2 Sámíò 1 - Ɓǎsɔ́ɔ̀ Báɓòɔ̀

Dèɓé wɔ̃́ Sɔ́ɔ̀ xwɛ́-bɔ̃̀

¹ Ti ɓɛ́ Sɔ́ɔ̀ sè ma to ɓɛ́ ɔ kè Féɖésìà-nyɔ̀ ɓěɔ̀ vɔ̃ ma kà kɛɛ, Dèɓé sɔ̀ ma Àmáɖɛ̀-nyɔ̀ ɓěɔ̀ toún ɖuɛń. Ké ɔ dyi ma ɖé Zíkàɖà-hwɔ̀ɖɔ̀ɔ̀ mú ɖe, ké ɔ nyu ma ɓó wé sɔ̃́.

² Púɛɛ, ɓó wéɔ̀ tã nììn nyɛɛ, gàa ɖò sɔ̀ ma ɖé Sɔ́ɔ̀ jàɖàìn-hwɔ̀ɖɔ̀ɔ̀ mú, ɖé toɔ̀ gbo. Ɔ fáìn ma ɔ mìɔùn ɖɔún dyi, ké ɔ po ma ɓóɖó dúi, ɓɛ́ ɔ kéɛ ma nyɔǔn dyí tɛ̀mɛ̀ìn kà ɔ kpá ma wìǐn mìɔ kɛ. Ké ɔ dyi ma ɖé Dèɓé gbo, ké ɔ jìɖǐ ma ɓó ɔ dyúa dyi.

³ Hwɛ̀ ké Dèɓé diè ma ɔ dyi, ké ɔ ɖá, “Dɛ̌ m̀ sɔ̀ kɛ́?” Ké ɔ jǔ ma Dèɓé gɔ̃̌, ké ɔ ɖá, “Ḿ kpá xwáɖáún, ké ḿ sɔ̀ ɖé Éézùɖùɛ̀-nyɔ̀ ɓěɔ̀ jàɖàìn-hwɔ̀ɖɔ̀ɔ̀ mú, ké ḿ dyià kɛ̀.”

⁴ Ké Dèɓé diè ma ɔ dyi ɖe, ké ɔ ɖá, “Ɖɛ́ kpá ɖé toɔ̀ gboɛ́?” Ké gàaɔ̀ zaìn ma ɖɛ ɓě kpá ma ɖéɛɛ Dèɓé gbo kɔ̃in, ké ɔ ɖá, “À to-vɔ̃-nyɔ̀ ɓěɔ̀ ɖǎ toɔ̀ dyúa gbǔ. Éézùɖùɛ̀-nyɔ̀ pàɖǎ ɖǎ toɔ̀ gbo mɛ́ìn, ké Sɔ́ɔ̀ kè ɔ dyú-gàà Jònétɔ̃̀ ɖǎ mɛ́ ɖekè.”

⁵ Ké Dèɓé diè ma ɔ dyi ɖe, ké ɔ ɖá, “Xwɛ̌ m̀ nyuɛ dyuòɛ̀ kà Sɔ́ɔ̀ kè ɔ dyú-gàà Jònétɔ̃̀ ɖǎ mɛ́ kɛ́?”

⁶ Ké gàaɔ̀ ɖá, “Ḿ wóɖóìn ma ɖé Gìòɓóà-tòɖòɔ̀ dya, ké ḿ dyé ma Sɔ́ɔ̀, ké ɔ kpɔ̃ ma ɔ ɖíɔ̀ kɔ̃in, ɓɛ́ ɔ ké ma kpé dyé. Ké ɔ mú-nyɛ́-nyɔ̀ ɓěɔ̀ hwíì-sǒ ɓěɔ̀ kè waà sǒ-nàìn-nyɔ̀ ɓěɔ̀ nìǎ ma ɔ bũ̌in xwɛ̃́ǐn.

⁷ Ti ɓɛ́ ɔ gmɔ̀ ma ɖeɛɛ, ɔ dyé ma ḿ, ké ɔ ɖá ma ḿ, ké ḿ mu ma ɖé ɔ ɖá-wùɖùɔ̀ gbo.

⁸ Ké ɔ diè ma ḿ dyi, ké ɔ ɖá, ‘Dɛ̌ m̀ sɔ̀ kɛ́?’ Ké ḿ jǔ ma ɔ gɔ̃̌, ké ḿ ɖá, ‘Ḿ mɔ̀ Àmáɖɛ̀-dyù.’

⁹ Hwɛ̀ ké ɔ cɛ̃ɛ ma ḿ gbo, ké ɔ ɖá, ‘Dyi, ɓɛ́ m̀ ké ḿ ɖáɓá, sepóɛɖé ḿ nìǎ mɛ́iń.’

