Dànyá 1 - Ɓǎsɔ́ɔ̀ Báɓòɔ̀

DÀNYÁ KÈ Ɔ ƁǍTO ƁĚƆ̀ ( 1:1–6:28 ) Gàa-dyù gmɔ̀ ɓěɔ̀ nì ɖé Kã́á Nɛ̀ɓùkànɛ́zàà gbǒɔ̀ dya

¹ Ɖé Jɛ̀hódyàkĩ̀ìn nììn Júɖà-ɓòɖòɔ̀ wuɖuí-kɔ̃̀-zɔ̃̀ɔ̀ tã nììnɔ̀ xwíníín nyɛɛ, Nɛ̀ɓùkànɛ́zà ɓɛ́ ɔ mɔ̀ ma Báɓèɖɔ́ùn-ɓòɖòɔ̀ kã́á kɛ kè ɔ sójà ɓěɔ̀ dyi ma, ké wa po ma Jùɖúsɛ̀ɖɛ̀ìn-hwɔ̀ɖɔ̀ɔ̀ to kɔ̃, ké wa gbǎìn ma hwɔɖɔɔ̀ wɔ̃.

² Ké Ɖɛɓíɔ́ po ma Jɛ̀hódyàkĩ̀ìn mɔ̀à Júɖà-ɓòɖòɔ̀ kã́áɔ̀ kɛɛ Nɛ̀ɓùkànɛ́zà xwaún dyi. Ké Nɛ̀ɓùkànɛ́zà kpa ma Jɛ̀hódyàkĩ̀ìn kè Júɖà-nyɔ̀ ɖíɛ́ ɓě ɔ kè ɖɛ ɓě sɔ̀ ma ɖé Gèɖèpɔ́ɔ̀ gbǒɔ̀ múɛɛ ɖíɛ́ ɓě. Ɔ kpa ma ɖɛ ɓě sɔ̀à ɖé Gèɖèpɔ́ɔ̀ gbǒɔ̀ múɛ, ké ɔ po ma wa ɖé ɔ nììn gèɖèpɔ́ɔ̀ gbǒ nì ɖé Báɓèɖɔ́ùn-ɓòɖòɔ̀ kɔ̃ɛɛ ɖɛín-dyi-dèìn-naín.

³ Sɔ̀ìn ɓóɛ gboɛɛ, Kã́á Nɛ̀ɓùkànɛ́zà cɛ̃ɛ ma Ápànà ɓɛ́ ɔ mɔ̀ ma gɔ̌mànà-nyɔ̀ ɓěɔ̀ nyɔ vɛ̀nɛ̀ kɛɛ gbo, ɓɛ́ ɔ ké Éézùɖùɛ̀-nyɔ̀ ɓě ɓɛ́ ɔ kpɔ̃à toɔ̀ gboɛɛ gàa-dyù gmɔ̀ ɖíɛ́ ɓě ɔ gbo dyà. Nyɔ ɓě ɔ kéà dyàa mɛ mɔ̀ nyɔ ɓě ɓɛ́ wa sɔ̀ ɖé kã́á gbǒ-xwíníín mú mɔɔ ɓɛ́ wa sɔ̀ gbǒ-xwíníín kpa ɖɛ ɓě múɛ.

⁴ Wa ɓéɖé wa ké gàa-dyù gmɔ̀ wóɖóún-wóɖóún kɔ̃̀ kpóɖó-dyùà se kɛɛ ɖò ɓéɖé, ɓɛ́ wa mɔ̀ dyíin-nɔ̀mɔ̀-nyɔ̀ ɓě, ké wa fɔ̀nɔ̀ hwòɖǒ ɓó ɖɛ kò-kò ɓě cɛ̃́ jèɛɛ jǔ. Wa mɛ mɔ̀ nyɔ ɓě kɔ̃̀ fɔ̀nɔ̀-hwòɖǒ fɛ̃́ìn xwa ɓó ɖɛ múin wɔ̃́ jèɛ, ɓɛ́ wa ké kpé ɓɛ́ìn ɓó kã́á-gbò mú kũ̀à nyu jè. Ápànà ɖǎ wa gã ní, ɔ mɛ tɛ̀mɛ̀ìn wa ɓóɖóɔ̀ céè-ɖɛ̀.

