓó kã́áɔ̀ nììn hwɔɔ̀ wé mɛ̀nɛ̌ìn-sɔ̃́ nììnɔ̀ ɓaɖaa, ti ɓɛ́ kã́áɔ̀ ɖǎ ma ná, ké náá-ɖɛ̀ɔ̀ ɖǎ ma ɔ nyuɛɛ, ɔ ɖá ma ɔ gbo-nì-nyɔ̀ vɛ̀nɛ̀ mɛ̀nɛ̌ìn-sɔ̃́ ɓě ɓɛ́ wa mɔ̀ ma ɔ ɖɛ ɓě gbo-gmɔ̀-nyɔ̀ ɓěɛɛ ní. Gàa ɓěɔ̀ nyɛ́nɛ́ mɔ̀ Mɛ̀húmɔ̀ kè Bìzífà kè Hàbónà kè Bìgífà kè Àɓáfà kè Zéfà ɔ kè Kákásì.

¹¹ Ké kã́áɔ̀ ɖoɓo ma wa, ɓɛ́ wa ké ɔ gmàà mɔ̀à Vásítà kɛɛ ɔ gbo dyà. Ɔ ɖá màaɔ̀ kã́á-gbàǎɔ̀ mɛ gã̀ ma ɔ dúi, ɓɛ́ màaɔ̀ ké ɔ ɖá-wùɖùɔ̀ gbo dyi, nìí, ɓɛ́ ɔ ké kà ɔ gmààɔ̀ nyu dyíin nɔ̀mɔ̀ɔ̀ kɛɛ ɔ gɔ̌mànà-nyɔ̀ ɓěɔ̀ kè nyɔ tɔ̀ɔ̀ ɓěɔ̀ dyí tɛ̀mɛ̀ìn, sepóɛɖé màaɔ̀ nɔ̀mɔ̀ ma dya gmɔ̀ɔ̀ mìɔ.

¹² Kɛɛ ti ɓɛ́ kã́áɔ̀ gbo-nì-nyɔ̀ ɓěɔ̀ dyà ma cuò-wùɖùɔ̀ kɛɛ, Vásítà mɔ̀à kã́áɔ̀ gmààɔ̀ kɛɛ nɔ́ɔ̀ ma, ké ɔ se ma kã́áɔ̀ ɖá-wùɖùɔ̀ gbo mu. Púɛɛ, kã́áɔ̀ kpá ma dyoɖoún mìɔ.

¹³ Ké ɔ diè ma hwòɖǒ-fɔ̀nɔ̀-nyɔ̀ ɓě ɓɛ́ wa dyuò ma gmaɔ̀ mìɔ kɛɛ dyi ɓá ɖɛ ɔ gmààɔ̀ ɖǎà nyuɛɛ jè dyí. Ɖɛ nìà kɛ mɔ̀ ma kã́áɔ̀ kpeɖe kà kàmàà-ɖɛ̀ ɖò dyi kpá ní, kã́áɔ̀ diè hwòɖǒ-fɔ̀nɔ̀-nyɔ̀ ɓě ɓɛ́ wa dyuò gmaɔ̀ kɛɛ dyi ɓá ɖɛ ɔ ké nyuɛɛ jè dyíɛ.

¹⁴ Nyɔ ɓěɔ̀ hwɔìn kà Kàsɛ́nà kè Séfà kè Ámàfà kè Tásìà kè Mɛ́wɛ̀ɖɛ̀ kè Màsɛ́nà ɔ kè Mɛ̀múkàùn. Gàa mɛ̀nɛ̌ìn-sɔ̃́ ɓěa mɔ̀ Pɔ́sìà-nyɔ̀ ɓěɔ̀ kè Míì-nyɔ̀ ɓěɔ̀ gɔ̌mànà-nyɔ̀ vɛ̀nɛ̀ ɓě ɓɛ́ wa xwɛ̃́ìn kã́áɔ̀ bũ̌in, ké wa mɔ̀ nyɔ ɓɛ́ìn kã́áɔ̀ dyéɛ kpɛ́-kpɛ́ kɛ.

¹⁵ Ké kã́áɔ̀ diè ma wa dyi, ké ɔ ɖá, “Ɖɛ́ gmaɔ̀ ɖá à mɛ nyu Kã́á-gmàà Vásítà bũ̌ ɓó ɖɛ ɔ ɖǎà nyuɛɛ jè kɛ́? Dyéɛ, mɔ̄ Kã́á Àhàzúwàɖà, ḿ ɖoɓo ma ní kíá ɓěɔ̀ ɖé ɔ gbo, ké ḿ dèìn wa wuɖu ɖò wĩín. Kɛɛ ɔ nɔ́ɔ̀ ké ɔ se wuɖuɔ̀ nyu.”

