Àpɔ́sò 1 - Ɓǎsɔ́ɔ̀ Báɓòɔ̀

Gèɖèpɔ́ɔ̀ ɖáìn wa Zùù Hwɛ̀ǐn-hwɛ̀ǐnɔ̀ nyɛ́nɛ́ín

¹ Tìɔ́féɖɛ̀, ḿ céè ma céè-ɖɛ̀ kĩ́ín-kĩ́ínɔ̀ ɓá ɖɛ séín Jízɛ̀ tɛ̀mɛ̀ìn ma nyɔ ɓěɔ̀ kɛ kè ɖɛ séín ɓɛ́ ɔ nyu ma kɛɛ dyíɛ. Ḿ céè ma ɖɛ séín ɔ nyu ma sɔ̀ìn ti ɔ dè ma kũ̀àɔ̀ nyuɛ gbɔɛɛ,

² dyɛ̀ìn wé ɓɛ́ Gèɖèpɔ́ɔ̀ kpa ma ɔ dyɔún wɛ̃. Gèɖèpɔ́ɔ̀ kpa ma ɔ dyɔún ti ɓɛ́ ɔ ɖǎ ma wuɖu ɓěɔ̀ àpɔ́sò ɓě ɓɛ́ ɔ ɖǎ ma gã kɛɛ gbo cɛ̃ dyììn ɖé Zùù Hwɛ̀ǐn-hwɛ̀ǐnɔ̀ múɛ.

³ Ti ɓɛ́ wa ɖǎ ma ɔ ɖáɓá, ké ɔ ɖǎ ma gĩɔ wóɖó kɛɛ, ɔ tɛ̀mɛ̀ìn ma ɔ mìɔùn gàa ɓěa dyí ɖé ɖɛ ɓáún-ɓáún mú kà ɓɛ́ ɔ nì ma cĩ́ɛń nyɛ. Ɔ wóɖóìn ma wa dyí kpɛ́-kpɛ́ ɓó wé kpáɖá-nyɔ sɔ̃́ xwíníín, ké ɔ zaìn ma wa Gèɖèpɔ́ɔ̀ kã́á-ɓòɖòɔ̀ jè gbo kɔ̃in.

⁴ Ti ɓɛ́ Jízɛ̀ nì ma wa gboɛɛ, ɔ cɛ̃ɛ ma wa gbo, ɓɛ́ wa ní kɔ̃̀ ɖà Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyí sɔ̀. Ɔ ɖá, “Ɓě fòìn ɖɛ ɓɛ́ Ɓǎɔ̀ ɖáìn ɓě nyɛ́nɛ́ín nyɛ. Ɔ mɔ̀ ɖɛ kɔ̃̀ jè ɓě wɔ̃́ ma kà ḿ wĩín nyɛ.

⁵ Jɔ̃́ɔ́ po ɓě níɔ, kɛɛ ɔ se wé ɓáún-ɓáún sè, ɓɛ́ Gèɖèpɔ́ɔ̀ ké ɓě Zùù Hwɛ̀ǐn-hwɛ̀ǐnɔ̀ mú po.”

Jízɛ̀ mu dyɔún

⁶ Ti ɓɛ́ àpɔ́sò ɓěɔ̀ kè Jízɛ̀ ɖǎ ma dyí poìn nyɛɛ, wa diè ɔ dyi, ké wa ɖá, “Bounɓo, ɔ mɔ̀ǎ ti ɓɛ́ m̀ ké kã́á-kpèɔ̀ Éézùɖùɛ̀-nyɔ̀ ɓěɔ̀ nyí ɖeè?”

⁷ Ké ɔ cɛ̃ɛ ma wa gbo, ké ɔ ɖá, “Wé ɓě kè ti ɓě ɓɛ́ Ɓǎɔ̀ ɖǎ gbɔ po ɖé ɔ mìɔùn nììn kpé múɛɛ, ɓě se ɓéɖé ɓɛ́ ɓě kéɛ dyuò.

⁸ Kɛɛ ti Zùù Hwɛ̀ǐn-hwɛ̀ǐnɔ̀ mu ɓě kɔ̃ dyiìn nyɛɛ, ɓě mu kpé ɓéɖéìn, ké ɓě mu ní zàse jǔùn ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú kè ɖé Júɖìà-ɓòɖòɔ̀ kɔ̃ kè ɖé Sɛ̀mɛ́ɖìà-ɓòɖòɔ̀ kɔ̃ dà séín ɔ kè ɖéé ɖé ɓóɖó-kpàà sèìn-naín ɖekè.”

