1 Píɖɛ̀ 1 - Ɓǎsɔ́ɔ̀ Báɓòɔ̀

Nyíɔún-zà-zà

¹ Céè-ɖɛ̀ nìà kɛ sɔ̀ mɔ̄ Píɖɛ̀ mɔ̀à Jízɛ̀ Kɛ́ɖɛ́ìɛ̀ àpɔ́sòɔ̀ kɛɛ gbo. Ḿ zà ɓě mɔ̀à nyɔ ɓě ɓeàìn dyi, ké ɓě mɔ̀à ɖéè ɖé Pɔ̃́tɔ̀-ɓòɖòɔ̀ kè Gàɖézìà-ɓòɖòɔ̀ kè Kàpàdósìà-ɓòɖòɔ̀ kè Ésìà-ɓòɖòɔ̀ ɔ kè Bìtínìà-ɓòɖòɔ̀ kɔ̃ɛɛ nyíɔún.

² Gèɖèpɔ́ɔ̀ mɔ̀à Ɓǎɔ̀ kɛɛ gã ma ɓě kà ɔ nyuɛ zɔ̃̌ɔ̀ gbɔ poɛ kĩ́ín nyɛ, ɓɛ́ ɔ Zùùɔ̀ kéɛ nyu ɓɛ́ bɛ̃̌ ɖò ké se ɓě bũ̌ nì, ɓɛ́ ɓě ké Jízɛ̀ Kɛ́ɖɛ́ì wuɖu nyu, ɓɛ́ ɔ nyɔmɔɔ̀ ké ɓě mú hwɔ. Mana kè gìɖìǐ mɛ zi ɓě kɔ̃ nìǐn.

Hwòɖǒ-kɔ̃-dè-ɖɛ̀

³ Ɓěà mɛ ɓàìn à Bounɓo Jízɛ̀ Kɛ́ɖɛ́ì Ɓǎ Gèɖèpɔ́ɔ̀. Ɔ wìì pàɖǎ ɓɛ́ ɔ ɓéɖéà kɛɛ nyuɛ ké à wóɖó ɖe ɖie dyììn ɖé Jízɛ̀ Kɛ́ɖɛ́ì gĩɔ-zà-zà mú. Ɖɛ nìà kɛ nyuɛ ké à ɓéɖé hwòɖǒ-kɔ̃-dè-ɖɛ̀ ɓɛ́ ɔ mu nììn kánáá pūɛ.

⁴ Ɖɛ ɓě ɓɛ́ à dèà hwòɖǒ kɔ̃ɛɛ mɔ̀ ɖɛ ɓě ɓɛ́ à mu kɔ̃̀ùn wɛ̃. Ɖɛ ɓěɔ̀ se mú gbɔɔ̀ ɓɛ́ìn. Ɖɛ ɖò se wa dyíin nyìnìɛ̀n ɓɛ́ìn, ké wa se wáɖáa ɓɛ́ìn. Gèɖèpɔ́ɔ̀ dè wa dyi ɓó ɓě bìì ɖé dyɔún.

⁵ Wa nì ɓó ɓě mɔ̀à nyɔ ɓě ɓɛ́ Gèɖèpɔ́ɔ̀ kpéɔ̀ gmɔ̀à dyí dyììn ɖé hwìɖǐǐ-taɓa-taɓa múɛɛ bìì. Gèɖèpɔ́ɔ̀ gmɔ̀ ɓě dyí, kà ɓɛ́ ɓě nìà pó-pó ɓɛ́ Gèɖèpɔ́ɔ̀ ɖǎà ti dyéìn, ɓɛ́ ɔ kéà ɔ nyɔǔn dyí tɛ̀mɛ̀ìn ɖé ti hwɛ̀ìn-gbɔɔ̀ múɛɛ fòɛ̌n nyɛ.

