2 Kĩ́ìn 1 - Ɓǎsɔ́ɔ̀ Báɓòɔ̀

Ìɖáájɔ̀ kè Kã́á Áhàzíà

¹ Ti ɓɛ́ Éhà mɔ̀à Éézùɖùɛ̀-kã̀ǎɔ̀ kɛɛ ɖǎ ma mɛ́ɛ, Móà-ɓòɖòɔ̀ po ma Éézùɖùɛ̀-ɓòɖòɔ̀ kɛ́ɛ́ dyí.

² Wé ɖòɛ̀ ɓaɖaa, Kã́á Áhàzíà mɔ̀à Éhàà dyú-gààɔ̀ kɛɛ ɓuɖu ma ɖé ɔ kã́á-gbò nì ma kà ɖé Sɛ̀mɛ́ɖìà-hwɔ̀ɖɔ̀ɔ̀ múɛɛ dya. Ɔ ɓuɖu ma gbǒɔ̀ dya sɔ̀ìn ɖé wúɖɛ̀-wɔ̃̀ ɖò gbo, ké ɔ puà ma mìɔ cá. Ɔ jèɛɛ, ɔ ɖoɓo ma kíá ɓě, ɓɛ́ wa ké Béò-Zɛ́ɓɔ̀ mɔ̀ Ɛ́kɔ̀nɔ̀-hwɔ̀ɖɔ̀ ɓɛ́ ɔ mɔ̀ Féɖésìà-nyɔ̀ ɓěɔ̀ ɓíɖí-hwɔ̀ɖɔ̀ɛɛ nììn gèɖèpɔ́ɔ̀ kɛɛ dyi diè kɛbì ɔ mu dyi kánáùn ní.

³ Kɛɛ ɓó ti dyúáɖòɔ̀ múɛɛ, Bounɓoɔ̀ ínjà ɖò cɛ̃ɛ ma Ìɖáájɔ̀ mɔ̀à kpáá-ɖɛ̀-cɛ̃-nyɔ̀ ɓɛ́ ɔ sɔ̀à ɖé Tísíbè-hwɔ̀ɖɔ̀ɔ̀ múɛɛ gbo, ɓɛ́ ɔ ké mu, ɓɛ́ ɔ kè kíá ɓě ɓɛ́ Kã́á Áhàzíà ɖoɓoà kɛɛ ké gmɔ̌ìn, ɓɛ́ ɔ ké wa dyi diè, ɓɛ́ ɔ ké níiń, “Ɖɛ́ kɔ̃̀ jè ɓě nìà Béò-Zɛ́ɓɔ̀ mɔ̀à Ɛ́kɔ̀nɔ̀-hwɔ̀ɖɔ̀ɔ̀ nììn gèɖèpɔ́ɔ̀ kɛɛ dyi dièɛ̌n muɛń nyɛ́? Gèɖèpɔ́ɔ̀ ɖò se Éézùɖùɛ̀-ɓòɖòɛ̀ kɔ̃ nìì?

⁴ Ɓě mɛ cɛ̃ɛ kã́áɔ̀ gbo kà Bounɓoɔ̀ ɖá ɔ se dyi kánáa mu sɔ̀ìn ɖé puà-puà ɓɛ́ ɔ nyuà kɛɛ múɛ, kɛɛ ɔ mu mɛ́ìn jǎà jɛ́ɛ́.” Ké Ìɖáájɔ̀ nyu ɖɛ ɓɛ́ Bounɓoɔ̀ cɛ̃ ma kà ɔ gboɛ.

⁵ Ké kíá ɓěɔ̀ kɔ́ìn ma ɖe, ké wa mu ɖé kã́áɔ̀ gbo ɖe, ké kã́áɔ̀ diè wa dyi, ké ɔ ɖá, “Ɖɛ́ kɔ̃̀ jè ɓě fṹà kà ɖe kɔ́ǐn nyɛ́?”

