2 Píɖɛ̀ 1 - Ɓǎsɔ́ɔ̀ Báɓòɔ̀

Nyíɔún-zà-zà

¹ Céè-ɖɛ̀ nìà kɛ sɔ̀ mɔ̄ Sã́ɓò Píɖɛ̀ gbo. Ḿ mɔ̀ Jízɛ̀ Kɛ́ɖɛ́ìɛ̀ àpɔ́sò kè ɔ gbo-nì-nyɔ̀. Ḿ zà ɓě mɔ̀à nyɔ ɓě ɖǎà hwìɖǐǐ-taɓa-taɓa kpa ɖɛ kà ɓɛ́ à mɔ̀ùn nìà kɛɛ dyé dyììn ɖé à Gèɖèpɔ́ɔ̀ mɔ̀à à Póìn-nyɔ̀ Jízɛ̀ Kɛ́ɖɛ́ì dyí-sɛ́ɖɛ́ìn-sɛ́ɖɛ́ìn múɛɛ nyíɔún.

² Mana kè gìɖìǐ mɛ zi ɓě kɔ̃ nìɛ̌n dyììn ɖé Gèɖèpɔ́ɔ̀ kè à Bounɓo Jízɛ̀ dyí-dyuò-dyuò mú.

Gèɖèpɔ́ɔ̀ ɖá ɓě ké ɔ gã ɓě

³ Kpé sɔ̀ìn kà ɖé Gèɖèpɔ́ɔ̀ múɛɛ nyí à ɖɛ séín ɓě ɓɛ́ à kéɔ́ ɓéɖé, ɓɛ́ à kéɔ́ Gèɖèpɔ́ɔ̀ bìì cĩ́ɛ, dyììn ɖé nyɔ ɓɛ́ ɔ ɖáà à, ɓɛ́ à kèɔ̀ kè ké ɔ dĩ́ín-dĩ̀ìnɔ̀ kè ɔ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ mú peɖeìn nyɛɛ dyí-dyuò-dyuò mú.

⁴ Dyììn ɖé ɖɛ ɓě nìà kɛ múɛɛ, ɔ ɖǎ à nyɛ́nɛ́ín-ɖáìn-ɖɛ̀ vɛ̀nɛ̀ ɓě nyí, ɓɛ́ dyììn ɖé wa múɛɛ, ɓě ké ɖɛ-dyíin-nyìnììn-nyɔ̀ mɔ̀à ɖɛ-gbà-nyu-tò nìà nɔ̄ ɓóɖó-kpàà kɔ̃ɛɛ xwaún pó, ɓɛ́ ɓě ké nì kà Gèɖèpɔ́ɔ̀ mìɔùn nìà kɛ.

⁵ Ɓó ɖɛ jɛ́ɛ́ nìà kɛ jè, ɓě mɛ vɔ̃ ɓɛ́ ɓě ké kpeɖeɛ̀-dyíin-nɔ̀mɔ̀-nɔ̀mɔ̀ ɓěɛ̀ hwìɖǐǐ-taɓa-taɓaɔ̀ kɔ̃ po. Ɓě mɛ po ɖɛ-dyuò-dyuò ɓěɛ̀ kpeɖeɛ̀-dyíin-nɔ̀mɔ̀-nɔ̀mɔ̀ɔ̀ kɔ̃.

⁶ Ɓě mɛ po ɓě mìɔùn dyí-kpɔ̃-kpɔ̃ ɓěɛ̀ ɖɛ-dyuò-dyuòɔ̀ kɔ̃. Ɓě mɛ po ɖɛ-hwòɖǒi-kùìn-kùìn ɓěɛ̀ mìɔùn dyí-kpɔ̃-kpɔ̃ɔ̀ kɔ̃. Ɓě mɛ po Gèɖèpɔ́ɔ̀ kpeɖe nyu-nyu ɓěɛ̀ ɖɛ-hwòɖǒi-kùìn-kùìnɔ̀ kɔ̃.

⁷ Ɓě mɛ po ɓěɛ̀ ɖíí ɓě mú-ɖɛ̀ɓɛ̀-ɖɛ̀ɓɛ̀ ɓěɛ̀ Gèɖèpɔ́ɔ̀ kpeɖe nyu-nyuɔ̀ kɔ̃. Ké ɓě mɛ po ɖɛ̀ɓɛ̀ǐn-ɖɛ̀ɓɛ̀ǐn ɓěɛ̀ ɖíí ɓě mú-ɖɛ̀ɓɛ̀-ɖɛ̀ɓɛ̀ɔ̀ kɔ̃.

⁸ Ɖɛ ɓě nìà kɛ dyi ɖé ɓě mú nì, ké wa dyi kɔ̃ kpáuń nìǐn, wa muɛ nyuùn ɓɛ́ ɓě ké ɖɛ kpa, ɓɛ́ ɓě ké ɖɛ ɓě nyu ɖé à Bounɓo Jízɛ̀ Kɛ́ɖɛ́ì dyí-dyuò-dyuò mú.

⁹ Kɛɛ nyɔ séín ɓě se wa ɓéɖéɛɛ, wa se dà vɛ̃in dyi dyéɛ ɓɛ́ìn. Wa kpè dyéɖéín dyi, ké ɔ sɔ̀ wa hwìɖǐi kà ɓɛ́ waà nàmàǔn sùà ɓěɔ̀ ɖǎ wa bũ̌in dèɖèɛ.

¹⁰ Ɔ jèɛɛ, ḿ ɖíí ɓě, ɓě mɛ vɔ̃ ɓɛ́ ɓě kéɛ nyu ɓɛ́ ɖáa ɓɛ́ Gèɖèpɔ́ɔ̀ ɖáà ɓě kè gãa ɓɛ́ ɔ gãà ɓěɛɛ ké jǎà kpá. Ɓě dyi ɖɛ ɓěɛ̀ nyuín, nìí, ɓě se ɓuɖuɛ́ mu fɔɔ.

