ယောဘဝတ္တု။ 6 - မြန်မာ့စံမီသမ္မာကျမ်းယောဘက ဧလိဖတ်ကို တုံ့ပြန်သောစကား 1 ထိုအခါ ယောဘက 2 “ငါခံရသော ပူဆွေးခြင်းနှင့် ပျက်စီးဆုံးရှုံးခြင်းများကို ချိန်ခွင်တွင် စုပုံချိန်တွယ်ကြည့်မည်ဆိုလျှင် 3 သမုဒ္ဒရာသဲလုံးထက်ပင် ပိုလေးလိမ့်မည်။ ထို့ကြောင့် ငါသည် စကားကို မဆင်မခြင်ပြောမိပြီ။ 4 အကယ်စင်စစ် အနန္တတန်ခိုးရှင်ထံမှ မြားတို့သည် ငါ့ကိုယ်၌စိုက်ဝင်လျက်ရှိ၏။ ငါ့စိတ်ဝိညာဉ်သည် ထိုမြားတို့၏အဆိပ်ရည်ကို သောက်သုံးနေရ၏။ ဘုရားသခင်ထံမှ ကြောက်မက်ဖွယ်ရာတို့သည် ငါ့ရှေ့၌ တန်းစီလျက်ရှိ၏။ 5 မြည်းရိုင်းသည် မြက်နုရှိလျက်နှင့် ဟီမည်လော။ နွားသည်လည်း အစာရှိလျက်နှင့် အော်မည်လော။ 6 အရသာမရှိသောအစာကို ဆားမပါဘဲ စားနိုင်သလော။ ကြက်ဥအကာ၌ အရသာရှိသလော။ 7 ငါ့အဖို့ ရွံရှာဖွယ်သောအစာကဲ့သို့ဖြစ်၍ တို့ထိလိုစိတ်ပင်မရှိ။ 8 ငါတောင်းဆိုသောအရာကို ရပါစေသော။ ဘုရားသခင်သည် ငါ့မျှော်လင့်ချက်ကို ဖြည့်ဆည်းပေးပါစေသော။ 9 ဘုရားသခင်သည် ငါ့ကို အမှုန့်ချေပစ်ဖို့ရန် အလိုတော်ရှိပါစေသော။ လက်တော်ကိုဆန့်၍ ငါ့ကို ကွပ်မျက်ပါစေသော။ 10 သို့မှ ငါခံစားရသက်သာလိမ့်မည်။ မညှာမတာခံစားရသောဝေဒနာများထဲမှ ဝမ်းမြောက်မိပါလိမ့်မည်။ ငါသည် သန့်ရှင်းသောအရှင်၏စကားတော်ကို မငြင်းဆန်ခဲ့ပါ။ 11 မည်သည့်ခွန်အားဖြင့် ငါစောင့်မျှော်နေရမည်နည်း။ ငါစိတ်ရှည်သည်းခံရအောင် ငါ့ဘဝနိဂုံးကား မည်သို့နည်း။ 12 ငါ့ခွန်အားကား ကျောက်တုံးခွန်အားလော။ ငါ့အသားကား ကြေးနီအသားလော။ 13 ငါသည် ကိုယ့်ကိုယ်ကိုယ် မကယ်နိုင်။ ဉာဏ်ပညာသည် ငါ့ထံမှ ထွက်သွားလေပြီတကား။ 14 မျှော်လင့်ချက်မဲ့သူအဖို့ မိတ်ဆွေထံမှ မေတ္တာကို ခံရသင့်ပေ၏။ သို့ဖြစ်လျှင် သူသည် အနန္တတန်ခိုးရှင်အား ကြောက်ရွံ့ရိုသေခြင်းကို စွန့်ပယ်မည်မဟုတ်ပေ။ 15 ငါ့ညီအစ်ကိုတို့သည် ချောင်းရေကဲ့သို့လည်းကောင်း၊ ဖြတ်သန်းစီးဆင်းသွားသောတောင်ကျချောင်းရေကဲ့သို့လည်းကောင်း သစ္စာမဲ့ကြ၏။ 16 ထိုချောင်းရေသည် အရည်ပျော်သွားသော ရေခဲ၊ နှင်းခဲများကြောင့် နောက်ကျိသွား၏။ 17 နွေရာသီရောက်သောအခါ ခန်းခြောက်ပျောက်ကွယ်သွား၏။ ပူပြင်းသောအခါ ရှိသည့်နေရာ၌ပင် ခြောက်သွေ့သွား၏။ 18 ရေစီးကြောင်းလမ်းလွဲသွား၍ လွင်တီးခေါင်ပြင်အရပ်သို့ရောက်သွားပြီး ပျောက်ကွယ်သွားရ၏။ 19 တေမခရီးသည်တို့သည် လိုက်ရှာကြ၏။ ရှေဘကုန်သည်တို့သည်လည်း စောင့်မျှော်နေကြ၏။ 20 ယုံကြည်စိတ်ချမိ၍ သူတို့အရှက်ကွဲရလေပြီ။ ထိုအရပ်သို့ရောက်သောအခါ သူတို့စိတ်ပျက်ကြရ၏။ 21 သင်တို့သည်လည်း အချည်းနှီးဖြစ်ကြ၏။ ကြောက်မက်ဖွယ်အဖြစ်ကိုမြင်ပြီး သင်တို့ကြောက်ရွံ့ကြ၏။ 22 ငါက ‘ငါ့ကို တစ်စုံတစ်ရာယူလာပေးပါ။ သင်တို့စည်းစိမ်ချမ်းသာများထဲမှ ငါ့ကိုလက်ဆောင်ပေးကြပါ’ဟု တောင်းဖူးသလော။ 23 ‘ရန်သူ့လက်မှ ငါ့ကိုကယ်တင်ကြပါ။ ကြမ်းကြုတ်သူတို့လက်မှ ငါ့ကိုရွေးနုတ်ကြပါ’ဟု တောင်းဆိုဖူးသလော။ 24 ငါ့ကိုသွန်သင်ပါ။ ငါဆိတ်ဆိတ်နေပါမည်။ ငါမည်သည့်အမှားလုပ်မိသည်ကို ပြောပြကြပါ။ 25 မှန်ကန်သောစကားသည် မည်မျှနာကျင်စေသနည်း။ သင်တို့ဆုံးမသောဆုံးမစကားမူကား မည်သို့နည်း။ 26 မျှော်လင့်ရာမဲ့သောဤလူ၏စကားမှာ လေသက်သက်သာဖြစ်သည်ဟု ထင်မှတ်၍ သင်တို့သည် ထိုစကားတို့ကို ပြစ်တင်ရှုတ်ချနေကြသလော။ 27 ဖတဆိုးကိုပင် သင်တို့မဲချခွဲဝေယူကြ၏။ ကိုယ့်မိတ်ဆွေရင်းကိုပင် သင်တို့ရောင်းစားကြ၏။ 28 သို့သော် ယခု ငါ့ကိုကြည့်ကြပါလော့။ ငါသည် သင်တို့ရှေ့မှာ လိမ်ပြောနေသလော။ 29 ယခု ပြန်ဆင်ခြင်ကြပါ။ မတရားသောသူများ မဖြစ်ကြနှင့်။ ထပ်ပြီးဆင်ခြင်ကြည့်ကြပါ။ ဤအမှု၌ ငါဖြောင့်မတ်ပါသေး၏။ 30 ငါ့လျှာ၌ မတရားမှုရှိသလော။ ငါ့ခံတွင်းသည် ပျက်စီးခြင်းကို မသိဘဲနေလိမ့်မည်လော။ |
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative
Global Bible Initiative