ဧဇရ 6 - မြန်မာ့စံမီသမ္မာကျမ်းဒါရိမင်းကြီး မှတ်တမ်းရှာဖွေစစ်ဆေးခြင်း 1 ထိုအခါ ဒါရိမင်းကြီးအမိန့်ထုတ်ပြန်၍ ဘေဘီလုံဘဏ္ဍာတိုက်ထဲရှိ မှတ်တမ်းများသိမ်းဆည်းထားသောနေရာ၌ ရှာဖွေစစ်ဆေးစေရာ 2 မေဒိနယ်ရှိ အာခမေသနန်းတော်တွင် စာလိပ်တစ်ခုကို တွေ့ရ၏။ ထိုစာလိပ်ထဲ၌ 3 “ကုရုမင်းကြီးနန်းစံပထမနှစ်တွင် ဂျေရုဆလင်မြို့ရှိ ဘုရားသခင်၏အိမ်တော်နှင့်ပတ်သက်၍ ကုရုမင်းကြီးက ‘ယဇ်ကောင်များကို ပူဇော်ရာ အိမ်တော်ကို ပြန်လည်တည်ဆောက်စေ။ အုတ်မြစ်ကို ခိုင်ခံ့စွာချစေ။ အိမ်တော်သည် အမြင့်အတောင်ခြောက်ဆယ်၊ အကျယ်အတောင်ခြောက်ဆယ် ရှိရမည်။ 4 ကျောက်တုံးကြီးသုံးဆင့်၊ သစ်သားတစ်ဆင့်ဖြင့် တည်ဆောက်ရမည်။ ကုန်ကျစရိတ်ကို ဘုရင့်ဘဏ္ဍာတိုက်မှ ထုတ်ပေးစေ။ 5 ဂျေရုဆလင်မြို့ရှိ ဗိမာန်တော်မှ ဘေဘီလုံမြို့သို့ နေဗုခဒ်နေဇာမင်းကြီး သိမ်းယူသွားသည့် ရွှေဖလား၊ ငွေဖလားစသော ဘုရားသခင်၏အိမ်တော်အသုံးအဆောင်များကိုလည်း ဂျေရုဆလင်မြို့ရှိ ဗိမာန်တော်သို့ ပြန်လည်ယူဆောင်လာ၍ ဘုရားသခင်၏အိမ်တော်၊ မိမိနေရာတွင် ပြန်ထားစေ’ဟူ၍ အမိန့်ထုတ်ပြန်၏။ ဒါရိမင်းကြီး၏အမိန့်တော် 6 ထို့ကြောင့် ယူဖရေးတီးမြစ်အနောက်ဘက်ကမ်း၏ဘုရင်ခံ တာတနဲ၊ ရှေသာဗောဇနဲမှစ၍ မြစ်အနောက်ဘက်ကမ်းရှိ သူတို့၏အပေါင်းပါ အဖာသပြည်သားတို့၊ ထိုအမှုနှင့် ကင်းကင်းရှင်းရှင်းနေကြလော့။ 7 ဤဘုရားသခင်၏အိမ်တော် တည်ဆောက်ခြင်းအမှုကို မနှောင့်ယှက်ကြနှင့်။ ဂျူးဘုရင်ခံနှင့် ဂျူးသက်ကြီးဝါကြီးတို့သည် ဘုရားသခင်၏အိမ်တော်ကို မူလနေရာ၌ ပြန်လည်တည်ဆောက်ကြစေ။ 8 ဘုရားသခင်၏အိမ်တော် ပြန်လည်တည်ဆောက်ခြင်းအမှု၌ ဂျူးသက်ကြီးဝါကြီးတို့အား သင်တို့လုပ်ဆောင်ပေးရမည့်အရာနှင့်ပတ်သက်၍ ငါထုတ်ပြန်လိုက်သည်မှာ တည်ဆောက်ခြင်းအမှု ရပ်ဆိုင်းမသွားစေရန် ကုန်ကျစရိတ်ကို ယူဖရေးတီးမြစ်အနောက်ဘက်ကမ်းမှရသော