Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

ယေ​ဇ​ကျေ​လ 34 - မြန်​​​မာ့​​​စံ​​​မီ​​​သမ္မာ​​​ကျမ်း​​


သိုးထိန်းများနှင့်ထာဝရဘုရား၏သိုးစုတော်

1 တစ်ဖန် ထာဝရဘုရား​၏​နှုတ်ကပတ်တော်​သည် ငါ့​ထံသို့​ရောက်လာ​၍

2 “​အချင်း​လူသား​၊ အစ္စရေး​သိုးထိန်း​တို့​ကို ဆန့်ကျင်​၍ ပရောဖက်ပြု​ဟောပြော​လော့​။ ဘုရားရှင်​ထာဝရဘုရား​က သိုးထိန်း​တို့​အား ‘မိမိကိုယ်ကို​သာ ကျွေးမွေး​စောင့်ရှောက်​သော အစ္စရေး​သိုးထိန်း​တို့​၊ သင်​တို့​သည် အမင်္ဂလာ​ရှိ​၏​။ သိုးထိန်း​တို့​မည်သည် သိုး​တို့​ကို ကျွေးမွေး​ရ​မည်​မ​ဟုတ်​လော​။

3 သင်​တို့​သည် သိုး​ဆီ​ကို​စား​ပြီး သိုးမွေး​ကို​ဝတ်​ကြ​၏​။ ဆူဖြိုး​သော​အကောင်​ကို​လည်း သတ်စား​ကြ​၏​။ သို့သော် သိုး​တို့​ကို​မူ မ​ကျွေးမွေး​ကြ​။

4 အားနည်း​သော​သိုး​တို့​ကို အား​မ​ဖြည့်​ပေး​၊ ဖျားနာ​သော​သိုး​တို့​ကို ဆေး​မ​ကု​ပေး​၊ ဒဏ်ရာ​ရ​သော​သိုး​တို့​ကို​လည်း ကျပ်​မ​စည်း​ပေး​ကြ​။ လမ်းလွဲ​သော​သိုး​များ​ကို ပြန်​မ​ခေါ်ဆောင်​လာ​၊ ပျောက်​သော​သိုး​တို့​ကို​လည်း မ​ရှာဖွေ​ကြ​။ သင်​တို့​သည် သိုး​တို့​ကို ခက်ထန်​ကြမ်းတမ်း​စွာ ထိန်းကျောင်း​ကြ​၏​။

5 သိုးထိန်း​မ​ရှိ​သောကြောင့် သိုး​တို့​ကွဲလွင့်​ကုန်​၏​။ ကွဲလွင့်​သွား​သော​သိုး​တို့​သည် သားရဲတိရစ္ဆာန်​တို့​၏​အစာ​ဖြစ်​ရ​ကုန်​၏​။

6 ငါ့​သိုး​တို့​သည် တောင်တန်း​ရှိသမျှ​၊ ကုန်းမြင့်​ရှိသမျှ​တို့​တွင် လှည့်လည်​သွားလာ​နေ​ရ​ပြီ​။ မြေ​တစ်ပြင်လုံး​သို့ ကွဲလွင့်​ကုန်​ပြီ​။ ငါ့​သိုး​တို့​ကို လိုက်လံ​ရှာဖွေ​သူ တစ်ယောက်မျှ​မ​ရှိ’​ဟု မိန့်​တော်မူ​၏​။

7 ထို့ကြောင့် အို သိုးထိန်း​တို့​၊ ထာဝရဘုရား​၏​စကား​တော်​ကို နားထောင်​ကြ​လော့​။

8 ဘုရားရှင်​ထာဝရဘုရား​က ‘ငါ​အသက်ရှင်​သည်​နှင့်အညီ သိုးထိန်း​မ​ရှိ​သောကြောင့် ငါ့​သိုး​တို့​သည် သားကောင်​များ​ဖြစ်သွား​ရ​ပြီ​။ တောရိုင်းတိရစ္ဆာန်​တို့​၏​အစာ​ဖြစ်​ရ​ပြီ​။ သိုးထိန်း​တို့​သည် ငါ့​သိုး​တို့​ကို မ​ရှာဖွေ​။ ငါ့​သိုး​တို့​ကို မ​ထိန်းကျောင်း​၊ သူတို့ကိုယ်ကို​သာ ကြည့်ရှု​၏’​ဟု မိန့်​တော်မူ​၏​။

