1 Sámíò 1 - Ɓǎsɔ́ɔ̀ Báɓòɔ̀

Ɛ̀kínà kè ɔ ɓíɖí-gbǒ-xwíníín-nyɔ̀ ɓěɔ̀ mu ɖé Síɖò-hwɔ̀ɖɔ̀ɔ̀ mú

¹ Ti ɖòɛ̀ ɓaɖaa, gàa ɖò nì ma ɓó, ké ɔ nyɛ́nɛ́ mɔ̀ ma Ɛ̀kínà. Ɔ sɔ̀ ma ɖé hwɔɖɔ mɔ̀ ma Wáɖámà kɛɛ mú. Ɔ mɔ̀ ma Zúfì nììn nyɔ ɓěɔ̀ ɖò, ké ɔ cĩ́ ma ɖé Ífèɖèìn mɔ̀à toɖo-ɓòɖòɔ̀ kɛɛ kɔ̃. Zúfì mɔ̀à Ífèɖèìn-nyɔ̀ɔ̀ kɛɛ mɔ̀ nyɔ wóɖóìn ma Tóhù, ké Tóhù wóɖóìn ma Ɛ̀ɖíhù, ké Ɛ̀ɖíhù wóɖóìn ma Jɛ̀ɖóhã̀, ké Jɛ̀ɖóhã̀ wóɖóìn ma Ɛ̀kínà.

² Ɛ̀kínà ɓéɖé ma nyɔ́nɔ́ sɔ̃́. Ɖòɛ̀ nyɛ́nɛ́ mɔ̀ ma Haná, ké nyɔ tɔ̀ɔ̀ nyɛ́nɛ́ mɔ̀ ma Pɛ̀nínà. Pɛ̀nínà mɔ̀ ma dyú-wóɖóìn-màà, kɛɛ Haná sè ma ɖààǔn.

³ Zɔ̃ séín xwíníín nyɛɛ, Ɛ̀kínà kè ɔ ɓíɖí-gbǒ-xwíníín-nyɔ̀ ɓěɔ̀ mu ma ɖé Síɖò-hwɔ̀ɖɔ̀ɔ̀ mú, ɓɛ́ wa ké ɓaà, ɔ kè ɓɛ́ wa ké sáa zà ɖé Bounɓo nìà ɖɛ séín kɔ̃in nyɛɛ gbo. Ɔ mɔ̀ dɛ̀ ɓɛ́ Háfìnì kè Fíníhà mɔ̀à Íìɖáà dyú-gàà ɓě mɔ̀à Bounɓoɔ̀ sáa-zà-nyɔ̀ ɓěɔ̀ kɛɛ nìà kɛ.

⁴ Ti séín ɓɛ́ Ɛ̀kínà mu sáa zàà hwɔùn wɛ̃ɛ, nìí, ɔ tò Pɛ̀nínà kè ɔ dyú-gàà kè ɔ dyú-màà ɓěɔ̀ nììn suaɖɛ̀.

⁵ Bounɓoɔ̀ ɖǎa ma nyu ké Haná mɔ̀ ma ɖàà-màà dyɛo, kɛɛ nìí, Ɛ̀kínà nyí Haná suaɖɛ̀ɔ̀ dàǔn-dà, sepóɛɖé Ɛ̀kínà ɖɛ̀ɓɛ̀ ma Haná mú mìɔ jè.

⁶ Sepóɛɖé Bounɓoɔ̀ ɖǎa ma nyu ké ɔ ɖǎ ma ɖààǔn sè jèɛɛ, ɔ mǔè-bɔ̀nɔ̌ɔ̀ mɔ́ ma ɔ ɖɛ dyéɖéín dyi, ɓɛ́ ɔ ké ɔ dyoɖoún po.

⁷ Ɖɛ nìà kɛ mu ma dyúa ɓó zɔ̃ séín xwíníín. Ti séín ɓɛ́ wa mu ɖé Bounɓoɔ̀ gbǒɔ̀ zɔ̃̌ kɛɛ, Haná mǔè-bɔ̀nɔ̌ɔ̀ mɔ́ ɔ ɖɛ dyéɖéín dyi tee, nìí, Haná vĩ̌, ké ɔ ɓɔ́ ɖii-ɖɛ̀.

