مَتَّى 1 - الكتاب المقدس بالعربي الدارجي هنا تشاد

جُدود المسيح

¹ دَاهُو قُرْمَةْ هَنَا جُدُودْ عِيسَى الْمَسِيحْ إِبْن دَاوُدْ إِبْن إِبْرَاهِيمْ.

² إِبْرَاهِيمْ وِلِدْ إِسْحَاقْ وَ إِسْحَاقْ وِلِدْ يَعْقُوبْ وَ يَعْقُوبْ وِلِدْ يَهُوذَا وَ أَخْوَانَهْ.

³ وَ يَهُوذَا وِلِدْ فَارِصْ وَ زَارَحْ وَ أَمُّهُمْ تَامَارْ. وَ فَارِصْ وِلِدْ حَصْرُونْ. وَ حَصْرُونْ وِلِدْ رَامْ.

⁴ وَ رَامْ وِلِدْ عَمِنَدَابْ. وَ عَمِنَدَابْ وِلِدْ نَحْشُونْ. وَ نَحْشُونْ وِلِدْ سَلْمُونْ.

⁵ وَ سَلْمُونْ وِلِدْ بُعَازْ وَ أَمّ بُعَازْ هِي رَاحَابْ. وَ بُعَازْ وِلِدْ عُبَيْد وَ أَمّ عُبَيْد هِي رَعُوثْ. وَ عُبَيْد وِلِدْ يَسَّى.

⁶ وَ يَسَّى وِلِدْ دَاوُدْ الْمَلِكْ. وَ دَاوُدْ وِلِدْ سُلَيْمَانْ وَ أَمّ سُلَيْمَانْ، أَوَّلْ هِي مَرِةْ أُرِيَّا.

⁷ وَ سُلَيْمَانْ وِلِدْ رَحَبْعَامْ. وَ رَحَبْعَامْ وِلِدْ أَبِيَّا. وَ أَبِيَّا وِلِدْ عَصَاةْ.

⁸ وَ عَصَاةْ وِلِدْ يَهُوشَفَطْ. وَ يَهُوشَفَطْ وِلِدْ يُورَامْ. وَ يُورَامْ وِلِدْ عُزِّيَّا.

⁹ وَ عُزِّيَّا وِلِدْ يُوتَامْ. وَ يُوتَامْ وِلِدْ أَحَازْ. وَ أَحَازْ وِلِدْ حِزْقِيَّا.

¹⁰ وَ حِزْقِيَّا وِلِدْ مَنَسَّى. وَ مَنَسَّى وِلِدْ آمُونْ. وَ آمُونْ وِلِدْ يُوشِيَّا.

¹¹ وَ يُوشِيَّا وِلِدْ يُيَكِينْ وَ أَخْوَانَهْ وَ دَا فِي الزَّمَنْ الْفَوْقَهْ وَدَّوْا بَنِي إِسْرَائِيلْ فِي الْغُرْبَةْ فِي بَلَدْ بَابِلْ.

¹² وَ بَعَدْ وَدَّوْهُمْ فِي بَابِلْ، يُيَكِينْ وِلِدْ شَلْتِيِيلْ. وَ شَلْتِيِيلْ وِلِدْ زَرُبَابِلْ.

¹³ وَ زَرُبَابِلْ وِلِدْ أَبِهُودْ. وَ أَبِهُودْ وِلِدْ أَلِيَاقِيمْ. وَ أَلِيَاقِيمْ وِلِدْ عَزُورْ.

¹⁴ وَ عَزُورْ وِلِدْ صَدُوقْ. وَ صَدُوقْ وِلِدْ أَخِيمْ. وَ أَخِيمْ وِلِدْ أَلِيُودْ.

¹⁵ وَ أَلِيُودْ وِلِدْ أَلِعَازَرْ. وَ أَلِعَازَرْ وِلِدْ مَتَّانْ. وَ مَتَّانْ وِلِدْ يَعْقُوبْ.

