Emɔ́ 1 - Ɓǎsɔ́ɔ̀ Báɓòɔ̀

¹ Emɔ́ cɛ̃ ma wuɖu ɓě nìà kɛ. Ɔ mɔ̀ ɖɛ ɓě ɔ dyé ma ɓá Éézùɖùɛ̀-ɓòɖòɔ̀ jè dyíɛ. Emɔ́ mɔ̀ ma ɓáɖáá-dyí-gmɔ̀-nyɔ̀ ɓě nì ma ɖé Tèkóà-hwɔ̀ɖɔ̀ɔ̀ múɛɛ ɖò. Ɔ cɛ̃ ma ɖɛ ɓěɛ̀, ké zɔ̃ sɔ̃́ zi ma hwɛ̀ ké ɓóɖó-kpàà túò ma kà dyi, ti ɓɛ́ Dyùzíà mɔ̀ ma kã́á ɓó Júɖà-ɓòɖòɔ̀ bìì, ké Jɛ́ɖòbóàùn mɔ̀à Jɛ̀hóàà dyú-gààɔ̀ kɛɛ mɔ̀ ma kã́á ɓó Éézùɖùɛ̀-ɓòɖòɔ̀ bììɛ.

² Ɖɛ ɓɛ́ ɔ cɛ̃ ma kàa, ɔ kɛà kɛ̀. Bounɓoɔ̀ mu kuɖuùn sɔ̀ìn ɖé Zádyɔún-hwɔ̀ɖɔ̀ɔ̀ mú kà ganìǎ kuɖuà kɛ. Ɔ mu mú pánáùn sɔ̀ìn ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ɔ ɖǎ ná nìǐn, nìí, pìǐ nì ɖé ɓáɖáá ɓěɔ̀ dyi-ɖi-naín ɓěɔ̀ kɛɛ mu dyɛìn. Ké ɖɛ séín nì ɖé Kámɛ̀-tòɖòɔ̀ dyaa mu dyɛìn ɖekè.

Gǎ mu ɓóɖó ɓě kè Éézùɖùɛ̀-ɓòɖòɔ̀ deìn bũ̌ɛɛ kɔ̃ dyiìn nyɛ

³ Ɖɛ Bounɓoɔ̀ cɛ̃ɛ kɛà kɛ̀. Ɔ ɖá, “Dìmásìkɔ̀-nyɔ̀ ɓěɔ̀ nyu nàmàǔn deìn kɔ̃in. Ɔ jèɛɛ, ní mu wa gǎ kɔ̃ tòùn wɛ̃́ɛ́. Nàmàǔnɔ̀ vɛ̀nɛ̀ mɔ̀, wa ɖáɓáìn ma Gíɖèà-nyɔ̀ ɓěɔ̀ ɖɛ-mú-nya-ɖɛ̀ ɓɛ́ ɔ ɓéɖé nɛɛ̀-kpà-nyɛ̀nɛ̀ kɛɛ dyí.

⁴ Ɔ jèɛɛ, ní mu nyɛ tòùn, ɓɛ́ nyɛɔ̀ ké Kã́á Hàzáèɛ̀ gbǒɔ̀ kè Kã́á Bɛ̃̀háɖàà to-pèɖèìn-naín ɓěɔ̀ fɔ̃.

⁵ Ní mu Dìmásìkɔ̀-hwɔ̀ɖɔ̀ɔ̀ wáɖáùn. Ké ní mu kã́á nìà ɖé Ávɛ̃̀ Bɔɔ-kpàɔ̀ kɔ̃ɛɛ mú gbɔɔ̀ùn. Ké ní mu nyɔ ɓɛ́ nyɔ-wuɖuí-kɔ̃̀-kpèɔ̀ nì xwaún ɖé Bɛ̀-Ídɛ̃̀ìn-pàɔ̀ múɛɛ mú gbɔɔ̀ùn ɖekè. Nìí, wa mu Síwíɖíà-nyɔ̀ ɓěɔ̀ to-xwàɖàǔn tòùn ɖé Kíì-ɓòɖòɔ̀ kɔ̃. Mɔ̄ Bounɓoɔ̀ mɔ̀ nyɔ cɛ̃à kɛ̀.”

⁶ Hwɛ̀ ké Bounɓoɔ̀ cɛ̃ɛ ɖe, ké ɔ ɖá, “Gázà-nyɔ̀ ɓěɔ̀ nyu nàmàǔn deìn kɔ̃in. Ɔ jèɛɛ, ní mu wa gǎ kɔ̃ tòùn wɛ̃́ɛ́. Nàmàǔnɔ̀ vɛ̀nɛ̀ mɔ̀, wa ɖú ma hwɔɖɔ-dù gàná ɓě dyí, ké wa pèɖèìn wa Íɖɔ̀ùn-nyɔ̀ ɓěɔ̀ gbo, ɓɛ́ wa ké gǐì jǔ.

⁷ Ɔ jèɛɛ, ní mu Gázà-hwɔ̀ɖɔ̀ɔ̀ nyɛ kɔ̃ tòùn, ɓɛ́ nyɛɔ̀ kéɛ to-pèɖèìn-naín ɓěɔ̀ fɔ̃.

