3 يُوحَنَّا 1 - الكتاب المقدس بالعربي الدارجي هنا تشاد1 جَوَابْ مِنْ الشَّيْخ لِحَبِيبْنَا غَايُسْ النِّحِبَّكْ فِي الْحَقّ. 2 يَا حَبِيبِي، نَسْأَلْ اللّٰهْ أَشَانْ كُلَّ شَيّءْ يَبْقَى لَيْك عَدِيلْ وَ أَشَانْ صِحِّتَكْ تُكُونْ طَيْبَةْ مِثِلْ نَعَرِفْ قَلْبَكْ دَايْماً طَيِّبْ. 3 أَنَا فِرِحْت بِزِيَادَةْ وَكِتْ أَخْوَانْ وَاحِدِينْ جَوْا مِنْ بَكَانَكْ وَ شَهَدَوْا لَيْنَا كَدَرْ إِنْتَ قَاعِدْ ثَابِتْ فِي الْحَقّ وَ إِنْتَ دَايْماً تِتَابِعْ الْحَقّ عَدِيلْ. 4 مَا فِي شَيّءْ يِفَرِّحْنِي زِيَادَةْ مِنْ الْخَبَرْ الْبُقُولْ عِيَالِي قَاعِدِينْ يِتَابُعُوا الْحَقّ. 5 يَا حَبِيبِي، أَكِيدْ إِنْتَ أَخُو صَادِقْ أَشَانْ وَكِتْ الْأَخْوَانْ يَجُوا لَيْك، كَنْ إِنْتَ مَا تَعَرِفْهُمْ كُلَ، إِنْتَ تِسَاعِدْهُمْ. 6 هُمَّنْ شَهَدَوْا بِمَحَبِّتَكْ قِدَّامْ جَمَاعَةْ الْمُؤمِنِينْ. وَ كَنْ تَنْطِيهُمْ زَادْ لِسَفَرْهُمْ مِثِلْ اللّٰهْ يَرْضَى بَيَّهْ، دَا يُكُونْ سَمَحْ بِلْحَيْن. 7 هُمَّنْ قَمَّوْا مِنْ هِنِي أَشَانْ يَخْدُمُوا فِي شَانْ أُسُمْ الْمَسِيحْ وَ مَا يَقْبَلَوْا شَيّءْ مِنْ النَّاسْ الْمَا مُؤمِنِينْ. 8 وَاجِبْ أَنِحْنَ نِضَيُّفُوا نَاسْ مِثِلْ دَوْل وَ بِمِثِلْ دَا، نَخْدُمُوا مَعَاهُمْ فِي شَانْ الْحَقّ. 9 أَنَا رَسَّلْت جَوَابْ لِجَمَاعْتَكْ الْمُؤمِنِينْ لَاكِنْ دِتْرِيفِي الْمُسْتَكْبِرْ سَوَّى نَفْسَهْ كَبِيرْهُمْ وَ هُو أَبَى مَا يَسْمَعْ كَلَامْنَا. 10 وَ وَكِتْ نَجِيكْ، نِوَضِّحْ لِلْأَخْوَانْ الشَّيّءْ الْهُو قَاعِدْ يُقُولَهْ فَوْقنَا. هُو قَاعِدْ يَقْطَعْنَا بِكَلَامْ فَسِلْ. وَ دَا كُلَ مَا تَمَّاهْ. هُو ذَاتَهْ أَبَى مَا ضَيَّفْ الْأَخْوَانْ الرَّسَّلْنَاهُمْ. وَ النَّاسْ الدَّوَّرَوْا يِضَيُّفُوهُمْ كُلَ، هُو دَحَرَاهُمْ وَ طَرَدَاهُمْ مِنْ جَمَاعَةْ الْمُؤمِنِينْ. 11 يَا حَبِيبِي، مَا تِتَابِعْ مَثَلْ هَنَا النَّاسْ الْيِسَوُّوا الشَّرّ. تَابِعْ مَثَلْ هَنَا النَّاسْ الْيِسَوُّوا الْخَيْر. النَّادُمْ الْيِسَوِّي الْخَيْر، هُو بَسْ نَادُمْ هَنَا اللّٰهْ. وَ النَّادُمْ الْيِسَوِّي الشَّرّ مَا يَعَرِفْ اللّٰهْ. 12 وَ كُلَّ الْأَخْوَانْ يَشْهَدَوْا لِدِمِتْرِي كَدَرْ هُو نَادُمْ عَدِيلْ وَ الْحَقّ الْبِنْشَافْ فَوْقَهْ كُلَ يَشْهَدْ لَيَّهْ. أَنِحْنَ كُلَ نَشْهَدَوْا لَيَّهْ وَ تَعَرِفْ شَهَادِتْنَا صَحِيحَةْ. 13 فِي كَلَامْ كَتِيرْ نِدَوْر نِأَوْرِيكْ بَيَّهْ وَ لَاكِنْ مَا نِدَوْر نَكْتِبَهْ لَيْك فِي جَوَابْ. 14 أَنَا نِتْمَنَّى نَمْشِي لَيْك قَرِيبْ وَ نِلِمُّوا وَ نِحَجُّوا أَمْبَيْنَاتْنَا. 15 عَلَيْكُمْ السَّلَامْ. الرُّفْقَانْ الْمَعَايِ يِسَلُّمُوكْ. وَ سَلِّمْ الرُّفْقَانْ الْمَعَاكْ كُلُّهُمْ كَيْ وَاحِدْ وَاحِدْ. |
La Bible en arabe tchadien © Alliance biblique du Tchad, 2019
Bible Society of Chad