2 Tímétè 1 - Ɓǎsɔ́ɔ̀ Báɓòɔ̀

Nyíɔún-zà-zà

¹ Céè-ɖɛ̀ nìà kɛ sɔ̀ mɔ̄ Pɔ́ɔ̀ gbo. Ɔ mɔ̀ Gèɖèpɔ́ɔ̀ mɔ́ɔ́-ɖɛ̀, ké ḿ mɔ̀à Kɛ́ɖɛ́ì Jízɛ̀ɛ̀ àpɔ́sò kɛ̀. Ɔ mɔ̀ ɓɛ́ ḿ ké fɛ̀ɛ̀ ɓɛ́ ɔ ɖáìn nyɔ ɓě ɓɛ́ wa kè Kɛ́ɖɛ́ì Jízɛ̀ mɔ̀à nyɔ dyúáɖò kɛɛ nyɛ́nɛ́ín nyɛɛ jè cɛ̃.

² Ḿ zà mɔ̀ mɔ̀à ní ɖɛ̀ɓɛ̀-dyù Tímétè kɛɛ nyíɔún. Gèɖèpɔ́ɔ̀ mɔ̀à Ɓǎɔ̀ kɛ kè Kɛ́ɖɛ́ì Jízɛ̀ mɔ̀à à Bounɓoɔ̀ kɛɛ mɛ po m̀ mana kɔ̃, ɓɛ́ wa ké m̀ jĩ́á-jè kè gìɖìǐ nyí.

Dɛ̃ ní ɖá ɓɛ́ ɔ ké m̀ nyu ɓó Jízɛ̀ jè

³ Ḿ po Gèɖèpɔ́ɔ̀ mɔ̀ nyɔ kɔ̃̀ bìì ḿ nyuà kũ̀à ɖé hwòɖǒ wáɖáá mú kà ɓɛ́ ḿ ɓǎ nììn ɓǎ ɓěɔ̀ nyuɛ ma kà kɛɛ zùo. Ḿ po ɔ zùo kà ɓɛ́ ḿ dyi ɓaà ní, nì jè nì ḿ hwìɖǐi tee ɓó máaún kè dyóɖóaún wɛ̃.

⁴ Kà ɓɛ́ m̀ nyu ma vĩ̌ɛ kɛɛ jè nì ḿ hwìɖǐi, ké nì dyé-tò nyu ḿ mìɔ. Ḿ dyi m̀ dyéín, ní mu múàǔn kpáùn mìɔ.

⁵ Nì hwìɖǐǐ-taɓa-taɓa jɛ́ɛ́ɔ̀ jè nì ḿ hwìɖǐi. Ɔ mɔ̀ hwìɖǐǐ-taɓa-taɓa dyúáɖò ɓɛ́ nì dàɓò Ɖóè kè m̀ ɖe Dyúɖè ɓéɖé ma kĩ́ín nyɛ. Ḿ dyuò kà m̀ ɓéɖéɛ ɖekèɛ.

⁶ Ɔ jèɛɛ, ḿ dyàà m̀ hwìɖǐi, mɔ̀ǔn ɖá ɓɛ́ nyíí-ɖɛ̀ ɓɛ́ Gèɖèpɔ́ɔ̀ nyí ma kà m̀, ti ɓɛ́ ḿ pɛ̃́ìn ma m̀ sɔ̃ kɔ̃ɛɛ ké mɔ́ kà nyɛ mɔ́à kɛ, kɛɛ m̀ mɛ geɛ dyí.

⁷ Sepóɛɖé Zùù ɓɛ́ Gèɖèpɔ́ɔ̀ nyíà à kɛɛ ní nyuɛ ké dɛ̃ ní nyu nyɔ. Kɛɛ ɔ Zùùɔ̀ nyí à kpé kè ɖɛ̀ɓɛ̀ǐn-ɖɛ̀ɓɛ̀ǐn ɔ kè nyɔ-mìɔùn-dyí-kpɔ̃-kpɔ̃.

⁸ Ɔ jèɛɛ, mɔ̀ǔn ɖá ɓɛ́ dɛ̃ ké m̀ nyu, ɓɛ́ m̀ ké zàse nyu ɓó à Bounɓoɔ̀ jè. Ké mɔ̀ǔn ɖá ɓɛ́ dɛ̃ ké m̀ nyu ɓó mɔ̄ mɔ̀à kpɔɖɔ-ɖeín-nì-nyɔ̀ ɓó ɔ jèɛɛ jè. Kɛɛ mɔ̀ùn mɛ dyé gǎ ɓɛ́ nyɔǔn ɓě mɔ̀ùn dyé ɓó bɔ̃̌ nɔ̀mɔ̀ dyíinɔ̀ jè kɛɛ ɖò, kà ɓɛ́ Gèɖèpɔ́ɔ̀ nyíà m̀ kpé ɓó ɔ jèɛ.

