Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

သုတ္တံကျမ်း။ 25 - မြန်​​​မာ့​​​စံ​​​မီ​​​သမ္မာ​​​ကျမ်း​​


ရှောလမုန်မင်း၏အခြားသုတ္တံစကားများ

1 ဤ​စကား​တို့​သည်​လည်း ယုဒ​ရှင်ဘုရင်​ဟေဇကိ​၏​လူ​တို့ ကူးရေး​ထား​သော ရှောလမုန်​၏ သုတ္တံ​စကား​များ​ဖြစ်​ကြ​၏​။

2 ဘုရားသခင်​၏​ဘုန်းအသရေ​ကား အမှုကိစ္စ​ကို​ဝှက်ထား​ခြင်း​ဖြစ်​၏​။ ရှင်ဘုရင်​တို့​၏​ဘုန်းအသရေ​ကား အမှုကိစ္စ​ကို​စူးစမ်း​ခြင်း​ဖြစ်​၏​။

3 မိုးကောင်းကင်​၏​အမြင့်​နှင့်​မြေကြီး​၏​အနက်​ကို စူးစမ်း​၍​မ​ရ​သကဲ့သို့ ရှင်ဘုရင်​တို့​၏​စိတ်နှလုံး​ကို စူးစမ်း​၍​မ​ရ​နိုင်​။

4 ငွေ​ထဲမှ ချော်​ကို​ဖယ်ထုတ်​လျှင် ပန်းထိမ်သမား​အတွက် အသုံးအဆောင်​ပစ္စည်း​ထွက်လာ​မည်​။

5 ရှင်ဘုရင်​၏​ရှေ့မှောက်​မှ ဆိုးယုတ်​သော​သူ​ကို​ဖယ်ထုတ်​လျှင် သူ​၏​ရာဇပလ္လင်​သည် ဖြောင့်မတ်​ခြင်း​၌ တည်မြဲ​လိမ့်မည်​။

6 ရှင်ဘုရင်​၏​ရှေ့မှောက်​၌ သင့်ကိုယ်သင် အမွှမ်း​မ​တင်​နှင့်​။ ကြီးမြတ်​သော​သူ​တို့​၏​နေရာ​၌​လည်း မ​ရပ်​နှင့်​။

7 အကြောင်းမူကား မြင့်မြတ်​သော​သူ​၏​ရှေ့​တွင် နှိမ့်ချ​ခြင်း​ခံရ​သည်​ထက် “​ဤ​နေရာ​သို့​တက်လာ​ပါ​”​ဟု ဖိတ်ခေါ်​ခြင်း​ခံရ​သည်​က ပို၍​ကောင်း​၏​။ သင့်​မျက်စိ​ဖြင့်​တွေ့မြင်​သော​အရာ​ကို

8 အလျင်စလို​သွား​၍ မ​တိုင်တန်း​နှင့်​။ နောက်ဆုံး​၌ သင်​၏​အိမ်နီးချင်း​သည် သင့်​ကို​အရှက်ရ​စေ​လျှင် သင်​မည်သို့​ပြု​မည်နည်း​။

9 သင်​၏​အမှုကိစ္စ​ကို သင်​၏​အိမ်နီးချင်း​နှင့် ရင်ဆိုင်ဖြေရှင်း​လော့​။ အခြား​သော​သူ​၏​လျှို့ဝှက်ချက်​ကို​လည်း မ​ဖော်ပြ​နှင့်​။

10 ဖော်ပြလျှင် ကြား​သော​သူ​သည် သင့်​ကို​အရှက်ခွဲ​သဖြင့် သင်​၏​မကောင်းသတင်း​သည် မည်သည့်​အခါ​မျှ ပျောက်ကွယ်​သွား​မည်​မ​ဟုတ်​။

11 သင့်လျော်​သော​အချိန်​၌ ပြောဆို​သော​စကား​သည် အပြောက်အမွမ်းခြယ်မှုန်း​ထား​သော​ငွေထည်​ပေါ်မှ ရွှေ​ပန်းသီး​များ​နှင့်​တူ​၏​။

12 ပညာရှိ​၏​အဆုံးအမ​သည် နားထောင်​တတ်​သော​သူ​၏​နား​အတွက် ရွှေ​နားကွင်း​၊ သို့မဟုတ် ရွှေစင်​ဖြင့်​ပြုလုပ်​ထား​သော​အဆင်တန်ဆာ​ဖြစ်​၏​။

13 သစ္စာရှိ​သော​စေတမန်​သည် သူ့​ကို​စေလွှတ်​သော​သူ​အတွက် ရိတ်သိမ်း​ရာ​ကာလ​၌​ကျ​သော အေးမြ​သည့်​နှင်းပွင့်​ကဲ့သို့​ဖြစ်၍ သူ့​သခင်​တို့​၏​စိတ်ဝိညာဉ်​ကို လန်းဆန်း​စေ​တတ်​၏​။

14 လက်ဆောင်​မပေး​ဘဲ ပေး​သည်​ဟု ဝါကြွား​သော​သူ​သည် မိုးရေ​မ​ပါ​သော မိုးတိမ်​များ​နှင့်​လေ​ကဲ့သို့​ဖြစ်​၏​။

