Sekaraia 7_1 - NISVITAI ITAP ANTAS ANEJOM

1 Era ahodaig va natwakam a ilpu ohna. 4 Et acaiji natwakam ura a Sekaraia. 8 Nohuun nohocred ura nedo has.

¹ IS yetpam intas o Ihova ehele Sekaraia, an mesese ford irai Taraius natimarid, an nadiat ford an mohoc naind, inmohoc Kislu iyehki;

² eris wat abraig pam Seriser, im Ricemilek im ilpu atimi o un, a nup u Bedel, mika eri ago eropse inliinmopoi Ihova,

³ um lep tas ehele ilpu atimi ahlap anliin neom u Ihova esjilid acen, im lep ehele ilpu profeta, um ika, Ecrupu ehtigtaig aijama an mohoc fiftd, um echim amen, et idivaig ecris ago aijama irai mesese iji igki is ahinag, ka oʼo?

⁴ Is um yetpam ehelek intas o Ihova esjilid acen, um ika,

⁵ Namu tas aiek ehele atimi asega an pece, im ilpu atimi ahlap, um ika, Akis wat atwakam aijaua um ehtigtaig, an mohoc fiftd im lep an mohoc sevend, irai mesese iji ehki is sevente, akis eti atwakam vai nyak aijaua;

⁶ akis wat hag aijaua, um umwig, akis hag vai caua aijaua, um umwig vai caua.

⁷ Et upene vai caua mika aki atahaijeg intas iji ig is asaig ijinies a Ihova irai ilpu profeta eris uhup ara, eris wat amen natimi an maliyum Jerusalem, um amen upene ache, eris lep amen natimi irai iji maliyum marehed iran, eris lep amen natimi irai uari pece iji ig et ahes nuritoga iran im lep an nuarin marara.

⁸ Is yetpam intas o Ihova ehele Sekaraia, um ika,

⁹ Et mun tas a Ihova esjilid acen, um ika, Akumu asaig intas alep atoh aijaua, um ago nedo updak ira nedo aiheuc jipe vai caua aijaua, athi um athi ehni:

¹⁰ um jim ehtipidai ilpu takata iji ig eris emesmas a ilpu atamnyura, im lep ilpu umnij, im ilpu atimi irai taka pece, im lep ilpu ihki atimi; um jim aktaktai an liinmopomia par aru sjipe nedo has unyimia vai caua, athi um athi ehni.

¹¹ Ja eris esjum ara natahaijeg vaig, um atidjira irak, um imipalea, eris ucjapines tikgara ara, mika eri jim ahgei itai ara.

¹² Eris ika ara yi ipjin um idivaig inhetmi inliinmopora ara, va eri jim atahaijeg intas alep ara, im lep intas is asaig a Ihova esjilid acen an Nesgan ehele ilpu profeta eris uhup ara: va nitai inigki is ahes ehele Ihova esjilid acen nedemda alupas um yetpam ehele ra.

¹³ Im lep inig, is ahlaig aien, ja eris esjum ara natahaijeg vaig; et idim uco, et ika a Ihova esjilid acen, eris ahlaig ara, ja kis eti atahaijeg ainyak.

¹⁴ Kis imiterimterim ra ainyak, et idivaig an narakiraki, ehele nup urai iji pece asega eris eti ato ra ara. Is eucaeucai inpece inig eris udei pan itac ara, is eti ahced jipe iran tah: eris mun ika ara yi eucaeucai inpece esjilid inigki.