زَبُور 1 - الكتاب المقدس بالعربي الدارجي هنا تشاد

الجُزُء الأوّل هنا الزَبُور

¹ مَبْرُوكْ لِلنَّادُمْ الْمَا يِتَابِعْ وَصِيَّةْ الْهَوَانِينْ وَ مَا يِشِيلْ طَرِيقْ الْمُذْنِبِينْ وَ مَا يَقْعُدْ مَعَ الشَّمَّاتِينْ.

² لَاكِنْ بِتَوْرَاةْ اللّٰهْ يَفْرَحْ وَ بِالتَّوْرَاةْ، لَيْل وَ نَهَارْ يَمْدَحْ.

³ هُو مِثِلْ شَدَرَةْ الْقَايْمَةْ فِي خَشُمْ الْبَحَرْ وَ تَلْدَ فِي وَكِتْهَا وَ وَرْشَالْهَا دَايْماً أَخْضَرْ. وَ هُو يَنْجَحْ فِي كُلَّ شَيّءْ الْيِسَوِّيهْ.

⁴ وَ لَاكِنْ النَّاسْ الْهَوَانِينْ مَا مِثِلْ دَا. هُمَّنْ مِثِلْ الْأُتَّابْ التِّشِيلَهْ الرِّيحْ.

⁵ وَ مِثِلْ دَا، الْهَوَانِينْ مَا يُقُولُوا شَيّءْ قِدَّامْ الشَّرِيعَةْ وَ الْمُذْنِبِينْ مَا يَقْعُدُوا مَعَ مُجْتَمَعْ الصَّالِحِينْ.

⁶ أَشَانْ طَرِيقْ الصَّالِحِينْ، اللّٰهْ يَحْفَضَهْ وَ لَاكِنْ طَرِيقْ الْهَوَانِينْ، فِي الضَّلَامْ يِوَدِّرَهْ.