Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

သုတ္တံကျမ်း။ 31 - မြန်​​​မာ့​​​စံ​​​မီ​​​သမ္မာ​​​ကျမ်း​​


လေမွေလမင်းကြီး၏စကားများ

1 လေမွေလ​မင်းကြီး​၏​စကား​များ​။ သူ​၏​မယ်တော်​က သူ့​ကို​သွန်သင်​သော​ဩဝါဒ​စကား​မှာ

2 ငါ့​သား​၊ ငါ​မည်သို့​ပြော​ရ​မည်နည်း​။ ငါ့​ဝမ်း​မှ​ဖွား​သော​သား​၊ ငါ​မည်သို့​ပြော​ရ​မည်နည်း​။ ငါ​၏​ကတိသစ္စာ​နှင့်ဆိုင်သော​သား​၊ ငါ​မည်သို့​ပြော​ရ​မည်နည်း​။

3 သင်​၏​ခွန်အား​ကို မိန်းမ​တို့​အား​လည်းကောင်း​၊ သင်​၏​အားမာန်​တို့​ကို ရှင်ဘုရင်​တို့​ကို​ဖျက်ဆီး​တတ်​သော​သူ​တို့​အား​လည်းကောင်း မ​ပေး​နှင့်​။

4 အို လေမွေလ​၊ စပျစ်ဝိုင်​သောက်​ခြင်း​သည် ရှင်ဘုရင်​တို့​နှင့်​မ​သင့်လျော်​ပေ​။ ရှင်ဘုရင်​တို့​နှင့်​မ​သင့်လျော်​ပေ​။ သေရည်သေရက်​ကို​တောင့်တ​ခြင်း​သည်​လည်း အုပ်ချုပ်​သူ​တို့​အတွက် မ​သင့်လျော်​ပေ​။

5 သူ​တို့​သည် သောက်​သောအခါ ပြဋ္ဌာန်း​ထား​သော​အရာ​ကို​မေ့လျော့​၍ ဖိစီးနှိပ်စက်မှု​ခံရ​သော​သူ​အပေါင်း​တို့​၏ အမှုအခင်း​ကို လွဲမှား​စွာ​စီရင်​မည်​ကို စိုးရိမ်​ရ​၏​။

6 ဆုံးပါး​တော့​မည့်​သူ​အား သေရည်သေရက်​ကို​လည်းကောင်း​၊ စိတ်​ဒုက္ခရောက်​နေ​သော​သူ​အား စပျစ်ဝိုင်​ကို​လည်းကောင်း ပေး​လော့​။

7 သူ​တို့​သည် သောက်​သောအခါ မိမိ​တို့​၏​ဆင်းရဲ​ခြင်း​ကို​မေ့လျော့​သွား​လိမ့်မည်​။ မိမိ​တို့​၏​အခက်အခဲ​ပြဿနာ​ကို​လည်း သတိရ​တော့​မည်​မ​ဟုတ်​။

8 သင်​သည် ပြောဆို​နိုင်စွမ်း​မ​ရှိ​သူ​အတွက်​လည်းကောင်း​၊ မှီခိုရာမဲ့​သော​သူ​အားလုံး​၏ အမှုအခင်း​အတွက်​လည်းကောင်း သင်​၏​နှုတ်​ကို​ဖွင့်​လော့​။

9 သင်​၏​နှုတ်​ကို​ဖွင့်​လျက် ဖြောင့်မတ်​စွာ​တရားစီရင်​လော့​။ အဖိနှိပ်​ခံရ​သော​သူ​နှင့် နွမ်းပါး​သော​သူ​၏​အခွင့်အရေး​ကို ကာကွယ်စောင့်ရှောက်​ပေး​လော့​။


စွမ်းရည်ရှိသောမယား

10 စွမ်းရည်​နှင့်​ပြည့်စုံ​သော​မယား​ကို မည်သူ​တွေ့​နိုင်​သနည်း​။ ထိုသို့သော​မယား​သည် ပတ္တမြား​ထက်​များစွာ​အဖိုးထိုက်​၏​။

11 သူ့​ခင်ပွန်း​သည် စိတ်နှလုံး​ထဲ၌ သူ့​ကို​ယုံကြည်စိတ်ချ​သဖြင့် စည်းစိမ်ဥစ္စာ​ချို့တဲ့​သည်​ဟူ၍​မ​ရှိ​။

12 ထို​မယား​သည် မိမိ​အသက်ရှင်​သမျှ​ကာလ​ပတ်လုံး ခင်ပွန်းသည်​အား ဆိုးကျိုး​မ​ပြု​၊ ကောင်းကျိုး​ကို​သာ​ပြု​တတ်​၏​။

13 သူ​သည် သိုးမွေး​နှင့်​ဗီသွာလျှော်​ကို​ရှာ​ပြီးလျှင် မိမိ​၏​လက်​ဖြင့် စိတ်ပါလက်ပါ​လုပ်ဆောင်​တတ်​၏​။

14 ကုန်သွယ်​သင်္ဘော​များ​ကဲ့သို့ မိမိ​၏​အစားအစာ​ကို ဝေးလံ​သော​အရပ်​မှ​သယ်ဆောင်​လာ​တတ်​၏​။

15 မိုးမလင်းမီ​ထ​ပြီး မိမိ​အိမ်သူအိမ်သား​များ​အတွက် စားစရာ​ကို​ပြင်ဆင်​၍ အစေခံ​မိန်းကလေး​များ​ကို အလုပ်​ခွဲဝေ​သတ်မှတ်​ပေး​တတ်​၏​။