ဘုရင့်အခွန်ဘဏ္ဍာထဲမှ သူတို့အား အလျင်မီထုတ်ပေးရမည်။ 9 ကောင်းကင်ဘုံရှင်ဘုရားသခင်ထံ မီးရှို့ရာယဇ်အဖြစ်ပူဇော်ရန် နွားသငယ်၊ သိုးထီး၊ သိုးသငယ် တို့ဖြစ်စေ၊ ဂျုံ၊ ဆား၊ စပျစ်ဝိုင်၊ ဆီ တို့ဖြစ်စေ လိုအပ်သမျှကို ဂျေရုဆလင်မြို့ရှိ ယဇ်ပုရောဟိတ်တို့ တောင်းဆိုသည့်အတိုင်း နေ့စဉ်မပျက်မကွက် ပေးရမည်။ 10 သို့မှ သူတို့သည် ကောင်းကင်ဘုံရှင်ဘုရားသခင်ထံ အမွှေးနံ့သာကို ပူဇော်၍ ရှင်ဘုရင်နှင့် သူ၏သားသမီးများကောင်းစားဖို့ ဆုတောင်းပေးနိုင်မည်ဖြစ်၏။ 11 တစ်စုံတစ်ယောက်သည် ဤအမိန့်ကိုဆန့်ကျင်လျှင် သူ့အိမ်မှတိုင်ကို ဆွဲနုတ်ပြီး ထိုတိုင်ပေါ်တွင် သူ့ကိုဆွဲထားစေ။ သူ့အိမ်သည်လည်း မစင်ပုံဖြစ်စေ။ 12 ဤအမိန့်ကိုဆန့်ကျင်လျက် ဂျေရုဆလင်မြို့၌ရှိသော ဘုရားသခင်၏အိမ်တော်ကိုဖျက်ဆီးသောသူ မည်သူမဆို ရှင်ဘုရင်ဖြစ်စေ၊ ပြည်သားဖြစ်စေ ထိုအရပ်၌နာမတော်ကိုတည်စေသောဘုရားသခင်သည် သူတို့ကိုဖျက်ဆီးပါစေသော။ ငါဒါရိမင်းကြီးအမိန့်ထုတ်ပြန်၏။ အမိန့်တော်အတိုင်း ချက်ချင်းလုပ်ဆောင်စေ”ဟု ရေးသားထား၏။ 13 ထိုအခါ ယူဖရေးတီးမြစ်အနောက်ဘက်ကမ်း၏ဘုရင်ခံ တာတနဲ၊ ရှေသာဗောဇနဲနှင့် အပေါင်းပါတို့သည်လည်း ဒါရိမင်းကြီး၏အမိန့်တော်အတိုင်း ချက်ချင်းလုပ်ဆောင်လေ၏။ 14 ပရောဖက်ဟဂ္ဂဲနှင့် ဣဒေါ၏သားဇာခရိတို့၏ ပရောဖက်ပြုအားပေးမှုကြောင့် ဂျူးသက်ကြီးဝါကြီးတို့သည် အိမ်တော်ကို အောင်မြင်စွာပြန်လည်တည်ဆောက်နိုင်ခဲ့၏။ အစ္စရေးလူမျိုးတို့၏ဘုရားသခင့်အမိန့်တော်နှင့် ကုရုမင်းကြီး၊ ဒါရိမင်းကြီး၊ ပါးရှားဘုရင်အာတဇေရဇ်မင်းကြီးတို့၏အမိန့်တော်အတိုင်း အိမ်တော်ကို ပြန်လည်တည်ဆောက်ပြီးစီးလေ၏။ 15 ဤသို့ဖြင့် ဒါရိမင်းကြီးနန်းစံ ဆဋ္ဌမနှစ်၊ အာဒါလ၊ သုံးရက်နေ့တွင် အိမ်တော်ကို တည်ဆောက်ပြီးစီးခဲ့၏။ အိမ်တော်ဆက်ကပ်ပွဲနှင့် ပသခါပွဲတော်ကျင်းပခြင်း 