Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

သုတ္တံကျမ်း။ 6 - မြန်​​​မာ့​​​စံ​​​မီ​​​သမ္မာ​​​ကျမ်း​​


ငွေကြေးဆိုင်ရာရှုပ်ထွေးမှု

1 ငါ့​သား​၊ သင်​သည် သင်​၏​အိမ်နီးချင်း​အတွက် အာမခံ​မိ​၍ သူစိမ်း​အတွက် တာဝန်ခံ​မိ​လျှင်

2 ကိုယ့်​နှုတ်ထွက်​စကား​နှင့်​ကိုယ်​ကျော့မိ​၍ ကိုယ့်​နှုတ်ထွက်​စကား​နှင့်​ကိုယ် အဖမ်း​ခံရ​လေ​ပြီ​။

3 ယခု​သင်​သည် သင်​၏​အိမ်နီးချင်း​လက်​သို့ ကျရောက်​လေ​ပြီ​။ ထို့ကြောင့် ငါ့​သား​၊ ဤသို့​ပြု​၍ ကိုယ့်ကိုယ်ကိုယ်​ကယ်နုတ်​လော့​။ သင်​၏​အိမ်နီးချင်း​ထံ​သွား​၍ ကိုယ့်ကိုယ်ကိုယ် နှိမ့်ချ​လျက် ကြပ်ကြပ်​တောင်းပန်​လော့​။

4 သင့်​မျက်စိ​ကို အိပ်စက်​ခွင့်​မ​ပြု​နှင့်​။ သင့်​မျက်လွှာ​ကို​လည်း ပိတ်​ခွင့်​မ​ပြု​နှင့်​။

5 ဒရယ်​သည် အမဲလိုက်သူ​လက်​မှ​လည်းကောင်း​၊ ငှက်​သည် ငှက်မုဆိုး​လက်​မှ​လည်းကောင်း လွတ်မြောက်​သကဲ့သို့ ကိုယ့်ကိုယ်ကိုယ်​လွတ်မြောက်​အောင်​ပြု​လော့​။


ပျင်းရိခြင်း

6 အချင်း​လူပျင်း​၊ ပုရွက်ဆိတ်​ထံသို့​သွား​၍ ၎င်း​၏​လုပ်ဆောင်မှု​တို့​ကို​ကြည့်ရှုဆင်ခြင်​လျက် ဉာဏ်ပညာရှိ​လော့​။

7 ပုရွက်ဆိတ်​သည် ဦးစီးဦးဆောင်​သူ​မ​ရှိ​၊ ကြီးကြပ်သူ​မ​ရှိ​၊ အုပ်စိုး​သူ​လည်း​မ​ရှိ​ဘဲ​လျက်

8 နွေရာသီ​၌ မိမိ​အစားအစာ​ကို​ပြင်ဆင်​၍ ရိတ်သိမ်း​ချိန်​၌ မိမိ​စားစရာ​ကို ရှာဖွေ​စုဆောင်း​တတ်​၏​။

9 အချင်း​လူပျင်း​၊ သင်​သည် မည်မျှ​ကြာ​အောင် အိပ်​လျက်​နေ​မည်နည်း​။ မည်သည့်​အချိန်​မှ အိပ်ရာ​ထ​မည်နည်း​။

10 ခဏ​အိပ်​လျက်​၊ ခဏ​ငိုက်​လျက်​၊ ခဏ​လက်ပိုက်​အနားယူ​လျက်​နေစဉ်

11 ဆင်းရဲ​ခြင်း​သည် သူခိုးဓားပြ​ကဲ့သို့​လည်းကောင်း​၊ ချို့တဲ့​နွမ်းပါး​ခြင်း​သည် လက်နက်​ကိုင်ဆောင်​သူ​ကဲ့သို့​လည်းကောင်း သင့်​ထံသို့​ရောက်လာ​လိမ့်မည်​။


ဆိုးညစ်ယုတ်ညံ့သူ

12 ဆိုးညစ်​သော​သူ​နှင့် ယုတ်ညံ့​သော​သူ​သည် ကောက်ကျစ်​သော​နှုတ်​ဖြင့်​လှည့်လည်​သွားလာ​ကာ

