1 Tímétè 1 - Ɓǎsɔ́ɔ̀ Báɓòɔ̀

Nyíɔún-zà-zà

¹ Céè-ɖɛ̀ nìà kɛ sɔ̀ mɔ̄ Pɔ́ɔ̀ gbo. Ḿ mɔ̀ Kɛ́ɖɛ́ì Jízɛ̀ɛ̀ àpɔ́sò, sepóɛɖé ɔ mɔ̀ ɖɛ ɓɛ́ Gèɖèpɔ́ɔ̀ mɔ̀à à Póìn-nyɔ̀ɔ̀ kɛ kè Kɛ́ɖɛ́ì Jízɛ̀ ɓɛ́ à dèà hwòɖǒ kɔ̃ɛɛ ɖá ḿ mɛ nyu ma kɛ.

² Tímétè, mɔ̀ mɔ̀à ní dyú jɛ́ɛ́ cá ɖé hwìɖǐǐ-taɓa-ɖɛ̀ ɓěɔ̀ múɛɛ, ḿ zà m̀ nyíɔún. Gèɖèpɔ́ɔ̀ mɔ̀à Ɓǎɔ̀ kè Kɛ́ɖɛ́ì Jízɛ̀ mɔ̀à à Bounɓoɔ̀ kɛɛ mɛ po m̀ mana kɔ̃, ɓɛ́ wa ké m̀ jĩ́á-jè kè gìɖìǐ nyí.

Náún-po-po ɓá tɛ̀mɛ̀ìn-ɖɛ̀ se jǎà kɛɛ dyíɛ

³ Ḿ mɔ́ ɓɛ́ m̀ ké ɖé Ɛ́fɛ́sà-hwɔ̀ɖɔ̀ɔ̀ mú sè, kà ɓɛ́ ḿ cɛ̃ɛ ma kà m̀ gbo, ti ɓɛ́ ḿ nì ma ɖé Màsèdónìà-ɓòɖòɔ̀ kɔ̃ muɛń nyɛ. Nyɔ ɖíɛ́ ɓě nìě, ké wa nì nyɔǔn ɖɛ kà kò ɖò tɛ̀mɛ̀ǐn. M̀ mɛ cɛ̃ɛ wa gbo, ɓɛ́ wa kéɛ nyuɛ ɓɔ́.

⁴ Wa mɛ táà nɔ́ɔ́ ɓě kè ɖíì-po-po zɛin ɓě dyi, sepóɛɖé ɖɛ ɓě nìà kɛ dyà dòǐn-zà-zà. Ɔ se dyíin nɔ̀mɔ̀ ɓó ɖɛ ɓɛ́ Gèɖèpɔ́ɔ̀ ɖǎà hwìɖǐi poìn, ɓɛ́ nyɔǔn dyuòà dyí dyììn ɖé hwìɖǐǐ-taɓa-taɓa múɛɛ jè.

⁵ Ɖɛ kɔ̃̀ jè ḿ nìà ɖɛ nìà kɛ cɛ̃iń nyɛɛ, ɔ mɔ̀, ɓɛ́ ɖɛ̀ɓɛ̀ǐn-ɖɛ̀ɓɛ̀ǐn ɓɛ́ ɔ sɔ̀àìn ɖé hwòɖǒ hwɛ̀ǐn-hwɛ̀ǐn kè hwòɖǒ wáɖáá ɔ kè ɖé hwìɖǐǐ-taɓa-taɓa jɛ́ɛ́ múɛɛ ké nì.

⁶ Nyɔ ɖíɛ́ ɓě ɖǎ ɖɛ ɓě nìà kɛ kɔ̃ín pòìn, ké wa ɖǎ hwìǐ sɔ̀ìn ɖé ɖɛ cá-cá cɛ̃-cɛ̃ mú.

⁷ Wa mɔ́ ɓɛ́ wa ké Gèɖèpɔ́ɔ̀ gmaɔ̀ nyɔǔn-tɛ̀mɛ̀ìn-nyɔ̀ jǔ, kɛɛ wa se wa mìɔùn nììn wuɖuɔ̀ múin wɔ̃́, ké wa se ɖɛ ɓě wa nɛ́ìn jìì kɔ̃, ké wa cɛ̃à kɛɛ múin wɔ̃́.