¹⁰ Ɔ jèɛɛ, ḿ mu, ké ḿ ɖáɓá ma Sɔ́ɔ̀, sepóɛɖé ḿ dyuòɛ̀ dyí kà dɛ̀ ɔ ɓɛ̀ɖɛ̀ìn ma kà dyíɛɛ, ɔ se ma cĩ́ɛ mu ɖeɛ. Ké ḿ zà ɔ kã́á-gbàǎɔ̀ dú kè ɔ sɔ̃-po-ɖɛ̀ɔ̀ sɔ̃, ké ḿ dyàà wa nɔ̄ mɔ̀ mɔ̀à ní wuɖuí-kɔ̃̀-nyɔ̀ɔ̀ kɛɛ gboɛ̀.”

¹¹ Púɛɛ, Dèɓé kè ɔ gàa séín ɓěɔ̀ fáìn ma wa mìɔùn ɖɔún dyi,

¹² ké wa kpá wa wìǐn. Wa vĩ̌ ma ɓó Sɔ́ɔ̀ kè ɔ dyú-gàà Jònétɔ̃̀ ɔ kè Éézùɖùɛ̀-ɓòɖò gànáɔ̀ jè. Ké wa se ma ɖɛ ɖò ɖi, ké ɔ dyɛ̀ìn ma hwìo, sepóɛɖé Bounɓoɔ̀ nyɔ ɓěɔ̀ pàɖǎ ɖǎ ma ɖé toɔ̀ gbo mɛ́ìn jè.

¹³ Ɓó tia ɓaɖaa, Dèɓé diè ma gàa mɔ̀ nyɔ dyà ma kà bɔ̃̌ɔ̀ ɔ gboɛɛ dyi, ké ɔ ɖá, “Ké dɛ̌ m̀ sɔ̀ kɛ́?” Ké ɔ jǔ ma Dèɓé gɔ̃̌, ké ɔ ɖá, “Ḿ mɔ̀ Àmáɖɛ̀-dyù, ké ḿ cĩ́ nɔ̄ nì ɓóɖóɛ̀ mú.”

¹⁴ Ké Dèɓé cɛ̃ɛ ma ɔ gbo, ké ɔ ɖá, “Ɖɛ́ nyuà ɓɛ́ m̀ seà fɛ̃̀ìn, ké m̀ dyià nyɔ ɓɛ́ Bounɓoɔ̀ ɖǎ gã, ɓɛ́ wa ɖǎ cáná dúún poɛɛ ɖáɓá kɛ́?”

¹⁵ Ké Dèɓé ɖá ma ɔ gàa ɓěɔ̀ dyúáɖò, ké ɔ cɛ̃ɛ ma ɔ gbo, ké ɔ ɖá, “Ɖáɓá gàa nìà kɛ.” Ké ɔ ɖáɓá ma gàaɔ̀ gàsíà dyí.

¹⁶ Hwɛ̀ ɓɛ́ gàaɔ̀ ké ma mɛ́ɛ, Dèɓé cɛ̃ɛ ma ɔ gbo, ké ɔ ɖá, “Nì mu m̀ mìɔùn nììn nyɔmɔɔ̀ kpa dyí ɖúùn, sepóɛɖé m̀ mìɔùn nììn wɔ̃ɔ̀ ɖǎ m̀ zaa dúún wáɖá kà ɓɛ́ m̀ ɖǎ nyɔ ɓɛ́ Bounɓoɔ̀ ɖǎà gãa ɖáɓá kɛ.”

Dèɓé vĩ̌ ɓó Sɔ́ɔ̀ kè Jònétɔ̃̀ jè

¹⁷ Ti ɓɛ́ Sɔ́ɔ̀ kè Jònétɔ̃̀ ɖǎ ma toɔ̀ sèɛɛ, Dèɓé vĩ̌ ma ɓó wa jè, ké ɔ nyu ma vĩ̌-wùɖùɔ̀ wɛ́ɖɛ́ mú.

¹⁸ Ké ɔ cɛ̃ɛ ma, ɓɛ́ wa ké vĩ̌-wùɖù ɓɛ́ ɔ nyu ma kà wɛ́ɖɛ́ múɛɛ Júɖà-nyɔ̀ ɓěɔ̀ tɛ̀mɛ̀ìn. Wa ɖáìn ma wɛ́ɖɛ́ɔ̀ pɔnɔ. Ɔ céè ɖé Jásà-cèè-ɖɛ̀-kpòɔ̀ mú. Dèɓéɛ̀ vĩ̌-wùɖùɔ̀ kɛà kɛ̀.