⁸ Ké ní mu kã́á nìà ɖé Áɖò-hwɔ̀ɖɔ̀ɔ̀ múɛ kè nyɔ ɓɛ́ nyɔ-wuɖuí-kɔ̃̀-kpèɔ̀ nì xwaún ɖé Àkéɖɔ̀ùn-hwɔ̀ɖɔ̀ɔ̀ múɛɛ mú gbɔɔ̀ùn. Ní mu Ɛ́kɔ̀nɔ̀-hwɔ̀ɖɔ̀ɔ̀ gǎ kɔ̃ tòùn tee, ɓɛ́ Féɖésìà-nyɔ̀ ɓěɔ̀ nyɔ ɓě sè ɓóɛɛ ké mɛ́ɛ hwɔ hwɛ̀. Mɔ̄ Bounɓo Ɖɛɓíɔ́ mɔ̀ nyɔ cɛ̃à kɛ̀.”

⁹ Hwɛ̀ ké Bounɓoɔ̀ cɛ̃ɛ ɖe, ké ɔ ɖá, “Nyɔ ɓě nì ɖé Táà-hwɔ̀ɖɔ̀ɔ̀ múɛɛ nyu nàmàǔn deìn kɔ̃in. Ɔ jèɛɛ, ní mu wa gǎ kɔ̃ tòùn wɛ̃́ɛ́. Nàmàǔnɔ̀ vɛ̀nɛ̀ mɔ̀, wa ɖú ma ɓóɖó-dù gàná ɖò dyí, ké wa pèɖèìn wa Íɖɔ̀ùn-nyɔ̀ ɓěɔ̀ gbo, ɓɛ́ wa ké gǐì jǔ. Wa se wuɖu ɓɛ́ wa kè wa ɖǎ ma kà ɓíín po ɓá ɓǎto jǔ jè dyíɛɛ jè hwìɖǐi poìn.

¹⁰ Ɔ jèɛɛ, ní mu Táà-hwɔ̀ɖɔ̀ɔ̀ nyɛ kɔ̃ tòùn, ɓɛ́ nyɛɔ̀ kéɛ to-pèɖèìn-naín ɓěɔ̀ fɔ̃.”

¹¹ Hwɛ̀ ké Bounɓoɔ̀ cɛ̃ɛ ɖe, ké ɔ ɖá, “Íɖɔ̀ùn-ɓòɖòɔ̀ nyu nàmàǔn deìn kɔ̃in. Ɔ jèɛɛ, ní mu ɔ gǎ kɔ̃ tòùn wɛ̃́ɛ́. Nàmàǔnɔ̀ vɛ̀nɛ̀ mɔ̀, ɔ kpáìn ma ɔ ɖíí-gààɔ̀ gàsíà kíɖíí, ké ɔ se ɔ wìǐn dyé fɔɔ cá, sepóɛɖé ɔ dyoɖo-hwòɖòɔ̀ se wáɖá-wáɖá kɔ̃̀ fɔɔ cá.

¹² Ɔ jèɛɛ, ní mu Témàùn-hwɔ̀ɖɔ̀ɔ̀ nyɛ kɔ̃ tòùn, ɓɛ́ nyɛɔ̀ ké Bɔ́zàɖà-hwɔ̀ɖɔ̀ɔ̀ to-pèɖèìn-naín ɓěɔ̀ fɔ̃ ɖekè.”

¹³ Hwɛ̀ ké Bounɓoɔ̀ cɛ̃ɛ ɖe, ké ɔ ɖá, “Ámànà-nyɔ̀ ɓěɔ̀ nyu nàmàǔn deìn kɔ̃in. Ɔ jèɛɛ, ní mu wa gǎ kɔ̃ tòùn wɛ̃́ɛ́. Nàmàǔnɔ̀ vɛ̀nɛ̀ mɔ̀, ti ɓɛ́ wa nì ma Gíɖèà-ɓòɖòɔ̀ gbo vɔ̃uń, ɓɛ́ wa nììn ɓóɖóɔ̀ ké ma kɔ̃ kpá jèɛɛ, wa ká ma Gíɖèà-màà ɓě nì zùù kɔ̃ɛɛ ní.

¹⁴ Ɔ jèɛɛ, ní mu Wáɖáɓà-hwɔ̀ɖɔ̀ɔ̀ nyɛ kɔ̃ tòùn, ɓɛ́ nyɛɔ̀ kéɛ to-pèɖèìn-naín ɓěɔ̀ fɔ̃ ɓó to-tìɔ̀ mú. Ɓó tia ɓaɖaa, wa mu toɔ̀ jĩ̌ wɔ̃́ùn, ké dìì ku wɔ̃ mu dyiìn ɖekè.

¹⁵ Nìí, wa mu Ámànà-kã̀ǎɔ̀ kè ɔ gɔ̌mànà-nyɔ̀ séín ɓěɔ̀ to-xwàɖàǔn kpaùn. Mɔ̄ Bounɓoɔ̀ mɔ̀ nyɔ cɛ̃à kɛ̀.”