9 ထို့ကြောင့် အို သိုးထိန်း​တို့​၊ ထာဝရဘုရား​၏​စကား​ကို နားထောင်​ကြ​လော့​။

10 ဘုရားရှင်​ထာဝရဘုရား​က ‘ကြည့်ရှု​လော့​။ ငါ​သည် သိုးထိန်း​တို့​ကို​ဆန့်ကျင်​၍ သူ​တို့​ထံမှ ငါ့​သိုး​တို့​ကို ပြန်တောင်း​မည်​။ သူ​တို့​ကို သိုးထိန်း​အဖြစ်​မှ နုတ်ပယ်​ပစ်​မည်​။ သိုးထိန်း​တို့​သည် သူတို့ကိုယ်​ကို ကျွေးမွေး​နိုင်​တော့​မည်​မ​ဟုတ်​။ ငါ့​သိုး​များ​ကို သူ​တို့​နှုတ်​မှ​ကယ်နုတ်​မည်​၊ သူ​တို့​အစာ မ​ဖြစ်​စေ​ရ’​ဟု မိန့်​တော်မူ​၏​။

11 ထို့ကြောင့် ဘုရားရှင်​ထာဝရဘုရား​က ‘ငါ​ကိုယ်တိုင် ငါ့​သိုး​တို့​ကို လိုက်လံ​ရှာဖွေ​မည်​။

12 သိုးထိန်း​သည် ကွဲလွင့်​သွား​သော မိမိ​၏​သိုး​တို့​ကို လိုက်ရှာ​သကဲ့သို့ ငါ​သည်​လည်း ငါ့​သိုး​တို့​ကို ရှာဖွေ​မည်​။ မိုးအုံ့​၍​အမှောင်ကျ​သော​နေ့​တွင် အရပ်ရပ်​ကွဲလွင့်​သွား​သော ငါ့​သိုး​တို့​ကို​ကယ်တင်​မည်​။

13 သူ​တို့​ကို လူမျိုး​တကာ​တို့​ထံမှ ထုတ်ဆောင်​လာ​မည်​။ အရပ်ရပ်​တို့​မှ ပြန်လည်​စုစည်း​၍ နေရင်းပြည်​သို့ ပြန်ပို့ဆောင်​မည်​။ အစ္စရေး​တောင်တန်း​များ​အပေါ်​၊ မြစ်ချောင်း​များ​အနား​မှစ၍ သူ​တို့​နေထိုင်​ရာ​အရပ်ရပ်​တို့​တွင် သူ​တို့​ကို ကျွေးမွေး​မည်​။

14 ကောင်း​သော​စားကျက်မြေ​တွင် သူ​တို့​ကို ကျွေးမွေး​မည်​။ မြင့်မား​သော​အစ္စရေး​တောင်တန်း​များ​သည် သူ​တို့​ကျက်စား​ရာ​နေရာ​ဖြစ်​လိမ့်မည်​။ ကောင်း​သော​စားကျက်မြေ​တွင်​နေ​ရ​၍ စိမ်းလန်း​သော​ကျက်စား​ရာ အစ္စရေး​တောင်တန်း​များ​ပေါ်တွင် သူ​တို့​ကျက်စား​ရ​ကြ​လိမ့်မည်’​ဟု မိန့်​တော်မူ​၏​။

15 ဘုရားရှင်​ထာဝရဘုရား​က ‘ငါ​ကိုယ်တိုင် ငါ့​သိုး​တို့​ကို ကျွေးမွေး​စောင့်ရှောက်​မည်​။ ငါ​ကိုယ်တိုင် သူ​တို့​ကို စိမ်းလန်း​သော​အရပ်​တွင် လဲလျောင်း​စေ​မည်​။

