ဝတ်​ပြု 3 - မြန်​​​မာ့​​​စံ​​​မီ​​​သမ္မာ​​​ကျမ်း​​

¹ သူ​သည် နွား​ကို မိတ်သဟာယယဇ်​အဖြစ် ပူဇော်​လို​လျှင် အပြစ်အနာအဆာကင်း​သော အထီး​ကို​ဖြစ်စေ​၊ အမ​ကို​ဖြစ်စေ ထာဝရဘုရား​ရှေ့​တော်​၌ ပူဇော်​ရ​မည်​။

² သူ​သည် မိမိ​ပူဇော်​သော​နွား​၏​ခေါင်း​ပေါ်၌ လက်​ကို​တင်​ရ​မည်​။ ထို​နွား​ကို တွေ့ဆုံစည်းဝေးရာ​တဲ​တော်​အဝင်ဝ​၌ သတ်​ရ​မည်​။ အာရုန်​၏​သား​ယဇ်ပုရောဟိတ်​တို့​သည် သွေး​ကို ယဇ်ပလ္လင်​ပတ်ပတ်လည်​ပေါ်၌ ဖျန်း​ရ​မည်​။

³ သူ​သည် ထာဝရဘုရား​အဖို့ မီး​ဖြင့်​ပူဇော်​သော​ယဇ်​အဖြစ် မိတ်သဟာယယဇ်ကောင်​မှ အူ​ကို​ဖုံး​နေ​သည့်​အဆီ​၊ အူ​၌​ရှိ​သည့်​အဆီ​အားလုံး​၊

⁴ ခါး​အောက်ပိုင်း​ရှိ​ကျောက်ကပ်​နှစ်​ခု​နှင့် ၎င်း​တို့​ပေါ်​ရှိ အဆီ​၊ ကျောက်ကပ်​နှင့်အတူ​ခွာယူ​သည့် အသည်း​ပေါ်မှ​အဆီပျဉ်​ကို ယူဆောင်​လာ​၍

⁵ ၎င်း​ကို အာရုန်​၏​သား​တို့​သည် ယဇ်ပလ္လင်​ပေါ်မှ မီး​ပေါ်တွင်​ရှိ​သည့် ထင်း​များ​ပေါ်၌​တင်​ထား​သော မီးရှို့ရာယဇ်​ပေါ်၌ ရှို့​ရ​မည်​။ ထာဝရဘုရား​အဖို့ မီး​ဖြင့်​ပူဇော်​သော​မွှေးကြိုင်​သည့်​ရနံ့​ဖြစ်​၏​။

⁶ သူ​သည် ထာဝရဘုရား​အား သိုးဆိတ်​တို့​ကို မိတ်သဟာယယဇ်​အဖြစ် ပူဇော်​လို​လျှင် အပြစ်အနာအဆာကင်း​သော​အထီး​၊ သို့မဟုတ် အမ​ကို ပူဇော်​ရ​မည်​။

⁷ သိုးသငယ်​ကို ပူဇော်​လို​လျှင် ထာဝရဘုရား​ရှေ့​တော်​၌ ပူဇော်​ရ​မည်​။

⁸ သူ​သည် မိမိ​ပူဇော်​သော​သိုးသငယ်​၏​ခေါင်း​ပေါ်၌ လက်​ကို​တင်​ရ​မည်​။ ထို​သိုးသငယ်​ကို တွေ့ဆုံစည်းဝေးရာ​တဲ​တော်​ရှေ့​၌ သတ်​ရ​မည်​။ အာရုန်​၏​သား​တို့​သည် သွေး​ကို ယဇ်ပလ္လင်​ပတ်ပတ်လည်​ပေါ်၌ ဖျန်း​ရ​မည်​။