16 အစ္စရေးအမျိုးသားများ၊ ယဇ်ပုရောဟိတ်များ၊ လေဝိသားများနှင့် ပြန်လာသောသုံ့ပန်းသားမြေးတို့သည် ဘုရားသခင်၏အိမ်တော်ဆက်ကပ်ပွဲကို ဝမ်းမြောက်စွာကျင်းပကြ၏။ 17 ဘုရားသခင်၏အိမ်တော်ဆက်ကပ်ပွဲတွင် နွားအကောင်တစ်ရာ၊ သိုးထီးအကောင်နှစ်ရာ၊ သိုးသငယ်အကောင်လေးရာနှင့် အစ္စရေးလူမျိုးအပေါင်းတို့အပြစ်ဖြေရာယဇ်အဖို့ အစ္စရေးအမျိုးအနွယ်အရေအတွက်နှင့်အညီ ဆိတ်ထီးတစ်ဆယ့်နှစ်ကောင်တို့ကို ပူဇော်ကြ၏။ 18 ထို့နောက် မောရှေ၏ပညတ်တရားကျမ်း၌ရေးထားသည့်အတိုင်း ဂျေရုဆလင်မြို့တွင် ဘုရားသခင်၏အမှုတော်ကိုထမ်းဆောင်ရန် ယဇ်ပုရောဟိတ်အုပ်စု၊ လေဝိအုပ်စုတို့ကို ခန့်ထားလေ၏။ 19 သုံ့ပန်းသားမြေးတို့သည်လည်း ပထမလ၊ တစ်ဆယ့်လေးရက်နေ့တွင် ပသခါပွဲတော်ကို ကျင်းပကြ၏။ 20 ယဇ်ပုရောဟိတ်အပါအဝင် လေဝိအမျိုးတို့သည် တစ်စိတ်တစ်သဘောတည်း ကိုယ်ကိုစင်ကြယ်စေကြပြီးဖြစ်၍ အားလုံးမှာ သန့်ရှင်းခြင်းသို့ရောက်ကြ၏။ ထို့ကြောင့် သူတို့အပါအဝင် သူတို့၏ညီအစ်ကိုယဇ်ပုရောဟိတ်တို့နှင့် သုံ့ပန်းသားသမီးတို့အဖို့ ပသခါသိုးသငယ်ကို သတ်ကြ၏။ 21 ဖမ်းခေါ်သွားခြင်းခံရရာမှ ပြန်ရောက်လာသောအစ္စရေးအမျိုးသားတို့နှင့်အတူ အစ္စရေးလူမျိုး၏ဘုရားသခင်ထာဝရဘုရားကို ကိုးကွယ်ရန် မိမိကိုယ်ကို တစ်ပါးအမျိုးသားတို့၏ညစ်ညူးခြင်းမှ ကင်းစင်စေသောသူအပေါင်းတို့သည် ထိုအသားကို စားကြ၏။ 22 ထာဝရဘုရားသည် သူတို့အား ဝမ်းမြောက်ရသောအခွင့်ကို ပေးတော်မူ၍ အစ္စရေးလူမျိုးတို့၏ဘုရားသခင့်အိမ်တော် တည်ဆောက်ရာတွင်လည်း သူတို့အား အဆီးရီးယားဘုရင်ထောက်ပံ့ပေးလိုသောစိတ်ရှိစေရန် ပြုတော်မူသောကြောင့် သူတို့သည် တဆေးမဲ့မုန့်ပွဲတော်ကို ခုနစ်ရက်တိုင်တိုင် ဝမ်းမြောက်စွာကျင်းပကြ၏။ |
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative
Global Bible Initiative