¹⁶ Hwɛ̀ ké Mɛ̀múkàùn cɛ̃ ma ɖɛ nìà kɛ ɓó kã́áɔ̀ kè ɔ gɔ̌mànà-nyɔ̀ ɓěɔ̀ dyúa, ké ɔ ɖá, “Ɖɛ gbà ɓɛ́ kã́áɔ̀ gmàà Vásítà nyuà kɛɛ, ɔ seɛ kã́áɔ̀ ɖòùn bũ̌ nyu, kɛɛ ɔ nyuɛ gɔ̌mànà-nyɔ̀ séín ɓěɔ̀ kè Àhàzúwàɖàà kã́á-ɓòɖò gànáɔ̀ nyɔ séín bũ̌ ɖekè.

¹⁷ Sepóɛɖé màa séín nì ɓóɖó nìà kɛ múɛɛ mu kpeɖe nì kà ɓɛ́ kã́á-gmààɔ̀ nyuà kɛɛ jè wɔ̃́ùn, ké ɔ muɛ nyuùn ɓɛ́ wa ké waà dyú-ɓǎ ɓěɔ̀ wuɖu dyií dyi po. Wa muɛ cɛ̃ìn, ɓɛ́ wa ké níiń, ‘Dyéɛ, Kã́á Àhàzúwàɖà ɖá ɔ gmàà Vásítà, ké ɔ nɔ́ɔ̀ ɔ ɖá-wùɖùɔ̀ gbo.’

¹⁸ Pɔ́sìà kè Míì-màà séín ɓɛ́ wa mɔ̀ gɔ̌mànà-nyɔ̀ ɓěɔ̀ gmàà ɓě ɓɛ́ wa ɖǎ ɖɛ nìà kɛ jè wɔ̃́ɛɛ, wa mu ɖɛ dyúáɖòɔ̀ gɔ̌mànà-nyɔ̀ séín ɓěɔ̀ bũ̌ nyuɛ gbɔ dèìn ɓó zɛ̃̌ɛ̀ ɖekè. Ɔ dyi ná nìǐn, nìí, se-kpéín-dyéɔ̀ mu kpéín ɓúáùn mìɔ, ké ɖɛ séín mu kɔ̃in cáùn, ké ɔ se sèìn-naín ɖò kɔ̃̀ɔ̌ mu.

¹⁹ “Ɔ jèɛɛ, kã́áɔ̀ hwòɖǒ mɛ wɔ̃́ ɓɛ́ ɔ ké gma ɖò po. Wa mɛ céè gmaɔ̀ dyììn ɖé Pɔ́sìà kè Míì-nyɔ̀ ɓěɔ̀ nììn gma mú, ɓɛ́ nyɔ ɖò ké seɛ dyí zàìn ɓɛ́ìn. Gmaɔ̀ mɛ mɔ̀, Vásítà mɛ ɓɔ́ ɓó Kã́á Àhàzúwàɖà dyúa dyiɛ ɖe fɔɔ cá. Ké kã́áɔ̀ mɛ nyí ɔ nììn pá nyuà ɔ kã́á-gmàà múɛɛ nyɔ kà kò ɖò ɓɛ́ ɔ kpa ɖɛ ké ɔ zi ɔ dyíɛ.

²⁰ Ɔ jǔ ké gma ɓɛ́ kã́áɔ̀ muà poùn wɛ̃ɛ dyi ɔ ɓóɖó vɛ̀nɛ̀ɔ̀ dà séín dyi ɓeìn ní, nìí, màa séín mu waà dyú-ɓǎ kpéín dyéìn, kɛbì ɔ dyú-ɓǎɔ̀ mɛ mɔ̀ nyɔ kpa ɖɛ mɔɔ kɛbì ɔ mɛ se ɖɛ kpa kɛ.”

²¹ Ɖɛ ɓɛ́ Mɛ̀múkàùn cɛ̃ ma kà kɛɛ dè ma kã́áɔ̀ kè ɔ gɔ̌mànà-nyɔ̀ ɓěɔ̀ hwìɖǐi. Ɔ jèɛɛ, kã́áɔ̀ nyu ɖɛ ɔ cɛ̃ ma kà kɛ.

²² Ké kã́áɔ̀ toìn ma céè-ɖɛ̀ dyi ɖé ɔ ɓóɖóɔ̀ gbɛ̌ɛ̀ séín mú. Wa céè ma céè-ɖɛ̀ ɓěɔ̀ ɖé wuɖu-dù kò-kò ɓɛ́ nyɔ ɓěɔ̀ po ma kɛɛ mú. Céè-ɖɛ̀ɔ̀ wuɖuɔ̀ mɔ̀ kà ɓɛ́ gàa ɖò-ɖò séín mɛ kɔ̃̀ ɔ mìɔùn nììn taà wuɖuí, ké ɔ kɔ̃̀ wuɖu mɛ sè ɖɛ kɔ̃ɛ.