16 လယ်ယာ​ကို​ကြည့်ရှု​သုံးသပ်​ပြီးမှ ၎င်း​ကို​ဝယ်ယူ​၍ မိမိ​လက်​နှင့် လုပ်ကိုင်​ရရှိ​သော​အကျိုးအမြတ်​ဖြင့် စပျစ်ခြံ​ကို​စိုက်ပျိုး​တတ်​၏​။

17 မိမိ​ခါး​ကို အစွမ်းသတ္တိ​နှင့်​စည်း​၍ မိမိ​လက်မောင်း​တို့​ကို သန်မာ​စေ​တတ်​၏​။

18 မိမိ​၏​ကုန်ပစ္စည်း​သည် အကျိုးအမြတ်​ရှိ​ကြောင်း​ကို သိမြင်​တတ်​၏​။ သူ​၏​မီးခွက်​သည် ညအချိန်​၌ မ​ငြိမ်း​တတ်​။

19 သူ​သည် မိမိ​၏​လက်​တွင် ဗိုင်းလိပ်တံ​ကို​ကိုင်​ထား​လျက် မိမိ​၏​လက်​ထဲ၌ ရစ်လုံး​ကို​ဆုပ်ကိုင်​ထား​တတ်​၏​။

20 အဖိနှိပ်​ခံရ​သော​သူ​တို့​အတွက် မိမိ​လက်​ကို​ဖြန့်​ပေး​၍ နွမ်းပါး​သော​သူ​တို့​အတွက် မိမိ​လက်​တို့​ကို​ကမ်းပေး​တတ်​၏​။

21 သူ​၏​အိမ်သူအိမ်သား​အားလုံး​သည် ကတ္တီပါနီ​ကို​ဝတ်ဆင်​ထား​သည်​ဖြစ်၍ နှင်းပွင့်​ကျ​သော်လည်း သူ​သည် မိမိ​အိမ်သူအိမ်သား​များ​အတွက် မ​စိုးရိမ်​ရ​ပေ​။

22 သူ​သည် မိမိ​အတွက် အိပ်ရာခင်း​များ​ကို​ပြုလုပ်​၍ သူ​၏​အဝတ်တန်ဆာ​သည် ဗီသွာချည်ထည်​နှင့် ခရမ်းရောင်​အထည်​ဖြစ်​၏​။

23 သူ​၏​ခင်ပွန်း​သည် အရပ်​လူကြီး​တို့​နှင့်အတူ မြို့​တံခါး​၌​ထိုင်​လေ့​ရှိ​၍ လူသိ​များ​သော​သူ​ဖြစ်​၏​။

24 သူ​သည် ပိတ်ချော​ဝတ်ရုံ​များ​ကို​ပြုလုပ်​ရောင်းချ​ကာ ခါးဝတ်တန်ဆာ​များ​ကို​လည်း ကုန်သည်​များ​ထံ​သွင်း​တတ်​၏​။

25 အစွမ်းသတ္တိ​နှင့်​ခန့်ညားထည်ဝါမှု​သည် သူ​၏​အဝတ်တန်ဆာ​ဖြစ်၍ သူ​သည် လာ​မည့်​နေ့ရက်​များ​အတွက် ရယ်မော​နိုင်​၏​။

26 သူ​သည် ဉာဏ်ပညာ​ဖြင့် မိမိ​နှုတ်​ကို​ဖွင့်​တတ်​၏​။ သူ​၏​လျှာ​ပေါ်၌ မေတ္တာကရုဏာ​နှင့်​ပြည့်စုံ​သော သွန်သင်ချက်​ရှိ​၏​။

27 မိမိ​အိမ်သူအိမ်သား​တို့​၏​အရေးကိစ္စ​များ​ကို သေချာ​စွာ​ကြည့်ရှု​တတ်​၏​။ ပျင်းရိ​ခြင်း​အစာ​ကို မ​စား​တတ်​။

28 သူ​၏​သားသမီး​တို့​သည်​ထ​၍ သူ့​ကို မင်္ဂလာ​ရှိ​သူ​ဟု ခေါ်​တတ်​ကြ​၏​။ သူ​၏​ခင်ပွန်း​သည်​လည်း

29 “​စွမ်းရည်ရှိရှိ​လုပ်ဆောင်​တတ်​သော​အမျိုးသမီး​များစွာ​ရှိ​သော်လည်း သင်​သည် ထို​သူ​အားလုံး​ထက်​သာလွန်​၏​”​ဟု သူ့​ကို​ချီးမွမ်း​တတ်​၏​။

30 တင့်တယ်​ခြင်း​သည် လှည့်ဖြား​တတ်​၏​။ လှပ​ခြင်း​သည်​လည်း အချည်းနှီး​ဖြစ်​၏​။ သို့သော် ထာဝရဘုရား​ကို​ကြောက်ရွံ့​သော မိန်းမ​သည် ချီးမွမ်း​ခြင်း​ခံရ​လိမ့်မည်​။

31 ထိုသို့သော​မိန်းမ​အား သူ့​လက်​ဖြင့် လုပ်ကိုင်​ရရှိ​သော​အကျိုးအမြတ်​ကို​ပေး​လော့​။ သူ​ပြု​သော​အမှု​အတွက် မြို့​တံခါး​တို့​၌ သူ့​ကို​ချီးမွမ်း​ကြ​ပါစေ​။

MYANMAR STANDARD BIBLE©

Copyright © 2012, 2014, 2017, 2021 by Global Bible Initiative

Global Bible Initiative
ကြှနျုပျတို့နောကျလိုကျပါ:



ကြော်ငြာတွေ