ဝတ်​ပြု 12 - မြန်​​​မာ့​​​စံ​​​မီ​​​သမ္မာ​​​ကျမ်း​​

မီးဖွားပြီးမိန်းမကို စင်ကြယ်စေခြင်း

¹ တစ်ဖန် ထာဝရဘုရား​က မောရှေ​အား

² “​အစ္စရေး​အမျိုးသား​တို့​အား ဆင့်ဆို​လော့​။ မိန်းမ​သည် ကိုယ်ဝန်ဆောင်​၍ သားယောက်ျား​ကို မွေးဖွား​လျှင် သူ​သည် ဓမ္မတာလာ​သောအခါ မစင်ကြယ်​သကဲ့သို့ ခုနစ်​ရက်​ပတ်လုံး မစင်ကြယ်​။

³ ရှစ်​ရက်​မြောက်​နေ့​တွင် သူငယ်​၏​ထိပ်ဖုံးအရေပြား​အသား​၌ အရေဖျားလှီး​ရ​မည်​။

⁴ မိန်းမ​သည် သွေး​သန့်စင်​ဖို့ ရက်​ပေါင်း​သုံးဆယ့်​သုံး​ရက်​စောင့်​ရ​မည်​။ မိမိ​သန့်စင်​ရာ​နေ့ရက်​မ​ပြည့်​မ​ချင်း မည်သည့်​သန့်ရှင်းသောအရာ​ကို​မျှ​မ​ထိ​ရ​၊ သန့်ရှင်းရာဌာန​သို့ မ​လာ​ရ​။

⁵ သမီး​မိန်းကလေး​ကို​မွေးဖွား​လျှင် သူ​သည် ဓမ္မတာလာ​သကဲ့သို့ တစ်ဆယ့်လေး​ရက်​ပတ်လုံး မစင်ကြယ်​။ သွေး​သန့်စင်​ဖို့ ရက်​ပေါင်း​ခြောက်ဆယ့်​ခြောက်​ရက် စောင့်​ရ​မည်​။

⁶ သားယောက်ျား​အတွက်​ဖြစ်စေ​၊ သမီး​မိန်းကလေး​အတွက်​ဖြစ်စေ သန့်စင်​ရာ​နေ့ရက်​ပြည့်​သောအခါ သူ​သည် မီးရှို့ရာယဇ်​အတွက် တစ်နှစ်သားအရွယ်​သိုးသငယ်​တစ်​ကောင်​နှင့် အပြစ်ဖြေရာယဇ်​အတွက် ခိုငယ်​တစ်​ကောင်​၊ သို့မဟုတ် ချိုးငှက်​တစ်​ကောင်​ကို တွေ့ဆုံစည်းဝေးရာ​တဲ​တော်​အဝင်ဝ​၊ ယဇ်ပုရောဟိတ်​ထံ ယူဆောင်​လာ​ရ​မည်​။

⁷ ယဇ်ပုရောဟိတ်​သည် ၎င်း​ကို ထာဝရဘုရား​၏​ရှေ့​တော်​၌ ပူဇော်​၍ ထို​မိန်းမ​အတွက် အပြစ်ဖြေလွှတ်​ခြင်း​ကို​ပြု​ပေး​သဖြင့် သူ​သည် သွေး​ဆင်း​ခြင်း​မှ စင်ကြယ်​လိမ့်မည်​။ ဤသည်ကား သားယောက်ျား​ကို​ဖြစ်စေ​၊ သမီး​မိန်းကလေး​ကို​ဖြစ်စေ မွေးဖွား​ခြင်း​နှင့်ဆိုင်သော​ပညတ်တရား​ဖြစ်​၏​။

⁸ အကယ်၍ သိုးသငယ်​ကို ပူဇော်​ရန်​မ​တတ်နိုင်​လျှင် ချိုးငှက်​နှစ်​ကောင်​၊ သို့မဟုတ် ခိုငယ်​နှစ်​ကောင်​ကို ယူဆောင်​လာ​ရ​မည်​။ တစ်​ကောင်​သည် မီးရှို့ရာယဇ်​အတွက်​ဖြစ်ပြီး ကျန်​တစ်​ကောင်​သည် အပြစ်ဖြေရာယဇ်​အတွက်​ဖြစ်​၏​။ ယဇ်ပုရောဟိတ်​သည် ထို​မိန်းမ​အတွက် အပြစ်ဖြေလွှတ်​ခြင်း​ကို​ပြု​ပေး​သဖြင့် သူ​သည် စင်ကြယ်​လိမ့်မည်​”​ဟု မိန့်​တော်မူ​၏​။