Sekaraia 3_1 - NISVITAI ITAP ANTAS ANEJOM

1 Et asuptecnaig nehteduo u nakalasia u Atua aien va nedo o un vai Josua. 8 Er ika etpu ehcohos pam Inrancai iyehki, Kristo marom.

¹ IS ehvaig Josua natimi esjilid an nahlap imi nyak aien, is aiji aien an nuhup u nagelo o Ihova, is lep aiji a Satana an matan mika yi atapnes yin aien.

² Is ika a nagelo o Ihova ehele Satana, Ak Satana, etmu acaiji euc a Ihova; maiya, etmu acaiji euc a Ihova inig et imiacitak nup u Jerusalem aien: et idivaig nisincai a natimi inigki eris leh an cap um ati ubos.

³ Eris aso Josua ira apelumai emig, is um aiji aien an nuhup u nagelo iyehki.

⁴ Is tas a nagelo iyehki ehele ra sji ehki eris aiji ara an nuhup o un, um ika, Akumu iknipagki apelumai emig ehelen aijaua. Is lep ika ehele Josua aien, Almoi aiek, ek mun atipagki nedo acalacal unyum ehelum ainyak, ekpu aso euc ainyak ira apelumai esjilid.

⁵ Is lep ika aien, Erumu adgan cat upene an nidjinin ara. Eris adgan cat upene an nidjinin ara, um aso yin ira apelumai. Is um atidai a nagelo o Ihova.

⁶ Is tas emda a nagelo o Ihova ehele Josua, um ika,

⁷ Et ika a Ihova esjilid acen; El et ahced efalaig unyak aiek, el et lep apos intas iji ig kis asaig ainyak, napu tas alep aiek anliin neom unyak, um aminjinaig niji okoro unyak, ekpu ikni ilpu atimi atau imi euc ainyak irai ra sji igki era aiji ko ara.

⁸ Ak Josua natimi esjilid an nahlap, namu atahaijeg aiek, im lep ilpu etwam era ateuc an nuhup unyum ara: era ilpu atimi asjaaicnaig ira atimi ara: ekpu idim imiapam naheca unyak ainyak nidan Inrancai.

⁹ Im lep inhat inigki ek mun ati an nuhup u Josua ainyak; etpu yaspan inhat et ethi nesganimta atimi inyi seven: et ika a Ihova esjilid acen; Ekpu idim wud ugnyit itai iran ainyak, ekpu lep atipagki neruvaig nedo acalacal u nup uran pece iyehki ainyak an nadiat inyi ethi ache.

¹⁰ Et ika a Ihova esjilid acen; An nadiat iyehki akupu ahlaig vai ilpu etwamia aijaua asega, ithai vaine unyimia im lep ithai ateg unyimia, athi um athi ehni.