Sekaraia 4_1 - NISVITAI ITAP ANTAS ANEJOM

1 Er asuptecnaig irai lamp colt mika yi atise nededuon neom itap a Serubabel, 11 im lep irai cai oliv et ero mika yi ati natimi inyi ero a Atua.

¹ IS lep apam a nagelo iyehki is tas ehelek aien, um ahugni nyak, et idivaig er ahugni tah natimi va numjeg o un.

² Is um ika aien ehelek, Na almoi inhe aiek? Kis ika ainyak, Ek ecetai inhus irai lamp ainyak er ago asega irai colt, im nuarin et etpen narakei iran ijinies, im lep lamp et seven ijinies iran, im nupul et seven vai lamp et seven et amen ijinies iran;

³ im lep oliv cai et ero an na-haijin, et ethi an nahaijin inmatan, im lep et ethi an nahaijin inmauun.

⁴ Kis lep tas ainyak ehele nagelo iyehki is tas ehelek aien, um ika, Ak natimi alupas unyak, inhe nitai iji igki?

⁵ Is tas ehelek a nagelo iyehki is tas ehelek aien, um ika, Na eti ato itai iji igki aiek, ka oʼo? Kis um ika ainyak, Oʼo, ak natimi alupas unyak.

⁶ Is tas ehelek aien, um ika, Intas a Ihova ehele Serubabel nigki, nikavaig, Et ika a Ihova esjilid acen; Eri eti ago nauritai inigki vai ilpu eucsupo, ka vai nemda, jai vai Nesgak ache.

⁷ Aiek di aigko, ak nedoon alupas? eri ika an idivaig nuarin marara aiek an nuhup u Serubabel: etpu imiapam Inhat Esjilid a Ihova, eru wit ahlaig ijinies, um ika, Uhmu aiheuc! uhmu aiheuc vai Inhat inigki!

⁸ Is lep apam ehelek intas o Ihova, um ika,

⁹ Et mun ati nededuon neom inigki nikmai Serubabel; etpu lep ago ehni nan nikman aien; akupu ato aijaua mika et mun abraig pam nyak ehelemia a Ihova esjilid acen.

¹⁰ Et mun amcel a di vai nadiat is eti elpat niji itai iran? Is wat ecetai nitai asjaaicnaig inig et ago atoh neom an nikmai Serubabel a Ihova, an nesganimtan et seven et um athut jipe an nobohtan asega, is imiacitak aien.

¹¹ Kis lep tas ainyak, um ika ehelen, Inhe oliv cai eraigki, an nahaijin hus irai lamp inmatan, im lep an nahaijin inmauun?

¹² Kis lep aketo ainyak um tas, um ika ehelen, Inhe inrai oliv cai eraigki erau atladwise narakei colt ira rau arau irai ohwat upul colt?

¹³ Is um tas ehelek aien, um ika, Nai eti ato aiek vai nitai eraig-ki, ka oʼo? Kis ika ainyak, Oʼo, ak natimi alupas unyak.

¹⁴ Is um ika aien, Natimi ero eris aspi rau raigki, erau aiji arau an nuhup u Natimarid an nobohtan asega.