သုတ္တံကျမ်း။ 11 - မြန်မာ့စံမီသမ္မာကျမ်း1 မမှန်ကန်သောချိန်ခွင်ကို ထာဝရဘုရားစက်ဆုပ်ရွံရှာတော်မူ၏။ မှန်သောအလေးကိုကား ကိုယ်တော်နှစ်သက်တော်မူ၏။ 2 မာနထောင်လွှားခြင်းလာသောအခါ အရှက်ကွဲခြင်းလိုက်လာတတ်၏။ ဉာဏ်ပညာကား စိတ်နှိမ့်ချသောသူတို့နှင့်အတူ လိုက်လာ၏။ 3 ဖြောင့်မှန်သောသူတို့၏သမာဓိသည် သူတို့ကိုဦးဆောင်လမ်းပြတတ်၏။ သစ္စာမဲ့သောသူတို့၏ကောက်ကျစ်စဉ်းလဲခြင်းမူကား သူတို့ကိုဖျက်ဆီးတတ်၏။ 4 အမျက်တော်ထင်ရှားရာနေ့၌ စည်းစိမ်ဥစ္စာသည် အကျိုးမရှိ။ ဖြောင့်မတ်ခြင်းမူကား သေခြင်းမှကယ်နုတ်တတ်၏။ 5 အပြစ်တင်စရာမရှိသောသူ၏ဖြောင့်မတ်ခြင်းသည် သူ၏လမ်းကိုဖြောင့်တန်းစေတတ်၏။ ဆိုးယုတ်သောသူမူကား မိမိ၏ဆိုးယုတ်မှုကြောင့် ကျဆုံးတတ်၏။ 6 ဖြောင့်မှန်သောသူတို့၏ဖြောင့်မတ်ခြင်းသည် သူတို့ကိုကယ်နုတ်တတ်၏။ သစ္စာမဲ့သောသူတို့မူကား မိမိတို့၏အလိုရမ္မက်အားဖြင့် ဖမ်းဆီးခြင်းခံရတတ်ကြ၏။ 7 ဆိုးယုတ်သောသူသေသောအခါ သူ၏မျှော်လင့်ချက်သည် ပျက်စီးတတ်၏။ ဓနဥစ္စာတို့အပေါ်ထားသော သူ၏မျှော်မှန်းချက်သည်လည်း ပျက်စီးတတ်၏။ 8 ဖြောင့်မတ်သောသူသည် ဆင်းရဲဒုက္ခထဲမှလွတ်မြောက်၍ ဆိုးယုတ်သောသူသည် သူ့အစားဝင်ရ၏။ 9 ဘုရားတရားမဲ့သောသူသည် နှုတ်ဖြင့် မိမိ၏အိမ်နီးချင်းကို ဖျက်ဆီးတတ်၏။ ဖြောင့်မတ်သောသူတို့မူကား အသိပညာအားဖြင့် လွတ်မြောက်ခြင်းသို့ရောက်ကြလိမ့်မည်။ 10 ဖြောင့်မတ်သောသူတို့ကောင်းစားသောအခါ တစ်မြို့လုံး ရွှင်လန်းကြ၏။ ဆိုးယုတ်သောသူတို့ပျက်စီးသောအခါ၌လည်း ရွှင်လန်းစွာကြွေးကြော်ကြ၏။ 11 မြို့သည် ဖြောင့်မှန်သောသူတို့၏ ကောင်းချီးမင်္ဂလာအားဖြင့် ချီးမြှောက်ခြင်းခံရတတ်၏။ သို့သော် ဆိုးယုတ်သောသူတို့၏နှုတ်အားဖြင့် ဖြိုဖျက်ခြင်းခံရတတ်၏။ 12 အသိစိတ်မရှိသောသူသည် မိမိ၏အိမ်နီးချင်းကို မထီမဲ့မြင်ပြုတတ်၏။ ထိုးထွင်းဉာဏ်ရှိသောသူမူကား တိတ်ဆိတ်စွာနေတတ်၏။ 13 အတင်းအဖျင်းလိုက်ပြောသောသူသည် လျှို့ဝှက်ချက်ကိုပေါက်ကြားစေတတ်၏။ ယုံကြည်စိတ်ချရသောစိတ်သဘောရှိသူမူကား အမှုကိစ္စကို ဖုံးကွယ်ထားတတ်၏။ 14 လမ်းညွှန်မှုမရှိလျှင် လူမျိုးတစ်မျိုးသည် ကျဆုံးတတ်၏။ အကြံပေးသူများစွာရှိလျှင်မူကား အောင်မြင်တတ်၏။ 15 သူစိမ်းအတွက်အာမခံသောသူသည် အမှန်တကယ်ဒုက္ခရောက်လိမ့်မည်။ တာဝန်ခံပေးရသည်ကိုမုန်းသောသူမူကား ဘေးကင်းလုံခြုံစွာနေရလိမ့်မည်။ 16 ယဉ်ကျေးသိမ်မွေ့သောမိန်းမသည် ဂုဏ်သရေကိုရတတ်၏။ ကြမ်းကြုတ်သောယောက်ျားတို့မူကား ဓနဥစ္စာကိုရတတ်ကြ၏။ 