⁹ Ti ɓɛ́ Jízɛ̀ ɖǎ ma ɖɛa cɛ̃ɛ, Gèɖèpɔ́ɔ̀ ɖú ma ɔ dyií. Ti wa nì ma ɔ dya gmɔ̀ǔn wɛ̃ɛ, ní-kpò ɖò zà ma ɔ wa dyéɖé waí.

¹⁰ Ti wa nì ma dyií gmɔ̀ǔn gãa kà ɔ nì ma muɛń nyɛɛ, wàɖà cá kɛɛ, gàa sɔ̃́ nyànà ma ɓó wa wáún dyi. Wa po ma ɖɔ púú mú.

¹¹ Ké gàa sɔ̃́ ɓěɔ̀ cɛ̃ɛ ma wa gbo, ké wa ɖá, “Gáɖàɖíì-gàà ɓě, ɖɛ́ kɔ̃̀ jè ɓě nyànàà dà dyi, ké ɓě nìà kà dyií gmɔ̀ǔn wɛ̃́? Jízɛ̀ mɔ̀ nyɔ ɓɛ́ Gèɖèpɔ́ɔ̀ zàà ɓě hwìɛ̀, ké ɔ kpaà ɔ dyɔún wɛ̃̀. Kà dyúáɖò kà ɓě nyuà ɔ dyɔún muɛ dyéɛ kɛɛ, kǎà ɔ mu dyiɛ nyuùn ɖe.”

Wa gã nyɔ ké Júdàà pá dyí ɖúɛ

¹² Ké àpɔ́sò ɓěɔ̀ sɔ̀ ma toɖo ɓɛ́ wa ɖáìn Ɔ́ɖè-tòɖò kɛɛ dya, ké wa dyi ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe. Ɔ́ɖè-tòɖòɔ̀ xwɛ̃́ìn ma Jùɖúsɛ̀ɖɛ̀ìn-hwɔ̀ɖɔ̀ɔ̀ bũ̌in. Sɔ̀ìn Ɔ́ɖè-tòɖòɔ̀ dya dyi ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ ɓɛ́ìn Gèɖèpɔ́ɔ̀ fɔ̀-wèɔ̀ nììn nà-nà dyúáɖò jǔɛ.

¹³ Ti wa ɖǎ ma hwɔɖɔɔ̀ mú nyiniɛɛ, wa mu ma ɖé dyií ɖé ɓí-dyùɔ̀ mú, dɛ̀ wa nì ma kà kɛ. Wa mɔ̀ ma Píɖɛ̀ kè Jɔ̃́ɔ́ kè Jĩ́ìn kè Ã́dòɖò kè Féɖò kè Tɔ̀mɔ́sì kè Bàtɔ́ɖɔ́mì kè Máfíò kè Jĩ́ìn mɔ̀à Áfìàà dyú-gààɔ̀ kɛ kè Sã́ɓò ɓɛ́ ɔ vɔ̃ ma kà ɓó ɔ ɓóɖóɔ̀ nyɔ ɓěɔ̀ bììɛ ɔ kè Júdà mɔ̀à Jĩ́ìnɛ̀ dyú-gààɔ̀ kɛ.

¹⁴ Nyɔ séín ɓěa ɓéɖé ma hwòɖǒ dyúáɖò ɓɛ́ wa ké ma dúún ku, ɓɛ́ wa ké ɓaà. Meɖé mɔ̀à Jízɛ̀ ɖeɛ kè ɔ ɖíí-gàà ɓěɔ̀ ɔ kè màa ɓěɔ̀ nì ma ɓó ɖekè.

¹⁵ Ɓó wé ɓěa ɓaɖaa, Píɖɛ̀ nyànà ma ɓó ɖíí ɓě nìà kɛ hwìɛ̀ dyi. Nyɔ séín ɓěɔ̀ poìn dyí ɓɛ́ìn ma nyɔ-kpò hɔ̃dɛ̀ɖɛ̀ kè kpáɖá-nyɔ jǔɛ. Ké Píɖɛ̀ cɛ̃ɛ ma wa gbo, ke ɔ ɖá,

¹⁶ “Ɖíí ɓě, ɖɛ céè ɖé Gèɖèpɔ́ɔ̀-cèè-ɖɛ̀ɔ̀ mú kà ɔ mu kpáùn wɛ̃ɛ, ɔ ɓéɖé ɔ ké kpá wɛ̃́ɛ́. Ɔ mɔ̀ ɖɛ ɓɛ́ Zùù Hwɛ̀ǐn-hwɛ̀ǐnɔ̀ cɛ̃̀ìn zɔ̃̌ɔ̀ ɖé Dèɓé mú ɓá Júdà dyíɛ. Ɔ mɔ̀ nyɔ zàìn nyɔ ɓě ɓɛ́ wa kpɔ̃ ma Jízɛ̀ kɛɛ hwìèɔ̀ da.