⁶ Ké wa jǔ ma ɔ gɔ̃̌, ké wa ɖá, “À kè gàa ɖò gmɔ̌ìn, ké gàaɔ̀ ɖá à mɛ dyi ɖe, ɓɛ́ à kéɛ mɔ̀ mɔ̀à kã́áɔ̀ kɛɛ gbo cɛ̃ kà Bounɓoɔ̀ ɖá, ‘Ɖɛ́ kɔ̃̀ jè m̀ ɖoɓoà kíá, ɓɛ́ wa kéà Béò-Zɛ́ɓɔ̀ mɔ̀à Ɛ́kɔ̀nɔ̀-hwɔ̀ɖɔ̀ɔ̀ nììn gèɖèpɔ́ɔ̀ kɛɛ dyi dièɛ́? Gèɖèpɔ́ɔ̀ ɖò se Éézùɖùɛ̀-ɓòɖòɛ̀ kɔ̃ nìì? M̀ se dyi kánáa mu sɔ̀ìn ɖé puà-puà ɓɛ́ m̀ nyuà kɛɛ mú, kɛɛ nì mu mɛ́ìn jǎà jɛ́ɛ́.’ ”

⁷ Ké kã́áɔ̀ diè wa dyi, ké ɔ ɖá, “Xwɛ̌ gàa cɛ̃à ɓě ɖɛ ɓěɛ̀ gboɛɛ nyu nìɛ̀ kɛ́?”

⁸ Ké wa ɖá, “Ɖɔ ɓɛ́ ɔ po múɛɛ mɔ̀ nimii-kùɖùù, ké ɔ jìnììn kúɖúù-kpã̀ ɖò gbo.” Ké kã́áɔ̀ ɖá, “Ɔ mɔ̀ Ìɖáájɔ̀ sɔ̀à ɖé Tísíbè-hwɔ̀ɖɔ̀ɔ̀ múɛo.”

⁹ Ké ɔ ɖoɓo ma sójà-wuɖuí-kɔ̃̀-nyɔ̀ ɖò kè sójà kpáɖá-nyɔ sɔ̃́ ɓaɖa-bùè, ɓɛ́ wa ké Ìɖáájɔ̀ ɔ gbo dyà. Ké sójà-wuɖuí-kɔ̃̀-nyɔ̀ɔ̀ dyɛ̀ìn ma Ìɖáájɔ̀ ɖé toɖo ɖò dya dyi kòɛ̀. Ké ɔ cɛ̃ɛ ma Ìɖáájɔ̀ gbo, ké ɔ ɖá, “Gèɖèpɔ́ɔ̀-gàà wè, kã́áɔ̀ ɖá m̀ mɛ dyi, ɓɛ́ ɓěà ké mu.”

¹⁰ Kɛɛ Ìɖáájɔ̀ cɛ̃ɛ ma sójà kpáɖá-nyɔ sɔ̃́ ɓaɖa-bùèɔ̀ wuɖuí-kɔ̃̀-nyɔ̀ɔ̀ gbo, ké ɔ ɖá, “Ḿ dyi Gèɖèpɔ́ɔ̀-gàà jǔǐn, nyɛ mɛ sɔ̀ dyɔún, ɓɛ́ ɔ ké m̀ kè nì sójà ɓěɔ̀ ɖáɓá.” Wàɖà cáa, nyɛ sɔ̀ ma dyɔún, ké ɔ ɖáɓá ma sójà-wuɖuí-kɔ̃̀-nyɔ̀ɔ̀ kè ɔ sójà ɓěɔ̀.

¹¹ Ké kã́áɔ̀ ɖoɓo ma sójà-wuɖuí-kɔ̃̀-nyɔ̀ ɖò kè sójà kpáɖá-nyɔ sɔ̃́ ɓaɖa-bùè ɖò ɖe. Ɔ mu ma, ké ɔ cɛ̃ɛ ma Ìɖáájɔ̀ gbo, ké ɔ ɖá, “Gèɖèpɔ́ɔ̀-gàà wè, kã́áɔ̀ ɖá m̀ mɛ dyi, ɓɛ́ ɓěà ké mu wàɖà.”

¹² Kɛɛ Ìɖáájɔ̀ cɛ̃ɛ ma ɔ mɔ̀ùn gbo, ké ɔ ɖá, “Ḿ dyi Gèɖèpɔ́ɔ̀-gàà jǔǐn, nyɛ mɛ sɔ̀ dyɔún, ɓɛ́ ɔ ké m̀ kè nì sójà ɓěɔ̀ ɖáɓá.” Wàɖà cáa, Gèɖèpɔ́ɔ̀ nyɛɔ̀ dyi ma ɓíɖíi, ké ɔ ɖáɓá ma sójà-wuɖuí-kɔ̃̀-nyɔ̀ɔ̀ kè ɔ nììn sójà ɓěɔ̀.