¹⁶ وَ يَعْقُوبْ وِلِدْ يُوسُفْ. وَ يُوسُفْ دَا رَاجِلْ مَرْيَمْ وَ مَرْيَمْ وِلْدَتْ عِيسَى الْبِنَادُوهْ الْمَسِيحْ.

¹⁷ وَ خَلَاصْ مِنْ إِبْرَاهِيمْ لَحَدِّي دَاوُدْ، حَسَبَوْا 14 جُدُودْ. وَ مِنْ دَاوُدْ لَحَدِّي الْوَكِتْ الْوَدَّوْا فَوْقَهْ الْيَهُودْ فِي بَابِلْ، حَسَبَوْا 14 جُدُودْ. وَ مِنْ وَكِتْ وَدَّوْا الْيَهُودْ فِي بَابِلْ لَحَدِّي وَالُودَةْ الْمَسِيحْ، حَسَبَوْا 14 جُدُودْ.

والودة المسيح

¹⁸ دَاهُو تَارِيخْ وَالُودَةْ عِيسَى الْمَسِيحْ. وَ أَمَّهْ أُسُمْهَا مَرْيَمْ وَ مَرْيَمْ دِي هِي بِنَيَّةْ عُدْرِيَّةْ وَ رَاجِلْ وَاحِدْ أُسْمَهْ يُوسُفْ كَرَبْ رَاسْهَا. وَ قُبَّالْ مَا يِشِيلْهَا، هِي بِقَتْ غَلْبَانَةْ بِقُدْرَةْ الرُّوحْ الْقُدُّوسْ.

¹⁹ وَ يُوسُفْ رَاجِلْهَا دَا، هُو نَادُمْ صَالِحْ وَ مَا يِدَوْر يِعَيِّبْهَا قِدَّامْ النَّاسْ. وَ أَشَانْ دَا، هُو شَالْ نِيَّةْ يِطَلِّقْهَا بِعَشِيرْ.

²⁰ وَ وَكِتْ هُو لِسَّاعْ قَاعِدْ يِفَكِّرْ فِي الْكَلَامْ دَا، وَاحِدْ مِنْ مَلَائِكَةْ اللّٰهْ جَاءْ لَيَّهْ فِي رُؤْيَةْ وَ قَالْ: «يَا يُوسُفْ وِلَيْد دَاوُدْ، مَا تَخَافْ. شِيلْ مَرْيَمْ فِي بَيْتَكْ وَ خَلِّي تَبْقَى مَرْتَكْ أَشَانْ الصَّغِيرْ الْفِي بَطُنْهَا دَا، جَاءْ بِقُدْرَةْ الرُّوحْ الْقُدُّوسْ.

²¹ وَ هِي تَلْدَ وِلَيْد وَ إِنْتَ تِسَمِّيهْ عِيسَى أَشَانْ هُو بَسْ النَّادُمْ الْيِنَجِّي شَعَبَهْ مِنْ ذُنُوبْهُمْ.»

²² وَ كُلَّ يَبْقَى مِثِلْ دَا أَشَانْ الْكَلَامْ الْاللّٰهْ قَالَهْ بِخَشُمْ النَّبِي يِتِمّ:

²³ <الْبِنَيَّةْ الْعُدْرِيَّةْ تَبْقَى غَلْبَانَةْ وَ تَلْدَ وِلَيْد وَ يِسَمُّوهْ عِمَّانُوِيل.> وَ أُسُمْ عِمَّانُوِيل مَعَنَاتَهْ اللّٰهْ مَعَانَا.

²⁴ وَ وَكِتْ يُوسُفْ قَمَّ مِنْ النَّوْم، هُو سَوَّى الشَّيّءْ الْمَلَكْ اللّٰهْ قَالَهْ لَيَّهْ وَ شَالْ مَرْتَهْ فِي بَيْتَهْ.

²⁵ وَ لَاكِنْ مَا لِمِسْهَا لَحَدِّي وِلْدَتْ وِلَيْد وَ سَمَّاهْ عِيسَى.