⁹ Ɔ póìn à, ké ɔ ɖá à, ɓɛ́ à ké ɔ mìɔùn nììn nyɔ ɓě jǔ. Ɔ se ɓó ɖɛ ɓě ɓɛ́ à ɖǎ ma nyuɛɛ jè, kɛɛ ɔ mɔ̀ ɓó ɔ mìɔùn nììn hwòɖǒɛ̀-gbɔ-po-ɖɛ̀ kè ɔ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ jè. Ɔ nyí à mana nìà kɛ ɖé Kɛ́ɖɛ́ì Jízɛ̀ mú, hwɛ̀ ké ɓóɖó-kpàà nì ma.

¹⁰ Kɛɛ ɔ tɛ̀mɛ̀ìn à dyí kàǔn dyììn ɖé à Póìn-nyɔ̀ Kɛ́ɖɛ́ì Jízɛ̀ xwáɖáún-wóɖó-wóɖó mú. Sepóɛɖé Kɛ́ɖɛ́ì ɖǎ gĩɔɔ̀ kpéɔ̀ jè dyi zĩ̀ìn, ké dyììn ɖé bɔ̃̌ nɔ̀mɔ̀ dyíinɔ̀ múɛɛ, ɔ ɖǎ fɛ̀ɛ̀ kè sè-ná-sèɛ̀ cĩ́-cĩ́ jè nyɔǔn dyí tɛ̀mɛ̀ìn.

¹¹ Gèɖèpɔ́ɔ̀ ɖǎ ḿ gã, ɓɛ́ ḿ ké àpɔ́sò kè nyɔǔn-ɖɛ-tɛ̀mɛ̀ìn-nyɔ̀ jǔ, ɓɛ́ ḿ ké bɔ̃̌ nɔ̀mɔ̀ dyíinɔ̀ jè zio po.

¹² Ké ɖɛa kɔ̃̀ jè, ḿ dyéà kà gǎ kɛ̀. Kɛɛ dɛ̃ se ḿ nyu, sepóɛɖé ḿ dyuò nyɔ ḿ ɖǎà hwìɖǐǐ taɓaa dyí, ké ḿ dèɛ̀ hwòɖǒ kɔ̃ kà ɓɛ́ ɔ ɓɛ́ìn ɖɛ ɓɛ́ ɔ ɖǎ ma ḿ gbo sèɛɛ dyí gmɔ̀ɔ̀, ɓɛ́ wéa ké nyiniɛ.

¹³ Kpɔ̃ wuɖu nɔ̀mɔ̀ dyíin ɓě ɓɛ́ ḿ tɛ̀mɛ̀ìn ma m̀, ɓɛ́ ɔ ké ma dyí-tɛ̀mɛ̀ìn-ɖɛ̀ jǔ ɓó m̀ bììɛɛ gboi ɖé hwìɖǐǐ-taɓa-taɓa kè ɖɛ̀ɓɛ̀ǐn-ɖɛ̀ɓɛ̀ǐn ɓɛ́ wa nìà ɖé Kɛ́ɖɛ́ì Jízɛ̀ múɛɛ mú.

¹⁴ Gmɔ̀ ɖɛ nɔ̀mɔ̀ dyíin ɓě ɓɛ́ Gèɖèpɔ́ɔ̀ sè ma m̀ gboɛɛ dyí dyììn ɖé Zùù Hwɛ̀ǐn-hwɛ̀ǐn ɓɛ́ ɔ cĩ́à ɖé à múɛɛ kpé mú.

¹⁵ M̀ dyuò kà nyɔǔn séín ɓě nì ɖé Ésìà-ɓòɖòɔ̀ kɔ̃ɛɛ táà ma ḿ dyiɛ. Fàjɛ́ɖà kè Hɔ̀mɔ́jìnì ɓě mɔ̀ùn mɔ̀ ma wa ɖò.

¹⁶ Bounɓoɔ̀ mɛ dyé Ònɛ́sífɔ̀ɖɔ̀ɛ̀ ɓíɖí-gbǒ-xwíníín-nyɔ̀ ɓěɔ̀ wìǐn, sepóɛɖé ɔ nyuɛ ké ní hwòɖǒ kpá kpéí ɓó ti pàɖǎ xwíníín. Dɛ̃ se ma ɔ nyu ɓó dyɔ̀ɔ̌ ɓě ḿ nìà múɛɛ jè.

¹⁷ Ti ɔ nyini ma Wóɖóùn-hwɔ̀ɖɔ̀ɔ̀ mú nyɛ̀nɛ̀ɛ̀ kɛɛ, ɔ ɖú ma ḿ dyi mɔ́ kpàǐ, ké ɔ dyé ma ḿ.

¹⁸ Bounɓoɔ̀ mɛ dyé ɔ wìǐn ɓó wéa ɓaɖa. Ḿ dyuò ɖɛ jĩ̀ kà ɓɛ́ ɔ nyu ma ḿ bìì ɖé Ɛ́fɛ́sà-hwɔ̀ɖɔ̀ɔ̀ múɛɛ dyí nɔ̀mɔ̀ dyíin.