⁸ À dyuò kà gmaɔ̀ nɔ̀mɔ̀ dyíin, ɔ jǔ ké nyɔǔn dyi gmaɔ̀ dyi kpɔ̃ kà ɓɛ́ wa ɓéɖé ɓɛ́ wa kéɔ́ɔ dyi kpɔ̃ɔ nyuɛɛ ní.

⁹ Ɔ mɛ nì m̀ hwìɖǐi kà ɓɛ́ wa se gmaɔ̀ po ɓó dyí-sɛ́ɖɛ́ìn-nyɔ̀ ɓěɔ̀ bììɛ. Kɛɛ nyɔ ɓě kɔ̃̀ bìì wa poà gmaɔ̀ kɛɛ, ɔ mɔ̀ gma-wáɖá-nyɔ̀ ɓě kè se-wuɖu-nyu-nyɔ̀ tɔ̀ɔ̀ ɓě kè nyɔ ɓě ɓɛ́ wa nyuà ɖɛ gbà Gèɖèpɔ́ɔ̀ bũ̌ɛ kè nàmàǔn-nyɔ̀ tɔ̀ɔ̀ ɓě kè nyɔ ɓě ɓɛ́ wa seà Gèɖèpɔ́ɔ̀ nyɔ ɓě, ké wa seà ɔ ɓièɛ kè nyɔ ɓě ɓɛ́ wa ɖáɓáà wa ɖe mɔɔ wa ɓǎ ɓěɛ kè kú-ɖáɓá-nyɔ̀ tɔ̀ɔ̀ ɓě

¹⁰ kè kpeɖe-gbà-nyu-nyɔ̀ tɔ̀ɔ̀ ɓě kè nyɔ ɓě ɓɛ́ wa nyuà wa mǔè ɓě dɛ̃-ɖɛ̀ bũ̌ɛ kè nyɔ ɓě ɓɛ́ wa dyíɖíà wa mǔè ɓěɛ kè se-tɔ́mɔ́-nyɔ̀ ɓě kè seɛ̀-zàse-nyu-nyɔ̀ ɓě ɔ kè nyɔ ɓě ɓɛ́ wa nyuà ɖɛ tɔ̀ɔ̀ ɓě, ɓɛ́ wa seà jǎà-tɛ̀mɛ̀ìn-ɖɛ̀ ɓěɔ̀ dyi kpɔ̃ɛ.

¹¹ Ɖɛ nìà kɛ mɔ̀ tɛ̀mɛ̀ìn-ɖɛ̀ ɓɛ́ ɔ nì ɖé bɔ̃̌ nɔ̀mɔ̀ dyíin ɓɛ́ Gèɖèpɔ́ɔ̀ zàìn ma kà ḿ xwáɖáún wɛ̃ɛ múɛ. Bɔ̃̌ nɔ̀mɔ̀ dyíinɔ̀ sɔ̀ìn ɖé dĩ́ín-dĩ̀ìn Gèɖèpɔ́ɔ̀ ɓɛ́ à ɓàìn nyɛɛ gbo.

Pɔ́ɔ̀ po Gèɖèpɔ́ɔ̀ zùo ɓó ɔ wììɔ̀ jè

¹² Ḿ po Kɛ́ɖɛ́ì Jízɛ̀ mɔ̀à à Bounɓo, ké ɔ nyíà ḿ kpé ɓɛ́ ḿ kéà ní kũ̀àɔ̀ nyuɛɛ zùo. Ḿ po ɔ zùo, sepóɛɖé ɔ ɖáìn ḿ hwòɖǒ-kɔ̃-dè-nyɔ̀, ké ɔ gã ḿ, ɓɛ́ ḿ ké ɔ bìì kũ̀à nyu.

¹³ Kĩ́ín-kĩ́ín nyɛɛ, ḿ cɛ̃ ma ɔ ɖɛ gbà kɔ̃ún, ké ḿ dyéìn ma ɔ gǎ, ké ḿ zàìn ma ɔ zùǔn. Kɛɛ Gèɖèpɔ́ɔ̀ dyé ma ḿ wìǐn, sepóɛɖé ḿ se ma ɔ hwìɖǐǐ taɓa, ké ḿ se ɖɛ ḿ nì ma nyuɛń nyɛɛ dyí dyuò.