¹³ Ké kã́áɔ̀ ɖoɓo ma sójà-wuɖuí-kɔ̃̀-nyɔ̀ ɖò kè sójà kpáɖá-nyɔ sɔ̃́ ɓaɖa-bùè ɖò ɖe. Ti ɔ mɔ̀ùn mu ma kɛɛ, ɔ dyá ma toɖoɔ̀, ké ɔ taɓa ma kɔ́-dù hwuɖu ɓó Ìɖáájɔ̀ dyúa, ké ɔ ɓaà ma Ìɖáájɔ̀, ké ɔ ɖá, “Gèɖèpɔ́ɔ̀-gàà wè, dyé ḿ kè ní sójà ɓě ɓɛ́ à mɔ̀à nì gbo-nì-nyɔ̀ ɓěɛ̀ kɛɛ wìǐn.

¹⁴ Dyéɛ, nyɛ sɔ̀ dyɔún wɛ̃ɛ ɖǎ sójà-wuɖuí-kɔ̃̀-nyɔ̀ sɔ̃́ ɓěɔ̀ kè wa nììn sójà ɓěɔ̀ ɖáɓá. Kɛɛ ɓɔ̌ɔ̀, ní ɓaà m̀ ní, dyé ḿ wìǐn.”

¹⁵ Hwɛ̀ ké Bounɓoɔ̀ ínjàɔ̀ cɛ̃ɛ ma Ìɖáájɔ̀ gbo, ké ɔ ɖá, “M̀ kè ɔ mɛ mu. Mɔ̀ǔn ɖá m̀ ké ɔ dyi fɛ̃̀ìn.” Ɔ jèɛɛ, Ìɖáájɔ̀ sí ma sójà-wuɖuí-kɔ̃̀-nyɔ̀ɔ̀ kíɖíí, ké wa mu ma ɖé kã́áɔ̀ gbo.

¹⁶ Ké ɔ cɛ̃ɛ ma kã́áɔ̀ gbo, ké ɔ ɖá, “Bounɓoɔ̀ ɖá, ‘Ɖɛ́ kɔ̃̀ jè m̀ ɖoɓoà kíá, ɓɛ́ wa kéà Béò-Zɛ́ɓɔ̀ mɔ̀à Ɛ́kɔ̀nɔ̀-hwɔ̀ɖɔ̀ɔ̀ nììn gèɖèpɔ́ɔ̀ kɛɛ dyi dièɛ́? Gèɖèpɔ́ɔ̀ ɖò se Éézùɖùɛ̀-ɓòɖòɛ̀ kɔ̃ nìì? M̀ se dyi kánáa mu sɔ̀ìn ɖé puà-puà ɓɛ́ m̀ nyuà kɛɛ mú, kɛɛ nì mu mɛ́ìn jǎà jɛ́ɛ́.’ ”

¹⁷ Ké Áhàzíà mɛ́ ma kà Bounɓoɔ̀ nyuɛ ma kà cɛ̃ɛ dyììn ɖé Ìɖáájɔ̀ múɛ. Áhàzíà se ma gàa-dyù ɖò wóɖóìn. Ɔ jèɛɛ, ɔ ɖíí-gàà ɖò kɔ̃̀ nyɛ́nɛ́ mɔ̀ ma Jówàɖàùn wɛ̃ɛ mɔ̀ ma kã́á ɓó ɔ bɛ̃̌ǐn. Ɖɛ nìà kɛ kpá ma ɖé Jɛ̀hówàɖàùn mɔ̀à Jɛ̀hósáfà mɔ̀à Júɖà-kã̀ǎɔ̀ kɛɛ dyú-gààɔ̀ kɛɛ nììn ɓóɖó-wuɖuí-kɔ̃̀-zɔ̃̀ɔ̀ sɔ̃́ nììnɔ̀ xwíníín.

¹⁸ Ɖɛ tɔ̀ɔ̀ séín ɓɛ́ Kã́á Áhàzíà nyu ma kɛɛ, wa jè céè ɖé Éézùɖùɛ̀-ɓòɖòɔ̀ kã́á ɓěɔ̀ kpáá-ɖɛ̀-sùà-cèè-ɖɛ̀ɔ̀ mú.