Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

သုတ္တံကျမ်း။ 28 - မြန်​​​မာ့​​​စံ​​​မီ​​​သမ္မာ​​​ကျမ်း​​

1 ဆိုးယုတ်​သော​သူ​သည် လိုက်​သော​သူ​မ​ရှိ​ဘဲ​လျက် ထွက်ပြေး​တတ်​၏​။ ဖြောင့်မတ်​သော​သူ​မူကား ခြင်္သေ့ပျို​ကဲ့သို့​ရဲရင့်တည်ကြည်​၏​။

2 တိုင်းပြည်​၌​အပြစ်​ကျူးလွန်​ခြင်း​ရှိ​သောအခါ အုပ်ချုပ်သူ​များပြား​လာ​တတ်​၏​။ သို့သော် သိမြင်​နားလည်​တတ်​သော​သူ​အားဖြင့် တိုင်းပြည်​သည် ကြာရှည်တည်တံ့​လိမ့်မည်​။

3 ဆင်းရဲ​သော​သူ​တို့​ကို​နှိပ်စက်​သော ဆင်းရဲသား​သည် မည်သည့်​အစားအစာ​မျှ​မ​ကျန်​အောင် တိုက်ချ​သွား​သော​မိုးရေ​နှင့်​တူ​၏​။

4 ပညတ်တရား​ကို​စွန့်ပယ်​သော​သူ​တို့​သည် ဆိုးယုတ်​သော​သူ​ကို​ချီးမွမ်း​တတ်​၏​။ ပညတ်တရား​ကို​စောင့်ထိန်း​သော​သူ​တို့​မူကား ဆိုးယုတ်​သော​သူ​တို့​ကို​ဆန့်ကျင်​တတ်​၏​။

5 မကောင်းမှု​ပြု​သော​သူ​တို့​သည် တရားမျှတမှု​ကို​နား​မ​လည်​ကြ​။ ထာဝရဘုရား​ကို​ရှာ​သော​သူ​တို့​မူကား အပြည့်အဝ​နားလည်​ကြ​၏​။

6 တည်ကြည်​စွာ​လျှောက်လှမ်း​သော ဆင်းရဲ​သော​သူ​သည် ကွေ့ကောက်​သော​လမ်း​ကို​လိုက်​သည့် ချမ်းသာ​သော​သူ​ထက် ပို၍​ကောင်း​၏​။

7 ပညတ်တရား​ကို​လိုက်နာကျင့်သုံး​သော​သူ​သည် အသိဉာဏ်​ရှိ​သော​သား​ဖြစ်​၏​။ အစားကြူး​သော​သူ​များ​နှင့်​ပေါင်းဖော်​သော​သူ​ကား မိမိ​ဖခင်​ကို​အရှက်ရ​စေ​တတ်​၏​။

8 အတိုးချ​ခြင်း​နှင့် အမြတ်​ကြီးစား​ခြင်း​ဖြင့် မိမိ​၏​စည်းစိမ်ဥစ္စာ​ကို​တိုးပွား​စေ​သော​သူ​သည် ဆင်းရဲ​သော​သူ​တို့​ကို​သနား​တတ်​သော​သူ​အတွက် စုဆောင်း​နေ​ခြင်း​ဖြစ်​၏​။

9 တစ်စုံတစ်ဦး​သည် ပညတ်တရား​ကို​နာယူနာခံ​ခြင်း​မ​ရှိ​လျှင် သူ​၏​ဆုတောင်းချက်​သည်ပင် စက်ဆုပ်ရွံရှာဖွယ်​ဖြစ်​၏​။

10 ဖြောင့်မှန်​သော​သူ​ကို မကောင်း​သော​လမ်း​ထဲသို့ လမ်းလွဲ​စေ​သော​သူ​သည် မိမိ​၏​တွင်း​ထဲသို့ မိမိကိုယ်တိုင်​ကျ​လိမ့်မည်​။ အပြစ်တင်စရာမရှိ​သော​သူ​တို့​မူကား ကောင်း​သော​အရာ​ကို အမွေဆက်ခံ​ရ​ကြ​လိမ့်မည်​။

11 ချမ်းသာ​သော​သူ​သည် ကိုယ့်ကိုယ်ကိုယ် ပညာရှိ​ဟု ထင်မြင်​တတ်​၏​။ သို့သော် အသိဉာဏ်​ရှိ​သော​ဆင်းရဲသား​သည် သူ့​ကို​စစ်ကြော​လိမ့်မည်​။

12 ဖြောင့်မတ်​သော​သူ​တို့ အောင်ပွဲခံ​ကြ​သောအခါ ကြီးစွာ​သော​ဂုဏ်ကျက်သရေ​ရှိ​၏​။ ဆိုးယုတ်​သော​သူ​တို့ ခေါင်းထောင်​လာ​သောအခါ​၌​မူကား လူ​တို့​သည် ပုန်းရှောင်​တတ်​ကြ​၏​။

13 မိမိ​ကျူးလွန်​သော​အပြစ်​များ​ကို ဖုံးကွယ်​ထား​သော​သူ​သည် ကြီးပွား​မည်​မ​ဟုတ်​။ ထို​အပြစ်​များ​ကို​ဖော်ပြ​ဝန်ခံ​၍ စွန့်ပယ်​သော​သူ​မူကား ကရုဏာ​တော်​ကို​ခံစား​ရ​လိမ့်မည်​။

14 ဩတ္တပ္ပစိတ်​အစဉ်အမြဲ​ရှိ​သော​သူ​သည် မင်္ဂလာ​ရှိ​၏​။ မိမိ​၏​စိတ်နှလုံး​ကို​မာကျော​စေ​သော​သူ​မူကား ဒုက္ခတွင်း​ထဲသို့​ကျရောက်​လိမ့်မည်​။