¹⁴ Ké Bounɓoɔ̀ nyu ḿ bìì kpeɖeɛ̀-dyíin-nɔ̀mɔ̀-ɖɛ̀ pàɖǎ, ké ɔ nyí ḿ hwìɖǐǐ-taɓa-taɓa kè ɖɛ̀ɓɛ̀ǐn-ɖɛ̀ɓɛ̀ǐn ɓɛ́ nyɔ ɓě kè Kɛ́ɖɛ́ì Jízɛ̀ mɔ̀à nyɔ dyúáɖò kɛɛ ɓéɖéà kɛ.

¹⁵ Ɖɛ nìà kɛ mɔ̀ ɖɛ wa cɛ̃, ké à ɓɛ́ìn hwòɖǒ kɔ̃ dèɛ̀, ké ɔ nɔ̀mɔ̀ dyíin ɓɛ́ à ké ɔ dyi kpɔ̃ gàná. Ɔ mɔ̀, Kɛ́ɖɛ́ì Jízɛ̀ dyi ma ɓóɖó-kpàà kɔ̃, ɓɛ́ ɔ ké nàmàǔn-nyɔ̀ póìn. Ké mɔ̄ mɔ̀ nàmàǔn-nyu-nyɔ̀ vɛ̀nɛ̀ɔ̀.

¹⁶ Ɔ jèɛɛ, Gèɖèpɔ́ɔ̀ dyé ma ḿ wìǐn, ɓɛ́ kà Jízɛ̀ Kɛ́ɖɛ́ì nyuà mɔ̄ mɔ̀à nàmàǔn-nyɔ̀ vɛ̀nɛ̀ɔ̀ kɛɛ kpɔ̃ɔ nyuɛ kɛɛ, ɔ kéɛ nyɔǔn ɔ hwòɖǒ-ku-ku gànáɔ̀ dyí tɛ̀mɛ̀ìn, ɓɛ́ ɔ ké dyí-tɛ̀mɛ̀ìn-ɖɛ̀ jǔ ɓó nyɔ ɓě mu ma ɔ hwìɖǐǐ taɓaùn, ɓɛ́ wa ké sè-ná-sèɛ̀ fɛ̀ɛ̀ ɓéɖéɛɛ bìì.

¹⁷ Sè-ná-sèɛ̀ Kã́á, nyɔ muà cĩ́ìn kánáá pūɛ, ɓɛ́ nyɔǔn seà dyéɛ ɓɛ́ìn, ké ɔ ɖòùn mɔ̀ Gèɖèpɔ́ɔ̀ kɛɛ mɛ ɓéɖé dya-dè-dè kè ɓàìn-ɓàìn kánáá pū. Kǎà ɔ mɛ nì.

¹⁸ Ní dyú Tímétè, ḿ zàìn m̀ náún-po-wùɖù nìà kɛ xwáɖáún. Ɖɛ ɓě ɓɛ́ Gèɖèpɔ́ɔ̀ dèìn ma nyɔ ɖò wĩín ɓá m̀ dyí, ké ɔ cɛ̃ ma kà kɛɛ, ɖò ɖé ní muà m̀ gbo cɛ̃ìn nyɛ̀. Wuɖu ɓěɔ̀ mɛ jǔ nì toún-vɔ̃̀ìn-ɖɛ̀, kà ɓɛ́ nì muà to vɔ̃ùn nɔ̀mɔ̀ dyíin nyɛ,

¹⁹ ɔ kè kà ɓɛ́ m̀ taɓa Gèɖèpɔ́ɔ̀ hwìɖǐǐ kánáá pū, ké m̀ ɓéɖé hwòɖǒ-xwíníín-hwòɖò-dyùà nɔ̀mɔ̀ dyíin teeɛ. Gàa ɖíɛ́ ɓě ní nyu ɖɛ waà hwòɖǒ-xwíníín-hwòɖò-dyùàɔ̀ cɛ̃ wa gboɛ, ké ɔ nyuɛ ké ɓá hwìɖǐǐ-taɓa-ɖɛ̀ ɓěɔ̀ jè dyíɛɛ, ɔ nì kà nyɔ wáɖáà ɓáɖáà kɛ.

²⁰ Hàmɛ̀níà kè Ɛ̀ɖìzánà nì ɖé wa hwìɛ̀. Ḿ ɖǎ wa Sétɔ̃̀ xwáɖáún zàìn, ɓɛ́ wa kéɛ cɛ̃́ kà ɔ se dyíin nɔ̀mɔ̀ ɓɛ́ wa ké Gèɖèpɔ́ɔ̀ ɖɛ gbà kɔ̃ún cɛ̃ɛ.