Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

ဟော​ရှေ 12 - မြန်​​​မာ့​​​စံ​​​မီ​​​သမ္မာ​​​ကျမ်း​​


ယာကုပ်၏အမွေခံကို ထာဝရဘုရားစွဲချက်တင်ခြင်း

1 ဧဖရိမ်​သည် လေ​ကို​စား​၏​။ အရှေ့​လေ​နောက်​သို့ လိုက်​၏​။ သူ​တို့​ပြု​သော​လိမ်လည်မှု​၊ အကြမ်းဖက်မှု​တို့​သည် တစ်နေ့​ထက်​တစ်နေ့ များများ​လာ​၏​။ အဆီးရီးယား​တို့​နှင့် ပဋိညာဉ်​ဖွဲ့​လျက်​နှင့်ပင် အီဂျစ်​ပြည်​သို့ ဆီ​ကို ပို့ပေး​၏​။

2 ထာဝရဘုရား​သည် ယုဒ​ကို စွဲချက်တင်​တော်မူ​ပြီ​။ ယာကုပ်​ကို သူ​ကျင့်ကြံ​ခဲ့​သည့်​အတိုင်း သူ့​ကို​ဒဏ်ခတ်​တော်မူ​မည်​။ သူ​လုပ်ဆောင်​ခဲ့​သည့်​အတိုင်း သူ့​ကို​ပြန်​ပေးဆပ်​စေ​မည်​။

3 ယာကုပ်​သည် အမိ​ဝမ်း​ထဲ၌ အစ်ကို​၏​ဖနောင့်​ကို ကိုင်ဆွဲ​ထား​ခဲ့​၏​။ သူ​သည် မိမိ​ခွန်အား​ဖြင့် ဘုရားသခင်​နှင့် ယှဉ်ပြိုင်​ခဲ့​၏​။

4 ကောင်းကင်တမန်​နှင့် ပြိုင်​၍​အနိုင်ရ​ခဲ့​၏​။ ကိုယ်တော့်​ထံ ငိုကြွေး​၍ ကောင်းချီး​တောင်းခံ​ခဲ့​၏​။ ဗေသလ​မြို့​တွင် ကိုယ်တော်​နှင့်​တွေ့​၏​။ ထို​အရပ်​တွင် ကိုယ်တော်​သည် ငါ​တို့​နှင့် စကား​ပြောဆို​ခဲ့​၏​။

5 ထာဝရဘုရား​သည် ကောင်းကင်​ဗိုလ်ခြေ​အရှင်​ဘုရားသခင် ဖြစ်​တော်မူ​၏​။ နာမ​တော်​သည် ထာဝရဘုရား ဖြစ်​၏​။

6 သင်​သည် သင်​၏​ဘုရားသခင်​ထံသို့ ပြန်လှည့်​လာ​လော့​။ ကရုဏာတရား​၊ ဖြောင့်မတ်​ခြင်း​တရား​တို့​ကို စောင့်ထိန်း​လော့​။ သင်​၏​ဘုရားသခင်​ကို အစဉ်​စောင့်မျှော်​လော့​။

7 ကုန်သည်​သည် မမှန်ကန်​သော​ချိန်ခွင်​ကို သုံး​တတ်​၏​။ မတရား​ရယူ​လို​သော​စိတ် ရှိ​၏​။

8 ဧဖရိမ်​က ‘ငါ​ကိုယ်တိုင် ဥစ္စာဓန​ကို ရှာတွေ့​၍ ချမ်းသာကြွယ်ဝ​ပြီ​။ ထို​ဥစ္စာဓန​တို့​ကို ဒုစရိုက်​ပြု​ခြင်း​ဖြင့် ရရှိ​သည်​ဟု မည်သူ​မျှ ငါ့​ကို​အပြစ်​ဆိုစရာ​အကြောင်း​မ​ရှိ’​ဟု ဆို​၏​။


လမ်းလွဲသောအစ္စရေးကိုစီရင်ခြင်း

9 သင်​တို့ အီဂျစ်​ပြည်​၌​ရှိ​စဉ်​ကပင် ငါ ထာဝရဘုရား​သည် သင်​တို့​၏​ဘုရားသခင် ဖြစ်​၏​။ သတ်မှတ်​ထား​သော​ပွဲတော်​အချိန်​က​ကဲ့သို့ သင်​တို့​ကို တဲ​ထဲတွင် ပြန်​နေ​စေ​မည်​။

10 ပရောဖက်​တို့​ကို ငါ​မိန့်မှာ​ခဲ့​ပြီ​။ ဗျာဒိတ်နိမိတ်​ကို အမျိုးမျိုး​ဖွင့်ပြ​ပေး​ခဲ့​ပြီ​။ ပရောဖက်​များ​အားဖြင့် ပုံပမာ​ကို ပြ​ခဲ့​ပြီ​။”

11 ဂိလဒ်​ပြည်သား​တို့​သည် အပြစ်ဒုစရိုက်​ပြု​၍ အကျိုးနည်း​ကြ​ပြီ​။ ဂိလဂါလ​မြို့​၌ နွား​ကို ပူဇော်​ကြ​၏​။ သူ​တို့​၏​ယဇ်ပလ္လင်​တို့​သည်​လည်း လယ်​ထဲမှ ထွန်ကြောင်း​များ​ပေါ်ရှိ​မြေစာပုံ​များ​ကဲ့သို့ များ​၏​။


ယာကုပ်၏အမွေခံကို ထပ်၍ စွဲချက်တင်ခြင်း

12 ယာကုပ်​သည် အာရံ​ပြည်​သို့ ထွက်ပြေး​လေ​ပြီ​။ အစ္စရေး​သည် မယား​ရ​ရန်​အတွက် အစေခံ​လေ​ပြီ​။ မယား​ရ​ရန်​အတွက် သိုးထိန်း​လေ​ပြီ​။

13 ထာဝရဘုရား​သည် ပရောဖက်​အားဖြင့် အစ္စရေး​ကို အီဂျစ်​ပြည်​မှ ထုတ်ဆောင်​တော်မူ​ခဲ့​၏​။ ပရောဖက်​အားဖြင့် စောင့်ရှောက်​တော်မူ​ခဲ့​၏​။

14 ဧဖရိမ်​သည် အမျက်​တော်​ကို​အကြီးအကျယ်​နှိုးဆွ​လေ​ပြီ​။ ထို့ကြောင့် သူ​၏​အရှင်​သည် သူ​၏​လူသတ်​ခြင်း​အပြစ်​ကို သူ့​အပေါ် ပြန်ရောက်​စေ​မည်​။ သူ​ကဲ့ရဲ့ပြစ်တင်​ခဲ့​သည်​များ​ကို သူ့​အပေါ် ပြန်ရောက်​စေ​မည်​။

MYANMAR STANDARD BIBLE©

Copyright © 2012, 2014, 2017, 2021 by Global Bible Initiative

Global Bible Initiative
ကြှနျုပျတို့နောကျလိုကျပါ:



ကြော်ငြာတွေ