Masalimo 126 - Buku Lopatulika Buku Lopatulika
Masalimo 126

¹ Pobweza Yehova ukapolo wa Ziyoni, tinakhala ngati anthu akulota.

² Pamenepo pakamwa pathu panadzala ndi kuseka, ndi lilime lathu linafuula mokondwera; pamenepo anati kwa amitundu, Yehova anawachitira iwo zazikulu.

³ Yehova anatichitira ife zazikulu; potero tikhala okondwera.

⁴ Bwezani ukapolo wathu, Yehova, ngati mitsinje ya kumwera.

⁵ Akubzala ndi misozi adzatuta ndi kufuula mokondwera.

⁶ Iye amene ayendayenda nalira, ponyamula mbeu yakufesa; adzabweranso ndithu ndi kufuula mokondwera, alikunyamula mitolo yake.