13 မျက်စိ​ကို​မှိတ်ပြ​လျက်​၊ ခြေ​ဖြင့်​အမှတ်ပြု​လျက်​၊ လက်ချောင်း​တို့​ဖြင့်​အချက်ပေး​လျက်​၊

14 ဖောက်ပြန်လွဲမှား​သော​စိတ်နှလုံး​ဖြင့် မကောင်းမှု​ကို​တွေးတော​ကြံစည်​လျက် ငြင်းခုံ​ရန်တွေ့​ခြင်း​ကို အစဉ်အမြဲ​ဖြစ်ပွား​စေ​တတ်​၏​။

15 ထို့ကြောင့် ဘေးဒုက္ခ​သည် သူ့​အပေါ်​ရုတ်တရက်​ကျရောက်​သဖြင့် သူ​သည် ချမ်းသာ​ရာ​မ​ရ​ဘဲ ချက်ချင်း​ပျက်စီး​ရ​လိမ့်မည်​။


ဘုရားသခင် မုန်းတော်မူသောအရာများ

16 ထာဝရဘုရား​မုန်း​တော်မူ​သော​အရာ​ခြောက်​ပါး​မက ကိုယ်တော်​၏​စိတ်ဝိညာဉ် စက်ဆုပ်ရွံရှာ​တော်မူ​သော​အရာ​ခုနစ်​ပါး​မှာ

17 ထောင်လွှား​သော​မျက်နှာ​၊ မုသားသုံး​သော​လျှာ​၊ အပြစ်ကင်း​သော​သူ​ကို​သတ်ဖြတ်​သော​လက်​၊

18 ယုတ်ညံ့​သော​အကြံအစည်​များ​ကို တွေးတော​ကြံစည်​သော​စိတ်နှလုံး​၊ မကောင်းမှု​ပြု​ရာ​သို့ အလျင်အမြန်​ပြေး​သော​ခြေ​၊

19 လိမ်လည်​ထွက်ဆို​သော​မုသား​သက်သေ​နှင့် ညီအစ်ကို​တို့​ကြား​၌ အငြင်းပွားမှု​များ​ဖြစ်ပွား​စေ​သော သူ​တို့​ဖြစ်​ကြ​၏​။


အိမ်ထောင်ရေးမဖောက်ပြန်အောင် သတိပေးခြင်း

20 ငါ့​သား​၊ သင့်​ဖခင်​၏​ပညတ်ချက်​ကို လိုက်နာကျင့်သုံး​လော့​။ သင့်​မိခင်​၏​သွန်သင်ချက်​ကို မ​ပစ်ပယ်​နှင့်​။

21 ၎င်း​တို့​ကို သင်​၏​စိတ်နှလုံး​တွင် အစဉ်မပြတ်​ချည်​ထား​၍ သင်​၏​လည်ပင်း​၌​ဆွဲထား​လော့​။

22 ၎င်း​တို့​သည် သင်​သွားလာ​သောအခါ သင့်​ကို​ပို့ဆောင်​လိမ့်မည်​။ သင်​အိပ်​သောအခါ သင့်​ကို​စောင့်ရှောက်​လိမ့်မည်​။ သင်​နိုး​သောအခါ သင့်​ကို​စကားပြော​လိမ့်မည်​။

23 အကြောင်းမူကား ပညတ်ချက်​သည် မီးခွက်​ဖြစ်​၍ သွန်သင်ချက်​သည် အလင်း​ဖြစ်​၏​။ ဆုံးမပဲ့ပြင်​ပေး​သော​ဆိုဆုံးမစကား​တို့​သည်​လည်း အသက်​လမ်း​ဖြစ်၍

24 မကောင်း​သော​မိန်းမ​၏​ဘေးရန်​မှ​လည်းကောင်း​၊ ကိုယ်ကျင့်​တရား​ပျက်ပြား​သော​မိန်းမ​၏​ချော့မြှူ​သော​စကား​မှ​လည်းကောင်း သင့်​ကို​စောင့်ရှောက်​လိမ့်မည်​။