16 ပျောက်​သော​သိုး​ကို ပြန်ရှာ​မည်​။ လမ်းလွဲ​သော​သိုး​ကို ပြန်ခေါ်​လာ​မည်​။ ဒဏ်ရာ​ရ​သော​သိုး​ကို ကျပ်စည်း​ပေး​မည်​။ အားနည်း​သော​သိုး​ကို အားရှိ​စေ​မည်​။ သို့သော် ဆူဖြိုး​သန်မာ​သော​သိုး​ကို​မူ ငါ​သုတ်သင်​ပစ်​မည်​။ ငါ​သည် သိုး​တို့​ကို တရားသဖြင့် ကျွေးမွေး​ထိန်းကျောင်း​မည်’​ဟု မိန့်​တော်မူ​၏​။

17 အသင် ငါ့​သိုး​တို့​၊ ဘုရားရှင်​ထာဝရဘုရား​က ‘ကြည့်ရှု​လော့​။ ငါ​သည် သိုး​အချင်းချင်း​အမှု​၊ သိုး​နှင့်​ဆိတ်​တို့​အမှု​ကို စီရင်​မည်​။

18 သင်​တို့​သည် ကောင်း​သော​စားကျက်မြေ​၌ ကျက်စား​ရ​သည်​မှာ မ​လုံလောက်​သေး​၍ ကျန်​သော​စားကျက်မြေ​ကို နင်းချေ​ပစ်​ရ​သလော​။ ကြည်လင်သန့်ရှင်း​သော​ရေ​ကို သောက်​ရ​သည်​မှာ မ​လုံလောက်​သေး​၍ ကျန်​သော​ရေ​ကို နောက်ကျိ​အောင် မွှေနှောက်​ပစ်​ရ​သလော​။

19 သင်​တို့​နင်းချေ​ခဲ့​သော စားကျက်မြေ​ကို ငါ့​သိုး​တို့​စား​ရ​မည်လော​။ သင်​တို့​နောက်ကျိ​အောင်​မွှေနှောက်​သော​ရေ​ကို ငါ့​သိုး​တို့​သောက်​ရ​မည်လော’​ဟု မိန့်​တော်မူ​၏​။

20 သို့ဖြစ်၍ ဘုရားရှင်​ထာဝရဘုရား​က သူ​တို့​အား ‘ကြည့်ရှု​လော့​။ ဆူဖြိုး​သော​သိုး​နှင့် ပိန်လှီ​သော​သိုး​တို့​အမှု​ကို ငါ​ကိုယ်တိုင်​စီရင်​မည်​။

21 သင်​တို့​သည် အားနည်း​သော​သိုး​တို့​ကို နံစောင်း​၊ ပခုံး​တို့​ဖြင့် တွန်းထုတ်​သည်​သာမက အဝေး​သို့​လွင့်ထွက်​သွား​သည့်​တိုင်အောင် ချို​ဖြင့်​ဝှေ့​သောကြောင့်

22 ငါ့​သိုး​တို့​ကို ငါ​ကယ်တင်​မည်​။ သားကောင်​ဖြစ်​ရ​တော့​မည်​မ​ဟုတ်​။ သိုး​တစ်ကောင်ချင်းစီ​၏​အမှု​ကို ငါ​စီရင်​မည်​။

23 သူ​တို့​ကို​ထိန်းကျောင်း​ရန် သိုးထိန်း​တစ်​ဦး​အဖြစ် ငါ့​အစေအပါး​ဒါဝိဒ်​ကို ငါ​ခန့်ထား​မည်​။ သူ​သည် သိုးထိန်း​တစ်​ဦး​အဖြစ် သိုး​တို့​ကို ထိန်းကျောင်း​ပေး​လိမ့်မည်​။

24 ငါ​ထာဝရဘုရား​သည် သူ​တို့​၏​ဘုရားသခင်​ဖြစ်​မည်​။ ငါ့​အစေအပါး​ဒါဝိဒ်​သည်​လည်း သူ​တို့​၏​မင်း​ဖြစ်​လိမ့်မည်​။ ငါ​ထာဝရဘုရား မိန့်​တော်မူ​၏​။