⁹ သူ​သည် ထာဝရဘုရား​အဖို့ မီး​ဖြင့်​ပူဇော်​သော​ယဇ်​အဖြစ် မိတ်သဟာယယဇ်ကောင်​၏​ကျောရိုး​နှင့်​ဆက်​နေ​သော အမြီးပိုင်း​တစ်ခုလုံး​မှ ခွာယူ​သည့်​အဆီ​၊ အူ​ကို​ဖုံး​နေ​သည့်​အဆီ​၊ အူ​၌​ရှိ​သည့်​အဆီ​အားလုံး​၊

¹⁰ ခါး​အောက်ပိုင်း​ရှိ​ကျောက်ကပ်​နှစ်​ခု​နှင့် ၎င်း​တို့​ပေါ်​ရှိ အဆီ​၊ ကျောက်ကပ်​နှင့်အတူ​ခွာယူ​သည့်​အသည်း​ပေါ်မှ​အဆီပျဉ် တို့​ကို ယူဆောင်​လာ​၍

¹¹ ယဇ်ပုရောဟိတ်​သည် ထာဝရဘုရား​အဖို့ မီး​ဖြင့်​ပူဇော်​သော​စားဖွယ်ရာ​ပူဇော်သက္ကာ​အဖြစ် ယဇ်ပလ္လင်​ပေါ်၌ ရှို့​ရ​မည်​။

¹² သူ​သည် ဆိတ်​ကို​ပူဇော်​လို​လျှင် ထာဝရဘုရား​ရှေ့​တော်​၌ ပူဇော်​ရ​မည်​။

¹³ သူ​သည် ဆိတ်​၏​ခေါင်း​ပေါ်၌ မိမိ​လက်​ကို​တင်​၍ တွေ့ဆုံစည်းဝေးရာ​တဲ​တော်​ရှေ့​၌ သတ်​ရ​မည်​။ အာရုန်​၏​သား​တို့​သည် သွေး​ကို​ယဇ်ပလ္လင်​ပတ်ပတ်လည်​ပေါ်၌ ဖျန်း​ရ​မည်​။

¹⁴ သူ​သည် ထာဝရဘုရား​အဖို့ မီး​ဖြင့်​ပူဇော်​သော​ယဇ်​အဖြစ် မိမိ​ပူဇော်​သော​ယဇ်ကောင်​၏​အူ​ကို​ဖုံး​နေ​သည့်​အဆီ​၊ အူ​၌​ရှိ​သည့် အဆီ​အားလုံး​၊

¹⁵ ခါး​အောက်ပိုင်း​ရှိ​ကျောက်ကပ်​နှစ်​ခု​နှင့် ၎င်း​တို့​ပေါ်​ရှိ​အဆီ​၊ ကျောက်ကပ်​တို့​နှင့်အတူ အသည်း​ပေါ်မှ​ခွာယူ​သည့်​အဆီပျဉ်​ကို ယူဆောင်​လာ​၍

¹⁶ ယဇ်ပုရောဟိတ်​သည် မွှေးကြိုင်​သော​ရနံ့​ဖြစ်​သည့် မီး​ဖြင့်​ပူဇော်​သော​စားဖွယ်ရာ​ပူဇော်သက္ကာ​အဖြစ် ယဇ်ပလ္လင်​ပေါ်၌ ရှို့​ရ​မည်​။ အဆီ​ရှိသမျှ​ကို ထာဝရဘုရား​ပိုင်​တော်မူ​၏​။

¹⁷ သင်​တို့​သည် မည်သည့်​အဆီ​၊ မည်သည့်​သွေး​ကို​မျှ မ​စား​ရ​။ ဤသည်ကား သင်​တို့​နေထိုင်​ရာ​အရပ်ရပ်​၌ သင်​တို့​၏​မျိုးဆက်​အစဉ်အဆက် အစဉ်အမြဲ​လိုက်နာ​ရ​မည့်​ပြဋ္ဌာန်းချက်​ဖြစ်​၏​’​ဟူ၍ ဆင့်ဆို​လော့​”​ဟု မိန့်​တော်မူ​၏​။