2 Jɔ̃́ɔ́ 1 - Ɓǎsɔ́ɔ̀ Báɓòɔ̀

Nyíɔún-zà-zà

¹ Céè-ɖɛ̀ nìà kɛ sɔ̀ìn mɔ̄ mɔ̀à nyɔ vɛ̀nɛ̀ɔ̀ kɛɛ gbo. Ḿ zà mɔ̀ mɔ̀ màa ɓɛ́ Gèɖèpɔ́ɔ̀ ɖǎà gãa kè nì dyú ɓěɔ̀ nyíɔún. Ḿ ɖɛ̀ɓɛ̀ ɓě mú jǎà. Ɔ se ḿ ɖòǔn, kɛɛ nyɔ séín ɓě dyuòà jǎàɔ̀ dyíɛɛ ɖɛ̀ɓɛ̀ ɓě mú ɖekè,

² sepóɛɖé jǎàɔ̀ nì à mú, ké ɔ mu à gbo nììn kánáá pū.

³ Mana kè jĩ́á-jè ɔ kè gìɖìǐ mu à gbo nììn sɔ̀ìn ɖé Gèɖèpɔ́ɔ̀ mɔ̀à Ɓǎɔ̀ kɛɛ gbo, ɔ kè sɔ̀ìn ɖé Jízɛ̀ Kɛ́ɖɛ́ì mɔ̀à ɔ Dyú-gààɔ̀ kɛɛ gbo, ɖé jǎà kè ɖɛ̀ɓɛ̀ǐn-ɖɛ̀ɓɛ̀ǐn mú.

À mɛ tɛ̀mɛ̀ìn nyɔǔn Kɛ́ɖɛ́ì tɛ̀mɛ̀ìn-ɖɛ̀ ɓěɔ̀ ɖòùn

⁴ Ḿ zi ma múàǔn kpáuń mìɔ, ɓɛ́ ḿ kéɛ ma dyí dyuò kà ɓɛ́ nì dyú ɓěɔ̀ ɖíɛ́ ɓě nì ɖé jǎàɔ̀ mú cĩ́ɛń kà ɓɛ́ Ɓǎɔ̀ cɛ̃ɛ ma kà à gbo, ɓɛ́ à kéɛ ma kà nyuɛ.

⁵ Noò, ní ɓaà m̀ ní ɓó kàǔn, ɓěà mɛ ɖɛɓɛìn ɖɛ̀ɓɛ̀ìn mú. Ɖɛ ḿ nìà m̀ gbo céèɛ̌n nyɛɛ se gma ɖìè ɖò. Ɔ mɔ̀ gma ɓɛ́ à ɖǎ ma ɓéɖé sɔ̀ìn ɖé ɖɛ-gbɔ-dè-dè múɛ.

⁶ Ɖɛ̀ɓɛ̀ǐn-ɖɛ̀ɓɛ̀ǐn kɔ̃̀ jè ɓɛ́ ḿ nìà cɛ̃iń nyɛɛ, ɔ mɔ̀, à mɛ cĩ́ ɓɛ́ à ké ɖɛ ɓě ɓɛ́ Gèɖèpɔ́ɔ̀ cɛ̃ à gboɛɛ nyu. Ɖɛ ɔ cɛ̃, ké ɓě wɔ̃́ ma sɔ̀ìn ɖé ɖɛ-gbɔ-dè-dè múɛɛ, ɔ kɛà kɛ̀. Ɔ mɔ̀, ɓě mɛ cĩ́ ɖé ɖɛ̀ɓɛ̀ǐn-ɖɛ̀ɓɛ̀ǐn mú.

⁷ Nyɔ-cá-nyɔ̀ pàɖǎ ɖǎ ɓóɖó-kpàà dà séín mu. Wa mɔ̀ nyɔ ɓě ɓɛ́ wa ní wɔ̃́ìn mú kà ɓɛ́ Jízɛ̀ Kɛ́ɖɛ́ì dyììn ma ɖé nyɔǔn-dyùɛ̀ kpóɖó-dyùà múɛ. Nyɔ nì kà ɓěa mɔ̀ nyɔ-cá-nyɔ̀. Wa mɔ̀ Kɛ́ɖɛ́ì gbo-vɔ̃-nyɔ̀ ɓě.

⁸ Ɓě màìn ɓě mìɔùn mú, ɓɛ́ ɓě ní kɔ̃̀ ɖà ɖɛ ɓě kɔ̃̀ jè ɓě nyu ma kũ̀à kɛɛ xwáɖáún sè, kɛɛ ɓɛ́ ɓě ké ɓěɛ̀ pɛ́ɛ̀-ɖɛ̀ɔ̀ séín dyé.

⁹ Nyɔ ɓɛ́ ɔ se Kɛ́ɖɛ́ì tɛ̀mɛ̀ìn-ɖɛ̀ ɓěɔ̀ ɖòùn nyɔǔn tɛ̀mɛ̀ìn, kɛɛ ɔ zĩ̀ɛ̀n kɔ̃ ɖeɛɛ, ɔ se Gèɖèpɔ́ɔ̀ ɓéɖé. Nyɔ ɓɛ́ ɔ tɛ̀mɛ̀ìn nyɔǔn Kɛ́ɖɛ́ì tɛ̀mɛ̀ìn-ɖɛ̀ ɓěɔ̀ ɖòùn wɛ̃ɛ ɓéɖé Ɓǎɔ̀ kè Dyúɔ̀ ní.

¹⁰ Nyɔ ɖò dyi ɓě gbo dyi, ké ɔ se tɛ̀mɛ̀ìn-ɖɛ̀ nìà kɛ dyàǐn, ɓěǐn ɖá ɓɛ́ ɓě ké ɔ dyi kpɔ̃ ɖé ɓěɛ̀ gbǒɔ̀ mú. Ɓěǐn zà ɔ nyíɔún.

¹¹ Sepóɛɖé nyɔ ɓɛ́ ɔ zà ɔ nyíɔún wɛ̃ɛ, ɔ kèɔ̀ kè peɖeìn ɔ ɖɛ gbà ɓě ɓɛ́ ɔ nyuà kɛɛ mú.

Cuò-wùɖù

¹² Ḿ ɓéɖéɔ́ ɖɛ pàɖǎ ɓɛ́ ḿ kéɛ ɓě gbo céè, kɛɛ ḿ se mɔ́ ɓɛ́ ḿ kéɛ pépà kè céèìn-nì céèìn. Ḿ dèɛ̀ hwòɖǒ kɔ̃, ɓɛ́ ḿ ké ɖé ɓě gbo dyi, ɓɛ́ ḿ kè ɓě ké wùɖù, ɓɛ́ à múàɔ̀ ké gbɔ hwɛ̀.

¹³ Nì ɖíí-màà ɓɛ́ Gèɖèpɔ́ɔ̀ gã ma kà kɛ kè ɔ dyú ɓěɔ̀ zà m̀ nyíɔún.