¹¹ Ɖé hwìè nìà kɛ múɛɛ, Gèɖèpɔ́ɔ̀ mu ɓě kpé séín nyíìn, ɓɛ́ ɓě ké ɖé Bounɓo mɔ̀à à Póìn-nyɔ̀ Jízɛ̀ Kɛ́ɖɛ́ì kɛɛ sè-ná-sèɛ̀ kã́á-ɓòɖòɔ̀ mú dyá.

¹² Ɓě dyuò ɖɛ ɓě nìà kɛ dyí, ké ɓě ku dyi ɖé jǎà ɓɛ́ ɓě ɖǎà dyi kpɔ̃ɛɛ mú dyɛo, kɛɛ ní mu wa ɓě hwìɖǐi dyàùn tee.

¹³ Ḿ poìn hwìɖǐi kà ɓɛ́ ɔ nɔ̀mɔ̀ dyíin ɓɛ́ ḿ ké ɓě ɖɛ ɓě nìà kɛ jè hwìɖǐi dyà, ɓɛ́ wa ké ɓě kpéí po kà ɓɛ́ ḿ nìà cĩ́ɛń keɛ.

¹⁴ Sepóɛɖé ḿ dyuòɛ̀ kà ɓɛ́ ní mu ní kpóɖó-dyùà nìà kɛ dyi táàùn kàǔn wɛ̃, kà ɓɛ́ à Bounɓo Jízɛ̀ Kɛ́ɖɛ́ì tɛ̀mɛ̀ìn ma kà ḿ wɛ̃.

¹⁵ Ní mu vɔ̃ùn ɓɛ́ ḿ kéɛ nyu ɓɛ́ ɔ jǔ ké ḿ dyi mɛ́ín, ɓě ké ti ɓéɖé ti séín, ɓɛ́ ɖɛ ɓě nìà kɛ ké ɓě hwìɖǐi dyi.

À dyé ma Kɛ́ɖɛ́ì dĩ́ín-dĩ̀ìnɔ̀ ní

¹⁶ Ti ɓɛ́ à nyuɛ ké ɓě dyuò ma kà Bounɓo Jízɛ̀ Kɛ́ɖɛ́ì muà dyiìn ɖé kpé múɛ jèɛɛ, à se ma nyɔǔn-dyù mìɔùn nììn sɛ́ɖɛ́-nɔ̀ɔ̌ ɓě hwòɖǒ kɔ̃ dè. À mìɔùn nììn dyéɖé-dyùà dyé ma ɔ dĩ́ín-dĩ̀ìnɔ̀ ní.

¹⁷ À nì ma ɖé ti ɓɛ́ Gèɖèpɔ́ɔ̀ mɔ̀à Ɓǎɔ̀ kɛɛ nyí ma ɔ dya-dè-dè kè ɓàìn-ɓàìn, ti ɓɛ́ wuɖuɔ̀ sɔ̀ìn ma ɖé dĩ́ín-dĩ̀ìn zi ɖɛ kpauń mìɔɛɛ múɛ. Wuɖuɔ̀ ɖá, “Nyɔ nìà kɛ mɔ̀ ní hwòɖǒ-kɔ̃-dè-dyùɔ̀. Ní hwòɖǒ dèìn ɔ múin.”

¹⁸ À mìɔùn wɔ̃́ ma wuɖu nìà kɛ, ké ɔ sɔ̀ìn ma ɖé dyɔún, ti ɓɛ́ à kèɔ̀ kè nì ma toɖo hwɛ̀ǐn-hwɛ̀ǐnɔ̀ dyaa.

¹⁹ Ɖɛ nìà kɛ nyuɛ ké à taɓa wuɖu ɓɛ́ kpáá-ɖɛ̀-cɛ̃-nyɔ̀ ɓěɔ̀ cɛ̃ ma kà kɛɛ hwìɖǐǐ mìɔ. Ɓě dyi ɔ ɖùǔ gbo tòǐn, ɓě nyu ɖɛ nɔ̀mɔ̀ dyíin, sepóɛɖé ɔ nì kà ɖáùnpò fãà dɛ̀ ɓɛ́ tíe kpɔ̃à kɛɛ nìà kɛ. Ɔ mu fãùn tee, ɓɛ́ zɔ̃ ké zɔ̃, ɓɛ́ zɔ̃-wĩín-dɛ̀nɛ̀-dyùɔ̀ ce ké ɖé ɓěɛ̀ hwòɖǒ-dyùàɔ̀ múin fã̀ìn hwɛ̀.

²⁰ Ɖé ɖɛ séín kɔ̃in nyɛɛ, ɖɛ nìà kɛ mɛ nì ɓě hwìɖǐi. Nyɔ ɖò ɖòùn se ɖɛ ɓɛ́ Gèɖèpɔ́ɔ̀ dèìn ma nyɔ ɖò wĩín, ké ɔ céèà ɖé ɔ céè-ɖɛ̀ɔ̀ múɛɛ xwíníín mú zàà ɓɛ́ìn.

²¹ Sepóɛɖé wuɖu ɓě nì kà kɛɛ se ɖé nyɔǔn-dyùɛ̀ mɔ́ɔ́-ɖɛ̀ mú sɔ̀ìn, kɛɛ Zùù Hwɛ̀ǐn-hwɛ̀ǐnɔ̀ mɔ̀ nyɔ nì ma wa nàǐn, ti ɓɛ́ wa nì ma wuɖu ɓě sɔ̀àìn ɖé Gèɖèpɔ́ɔ̀ gboɛɛ cɛ̃iń nyɛ.