Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

ယေ​ဇ​ကျေ​လ 5 - မြန်​​​မာ့​​​စံ​​​မီ​​​သမ္မာ​​​ကျမ်း​​


ဂျေရုဆလင်မြို့ကျဆုံးပုံကို သရုပ်ပြခြင်း

1 အချင်း​လူသား​၊ ဆံသသမား​၏​သင်တုန်းဓား​ကဲ့သို့ ထက်​သော​ဓား​ကို​ယူ​၍ သင့်​ဆံပင်​နှင့်​မုတ်ဆိတ်မွေး​တို့​ကို ရိတ်​လော့​။ ထို့နောက် ချိန်ခွင်​ဖြင့်​ချိန်​၍ အစုစု​ခွဲ​ထား​လော့​။

2 မြို့​ကို​ဝိုင်း​ထား​သော​နေ့​စေ့​သောအခါ ထို​အထဲ​မှ သုံးပုံတစ်ပုံ​ကို မြို့​ထဲ​တွင် မီးရှို့​ပစ်​လော့​။ နောက်ထပ်​သုံးပုံတစ်ပုံ​ကို မြို့​ထဲ​လှည့်လည်​၍ ဓား​ဖြင့်​ခုတ်ဖြတ်​လော့​။ နောက်ထပ်​သုံးပုံတစ်ပုံ​ကို လေ​ထဲသို့​လွှင့်ပစ်​လိုက်​လော့​။ ငါ​သည် ထို​အစု​နောက်​သို့ ဓား​ကို​လွှတ်​လိုက်​မည်​။

3 ထို​အထဲ​မှ အနည်းငယ်​ကို​ယူ​၍ သင့်​ဝတ်ရုံ​အနားစ​တွင် ထုပ်​ထား​လော့​။

4 တစ်ဖန် ထို​အထဲ​မှ အနည်းငယ်​ကို​ယူ​ပြီး မီး​ထဲ​သို့​ပစ်ချ​၍ မီး​ရှို့​ပစ်​လော့​။ ထို​မီး​သည် အစ္စရေး​တစ်မျိုးနွယ်လုံး​သို့ ပြန့်သွား​လိမ့်မည်​။

5 ဘုရားရှင်​ထာဝရဘုရား​က ‘ဤသည်ကား ဂျေရုဆလင်​မြို့​တည်း​။ ငါ​သည် ဂျေရုဆလင်​မြို့​ကို လူမျိုးတကာ​တို့​အလယ်​၊ သူ့​ဝန်းကျင်​ရှိ တိုင်းနိုင်ငံ​တို့​အလယ်​တွင် ချ​ထား​၏​။

6 သို့သော် သူ​သည် ဆိုးယုတ်​သော​အမှု​ကို​ပြု​လျက် လူမျိုးတကာ​တို့​ထက် ငါ့​စီရင်ထုံးဖွဲ့ချက်​တို့​ကို သာ၍​ဖီဆန်​ကြ​၏​။ သူ့​ဝန်းကျင်​ရှိ တိုင်းနိုင်ငံ​များ​ထက် ငါ့​ပြဋ္ဌာန်းချက်​တို့​ကို သာ၍​ဖီဆန်​ကြ​၏​။ စင်စစ် သူ​တို့​သည် ငါ့​စီရင်ထုံးဖွဲ့ချက်​ကို စွန့်ပယ်​၍ ငါ့​ပြဋ္ဌာန်းချက်​တို့​ကို မ​လိုက်နာ​ဘဲ​နေ​ကြ​၏’​ဟု မိန့်​တော်မူ​၏​။

7 ထို့ကြောင့် ဘုရားရှင်​ထာဝရဘုရား​က ‘​သင်​တို့​သည် သင်​တို့​ဝန်းကျင်​ရှိ​လူမျိုးတကာ​တို့​ထက် သာ၍​သောင်းကျန်း​၏​။ ငါ့​စီရင်ထုံးဖွဲ့ချက်​တို့​ကို မ​လိုက်နာ​၊ ငါ့​ပြဋ္ဌာန်းချက်​တို့​ကို မ​စောင့်ထိန်း​ကြ​။ သင်​တို့​ဝန်းကျင်​ရှိ လူမျိုးတကာ​တို့​၏​စီရင်ထုံးဖွဲ့ချက်​တို့​ကို​ပင် မ​ပြုကျင့်​နိုင်​ကြ’​ဟု မိန့်​တော်မူ​၏​။

8 ထို့ကြောင့် ဘုရားရှင်​ထာဝရဘုရား​က ‘ငါ​ကိုယ်တိုင် သင့်​ကို​စီရင်​မည်​။ လူမျိုးတကာ​တို့​ရှေ့​တွင် သင့်​ကို​စီရင်​မည်​။

9 သင်​ပြု​သော​စက်ဆုပ်ရွံရှာဖွယ်​အမှု​အလုံးစုံ​တို့​ကြောင့် ငါ​မ​ပြု​ဖူး​သော​၊ နောင်တွင်လည်း ပြု​မည်​မ​ဟုတ်​သော​အမှု​ကို သင်​၌​ငါ​ပြု​မည်​။

