يَعْقُوب 1 - الكتاب المقدس بالعربي الدارجي هنا تشاد

¹ جَوَابْ مِنِّي أَنَا يَعْقُوبْ عَبْد اللّٰهْ وَ عَبْد رَبِّنَا عِيسَى الْمَسِيحْ. وَ نِرَسِّلَهْ لَيْكُو إِنْتُو أُمَّةْ اللّٰهْ الْمُشَتَّتِينْ فِي أَيِّ بَكَانْ. السَّلَامْ عَلَيْكُمْ.

الصبُر في التعب و الإيمان الثابِت

² يَا أَخْوَانِي، أَفْرَحَوْا فِي أَيِّ تَعَبْ الْيَجِيكُو

³ أَشَانْ تَعَرْفُوا كَدَرْ التَّعَبْ يِجَرِّبْ إِيمَانْكُو وَ كَنْ قَعَدْتُوا ثَابْتِينْ فِي أُسْط التَّعَبْ، تَبْقَوْا نَاسْ صُبُورِينْ.

⁴ وَ خَلِّي صَبُرْكُو يَبْقَى تَمَامْ أَشَانْ بَيَّهْ تَبْقَوْا كَامِلِينْ وَ قَادْرِينْ وَ مَا فِي شَيّءْ يِقَصِّرْ لَيْكُو.

⁵ كَنْ نَادُمْ مِنْكُو مَا عِنْدَهْ حِكْمَةْ، خَلِّي يَطْلُبْهَا مِنْ اللّٰهْ وَ اللّٰهْ يَنْطِيهْ. أَشَانْ اللّٰهْ يَنْطِي لِكُلَّ النَّاسْ بِزِيَادَةْ بِجُودْ وَ بَلَا لُوَامَةْ.

⁶ وَ خَلِّي يَطْلُبْهَا بِإِيمَانْ ثَابِتْ وَ بَلَا شَكَكْ. نَادُمْ كَنْ يِشَكِّكْ، هُو مِثِلْ شَلَّالْ الْبَحَرْ التِّشِيلَهْ الرِّيحْ وَ تِهِزَّهْ.

⁷ نَادُمْ مِثِلْ دَا، خَلِّي مَا يُخُطّ فِي عَقْلَهْ كَدَرْ يَلْقَى شَيّءْ مِنْ رَبِّنَا

⁸ أَشَانْ النَّادُمْ دَا قَلْبَهْ إِتْنَيْن وَ هُو مَا ثَابِتْ فِي أَيِّ شَيّءْ الْيِسَوِّيهْ.

سياد المال و المساكين

⁹ الْأَخُو الْمُؤمِنْ الْمِسْكِينْ، خَلِّي يَفْرَحْ أَشَانْ اللّٰهْ دَرَّجَهْ.

¹⁰ وَ الْمُؤمِنْ سِيدْ الْمَالْ كُلَ، خَلِّي يَفْرَحْ أَشَانْ هُو مَسْكَنْ نَفْسَهْ قِدَّامْ اللّٰهْ. وَ سِيدْ الْمَالْ، هُو مِثِلْ قَشّ، مَا يِطَوِّلْ.

¹¹ كَنْ الْحَرَّايْ طَلَعَتْ وَ بِقَتْ حَامِيَةْ بِلْحَيْن، هِي تُطُقّ الْقَشّ وَ الْقَشّ دَا يَبْقَى أَصْفَرْ وَ يَيْبَسْ وَ يُمُوتْ. وَ مِثِلْ دَا بَسْ، سِيدْ الْمَالْ كُلَ يُمُوتْ فِي أُسُطْ خِدِمْتَهْ وَ يَبْقَى مَا فِيهْ.

التجْرِبة و الذُنوب

¹² مَبْرُوكْ لِلنَّادُمْ الْيَصْبُرْ فِي التَّعَبْ الْيِجَرِّبْ إِيمَانَهْ. أَشَانْ وَكِتْ التَّجْرِبَةْ دِي كَمَّلَتْ خَلَاصْ، هُو يَلْقَى تَاجْ الْحَيَاةْ. وَ التَّاجْ دَا، هُو الْحَيَاةْ الْاللّٰهْ وَاعَدْ بَيْهَا النَّاسْ الْيِحِبُّوهْ.

¹³ كَنْ نَادُمْ قَاعِدْ فِي التَّجْرِبَةْ، خَلِّي مَا يُقُولْ: «اللّٰهْ قَاعِدْ يِلِزِّنِي فِي الذَّنِبْ.» أَشَانْ أَبَداً مَا فِي شَيّءْ يِلِزّ اللّٰهْ فِي الذَّنِبْ. وَ اللّٰهْ هُو أَبَداً مَا يِلِزّ نَادُمْ فِي الذَّنِبْ.

¹⁴ لَاكِنْ كَنْ نَادُمْ يِدَوْر يَذْنِبْ، شَهْوَتَهْ بَسْ قَاعِدَةْ تِلِزَّهْ أَشَانْ الذَّنِبْ بِقِي لَيَّهْ حَلُو.