⁸ Ɓó tia ɓaɖaa, nìí, Ɛ̀kínà mɔ̀à ɔ dyú-ɓǎɔ̀ kɛɛ diè ɔ dyi, ké ɔ ɖá, “Haná, ɖɛ́ kɔ̃̀ jè m̀ nìà vĩ̌ɛń nyɛ́? Ɖɛ́ kɔ̃̀ jè m̀ seà ɖɛ ɖiɛ mɔ́ kɛ́? Ɖɛ́ kɔ̃̀ jè nì hwòɖǒ kpáà ɖé ɖeiɛ́? Ḿ se ɖɛ kpa ɖé m̀ gbo ɓɛ́ ɔ ké gàa-dyù ɓaɖa-bùè dyí zie?”

Haná kè Íìɖáà

⁹ Wé ɖòɛ̀ ɓaɖaa, ti Ɛ̀kínà kè ɔ gbǒ-xwíníín-nyɔ̀ ɓěɔ̀ nì ma ɖé Síɖò-hwɔ̀ɖɔ̀ɔ̀ mú, ké wa ɖǎ ma ɖɛ ɖiɛ hwɔ ɖé Bounɓoɔ̀ gbǒɔ̀ múɛɛ, púɛɛ, Haná sɔ̀ ma ɓó ɖii-ɖɛ̀-hwùɖùǔɔ̀ gbɔ dyí, ké ɔ xwɛ̃́ìn ma ɓó Bounɓoɔ̀ gbǒɔ̀ wĩín dyi, ɓɛ́ ɔ ké ma ɓaà. Ɓó tia ɓaɖaa, Íìɖáà mɔ̀à sáa-zà-nyɔ̀ vɛ̀nɛ̀ɔ̀ kɛɛ dèɖě ma ɓó ɔ pá nìà ɓó Bounɓoɔ̀ gbǒɔ̀ wĩín nyɛɛ mú dya.

¹⁰ Sepóɛɖé Haná hwòɖǒ kpá ma ɖé ɖei mìɔ jèɛɛ, ɔ vĩ̌ ma, ké ɔ ɓaà ma Bounɓoɔ̀.

¹¹ Ké ɔ nyu ma wuɖu-ɖi-ɖi ɖò ɖé Bounɓoɔ̀ gbo, ké ɔ ɖá, “Óó Bounɓo, mɔ̀ nìà ɖɛ séín kɔ̃in nyɛɛ, gmɔ̀ mɔ̄ mɔ̀à nì gbo-nì-màà-dyùɔ̀ kɛɛ dya, ɓɛ́ m̀ ké ní gǎ-dyé-dyéɔ̀ dyé. Ké ní jè mɛ ɓɔ́ m̀ hwìɖǐi sɔ̀ɔ̀. Ní jè mɛ nì m̀ hwìɖǐi, ɓɛ́ m̀ ké ḿ gàa-dyù ɖò nyí. Ɔ jǔ ké ɔ dyi ná nìǐn, nìí, ní mu gàa-dyùɔ̀ m̀ nyíìn ɖe ɖé ɔ fɛ̀ɛ̀-wè séín mú. Jɛ̃̌ ɖò se ɔ dú muɛ́ mu.”

¹² Ti ɔ nì ma ɓaàǔn ɖé Bounɓoɔ̀ gboɛɛ, púɛɛ, Íìɖáà dè ma ɔ wɔ̃ɔ̀ dyi-túò-túòɔ̀ dyéɖé gbo.

¹³ Haná nì ma ɓaàǔn ɖé ɔ hwòɖǒ bũ̌ jèɛɛ, ɔ wɔ̃-kpũ̀àɔ̀ ɖòùn nì ma dyi túòɛ̌n, kɛɛ Íìɖáà ní wɔ̃́ ma ɔ wuɖuɔ̀. Ɔ jèɛɛ, Íìɖáà poɛ̀n ma hwìɖǐi kà ɓɛ́ ɔ ná ma kɛ,

¹⁴ ké ɔ cɛ̃ɛ ma Haná gbo, ké ɔ ɖá, “Tiɔ̀ nyɛ́ nì mu náá-ɖɛ̀ ɓɔ́ùn wɛ̃́? Táà nì náá-ɖɛ̀ ná-náɔ̀ dyi.”