⁶ Ɓě kpá múàǔn ɓó ɖɛ nìà kɛ jè. Ɓě ɓɛ́ìn wìǐn kpáa ɖɛ wè ɓó kàǔn ɓó mú-dɔ̃̌-dɔ̃̌ kò-kò ɓě ɓɛ́ ɓě nìà dyí dyéɛń nyɛɛ bìì dyɛo, kɛɛ ɓě mɛ kpá múàǔn.

⁷ Mú-dɔ̃̌-dɔ̃̌ ɓě nìà kɛ dyi, ɓɛ́ ɓěɛ̀ hwìɖǐǐ-taɓa-taɓaɔ̀ ké mú-dɔ̃̌-dɔ̃̌ dyé, ɓɛ́ ɔ ké hwìɖǐǐ-taɓa-taɓa jɛ́ɛ́ jǔ. Góò ɓɛ́ìn mú gbɔɔ̀ dyɛo, kɛɛ wa dɔ̃̌ɔ mú ɖé nyɛ mú. Ɓě nììn hwìɖǐǐ-taɓa-taɓa kpa ɖɛ mìɔ ké ɔ zi góò dyí vɛ̃in. Ké ɓěɛ̀ hwìɖǐǐ-taɓa-taɓa jɛ́ɛ́ɔ̀ muɛ nyuùn ɓɛ́ ɓě ké ɓàìn-ɓàìn kè dĩ́ín-dĩ̀ìn ɔ kè dya-dè-dè ɓéɖé ti ɓɛ́ Jízɛ̀ Kɛ́ɖɛ́ì muà xwáɖáún wóɖóùn wɛ̃.

⁸ Ɓě séè ɔ dyé ke dyɛo, kɛɛ ɓě ɖɛ̀ɓɛ̀ ɔ mú. Ɓě séè ɔ dyé ke ɓó kàǔn, kɛɛ ɓě taɓa ɔ hwìɖǐǐ, ké ɔ nyuɛ ké ɓě kpá múàǔn, ké ɓěɛ̀ múà zi kpé wɔ̃ ɓúáuń, ké ɔ se kɔ̃in zaìn ɓɛ́ìn,

⁹ sepóɛɖé ɓě nìǎ ɖɛ kɔ̃̀ jè ɓě ɓéɖéà hwìɖǐǐ-taɓa-taɓaɔ̀ kɛɛ dyéɛń. Ɔ mɔ̀ ɓěɛ̀ zùùɔ̀ pó-pó.

¹⁰ Pó-pó nìà kɛ jè kpáá-ɖɛ̀-cɛ̃-nyɔ̀ ɓěɔ̀ gmɔìn zɔ̃̌ɔ̀ dyi nɔ̀mɔ̀ dyíin, ké wa diè zɔ̃̌ɔ̀ kà ɖɛi ɓó ɔ jèɛ̀. Wa mɔ̀ nyɔ cɛ̃ ma kà wuɖu ɓě ɓɛ́ Gèɖèpɔ́ɔ̀ dèìn ma wa wĩín ɓá mana ɓɛ́ ɔ mu ma kà ɓě nyíìn nyɛɛ jè dyíɛ̀.

¹¹ Wa vɔ̃ ma ɓɛ́ wa ké kà tiɔ̀ mu ma nììn nyɛ, ɔ kè kà ɔ mu ma dyiɛ nyuùn wɛ̃ɛ jè dyuò. Kɛ́ɖɛ́ì Zùù nì ma wa múɛɛ cɛ̃ ma ti nìà kɛ jè wa gbo, ti ɓɛ́ ɔ cɛ̃ ma kà gǎ ɓě ɓɛ́ Kɛ́ɖɛ́ì mu ma dyéìn nyɛ ɔ kè dĩ́ín-dĩ̀ìn ɓě mu ma ɓó dyí kɔùn wɛ̃ɛ jè kɛ.