25 သင်​၏​စိတ်နှလုံး​ထဲတွင် ထို​မိန်းမ​၏​အလှ​ကို မ​တပ်မက်​နှင့်​။ သူ့​မျက်လွှာ​ဖြင့် ညှို့ယူ​ဖမ်းစား​ခြင်း​ကို​မ​ခံ​နှင့်​။

26 အကြောင်းမူကား ပြည့်တန်ဆာ​မ​တစ်​ယောက်​ကို မုန့်​တစ်​လုံး​ဖြင့်​ရ​နိုင်​၏​။ လင်ရှိမယား​မူကား အဖိုးတန်​သော​အသက်​ကို လိုက်ဖမ်း​တတ်​၏​။

27 လူ​သည် မိမိ​အဝတ်​ကို မ​လောင်​စေ​ဘဲ မိမိ​ရင်ခွင်​၌ မီး​ကို​ပွေ့ပိုက်​နိုင်​မည်လော​။

28 သို့မဟုတ် သူ​သည် မိမိ​ခြေ​ကို မ​လောင်မြိုက်​စေ​ဘဲ မီးခဲ​ပေါ်တွင် လမ်းလျှောက်​နိုင်​မည်လော​။

29 မိမိ​အိမ်နီးချင်း​၏​မယား​ထံသို့ ဝင်​သော​သူ​သည်​လည်း ထိုနည်းတူ​ဖြစ်​၏​။ ထို​မိန်းမ​နှင့်​ထိတွေ့​သော​သူ​မှန်သမျှ အပြစ်ဒဏ်​နှင့်​ကင်းလွတ်​လိမ့်မည်​မ​ဟုတ်​။

30 သူခိုး​သည် ဆာလောင်မွတ်သိပ်​သောကြောင့် အငတ်​ပြေ​စေရန် ခိုးယူ​ခဲ့​လျှင် လူ​တို့​သည် သူ့​ကို​မထီမဲ့မြင်ပြု​ကြ​မည်​မ​ဟုတ်​။

31 သို့သော် သူ​သည် အဖမ်း​ခံရ​လျှင် ခုနစ်ဆ​ပြန်လျော်​ရ​မည်​။ မိမိ​အိမ်​၌​ရှိ​သော​စည်းစိမ်ဥစ္စာ​အားလုံး​ကို​ပင် ပေး​ရ​မည်​ဖြစ်​၏​။

32 သူတစ်ပါး​၏​မယား​နှင့် အိမ်ထောင်ရေးဖောက်ပြန်​သော​သူ​သည် အသိစိတ်​မ​ရှိ​။ ထို​အမှု​ကို​ပြု​သော​သူ​သည် ကိုယ့်ကိုယ်ကိုယ်​ဖျက်ဆီး​သော​သူ​ဖြစ်​၏​။

33 ထို​သူ​သည် ရိုက်နှက်​ခြင်း​နှင့် အရှက်ခွဲခြင်း​ကို​ခံရ​လိမ့်မည်​။ သူ​ခံရ​သော​ကဲ့ရဲ့ပြစ်တင်​ခြင်း​သည်​လည်း မည်သည့်​အခါ​မျှ​ပျောက်ပျက်​သွား​မည်​မ​ဟုတ်​။

34 အကြောင်းမူကား သဝန်တိုမှု​သည် ခင်ပွန်းသည်​ကို အမျက်ဒေါသ​ထွက်​စေ​သဖြင့် သူ​သည် လက်စားချေ​သော​နေ့​၌ ညှာတာ​လိမ့်မည်​မ​ဟုတ်​။

35 မည်သည့်​လျော်ကြေး​ကို​မျှ လက်ခံ​လိမ့်မည်​မ​ဟုတ်​။ များစွာ​သော​တံစိုးလက်ဆောင်​ကို​လည်း အလိုရှိ​လိမ့်မည်​မ​ဟုတ်​။

MYANMAR STANDARD BIBLE©

Copyright © 2012, 2014, 2017, 2021 by Global Bible Initiative

Global Bible Initiative
ကြှနျုပျတို့နောကျလိုကျပါ:



ကြော်ငြာတွေ