10 သင်​တို့​ထဲ​တွင် မိဘ​တို့​သည် သားသမီး​အသား စား​ကြ​လိမ့်မည်​။ သားသမီး​တို့​သည်​လည်း မိဘ​အသား စား​ကြ​လိမ့်မည်​။ ငါ​သည် သင့်​ကို အပြစ်ဒဏ်​ပေး​မည်​။ ကြွင်းကျန်​သော​သူ​တို့​ကို လေနှင်ရာ​အရပ်ရပ်​သို့ ကွဲလွင့်​စေ​မည်’​ဟု မိန့်​တော်မူ​၏​။

11 ဘုရားရှင်​ထာဝရဘုရား​က ‘စင်စစ် သင်​ပြု​သော စက်ဆုပ်​ရွံရှာဖွယ်​အမှု​အပေါင်း​တို့​သည် ငါ​၏​သန့်ရှင်းရာဌာန​ကို ညစ်ညူး​စေ​ပြီ​ဖြစ်၍ ငါ​အသက်ရှင်​သည်​နှင့်အညီ သင့်​ကို မ​သနား​၊ မ​ညှာတာ​ဘဲ သုတ်သင်​ပစ်​မည်​။

12 လူ​သုံးပုံတစ်ပုံ​သည် ကပ်ရောဂါ​ဘေး​၊ ငတ်မွတ်ခေါင်းပါး​ခြင်း​ဘေး​ဖြင့် သင်​တို့​အလယ်​တွင် သေကျေ​ပျက်စီး​ကြ​မည်​။ ကျန်​သုံးပုံတစ်ပုံ​သည် ဓားဘေး​ဖြင့် သင်​တို့​ပတ်ပတ်လည်​တွင်​ကျဆုံး​ကြ​မည်​။ ကျန်​သုံးပုံတစ်ပုံ​သည် လေနှင်ရာ​အရပ်ရပ်​သို့ ကွဲလွင့်​သွား​မည်​။ ငါ​သည် ဓား​ကို​ထုတ်​၍ သူ​တို့​နောက်​ကို​လိုက်​မည်’​ဟု မိန့်​တော်မူ​၏​။

13 ‘သို့မှ ငါ့​အမျက်ပြေ​မည်​။ သူ​တို့​ကို အမျက်ဒဏ်​ခံ​စေ​ပြီးမှ ငါ့​စိတ်ချင်ရဲပြေ​မည်​။ ငါ့​အမျက်​ငြိမ်း​ပြီးမှ ငါ​ထာဝရဘုရား စိတ်အားကြီး​စွာ​ဖြင့် မိန့်ဆို​ခဲ့​ကြောင်း​ကို သူ​တို့​သိ​ရ​ကြ​လိမ့်မည်​။

14 ငါ​သည် သင့်​ကို ပြိုပျက်​ရာ ဖြစ်​စေ​မည်​။ သင့်​ဝန်းကျင်​ရှိ လူမျိုးတကာ​တို့​အလယ်​၊ ဖြတ်သန်းသွားလာ​သူ​တို့​အမြင်​တွင် ကဲ့ရဲ့စရာ​ဖြစ်စေ​မည်​။

15 ငါ​သည် အမျက်​ဒေါသ​ပြင်းစွာ​ဖြင့် သင့်​ကို​ဆုံးမ​၍ အပြစ်ဒဏ်​ပေး​သောအခါ သင့်​ဝန်းကျင်​ရှိ လူမျိုးတကာ​တို့​တွင် သင်​သည် ကဲ့ရဲ့စရာ​၊ ပုတ်ခတ်စရာ​၊ ခိုင်းနှိုင်းစရာ​၊ လူသူကင်းမဲ့​ရာ ဖြစ်​လိမ့်မည်​ဟု ငါ​ထာဝရဘုရား မိန့်​တော်မူ​ပြီ​။

16 ငါ​သည် သင်​တို့​ထံ သေ​စေ​နိုင်​သော​ငတ်မွတ်ခေါင်းပါး​ခြင်း​မြား​ကို ပစ်လွှတ်​လိုက်​သောအခါ​၊ သင်​တို့​ကို ဖျက်ဆီး​ပစ်​မည့် ဖျက်ဆီး​ခြင်း​မြား​ကို​ပစ်လွှတ်​သောအခါ သင်​တို့​၌ ပို၍​ဆိုးရွား​သော​ငတ်မွတ်ခေါင်းပါး​ခြင်း​ဘေး ဖြစ်​လိမ့်မည်​။ သင်​တို့​၏​စားနပ်ရိက္ခာ​ကို ဖြတ်တောက်​ပစ်​မည်​။

17 သင်​တို့​ထံ ငတ်မွတ်ခေါင်းပါး​ခြင်း​ဘေး​ကို စေလွှတ်​မည်​၊ သားရဲတိရစ္ဆာန်​တို့​ကို စေလွှတ်​မည်​။ သင်​တို့​သည် သားသမီးမဲ့ ဖြစ်​ကြ​လိမ့်မည်​။ ကပ်ရောဂါ​ဘေး​၊ သေဘေး​တို့ သင့်​ထံ​ရောက်လာ​မည်​။ သင့်​အပေါ် ဓားဘေး​ကျရောက်​စေ​မည်’​ဟူ၍ ငါ​ထာဝရဘုရား မိန့်​တော်မူ​ပြီ​”​ဟု မိန့်ဆို​လေ​၏​။

MYANMAR STANDARD BIBLE©

Copyright © 2012, 2014, 2017, 2021 by Global Bible Initiative

Global Bible Initiative
ကြှနျုပျတို့နောကျလိုကျပါ:



ကြော်ငြာတွေ