⁵ Ké kã́áɔ̀ ɖoɓo ɖii-ɖɛ̀ ɓɛ́ ɔ ɖiɛ kè wã́ìn ɓɛ́ ɔ náa ɖò wa gbo ɓó wé séín. Ápànà ɓéɖé ɓɛ́ ɔ ké ma gàa-dyù gmɔ̀ ɓěɔ̀ ɖɛ tɛ̀mɛ̀ìn ɓó zɔ̃ tã xwíníín, nìí, sɔ̀ìn ɓóɛɛ, wa ké ma kã́áɔ̀ kũ̀à ɓě nyu kpàǐ ɖú.

⁶ Gàa-dyù gmɔ̀ ɓěɔ̀ ɖíɛ́ ɓě sɔ̀ ma ɖé Júɖà-ɓòɖòɔ̀ kɔ̃. Wa mɔ̀ Dànyá kè Hánàníà kè Mìsáè ɔ kè Ázàwíɖíà.

⁷ Ké Ápànà mɔ̀à gɔ̌mànà-nyɔ̀ ɓěɔ̀ nyɔ vɛ̀nɛ̀ɔ̀ kɛɛ nyí ma wa nyɛ́nɛ́ ɖìè ɓě. Ɔ jǔìn ma Dànyá Bɛ́tèsíázɔ̀-nyɛ̀nɛ̀, ké ɔ jǔìn ma Hánàníà Síáwàɖà-nyɛ̀nɛ̀, ké ɔ jǔìn ma Mìsáè Mísìà-nyɛ̀nɛ̀, ké ɔ jǔìn ma Ázàwíɖíà Àbɛ́nɛ́gò-nyɛ̀nɛ̀.

⁸ Kɛɛ Dànyá hwòɖǒ poɛ ma gbɔ kà ɓɛ́ ɔ se ma nàmàǔn nyuɛ mɔ́ dyììn ɖé kã́áɔ̀ ɖii-ɖɛ̀ɔ̀ ɖi-ɖi kè ɔ wã́ìnɔ̀ ná-ná múɛ. Ɔ jèɛɛ, ɔ ɓaà ma Ápànà mɔ̀à gɔ̌mànà-nyɔ̀ ɓěɔ̀ nyɔ vɛ̀nɛ̀ɔ̀ kɛ, ɓɛ́ wa ké se ma kã́áɔ̀ ɖii-ɖɛ̀ɔ̀ ɖò ɖi, ɓɛ́ dyììn ɖéɛ múɛɛ, wa ní kɔ̃̀ ɖà wa mìɔùn se-mú-hwɛ̀-nyɔ̀ mú nyu.

⁹ Ké Gèɖèpɔ́ɔ̀ nyuɛ ma ɓɛ́ Ápànàà hwòɖǒ ké ma wɔ̃́ ɓɛ́ ɔ ké ma Dànyá wìǐn dyé.

¹⁰ Kɛɛ Ápànà cɛ̃ɛ ma Dànyá gbo, ké ɔ ɖá, “Ḿ fɛ̃̀ìn ní gbo-nì-ɓǎ mɔ̀à kã́áɔ̀ kɛɛ ní, sepóɛɖé ɔ mɔ̀ nyɔ tò ɓěɛ̀ ɖii-ɖɛ̀ kè náá-ɖɛ̀ɔ̀. Ɔ jǔ ké ɔ dyi ɓě sɔɔ̀ dyé ɖé gàa-dyù gmɔ̀ tɔ̀ɔ̀ ɓěɔ̀ hwìɛ̀ ní, ɔ mu ḿ dúí zàùn ɓó ɓě jè.”

¹¹ Hwɛ̀ ké Dànyá cɛ̃ɛ ma waà gbo-gmɔ̀-nyɔ̀ ɓɛ́ Ápànà po ma kà ɔ kè Hánàníà kè Mìsáè ɔ kè Ázàwíɖíà kɔ̃in nyɛɛ gbo, ké ɔ ɖá,

¹² “Ní ɓaà m̀ ní, dɔ̃̌ à mɔ̀à nì gbo-nì-nyɔ̀ ɓěɛ̀ kɛɛ mú ɓó wé ɓaɖa-bùè xwíníín. Ɓɔ́ à ɖii-ɖɛ̀ kà kò ɖò nyíɛ, ɔ sèìn vàǎ kè náá-nì ɖòùn pū.

¹³ Ɔ jǔ ké wé ɓaɖa-bùèɔ̀ ɖǎ zi ní, m̀ ké à kè gàa-dyù gmɔ̀ tɔ̀ɔ̀ ɓě ɓɛ́ wa ɖià ɖii-ɖɛ̀ sɔ̀à ɖé kã́áɔ̀ téɓèɖèɔ̀ gbɔɛɛ dyé, ɓɛ́ m̀ ké ɖɛ nì mu nyuùn ɓá à jè dyíɛɛ dyí sɔ́.”