¹⁵ Hwɛ̀ ké Haná cɛ̃ɛ ma ɔ gbo, ké ɔ ɖá, “Ɓɔ̌ɔ̀, ɔ se ná nìe. Ḿ mɔ̀ màa kɔ̃̀ hwòɖǒ zi dyi pĩ́àǔn wɛ̃. Ḿ se náá-ɖɛ̀ ɖò ná fɔɔ. Kɛɛ ḿ nì ɖɛ séín nì ní hwòɖǒ-dyùàɔ̀ bũ̌ɛɛ dyi púèɛ̌n ɓó Bounɓoɔ̀ dyúa.

¹⁶ Ɓɔ́ mɔ̄ mɔ̀à nì gbo-nì-màà-dyùɔ̀ kɛɛ dyéɛ kà nyɔ dyéà hwòɖǒ-kɔ̃in-nyìnììn-màà ɖò kɛ, sepóɛɖé ḿ ɖúɔ́ má dà pá nìà kɛ mú ɓaàǐn dyíɛ. Ní hwòɖǒɔ̀ zi ɖé ɖei kpáuń mìɔ.”

¹⁷ Hwɛ̀ ké Íìɖáà cɛ̃ɛ ma ɔ gbo, ké ɔ ɖá, “Mu ɖé gìɖìǐ mú, ké Éézùɖùɛ̀ Gèɖèpɔ́ɔ̀ mɛ nyí m̀ ɖɛ m̀ ɖǎà ɔ zɔ̀ìn nyɛ.”

¹⁸ Ké Haná zà ma ɖé wuɖu, ké ɔ ɖá, “Ɓɔ̌ɔ̀, nì hwòɖǒ mɛ dèìn ḿ múin.” Ké ɔ sɔ̀ìn ma ɓó daí, ké ɔ mu ma, ké ɔ ɖi ma ɖɛ, ké ɔ hwòɖǒ dè ma dyi.

Sámíò wóɖó-wóɖó kè ɔ Bounɓoɔ̀ xwáɖáún-zàìn-zàìn

¹⁹ Wéɔ̀ nyɔ kɔ ma ɓó dyíɛɛ, Ɛ̀kínà kè ɔ gbǒ-xwíníín-nyɔ̀ ɓěɔ̀ sɔ̀ ma dyí ɓó gànà-kṹún mɛ̀nɛ̀ɛ̀, ké wa ɓiè ma Bounɓoɔ̀, ké wa mu ma ɖé wa ɓíɖí-hwɔ̀ɖɔ̀ mɔ̀à Wáɖámà kɛɛ mú ɖe. Hwɛ̀ ké Ɛ̀kínà kè Haná nì ma ɓó da. Ké Bounɓoɔ̀ jǔ ma Hanáà ɓaà-wùɖùɔ̀ gɔ̃̌.

²⁰ Ɔ jèɛɛ, Haná nì ma zùù kɔ̃, ké ɔ wóɖóìn ma gàa-dyù ɖò. Ké ɔ jǔìn ma ɔ Sámíò-nyɛ̀nɛ̀ kɔ̃̀ xwíníín mɔ̀à Bounɓoɔ̀ zɔ̀ìn-ɖɛ̀ kɛ, sepóɛɖé Haná ɖá, “Ḿ zɔ̀ìn ma ɔ Bounɓoɔ̀” jè.