¹² Gèɖèpɔ́ɔ̀ tɛ̀mɛ̀ìn ma ɔ kpáá-ɖɛ̀-cɛ̃-nyɔ̀ ɓě nìà kɛ dyí kà ɓɛ́ ɖɛ ɓě wa nì ma kà nyuɛń nyɛɛ se ma wa mìɔùn bìì, kɛɛ ɔ mɔ̀ ɓě bììɛ. Ɖɛ ɓě wa nyu ma kà kɛɛ mɔ̀ ɖɛ ɓě ɓɛ́ wa cɛ̃ ma, ké ɓě ɖǎà wa wɔ̃́ kàǔn wɛ̃. Nyɔ cɛ̃ ma ɓě ɖɛ ɓě nìà kɛ gboɛɛ mɔ̀ nyɔ ɓě cɛ̃ ma ɓě bɔ̃̌ nɔ̀mɔ̀ dyíinɔ̀ gboɛ. Wa wùɖùìn ma ɖé Zùù Hwɛ̀ǐn-hwɛ̀ǐn sɔ̀ìn ɖé dyɔún wɛ̃ɛ mú. Ɖɛ ɓě nìà kɛ mɔ̀ ɖɛ ɓě ɓɛ́ ínjà ɓěɔ̀ mɔ́ ɓɛ́ wa ké múin gmɔìn nyɛ.

À cĩ́-cĩ́ɔ̀ se ɓéɖé ɓɛ́ ɔ ké kɛɛ ɖò ɓéɖé

¹³ Ɔ jèɛɛ, ɓěɛ̀ hwòɖǒ mɛ dyé ti ɓó kũ̀à nyu jè. Ɓě mɛ kpɔ̃ ɓě mìɔùn dyí. Ɓě mɛ dè mana ɓɛ́ ɓě muà ɓéɖéìn ti ɓɛ́ Jízɛ̀ Kɛ́ɖɛ́ì muà xwáɖáún wóɖóùn wɛ̃ɛ dyé jè hwòɖǒ kɔ̃ gàná cá.

¹⁴ Ɓě mɛ jǔ Gèɖèpɔ́ɔ̀ wuɖu-nyu-dyù ɓě. Ɓě ní ɖá ɓɛ́ ɖɛ ɓě kɔ̃̀ tó nyu ma kà ɓě, ti ɓɛ́ ɓě séè ma kà ɖɛ ɖò dyí dyuò keɛɛ kéɛ nyu ɓɛ́ ɓěɛ̀ kpeɖeɔ̀ ké dyí zàìn.

¹⁵ Kɛɛ ɖɛ séín ɓě ɓɛ́ ɓě mu nyuùn wɛ̃ɛ kɛɛ ɖò ní ɖá ɓɛ́ ɔ ké ɓě bũ̌ nì kà ɓɛ́ Gèɖèpɔ́ɔ̀ ɓɛ́ ɔ ɖáà ɓěɛɛ seà kɛɛ ɖò ɓéɖéɛ.

¹⁶ Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, “Ɓě mɛ hwɛ̀ mú, sepóɛɖé mɔ́ún hwɛ̀ mú.”

¹⁷ Gèɖèpɔ́ɔ̀ dyi nyɔǔn-dyùɛ̀ zaa wɔ̃ poín, ɔ ní zi wáká dyúáɖò kɔ̃. Ɔ po nyɔ ɓěɔ̀ zaa wɔ̃ kà ɓɛ́ waà nyuu-ɖɛ̀ ɓěɔ̀ nyu nìɛ̀ kɛ. Ɓě dyi ɔ gbo wùɖù ní, ɓě ɖáìn ɔ ɓě Ɓǎ. Ɔ jèɛɛ, kà ɓě mu cĩ́ìn nyɛɛ, ɓě mɛ fɛ̃̀ìn ɔ dyi kánáá pū, kà ɓɛ́ ɓě mɔ̀à ɖéè nɔ̄ ɓóɖó-kpàà kɔ̃ɛ.