¹⁴ Ké waà gbo-gmɔ̀-nyɔ̀ɔ̀ wɔ̃́ ma, ké ɔ dɔ̃̌ ma wa mú ɓó wé ɓaɖa-bùè xwíníín.

¹⁵ Ti ɓɛ́ wé ɓaɖa-bùè ɖǎ ma ziɛɛ, waà gbo-gmɔ̀-nyɔ̀ɔ̀ dyéɛ ma kà ɓɛ́ waà dyɔɔ̀ nɔ̀mɔ̀ ma dyíin ké wa ɓúá ma mìɔ ké ɔ zi ma gàa-dyù gmɔ̀ tɔ̀ɔ̀ ɓě ɖi ma kà ɖii-ɖɛ̀ sɔ̀à ɖé kã́áɔ̀ téɓèɖèɔ̀ gbɔɛɛ dyíɛ.

¹⁶ Ɔ jèɛɛ, sɔ̀ìn ɓóɛ gboɛɛ, waà gbo-gmɔ̀-nyɔ̀ɔ̀ wɔ̃́ ké Dànyá kè ɔ ɓǎto ɓěɔ̀ ɖi ma vàǎ tee. Ɔ se ma wa ɖii-ɖɛ̀ kè wã́ìn sɔ̀à ɖé kã́áɔ̀ téɓèɖèɔ̀ gbɔɛɛ nyí.

¹⁷ Ké Gèɖèpɔ́ɔ̀ nyí ma gàa-dyù gmɔ̀ hĩinyɛ ɓěɛ̀ ɖɛ-múin-wɔ̃́-wɔ̃́ ɓá fɔ̀nɔ̀-hwòɖǒ-ɖɛ̀ séín kè céè-ɖɛ̀-dù kò-kò séín dyuò jè dyí. Ké Dànyá wɔ̃́ ma dyí-tɛ̀mɛ̀ìn-ɖɛ̀ kè dya-dyèɖè séín múin.

¹⁸ Ti ɓɛ́ zɔ̃ tã ɓɛ́ Kã́á Nɛ̀ɓùkànɛ́zà ɖá ma kà nyɛ́nɛ́ kɔ̃̀ mánáín ɓɛ́ gàa-dyù gmɔ̀ ɓěɔ̀ ké ma kà ɓó ɔ dyúa dyiɛɛ nyini ma ɓóɛɛ, Ápànà mɔ̀à gɔ̌mànà-nyɔ̀ ɓěɔ̀ nyɔ vɛ̀nɛ̀ɔ̀ kɛɛ dyà ma wa, ké ɔ zàìn ma wa kã́áɔ̀ xwáɖáún.

¹⁹ Ké wa kè kã́áɔ̀ dè ma dɔ́ɔ́. Ké kã́áɔ̀ dyéɛ ma kà nyɔ ɖò se ma ɖé gàa-dyù gmɔ̀ séín ɓěɔ̀ hwìɛ̀ nì, ɓɛ́ ɔ ké ma hwòɖǒ fɔ̀nɔ̀ ɓɛ́ ɔ ké ma Dànyá kè Hánàníà kè Mìsáè ɔ kè Ázàwíɖíà dyɛ̀ìn nyɛ. Ɔ jèɛɛ, kã́áɔ̀ gã ma wa, ɓɛ́ wa ké ɔ bìì kũ̀à nyu.

²⁰ Ɖɛ ɓě ɓá fɔ̀nɔ̀-hwòɖǒ-ɖɛ̀ kò-kò séín ɓɛ́ kã́áɔ̀ diè ma wa dyiɛɛ jè dyíɛɛ, kã́áɔ̀ dyéɛ kà wa fɔ̀nɔ̀ ma hwòɖǒ mìɔ cá ké wa zi ma zɛ̃̀ìn-ɖɛ̀-nyu-nyɔ̀ kè sɛ̀ɛ̀-po-nyɔ̀ séín nì ma ɖé ɔ kã́á-ɓòɖò gànáɔ̀ múɛɛ dyí vɛ̃in-vɛ̃in nyɛ.

²¹ Ké Dànyá gã̀ ma kũ̀àɔ̀ nyuɛń dyi tee, ké ɔ dyɛ̀ìn ma Sáwàɖà nììn ɓóɖó-wuɖuí-kɔ̃̀-tìɔ̀.