²¹ Ti ɓɛ́ Ɛ̀kínà kè ɔ gbǒ-xwíníín-nyɔ̀ ɓěɔ̀ mu ma ɖé Síɖò-hwɔ̀ɖɔ̀ɔ̀ mú ɖe, ɓɛ́ ɔ ké ma ɔ zɔ̃ɔ̀ sáa-zàìn-ɖɛ̀ɔ̀ Bounɓoɔ̀ nyí, ɔ kè ɓɛ́ ɔ ké ma sáa-zàìn-ɖɛ̀ɔ̀ nyɔ ɓá ɖɛ kɔ̃̀ wuɖu ɔ ɖǎ ma ɖi ɖé Bounɓoɔ̀ gboɛ nyuɛɛ,

²² Haná se ma mu ɓó tia ɓaɖa. Sepóɛɖé ɔ ɖǎa ma ɔ dyú-ɓǎɔ̀ gbo cɛ̃, ké ɔ ɖá, “Gàa-dyùɔ̀ mu nɛɛ̀ ɓɔ́ùn, hwɛ̀ ɓɛ́ ḿ ké ɔ kpa ɖé Bounɓoɔ̀ gbǒɔ̀ mú, ɓɛ́ ḿ ké ɔ Bounɓoɔ̀ xwáɖáún zàìn, ké ɖéɛ̀ ɔ muá cĩ́ìn kánáá pū.”

²³ Hwɛ̀ ké Ɛ̀kínà cɛ̃ɛ ma ɔ gbo, ké ɔ ɖá, “Nyu ɖɛ sɛ́ɖɛ́ìn dyí ɖé m̀ gboɛ. Sè ɓíɖíi, ɓɛ́ dyúɔ̀ ké nɛɛ̀ ɓɔ́ hwɛ̀. Kɛɛ wɛ̃́ɛ́ kɛɛ, m̀ mɛ nyu ɖɛ kɔ̃̀ wuɖu ɓɛ́ m̀ ɖià ɓó Bounɓoɔ̀ dyúa kɛ.” Ɔ jèɛɛ, Haná sè ma ɓíɖíi, ké ɔ nyáìn ma ɔ dyúɔ̀ tee, ké ɔ ɓɔ́ ma nɛɛ̀ hwɛ̀.

²⁴ Ti ɓɛ́ Haná ɖǎ ma dyúɔ̀ nɛɛ̀ wɔ̃ zà kɛɛ, dyúɔ̀ ɓíè ma dyí ke dyɛo, kɛɛ Haná kè ɔ nyɔ ɓěɔ̀ ɖú ma nà-dyù-gbɔ́ɔ̀ kè ɓìɖǐ ɓíɔ́ ɓɛ́ ɔ nyuá zɔ̃ tã kɛ kè fáɖáɓà gbǎ-wĩín-wè sɔ̃́ ɔ kè wã́ìn-tɛ̀ɓɛ̀ɛ̌ ɖò dyí, ké ɔ dyà ma wa ɖé Bounɓoɔ̀ gbǒ nìà ɖé Síɖò-hwɔ̀ɖɔ̀ɔ̀ múɛɛ mú.

²⁵ Ti wa ɖǎ ma ɓìɖǐ ɓíɔ́ɔ̀ sáa zàìn nyɛɛ, púɛɛ, wa dyà ma dyúɔ̀ Íìɖáà gbo.

²⁶ Hwɛ̀ ké Haná cɛ̃ɛ ma Íìɖáà gbo, ké ɔ ɖá, “Ɓɔ̌ɔ̀, mɔ̄ mɔ̀ màa ɓɛ́ m̀ dyé ma kà, ké ḿ nì ma kà Bounɓoɔ̀ ɓaàǔn wɛ̃̀.

²⁷ Ḿ ɓaà ma dyú nìà kɛ jè. Ké Bounɓoɔ̀ ɖǎ dyú kɔ̃̀ jè ḿ ɓaà ma kà ɔ kɛɛ ḿ nyí.

²⁸ Ɔ jèɛɛ, ḿ zàìn dyúɔ̀ Bounɓoɔ̀ xwáɖáún. Kà ɓɛ́ ɔ mu cĩ́ɛń nììn nyɛɛ, Bounɓoɔ̀ mɔ̀ nyɔ kɔ̃̀ɔ̀.” Ké wa ɓièìn ma ɓó Bounɓoɔ̀.