هُوشَع 1 - الكتاب المقدس بالعربي الدارجي هنا تشاد

¹ دَاهُو كَلَامْ اللّٰهْ الْقَالَهْ لِهُوشَعْ وِلَيْد بِيرِي. وَ دَا فِي أَيَّامْ حُكُمْ عُزِّيَّا وَ يُوتَامْ وَ أَحَازْ وَ حِزْقِيَّا مُلُوكْ مَمْلَكَةْ يَهُوذَا وَ فِي أَيَّامْ حُكُمْ يَرُبَعَامْ وِلَيْد يَهُآشْ مَلِكْ مَمْلَكَةْ إِسْرَائِيلْ.

هُوشَع ياخُد مرة شرْموطة

² دَاهُو بِدَايَةْ كَلَامْ اللّٰهْ الْقَالَهْ بِوَاسِطَةْ النَّبِي هُوشَعْ. اللّٰهْ قَالْ لِهُوشَعْ: «أَمْشِي آخُدْ لَيْك مَرَةْ شَرْمُوطَةْ وَ أَلْدَ مِنْهَا عِيَالْ زِنَى. أَشَانْ نَاسْ الْبَلَدْ أَشَّرْمَطَوْا مَعَ الْأَصْنَامْ وَ أَبَوْنِي أَنَا اللّٰهْ.»

³ وَ خَلَاصْ، هُوشَعْ مَشَى أَخَدْ قُومَرْ بِنَيَّةْ دِبْلَايِمْ وَ هِي بِقَتْ غَلْبَانَةْ وَ وِلْدَتْ لَيَّهْ وِلَيْد.

⁴ وَ اللّٰهْ قَالْ لِهُوشَعْ: «سَمِّي وِلَيْدَكْ يَزْرَعِيلْ أَشَانْ بَعَدْ وَكِتْ شِيَّةْ، أَنَا نَطْلُبْ مِنْ ذُرِّيَّةْ يَاهُو الدَّمّ الْجِدُّهُمْ يَاهُو دَفَّقَهْ فِي وَادِي يَزْرَعِيلْ. وَ نُقُشّ مَمْلَكَةْ إِسْرَائِيلْ.

⁵ وَ فِي الْيَوْم دَا، نَكْسِرْ نُبَّالْ دَيْش إِسْرَائِيلْ فِي وَادِي يَزْرَعِيلْ.»

⁶ وَ مَرِةْ هُوشَعْ بَتَّانْ بِقَتْ غَلْبَانَةْ وَ وِلْدَتْ بِنَيَّةْ. وَ اللّٰهْ قَالْ لِهُوشَعْ: «سَمِّي بِنَيِّتَكْ مَا نَرْحَمْهَا أَشَانْ بَتَّانْ أَنَا مَا نَرْحَمْ بَنِي إِسْرَائِيلْ وَ مَا نَغْفِرْ لَيْهُمْ أَبَداً.

⁷ لَاكِنْ نَرْحَمْ بَنِي يَهُوذَا وَ أَنَا اللّٰهْ إِلٰـهُّمْ، نِنَجِّيهُمْ. أَيْوَى، نِنَجِّيهُمْ بَلَا نُبَّالْ وَ لَا سَيْف وَ لَا حَرِبْ وَ بَلَا خَيْل وَ لَا سِيَادْ خَيْل.»

⁸ وَ مَرِةْ هُوشَعْ فَرَدَتْ مَا نَرْحَمْهَا. وَ بَعَدْ دَا، بَتَّانْ بِقَتْ غَلْبَانَةْ وَ وِلْدَتْ وِلَيْد.

⁹ وَ اللّٰهْ قَالْ: «سَمِّي وِلَيْدَكْ مَا شَعَبِي أَشَانْ إِنْتُو مَا شَعَبِي وَ أَنَا كُلَ مَا إِلٰـهْكُو.»

اللّه أنْطى عشم لشعبه

¹⁰ عَدَدْ بَنِي إِسْرَائِيلْ يَبْقَى مِثِلْ رَمْلَةْ هَنَا خَشُمْ الْبَحَرْ الْمَا تِنْوَزِنْ وَ لَا تِنْحَسِبْ. وَ فِي الْبَكَانْ الْأَوَّلْ اللّٰهْ قَالْ فَوْقَهْ: «إِنْتُو مَا شَعَبِي»، فِي نَفْس الْبَكَانْ، هُو يُقُولْ لَيْهُمْ: «إِنْتُو عِيَالِي أَنَا اللّٰهْ الْحَيّ.»

¹¹ بَنِي يَهُوذَا وَ بَنِي إِسْرَائِيلْ يِلِمُّوا سَوَا وَ يِدَرُّجُوا نَادُمْ وَاحِدْ كَبِيرْ فَوْقهُمْ. وَ يَكْتَرَوْا فِي أَرْضُهُمْ فِي يَوْم كَبِيرْ الْبِنَادُوهْ يَزْرَعِيلْ (مَعَنَاتَهْ اللّٰهْ يَزْرَعْ).