17 မေတ္တာကရုဏာထားတတ်သောသူသည် ကိုယ့်ကိုယ်ကိုယ်အကျိုးပြုတတ်၏။ ရက်စက်သောသူမူကား ကိုယ့်ကိုယ်ကိုယ်ဒုက္ခပေးတတ်၏။ 18 ဆိုးယုတ်သောသူသည် လှည့်ဖြားသောအဖိုးအခကိုရတတ်၏။ ဖြောင့်မတ်ခြင်းမျိုးစေ့ကိုကြဲသောသူမူကား မှန်ကန်သောအကျိုးကိုရတတ်၏။ 19 ဖြောင့်မတ်ခြင်း၌တည်မြဲသောသူသည် အသက်ရှင်ခြင်းသို့ရောက်လိမ့်မည်။ မကောင်းမှုနောက်သို့လိုက်သောသူမူကား သေခြင်းသို့ရောက်လိမ့်မည်။ 20 စိတ်နှလုံးကောက်ကျစ်သောသူတို့ကို ထာဝရဘုရားစက်ဆုပ်ရွံရှာတော်မူ၏။ ပြည့်ဝစုံလင်သောလမ်းကို လိုက်သောသူတို့ကိုကား ကိုယ်တော်နှစ်သက်တော်မူ၏။ 21 မကောင်းမှုပြုသောသူသည် အပြစ်ဒဏ်နှင့်မည်သို့မျှကင်းလွတ်လိမ့်မည်မဟုတ်။ ဖြောင့်မတ်သောသူတို့၏သားမြေးတို့မူကား မုချကင်းလွတ်လိမ့်မည်။ 22 အဆင်းလှသော်လည်း ဆင်ခြင်တုံတရားကင်းမဲ့သောမိန်းမသည် ဝက်နှာခေါင်း၌တပ်ထားသော ရွှေနှာဆွဲနှင့်တူ၏။ 23 ဖြောင့်မတ်သောသူတို့၏အလိုဆန္ဒသည် ကောင်းကျိုးကိုသာဖြစ်စေတတ်၏။ ဆိုးယုတ်သောသူတို့၏မျှော်လင့်ချက်မူကား အမျက်ကိုဖြစ်စေတတ်၏။ 24 စွန့်ကြဲသော်လည်း ဥစ္စာပို၍တိုးပွားသူရှိ၏။ ပေးသင့်သည့်အရာကိုပင် ဆုပ်ကိုင်ထားသော်လည်း ချို့တဲ့နွမ်းပါးခြင်းသို့ရောက်သူလည်းရှိ၏။ 25 စိတ်စေတနာကောင်းသောသူသည် ကြွယ်ဝ၍ ရေလောင်းပေးသောသူသည် ကိုယ်တိုင်လည်း ရေလောင်းပေးခြင်းကိုခံရလိမ့်မည်။ 26 ဂျုံစပါးသိုလှောင်ထားသောသူကို တိုင်းသူပြည်သားတို့ ကျိန်ဆဲကြလိမ့်မည်။ ရောင်းချပေးသောသူ၏ဦးခေါင်းအပေါ်၌မူကား ကောင်းချီးမင်္ဂလာရှိလိမ့်မည်။ 27 ကောင်းမြတ်သောအရာကိုကြိုးစား၍ရှာသောသူသည် ကျေးဇူးကိုရှာတွေ့လိမ့်မည်။ မကောင်းမှုကိုရှာသောသူမူကား သူ့ထံသို့ မကောင်းမှုရောက်လာလိမ့်မည်။ 28 မိမိ၏ဓနဥစ္စာကို ကိုးစားသောသူသည် ကျဆုံးလိမ့်မည်။ ဖြောင့်မတ်သောသူမူကား သစ်ရွက်ကဲ့သို့ ပွင့်လန်းဝေဆာလိမ့်မည်။ 29 မိမိအိမ်သူအိမ်သားတို့ကိုဒုက္ခပေးသောသူသည် လေကိုအမွေဆက်ခံရလိမ့်မည်။ ဆိုးမိုက်သောသူသည်လည်း စိတ်နှလုံး၌ ပညာရှိသောသူ၏အစေအပါးဖြစ်ရလိမ့်မည်။ 30 ဖြောင့်မတ်သောသူ၏အသီးအပွင့်သည် အသက်ပင်သဖွယ်ဖြစ်၏။ စိတ်ဝိညာဉ်များကိုဆွဲဆောင်စည်းရုံးနိုင်သောသူသည် ပညာရှိဖြစ်၏။ 31 ကမ္ဘာမြေကြီးပေါ်တွင် ဖြောင့်မတ်သောသူပင် အကျိုးအပြစ်ကိုခံစားရသည်ဆိုလျှင် ဆိုးယုတ်သောသူနှင့် အပြစ်ပြုသောသူမူကား အဘယ်ဆိုဖွယ်ရှိသနည်း။ |
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative
Global Bible Initiative