25 ထို့ပြင် သူ​တို့​နှင့် ငြိမ်သက်​ခြင်း​ပဋိညာဉ်​ကို ဖွဲ့​မည်​။ ထို​ပြည်​ရှိ သားရဲတိရစ္ဆာန်​တို့​ကို ဖယ်ရှား​မည်​။ သူ​တို့​သည် တောကန္တာရ​ထဲတွင် ဘေးကင်းလုံခြုံ​စွာ​နေ​ရ​မည်​။ တောအုပ်​ထဲတွင် အိပ်​ရ​လိမ့်မည်​။

26 သူ​တို့​နှင့်တကွ သူ​တို့​ကျက်စား​ရာ​ငါ့​တောင်​ပတ်ပတ်လည်​ကို ကောင်းချီးမင်္ဂလာ​ချပေး​မည်​။ ရာသီ​အလိုက် မိုး​ရွာသွန်း​စေ​မည်​။ ကောင်းချီးမိုး​ကို ရွာသွန်း​စေ​မည်​။

27 တော​ထဲရှိ​အပင်​တို့​သည် အသီး​သီး​လိမ့်မည်​။ မြေကြီး​သည် အသီးအနှံ​ကို ဖြစ်ထွန်း​စေ​မည်​။ သူ​တို့​သည် နေရင်းပြည်​တွင် ဘေးကင်းလုံခြုံ​စွာ​နေ​ရ​လိမ့်မည်​။ သူ​တို့​ထမ်း​ထား​ရ​သော​ထမ်းပိုး​ကို​ချိုး​၍ သူ​တို့​အား​ကျွန်ပြု​သော​သူ​တို့​လက်​မှ သူ​တို့​ကို ကယ်နုတ်​သောအခါ ငါ​သည် ထာဝရဘုရား​ဖြစ်ကြောင်း သူ​တို့​သိ​ကြ​လိမ့်မည်​။

28 သူ​တို့​သည် လူမျိုးတကာ​တို့​၏​သားကောင် ဖြစ်​တော့​မည်​မ​ဟုတ်​။ ထို​ပြည်​ရှိ​သားရဲတိရစ္ဆာန်​တို့​လည်း သူ​တို့​ကို ကိုက်စား​ကြ​တော့​မည်​မ​ဟုတ်​။ ဘေးကင်းလုံခြုံ​စွာ​နေ​ရ​လိမ့်မည်​။ သူ​တို့​ကို​ခြိမ်းခြောက်​မည့်​သူ ရှိ​တော့​မည်​မ​ဟုတ်​။

29 သူ​တို့​အား သီးနှံ​ဖြစ်ထွန်း​သော​ဥယျာဉ်မြေ​ကို ပေး​မည်​။ ထို​ပြည်​တွင် ငတ်မွတ်​ခြင်း​ဘေး​ကြောင့် သေ​ရ​တော့​မည်​မ​ဟုတ်​။ လူမျိုးခြား​တို့​၏​အသရေဖျက်​ခြင်း​ကို​လည်း ခံရ​တော့​မည်​မ​ဟုတ်​။

30 သူ​တို့​၏​ဘုရားသခင် ငါ​ထာဝရဘုရား​သည် သူ​တို့​နှင့်အတူ​ရှိ​ကြောင်း​၊ အစ္စရေး​အမျိုးအနွယ်​သည် ငါ့​လူမျိုး​တော်​ဖြစ်ကြောင်း​ကို လူ​တို့​သိ​ကြ​လိမ့်မည်’​ဟူ၍ မိန့်​တော်မူ​သည်”​ဟု မိန့်ဆို​၏​။

31 ဘုရားရှင်​ထာဝရဘုရား​က “သင်​တို့​သည် ငါ့​စားကျက်​၌​ကျက်စား​သော လူမျိုး​တော်​သိုးစု​ဖြစ်​၏​။ ငါ​သည်​လည်း သင်​တို့​၏​ဘုရားသခင်​ဖြစ်​၏​”​ဟု မိန့်​တော်မူ​၏​။

MYANMAR STANDARD BIBLE©

Copyright © 2012, 2014, 2017, 2021 by Global Bible Initiative

Global Bible Initiative
ကြှနျုပျတို့နောကျလိုကျပါ:



ကြော်ငြာတွေ