15 စိတ်ရှည်​ခြင်း​အားဖြင့် ဦးစီးဦးဆောင်​သူ​ကို ဖျောင်းဖျ​နိုင်​၏​။ နူးညံ့သိမ်မွေ့​သော​စကား​သည်​လည်း အရိုး​ကို​ကျိုး​စေ​နိုင်​၏​။

16 ပျားရည်​ကို​တွေ့​လျှင် သင့်​အတွက် လုံလောက်​ရုံ​မျှသာ​စား​လော့​။ ထိုသို့​မ​စား​ဘဲ ဝအီ​အောင်​စား​လျှင် ၎င်း​ကို​အန်ထုတ်​ရ​လိမ့်မည်​။

17 သင်​၏​အိမ်နီးချင်း​အိမ်​သို့ တစ်ခါတစ်ရံ​သာ ခြေဦးလှည့်​လော့​။ သို့မဟုတ်လျှင် သူ​သည် သင့်​ကို​ငြီးငွေ့​၍ မုန်း​လိမ့်မည်​။

18 မိမိ​၏​အိမ်နီးချင်း​တစ်ဖက်​၌ မုသား​သက်သေ​ထွက်ဆို​သော​သူ​သည် တင်းပုတ်​၊ ဓား​၊ ချွန်ထက်​သော​မြား​နှင့်​တူ​၏​။

19 ဆင်းရဲဒုက္ခ​ရောက်​သော​ကာလ​၌ သစ္စာမဲ့​သော​သူ​ကို​အားထား​ခြင်း​သည် ကျိုးပဲ့​သော​သွား​၊ တုန်ချည့်​နေ​သော​ခြေ​နှင့်​တူ​၏​။

20 စိတ်​ဒုက္ခရောက်​နေ​သော​သူ​အား သီချင်း​ဆိုပြ​သော​သူ​သည် ချမ်းအေး​သော​နေ့​တွင် အဝတ်​ကို​ချွတ်​သော​သူ​နှင့်​လည်းကောင်း​၊ ချွတ်ဆေး​ပေါ်မှာ ရှာလကာရည်​ကို လောင်း​သော​သူ​နှင့်​လည်းကောင်း တူ​၏​။

21 သင့်​ရန်သူ ဆာလောင်မွတ်သိပ်​လျှင် သူ့​ကို​စားစရာ​ပေး​လော့​။ ရေငတ်​လျှင် သူ့​ကို​ရေ​တိုက်​လော့​။

22 ထိုသို့​ပြု​လျှင် သင်​သည် သူ​၏​ခေါင်း​ပေါ်၌ မီးခဲ​များ​ကို​ပုံ​ထား​လိမ့်မည်​။ ထာဝရဘုရား​သည်​လည်း သင့်​ကို ဆုလာဘ်​ပေး​တော်မူ​လိမ့်မည်​။

23 မြောက်​လေ​သည် မိုး​ကို​ဖြစ်ပေါ်​စေ​တတ်​၏​။ အတင်းပြော​သော​လျှာ​သည်​လည်း ဒေါသ​မျက်နှာထား​ကို ဖြစ်ပေါ်​စေ​တတ်​၏​။

24 ငြင်းခုံ​ရန်တွေ့​တတ်​သော​မယား​နှင့် တစ်အိမ်တည်း​အတူ​နေ​ရ​ခြင်း​ထက် ခေါင်မိုးပြင်​ထောင့်​၌​နေ​ရ​ခြင်း​သည် ပို၍​ကောင်း​၏​။

25 ဝေးလံ​သော​ပြည်​မှ ရောက်လာ​သော​သတင်း​ကောင်း​သည် မောပန်း​သော​စိတ်ဝိညာဉ်​အတွက် အေးမြ​သော​ရေ​ကဲ့သို့​ဖြစ်​၏​။

26 ဆိုးယုတ်​သော​သူ​ကို အလျှော့ပေး​လိုက်လျော​သည့် ဖြောင့်မတ်​သော​သူ​သည် နောက်ကျိ​သော​စမ်းရေတွင်း​၊ သို့မဟုတ် ညစ်ညမ်း​သော​ရေတွင်း​နှင့်​တူ​၏​။

27 ပျားရည်​ကို များစွာ​စားသုံး​ခြင်း​သည်​မ​ကောင်း​ပေ​။ ဂုဏ်သရေ​ပေါ် ဂုဏ်သရေ​ထပ်၍​ရှာခြင်း​သည်​လည်း ထိုနည်းတူ​ဖြစ်​၏​။

28 မိမိ​၏​စိတ်​ကို​မ​ချုပ်တည်း​နိုင်​သော​သူ​သည် ပြိုပျက်​၍​တံတိုင်း​မ​ရှိ​သော​မြို့​နှင့်​တူ​၏​။

MYANMAR STANDARD BIBLE©

Copyright © 2012, 2014, 2017, 2021 by Global Bible Initiative

Global Bible Initiative
ကြှနျုပျတို့နောကျလိုကျပါ:



ကြော်ငြာတွေ