Masalimo 129 - Buku Lopatulika Buku Lopatulika
Masalimo 129

¹ Anandisautsa kawirikawiri kuyambira ubwana wanga, anene tsono Israele;

² Anandisautsa kawirikawiri kuyambira ubwana wanga; koma sanandilake.

³ Olima analima pamsana panga; anatalikitsa mipere yao.

⁴ Yehova ndiye wolungama; anadulatu zingwe za oipa.

⁵ Achite manyazi nabwerere m'mbuyo. Onse akudana naye Ziyoni.

⁶ Akhale ngati udzu womera patsindwi, wakufota asanauzule;

⁷ umene womweta sadzaza nao dzanja lake, kapena womanga mitolo sakupatira manja.

⁸ Angakhale opitirirapo sanena, Dalitso la Mulungu likhale pa inu; tikudalitsani m'dzina la Yehova.