¹⁸ Ɓě dyuò ɖɛ nyuɛ ma ké ɓě gbǎà ma ɖé ɓě ɓǎ nììn ɓǎ ɓěɛ̀ kpeɖe se ɖɛ kpa, ɓɛ́ ɓě ɖú ma dyíɛɛ xwaún wɛ̃. Ɔ se ɖɛ ké mú gbɔɔ̀ kà séɓàɖà kè góò gbɔɔ̀à mú kɛ.

¹⁹ Ɖɛ gbǎà ma kà ɓěɛɛ mɔ̀ Kɛ́ɖɛ́ì nyɔmɔɔ kpa ɖɛɔ̀. Ɔ nì ma kà ɓáɖáá-dyù se kɛɛ ɖò ɓéɖé, ké ɖɛ ɖò seà dyíin nyìnììn nyɛɛ nyɔmɔɔ nìà kɛ.

²⁰ Gèɖèpɔ́ɔ̀ gã zɔ̃̌ɔ̀ ɔ kĩ́ín, hwɛ̀ ké ɔ mɛ ma ɓóɖó-kpàà. Ké ɔ tɛ̀mɛ̀ìn ma ɔ nyɔǔn dyí ɖé wé hwɛ̀ìn-gbɔ ɓěà mú, ɓó ɓě jè.

²¹ Ɓě ɖǎ Gèɖèpɔ́ɔ̀ mɔ̀ nyɔ ɓɛ́ ɔ zà ma kà Kɛ́ɖɛ́ì gĩɔ, ké ɔ nyí ma kà ɔ dĩ́ín-dĩ̀ìn nyɛɛ hwìɖǐǐ taɓa dyììn ɖé ɔ mú. Ɔ jèɛɛ, ɓěɛ̀ hwìɖǐǐ-taɓa-taɓaɔ̀ kè ɓěɛ̀ hwòɖǒ-kɔ̃-dè-ɖɛ̀ɔ̀ nì ɖé Gèɖèpɔ́ɔ̀ mú.

²² Kàǔn wɛ̃ɛ, kà ɓɛ́ ɓě ɖǎà jǎà-wùɖù ɓěɔ̀ nyu, ké ɔ ɖǎà ɓě mìɔùn mú hwɔ, ké ɓě ɖɛ̀ɓɛ̀à ɓě ɖíí Kɛ́ɖɛ́ì ɖeín-sí-nyɔ̀ ɓěɔ̀ mú jɛ́ɛ́ kɛɛ, ɓě mɛ ɖɛɓɛìn ɖɛ̀ɓɛ̀ìn mú hwòɖǒɛ̀-ɖé-hwɛ̀-kà.

²³ Ɓě ɖǎ wóɖó ɖe ɖie dyììn ɖé Gèɖèpɔ́ɔ̀ cĩ́-cĩ́-wùɖù ɓɛ́ ɔ seà dyi ziɛ́ muɛɛ mú. Ké ɖɛ ɓɛ́ ɔ wóɖóàìn ɓěɛɛ se ɖɛ ɓɛ́ ɔ ɓɛ́ìn mú gbɔɔ̀ kɛ, kɛɛ ɔ mɔ̀ ɖɛ se mú gbɔɔ̀ ɓɛ́ìn nyɛ.

²⁴ Sepóɛɖé Gèɖèpɔ́ɔ̀-cèè-ɖɛ̀ɔ̀ ɖá, “Nyɔǔn séín nì kà pìǐ nìà kɛ, ké waà dyíin-nɔ̀mɔ̀-nɔ̀mɔ̀ séín ɓěɔ̀ nì kà cu-bùè nìà kɛ. Pìǐɔ̀ dyɛ ní, ké cu-bùèɔ̀ keè ní,

²⁵ kɛɛ ɖɛ ɓɛ́ Bounɓoɔ̀ cɛ̃ kɛɛ nì kánáá pū.” Wuɖu ɓɛ́ bɔ̃̌ nɔ̀mɔ̀ dyíinɔ̀ dyà ma ɓěɛɛ, ɔ nìàǒ wɛ̀.