¹⁷ Ɔ mɔ̀ ma à ɖò, ké kũ̀à ɓɛ́ à ɓéɖéà kɛɛ, ɔ ɓéɖé ma ɔ nììn.”

¹⁸ Júdà nìà kɛ dɔ̃ ma ɔ pá ɓó ɔ ɖɛ gbà ɓɛ́ ɔ ɖǎ ma nyuɛɛ wíɖíɔ̀ kɔ̃ún. Ɔ ɓuɖu, ké ɔ gè ma, ké ɔ mɛ́ séín ɓěɔ̀ wáɖá ma dyi.

¹⁹ Nyɔ séín ɓě ɓɛ́ wa cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ dèɛ̀ ma wɔ̃́ɔ gbɔ. Ɓó ɖɛ kpá ma ɔ gboɛɛ jè, wa jǔìn ma páɔ̀ nyɛ́nɛ́ Àkɛ̀dámà ɖé wa ɓíɖí-wùɖùǔn. Ɔ xwíníín mɔ̀ “Nyɔmɔɔ-pà.”

²⁰ Píɖɛ̀ nìɛ̀ ma cɛ̃iń, ké ɔ ɖá, “Ɖɛ kpáà Júdà gboɛɛ mɔ̀ ɖɛ céèà ɖé Wɛ́ɖɛ́-cèè-ɖɛ̀ɔ̀ múɛɛ jè. Ɔ ɖá, ‘Ɔ ɓíɖí-taún mɛ kpá fóɖóún. Nyɔ ɖò mɛ ɓɔ́ ɔ gbǒɔ̀ mú cĩ́ɛ.’ Ké ɔ ɖá ɖe, ‘Nyɔ kà kò ɖò mɛ ɖú ɔ nyɔ-wuɖuí-kɔ̃̀-kpèɔ̀ dyí.’

^21-22 “Ɔ jèɛɛ, ɓěà mɛ gã nyɔ ɖò, ɓɛ́ à kèɔ̀ kè ké zàse nyu kà ɓɛ́ Jízɛ̀ wóɖó ma gĩɔ kɛ. Ɔ mɛ mɔ̀ nyɔ ɓɛ́ à kèɔ̀ kè ɖǎ mú naìn kĩ́ín, ti séín ɓɛ́ à kè Bounɓo Jízɛ̀ naìn ma múɛ, sɔ̀ìn ti ɓɛ́ Jɔ̃́ɔ́ po ma nyɔ níɔ, ké wé ɓɛ́ Gèɖèpɔ́ɔ̀ zà ma Jízɛ̀ à hwìɛ̀, ké ɔ kpa ma ɔ dyɔún wɛ̃ɛ dyɛ̀ìn nyɛ.”

²³ Ke wa ɖá ma nyɔ sɔ̃́ nyɛ́nɛ́. Ɖò mɔ̀ Jòsé ɓɛ́ wa ɖáìn Bàsábà, kɔ̃̀ nyɛ́nɛ́ tɔ̀ɔ̀ mɔ̀ ma Jɔ́sɔ̀ɖɔ̀ kɛ, ké nyɔ tɔ̀ɔ̀ mɔ̀ Màtádyà.

²⁴ Ké nyɔ ɓěɔ̀ ɓaà ma, ké wa ɖá, “Bounɓo, mɔ̀ mɔ̀ nyɔ dyéà nyɔǔn séín hwòɖǒ-dyùàɔ̀ múin nyɛɛ, nyɔ sɔ̃́ ɓě nìà kɛɛ, zàìn à nyɔ ɓɛ́ m̀ ɖǎ gã kɛɛ da.

²⁵ Zàìn à nyɔ ké pá dyí ɖú ɖé àpɔ́sò-kũ̀àɔ̀ múɛɛ da. Ɔ mɔ̀ pá ɓɛ́ Júdà táà ma dyi, ké ɔ mu dɛ̀ ɓɛ́ ɔ ɓéɖé ɔ ké ma mu kɛ.”

²⁶ Ké wa nyu ma gbo-ɖàɓàìn-ɖɛ̀ ɓá nyɔ sɔ̃́ ɓěa dyí, ké ɔ kpɔ̃ ma Màtádyà, ké wa nɛ́ìn ma ɔ àpɔ́sò ɓaɖa-bùè sè dyúáɖò ɓěɔ̀ kɔ̃.