ယေဇကျေလ 10 - မြန်မာ့စံမီသမ္မာကျမ်းထာဝရဘုရား၏ဘုန်းတော် ဗိမာန်တော်မှထွက်သွားခြင်း 1 ထို့နောက် ငါကြည့်လိုက်သော် ခေရုဗိမ်တို့၏ဦးခေါင်းအထက်မိုးမျက်နှာကြက်တွင် နီလာရောင်အဆင်းသဏ္ဌာန်ပလ္လင်နှင့်တူသောအရာတစ်ခု ပေါ်လာသည်ကို တွေ့ရ၏။ 2 ကိုယ်တော်သည် ပိတ်ချောထည်ဝတ်ထားသူအား “ခေရုဗိမ်အောက် ဘီးများကြားသို့ဝင်၍ ခေရုဗိမ်အလယ်ရှိမီးခဲကို လက်နှင့်အပြည့်ယူပြီးလျှင် မြို့ပေါ်ကြဲချလော့”ဟု မိန့်တော်မူရာ ထိုသူလည်း ဝင်သွားသည်ကို ငါတွေ့ရ၏။ 3 ခေရုဗိမ်တို့သည် အိမ်တော်တောင်ဘက်တွင် ရပ်နေ၏။ ထိုသူဝင်သွားသောအခါ အတွင်းဝင်းတစ်ခုလုံး မိုးတိမ်များလွှမ်းခြုံသွား၏။ 4 ထာဝရဘုရား၏ဘုန်းတော်သည် ခေရုဗိမ်အထက်မှ အိမ်တော်တံခါးခုံသို့ ရွေ့သွားလျှင် အိမ်တော်တစ်ခုလုံး မိုးတိမ်များလွှမ်းခြုံသွား၏။ ဝင်းတစ်ခုလုံးသည်လည်း ထာဝရဘုရား၏ဘုန်းတော်ရောင်ခြည်နှင့် ထွန်းတောက်လေ၏။ 5 ထိုအခါ ခေရုဗိမ်တို့၏တောင်ပံခတ်သံကို အနန္တတန်ခိုးရှင်ဘုရားသခင် မိန့်မြွက်တော်မူသောစကားသံကဲ့သို့ အပြင်ဝင်းတိုင်အောင် ကြားရ၏။ 6 တစ်ဖန် ပိတ်ချောထည်ဝတ်ထားသူအား “ဘီးများ၊ ခေရုဗိမ်များအလယ်ရှိ မီးခဲကိုယူလော့”ဟု မိန့်တော်မူလျှင် ထိုသူလည်း ဝင်သွားပြီး ဘီးအနားတွင် ရပ်နေ၏။ 7 ခေရုဗိမ်တို့ထဲမှ ခေရုဗိမ်တစ်ပါးက ခေရုဗိမ်များအလယ်ရှိမီးခဲကိုလှမ်းယူပြီး ပိတ်ချောထည်ဝတ်ထားသူ၏လက်ထဲသို့ ထည့်ပေးသောအခါ သူလည်း ယူ၍ထွက်သွား၏။ 8 ခေရုဗိမ်တို့၏အတောင်ပံအောက်တွင် လူလက်နှင့်တူသောလက်ရှိသည်ကို တွေ့ရ၏။ 9 ထို့နောက် ငါကြည့်လိုက်သော် ခေရုဗိမ်တို့၏ဘေးတွင် ဘီးလေးဘီးရှိ၏။ ခေရုဗိမ်တစ်ပါးစီ၏ဘေးတွင် ဘီးတစ်ဘီးစီရှိပြီး ဘီးများသည် ကျောက်မျက်ရွဲအရောင်ကဲ့သို့ တောက်ပနေ၏။ 10 ဘီးလေးခုတို့မှာ တစ်ပုံစံတည်းဖြစ်၍ ဘီးတစ်ခုတွင် နောက်ဘီးတစ်ခုကို ကန့်လန့်ဖြတ်ထည့်ထားသည့်ပုံစံမျိုးဖြစ်၏။ 11 သွားသောအခါ ဟိုဘက်သည်ဘက်မကွေ့ဘဲ ခေရုဗိမ်တို့ မျက်နှာမူရာလေးဘက်လေးတန်သို့ သွား၏။ မျက်နှာတစ်ဖက်၏ဦးဆောင်သွားရာဘက်သို့ ဟိုဘက်သည်ဘက်မကွေ့ဘဲ လိုက်သွား၏။ 12 ခေရုဗိမ်လေးပါးရှိ ဘီးများနှင့်တကွ ခေရုဗိမ်တို့၏ကျော၊ လက်များ၊ တောင်ပံများနှင့် တစ်ကိုယ်လုံးတွင် မျက်စိအပြည့်ပါရှိ၏။ 13 ဘီးများကို “ဘီးစကြာ”ဟု ခေါ်ဆိုသည်ကို ငါကြား၏။ 14 ခေရုဗိမ်တစ်ပါးစီတွင် မျက်နှာလေးခုစီပါရှိ၏။ ပထမမျက်နှာသည် ခေရုဗိမ်မျက်နှာ၊ ဒုတိယမျက်နှာသည် လူမျက်နှာ၊ တတိယမျက်နှာသည် ခြင်္သေ့မျက်နှာ၊ စတုတ္ထမျက်နှာသည် လင်းယုန်မျက်နှာဖြစ်၏။ 15 ခေရုဗိမ်တို့ ကြွတက်သွားကြ၏။ ထိုခေရုဗိမ်တို့သည် ခေဗာမြစ်နားတွင် ငါတွေ့ခဲ့သောသတ္တဝါများပင် ဖြစ်၏။ 16 ထိုသို့ ခေရုဗိမ်တို့ သွားသောအခါ ဘီးတို့သည်လည်း သူတို့၏ဘေးမှ လိုက်ကြ၏။ ခေရုဗိမ်တို့အတောင်ပံဖြန့်၍ မြေမှကြွသောအခါ ဘီးတို့သည်လည်း ထက်ကြပ်မကွာလိုက်ကြ၏။ 17 သတ္တဝါတို့၏ဝိညာဉ်သည် ဘီး၌တည်သောကြောင့် သူတို့ရပ်သောအခါ ဘီးတို့လည်း ရပ်ကြ၏။ သူတို့ကြွသောအခါ ဘီးတို့လည်း ကြွကြ၏။ 18 တစ်ဖန် ထာဝရဘုရား၏ဘုန်းအသရေတော်သည် အိမ်တော်တံခါးခုံမှခွာသွား၍ ခေရုဗိမ်အထက်၌ တည်နေ၏။ 19 ငါကြည့်နေစဉ်မှာပင် ခေရုဗိမ်တို့သည် အတောင်ပံကိုဖြန့်၍ မြေမှကြွသွားကြ၏။ ဘီးတို့သည်လည်း သူတို့နှင့်အတူ လိုက်သွား၏။ ထာဝရဘုရားအိမ်တော်အရှေ့ဘက်တံခါးဝသို့ရောက်သောအခါ ရပ်နေ၏။ အစ္စရေးလူမျိုး၏ဘုရားသခင်ဘုန်းအသရေတော်သည်လည်း သူတို့အပေါ်တွင် တည်နေ၏။ 20 ဤသည်ကား ခေဗာမြစ်နား၊ အစ္စရေးလူမျိုး၏ဘုရားသခင်ဘုန်းတော်အောက်တွင် ငါတွေ့ရသောသတ္တဝါများဖြစ်၏။ သူတို့သည် ခေရုဗိမ်များပင်ဖြစ်သည်ကို ငါသိ၏။ 21 တစ်ပါးစီတွင် မျက်နှာလေးခု၊ တောင်ပံလေးခုရှိ၍ တောင်ပံများအောက်တွင် လူလက်နှင့်တူသောလက်ရှိ၏။ 22 မျက်နှာပုံသဏ္ဌာန်မှာလည်း ခေဗာမြစ်နား၌တွေ့ခဲ့သော မျက်နှာပုံသဏ္ဌာန်နှင့်တူ၏။ မိမိတို့မျက်နှာမူရာတည့်တည့်သို့သာသွားတတ်ကြ၏။ |
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative
Global Bible Initiative