¹⁹ “Éézùɖùɛ̀-dyù ɓěo, wa ɖǎ ɓěà ɓǎ ɓě mɔ̀à Sɔ́ɔ̀ kè Jònétɔ̃̀ kɛɛ ɖáɓá ɖé ɓěà toɖo ɓěɔ̀ dya. Ɓěà gàa-zà-nyɔ̀ vɛ̀nɛ̀ kpa ɖɛ ɓěɔ̀ mɔ̀ nyɔ sèà toɛ̀.

²⁰ Ɓě mɛ ɓɔ́ ɖɛ ɖǎà kpáa bɔ̃̌ kpaa ɖé Gátì-hwɔ̀ɖɔ̀ɔ̀ mú, ké ɓě mɛ ɓɔ́ɔ jè zio dyi poɛ ɖé Àkéɖɔ̀ùn-hwɔ̀ɖɔ̀ɔ̀ hwìè ɓěɔ̀ xwíníín, ɓɛ́ Féɖésìà-gàà se sàà mɛ́ ɓěɔ̀ màa ɓěɔ̀ ní kɔ̃̀ ɖà múàǔn kpá.

²¹ “Dunu ɖò mɛ ɓɔ́ ɖé Gìòɓóà-tòɖòɔ̀ dya ɓuɖuɛ ɖe, ké ní ɖò mɛ ɓɔ́ ɖé ɔ dya ɖaɓaa ɖe. Ké ɓáá-ɖɛ̀ ɖò mɛ ɓɔ́ toɖoɔ̀ dya mɛɛ ɖe fɔɔ. Sepóɛɖé ɖé Gìòɓóà-tòɖòɔ̀ dyaa, ɖéɛ̀ Sɔ́ɔ̀ dyí-zĩ̀ìn-ɖɛ̀ɔ̀ pɛ̃́à dyiɛ̀, ké nyɔ ɖò seɛ cáná poɛ́ mu ɖe.

²² Jònétɔ̃̀ɛ̀ sé-kpìì ɓěɔ̀ ɖáɓá ma kú, ké ɔ po ma gàa-zà-nyɔ̀ ɓě dyi. Sɔ́ɔ̀ gàsíàɔ̀ námá ma ní, ké ɔ ɖáɓá ma ɓěà mú-nyɛ́-nyɔ̀ ɓěɔ̀.

²³ “Nyɔǔn ɓě ɖɛ̀ɓɛ̀ ma Sɔ́ɔ̀ kè Jònétɔ̃̀ mú, ké Sɔ́ɔ̀ kè Jònétɔ̃̀ nɔ̀mɔ̀ ma kpeɖeín. Wa kpɔ̃ìn ma gbo ti ɓɛ́ wa nì ma cĩ́ɛń nyɛ, ké wa se gbo zaìn ɖé gĩɔ mú. Wa fṹà ma xwai mìɔ ké ɔ zi ke ɓě dyí, ké wa ɓéɖé ma kpé mìɔ ké ɔ zi ganìǎ ɓě dyí.

²⁴ “Éézùɖùɛ̀-màà ɓěo, ɓě vĩ̌ Sɔ́ɔ̀ jè. Ɔ mɔ̀ nyɔ ɖǎà ɓě ɖɔ nɔ̀mɔ̀ kɔ̃in ɓě mú po, ké ɔ ɖǎà ɓě góò-bɛ̃̀ìn-ɖɛ̀ ɓě nyíɛ̀.

²⁵ “Ɓěà gàa-zà-nyɔ̀ ɓěɔ̀ ɖǎ to sè. Dyé kà Jònétɔ̃̀ɛ̀ xwɛ́ pɛ̃́ ɖé ɓěà toɖo ɓěɔ̀ ɖò gboiɛ.

²⁶ “Éé, ḿ ɖíí-gàà Jònétɔ̃̀, ḿ kpá wìǐn mìɔ ɓó nì jè. Nì jè zi ɖɛ kpauń mìɔ ɖé ḿ gbo. Ɖɛ̀ɓɛ̀ǐn-ɖɛ̀ɓɛ̀ǐn ɓɛ́ m̀ ɓéɖé ma ḿ bììɛɛ ɓúá ma kpéín mìɔ, ké ɔ zi ɖɛ̀ɓɛ̀ǐn-ɖɛ̀ɓɛ̀ǐn ɓɛ́ màa ɓě ɓéɖé ḿ bììɛɛ dyí.

²⁷ “Ɓěà gàa-zà-nyɔ̀ vɛ̀nɛ̀ ɓěɔ̀ ɖǎ to sè, ké wa toún-vɔ̃̀ìn-ɖɛ̀ ɓěɔ̀ ɖǎ mú gbɔɔ̀.”