2 Tɛ̀sàɖónìà 1 - Ɓǎsɔ́ɔ̀ Báɓòɔ̀

Nyíɔún-zà-zà

¹ Céè-ɖɛ̀ nìà kɛ sɔ̀ìn mɔ̄ Pɔ́ɔ̀ kè Sɔ̀vénà ɔ kè Tímétè gbo. À zà ɓě mɔ̀à cɔ́cì-nyɔ̀ ɓě nìà ɖé Tɛ̀sàɖònákà-hwɔ̀ɖɔ̀ɔ̀ múɛɛ nyíɔún. Ɓě mɔ̀ Gèɖèpɔ́ɔ̀ mɔ̀à à Ɓǎ kɛ kè Bounɓo Jízɛ̀ Kɛ́ɖɛ́ìɛ̀ nyɔ ɓě.

² Gèɖèpɔ́ɔ̀ mɔ̀à Ɓǎɔ̀ kɛ kè Bounɓo Jízɛ̀ Kɛ́ɖɛ́ì mɛ po ɓě mana kɔ̃, ɓɛ́ wa ké ɓě gìɖìǐ nyí.

Zaa-wɔ̃-po-po mu nììn ti Kɛ́ɖɛ́ì mu dyiìn nyɛ

³ Ɖíí ɓě, à ɓéɖé à ké Gèɖèpɔ́ɔ̀ zùo po ti séín ɓó ɓě jè. Ɔ sɛ́ɖɛ́ìn dyí ɓɛ́ à kéɛ náa nyu, sepóɛɖé ɓěɛ̀ hwìɖǐǐ-taɓa-taɓaɔ̀ zi kɔ̃ kpáuń mìɔ, ké kà ɓě nyu mú ɖɛɓɛìn ɖɛ̀ɓɛ̀ìn nyɛɛ nì dyí vòɛ̌n.

⁴ Ɔ jèɛɛ, à mɔ̀ùn ɓɔ́ɖɔ́à ɓó ɓě jè ɖé Gèɖèpɔ́ɔ̀ cɔ́cì ɓěɔ̀ múɛ̀. À ɓɔ́ɖɔ́ ɓó kà ɓě nyu hwòɖǒ kuɛ, ɔ kè kà ɓě taɓa Gèɖèpɔ́ɔ̀ hwìɖǐǐ ɖé nyɔǔn-gǎ-dyéìn-ɖɛ̀ kè fũ̀à-fṹá-ɖɛ̀ séín ɓě ɓɛ́ ɓě nìà mú mùɛ̌n nyɛɛ jèɛ.

⁵ Ɖɛ nìà kɛ tɛ̀mɛ̀ìn nyɔǔn Gèɖèpɔ́ɔ̀ zaa-wɔ̃-po-po sɛ́ɖɛ́ìn dyíɔ̀ dyí, sepóɛɖé ɔ muɛ nyuùn ɓɛ́ ɓě ké ɖɛ kpa, ɓɛ́ ɓě ké ɖé ɔ kã́á-ɓòɖò kɔ̃̀ jè ɓɛ́ ɓě nìà gǎ dyéɛń nyɛɛ mú mu.

⁶ Sepóɛɖé Gèɖèpɔ́ɔ̀ mu ɖɛ mɔ̀ ɖɛ sɛ́ɖɛ́ìn dyíɛɛ nyuùn. Ɔ muɛ nyuùn ɓɛ́ nyɔ ɓě nìà ɓě gǎ dyéɛń nyɛɛ ké gǎ dyé.

⁷ Ké ɔ mu ɓě mɔ̀ nyɔ ɓě nìà gǎ dyéɛń nyɛɛ fɔ̀-fɔ̀ nyíìn, ké ɔ mu à mɔ̀ùn fɔ̀-fɔ̀ nyíìn ɖekè. Ɔ mu ɖɛ nìà kɛ nyuùn, ti ɓɛ́ Bounɓo Jízɛ̀ kè ɔ ínjà ɓéɖé kpé ɓěɔ̀ muà xwáɖáún wóɖóùn sɔ̀ìn ɖé dyɔún wɛ̃.

⁸ Bounɓoɔ̀ mu dyiìn ɖé nyɛ mú, ɓɛ́ ɔ ké nyɔ ɓě seà ɔ dyí dyuò wɛ kè nyɔ ɓě seà ɖɛ bɔ̃̌ nɔ̀mɔ̀ dyíin ɓá à Bounɓo Jízɛ̀ dyíɛɛ cɛ̃à kɛ nyuɛɛ gǎ kɔ̃ tò.

⁹ Gǎ ɓɛ́ wa muà dyéìn nyɛɛ mɔ̀ sè-ná-sèɛ̀ mú-gbɔɔ̀-gbɔɔ̀. Wa se Bounɓoɔ̀ kè ɔ kpé dĩ́ín-dĩ̀ìnɔ̀ dyúa nìɛ̌ mu,

¹⁰ ti ɓɛ́ ɔ muà dyiìn ɓó wéa ɓaɖa, ɓɛ́ ɔ kéà ɓàìn-ɓàìn kè dya-dè-dè dyé sɔ̀ìn ɖé ɔ nyɔ ɓěɔ̀ kè nyɔ séín ɓě taɓaà ɔ hwìɖǐǐɛɛ xwaún wɛ̃. Ɓě mɔ̀ùn mu ɖé kpáùn ɖekè, sepóɛɖé ɓě po ma zàse ɓɛ́ à nyu ma kɛɛ jǎà.

¹¹ Ɖɛa kɔ̃̀ jè à ɓaà ɓě bìì teeɛ̀. À diè à Gèɖèpɔ́ɔ̀ dyi, ɓɛ́ ɔ kéɛ nyu ɓɛ́ ɓě ké ɖɛ kpa ɓó ɖáa ɓɛ́ ɔ ɖáà ɓěɛɛ jè. Ɔ kpéɔ̀ mɛ nyuɛ ɓɛ́ ɓě ké ɖɛ nɔ̀mɔ̀ dyíin séín kɔ̃̀ nyu-tò nyuà ɓěɛɛ nyu, ɔ kè ɓɛ́ ɓěɛ̀ hwìɖǐǐ-taɓa-taɓaɔ̀ nyuu-ɖɛ̀ɔ̀ ké gbɔ hwɛ̀.

¹² Kǎà ɓě muɛ nyuùn ɓɛ́ à Bounɓo Jízɛ̀ nyɛ́nɛ́ɔ̀ ké ɓàìn-ɓàìn ɓéɖéɛ nyu. Ké ɓě mɔ̀ùn mu ɓàìn-ɓàìn ɓéɖéìn sɔ̀ìn ɖé à Gèɖèpɔ́ɔ̀ kè Bounɓo Jízɛ̀ Kɛ́ɖɛ́ì kpeɖeɛ̀-dyíin-nɔ̀mɔ̀-nɔ̀mɔ̀ɔ̀ mú.