15 ဆင်းရဲ​သော​ပြည်သူပြည်သား​တို့​ကို အုပ်စိုး​သည့်​ဆိုးယုတ်​သော​မင်း​သည် ဟောက်​သော​ခြင်္သေ့​၊ သို့မဟုတ် တစ်ဟုန်ထိုး​တိုက်ခိုက်​သော​ဝက်ဝံ​နှင့်​တူ​၏​။

16 ထိုးထွင်းဉာဏ်​ကင်းမဲ့​သော​အုပ်ချုပ်သူမင်း​သည် အလွန်​ဖိနှိပ်​ညှဉ်းပန်း​တတ်​၏​။ မတရား​သော​အကျိုး​စီးပွား​ကို​ရွံမုန်း​သော​သူ​သည် အသက်​ရှည်​လိမ့်မည်​။

17 လူ့​အသက်​သတ်ခြင်း​အပြစ်ဝန်​ကို ထမ်း​သော​သူ​သည် သေတွင်း​ထဲ​ရောက်​သည့်​တိုင်အောင် ထွက်ပြေး​တိမ်းရှောင်​နေ​ရ​လိမ့်မည်​။ မည်သူ​မျှ​သူ့​ကို​မ​ထောက်မ​စေ​နှင့်​။

18 အပြစ်တင်စရာမရှိ​အောင်​လျှောက်လှမ်း​သော​သူ​သည် ကယ်တင်​ခြင်း​ခံရ​လိမ့်မည်​။ ကွေ့ကောက်​သော​လမ်း​သို့​လိုက်​သော​သူ​မူကား ရုတ်တရက်​လဲကျ​လိမ့်မည်​။

19 မိမိ​မြေ​ကို​ထွန်ယက်​လုပ်ကိုင်​သော​သူ​သည် အစားအစာ​နှင့်​ပြည့်စုံကြွယ်ဝ​လိမ့်မည်​။ အချည်းနှီး​သော​အရာ​များ​နောက်​သို့ လိုက်​သော​သူ​မူကား ဆင်းရဲ​ခြင်း​နှင့်​ပြည့်ဝ​လိမ့်မည်​။

20 သစ္စာရှိ​သော​သူ​သည် ကောင်းချီးမင်္ဂလာ​များစွာ​ခံစား​ရ​လိမ့်မည်​။ အလျင်စလို​ချမ်းသာကြွယ်ဝ​လို​သော​သူ​မူကား အပြစ်ဒဏ်​နှင့်​ကင်းလွတ်​လိမ့်မည်​မ​ဟုတ်​။

21 မျက်နှာလိုက်​ခြင်း​သည် မ​ကောင်း​ပေ​။ သို့သော် လူ​သည် မုန့်​တစ်လုတ်စာ​အတွက် အပြစ်ကျူးလွန်​တတ်​၏​။

22 စေးနှဲ​သော​သူ​သည် စည်းစိမ်ဥစ္စာ​ရ​ရန် အလျင်စလို​လုပ်ဆောင်​သော်လည်း ဆင်းရဲ​ခြင်း​သည် သူ့​ထံသို့​ရောက်လာ​မည်​ကို သူ​မ​သိ​ချေ​။

23 လူ​ကို​ဆုံးမ​သော​သူ​သည် နောက်ဆုံးတွင် မြှောက်ပင့်​ပြောဆို​သော​သူ​ထက် ပို၍​မျက်နှာရ​လိမ့်မည်​။

24 မိမိ​၏​ဖခင်​၊ သို့မဟုတ် မိခင်​၏​ဥစ္စာ​ကို​လုယူ​ပြီးမှ ငါ​အပြစ်​ကျူးလွန်​သည်​မ​ဟုတ်​ဟု ပြောဆို​သော​သူ​သည် အဖျက်သမား​၏​အပေါင်းအဖော်​ဖြစ်​၏​။

25 လောဘကြီး​သော​သူ​သည် အငြင်းပွားမှု​ဖြစ်​ရန်​လှုံ့ဆော်​တတ်​၏​။ ထာဝရဘုရား​ကို​ယုံကြည်ကိုးစား​သော​သူ​မူကား ပြည့်စုံကြွယ်ဝ​လိမ့်မည်​။

26 မိမိ​စိတ်နှလုံး​ကို ကိုးစား​သော​သူ​သည် မိုက်မဲ​သော​သူ​ဖြစ်​၏​။ ဉာဏ်ပညာ​အားဖြင့်​လျှောက်လှမ်း​သော​သူ​မူကား ဘေးလွတ်​လိမ့်မည်​။

27 ဆင်းရဲ​သော​သူ​တို့​အား ပေးကမ်း​သော​သူ​သည် ချို့တဲ့​နွမ်းပါး​လိမ့်မည်​မ​ဟုတ်​။ မျက်ကွယ်​ပြု​သော​သူ​မူကား များစွာ​သော​ကျိန်ဆဲ​ခြင်း​ကို​ခံရ​လိမ့်မည်​။

28 ဆိုးယုတ်​သော​သူ​တို့​ခေါင်းထောင်​လာ​သောအခါ လူ​တို့​သည် ပုန်းရှောင်​တတ်​ကြ​၏​။ သူ​တို့​ပျက်စီး​သွား​သောအခါ​၌​မူကား ဖြောင့်မတ်​သော​သူ​တို့​သည် တိုးပွား​ကြ​လိမ့်မည်​။

MYANMAR STANDARD BIBLE©

Copyright © 2012, 2014, 2017, 2021 by Global Bible Initiative

Global Bible Initiative
ကြှနျုပျတို့နောကျလိုကျပါ:



ကြော်ငြာတွေ