¹⁵ وَ الشَّهْوَةْ هِي مِثِلْ مَرَةْ التَّغْلَبْ وَ تَلْدَ صَغِيرْ. الشَّهْوَةْ كُلَ تَغْلَبْ وَ تَلْدَ صَغِيرْ وَ صَغِيرْهَا، هُو الذَّنِبْ. وَ الذَّنِبْ كَنْ خَلَاصْ كِبِرْ يِسَبِّبْ الْمَوْت.

¹⁶ يَا أَخْوَانِي النِّحِبُّكُو، مَا تُغُشُّوا نُفُوسْكُو.

¹⁷ كُلَّ شَيّءْ الْعَدِيلْ وَ كُلَّ شَيّءْ التَّمَامْ جَايِ مِنْ اللّٰهْ بَسْ وَ يَنْزِلْ مِنْ اللّٰهْ خَالِقْ الْأَنْوَارْ الْفِي السَّمَاءْ. وَ هُو مَا يِلْغَيَّرْ أَبَداً وَ مَا يِلْحَوَّلْ مِثِلْ الضُّلّ.

¹⁸ بِوَاسِطَةْ كَلَامْ الْحَقّ، اللّٰهْ أَنْطَانَا الْحَيَاةْ الْجَدِيدَةْ بِنِيّتَهْ أَشَانْ أَنِحْنَ نَبْقَوْا مُهِمِّينْ مِنْ كُلَّ مَخْلُوقِينَهْ.

طبِّقين كلام اللّه

¹⁹ يَا أَخْوَانِي النِّحِبُّكُو، فَكُّرُوا عَدِيلْ. خَلِّي أَيِّ نَادُمْ يُكُونْ دَايْماً جَاهِزْ لِيَسْمَعْ. خَلِّي مَا يِحَجِّي عَجَلَةْ وَ مَا يَزْعَلْ عَجَلَةْ

²⁰ أَشَانْ كَنْ نَادُمْ زَعْلَانْ مَا يِسَوِّي الْعَمَلْ الصَّالِحْ الْاللّٰهْ يِدَوْرَهْ.

²¹ أَشَانْ دَا، خَلُّوا مِنْكُو كُلَّ شَيّءْ الْيِنَجِّسْكُو وَ كُلَّ شَيّءْ الْفَسِلْ وَ أَقْبَلَوْا بِمَسْكَنَةْ الْكَلَامْ الْاللّٰهْ خَطَّاهْ فِي قُلُوبْكُو. الْكَلَامْ دَا عِنْدَهْ قُدْرَةْ أَشَانْ يِنَجِّيكُو.

²² طَبُّقُوا كَلَامْ اللّٰهْ وَ مَا تَسْمَعَوْه بَسْ. كَنْ تَسْمَعَوْه وَ مَا تِطَبُّقُوهْ، تُغُشُّوا نُفُوسْكُو.

²³ كَنْ نَادُمْ سِمِعْ كَلَامْ اللّٰهْ وَ مَا طَبَّقَهْ، هُو يَبْقَى مِثِلْ نَادُمْ الْيِشِيفْ وِجْهَهْ فِي أَمْ شَوَّافَةْ.

²⁴ وَ يِشِيفْ كِكَّيْف وِجْهَهْ وَ خَلَاصْ يَمْشِي وَ طَوَّالِي يَنْسَاهْ.

²⁵ وَ لَاكِنْ كَنْ نَادُمْ يُخُطّ بَالَهْ عَدِيلْ فِي وَصَايَا اللّٰهْ الْكَامِلِينْ الْيَنْطُونَا الْحُرِّيَّةْ وَ يِنْكَرِبْ فَوْقهُمْ وَ مَا يَسْمَعْهُمْ لِيَنْسَاهُمْ وَ يِطَبِّقْهُمْ، خَلَاصْ النَّادُمْ دَا، اللّٰهْ يِبَارِكَهْ فِي كُلِّ شَيّءْ الْيِسَوِّيهْ.

²⁶ النَّادُمْ الْيِفَكِّرْ هُو يِتَابِعْ الدِّينْ عَدِيلْ وَ لَاكِنْ مَا يَلْزَمْ لِسَانَهْ، هُو دَا قَاعِدْ يُغُشّ نَفْسَهْ وَ دِينَهْ مَا يَنْفَعْ.

²⁷ دَاهُو الدِّينْ الصَّافِي الْمَا عِنْدَهْ عَيْب قِدَّامْ أَبُونَا اللّٰهْ. عَاوُنُوا الْأَتَامَا وَ الْعَوِينْ الْأَرَامِلْ الْقَاعِدِينْ فِي التَّعَبْ. وَ أَقِيفُوا بَعِيدْ مِنْ الْأَشْيَاءْ الْيِنَجُّسُوا نَاسْ الدُّنْيَا.