မြည်တမ်းစကား 3 - မြန်မာ့စံမီသမ္မာကျမ်းထာဝရဘုရား၏ကရုဏာတော်၌သာ မျှော်လင့်စရာ 1 ငါသည် ကိုယ်တော်၏အမျက်တော်ကြိမ်လုံးကြောင့် ဖိစီးနှိပ်စက်မှုကို ကြုံတွေ့ခဲ့ရသောသူဖြစ်ပါ၏။ 2 ကိုယ်တော်သည် ငါ့ကိုနှင်ထုတ်တော်မူပြီ။ အလင်းမရှိသော မှောင်မိုက်၌ သွားလာစေတော်မူပြီ။ 3 စင်စစ် ကိုယ်တော်သည် လက်ကိုဆန့်၍ ငါ့ကို တစ်နေ့လုံး အကြိမ်ကြိမ်ဆုံးမတော်မူပြီ။ 4 ကိုယ်တော်သည် ငါ၏အသားအရေကို ရွတ်တွစေတော်မူပြီ။ ငါ၏အရိုးတို့ကို ချိုးတော်မူပြီ။ 5 ငါ့ကို ဝန်းရံတိုက်ခိုက်တော်မူပြီ။ ခါးသီးမှု၊ ခက်ခဲမှုဖြင့် ဝိုင်းထားတော်မူပြီ။ 6 ကာလကြာမြင့်စွာကသေဆုံးသွားသူကဲ့သို့ ငါ့ကိုမှောင်မိုက်သောအရပ်ထဲ၌နေစေတော်မူပြီ။ 7 ငါမထွက်သွားနိုင်အောင် ကြေးနီကြိုးဖြင့်ချုပ်နှောင်၍ ပိတ်လှောင်ထားပြီ။ 8 ငါအကူအညီအော်ဟစ်တောင်းခံသော်လည်း ငါ၏ဆုတောင်းချက်ကို နားညောင်းတော်မမူ။ 9 ငါသွားသောလမ်းကို ကျောက်နံရံဖြင့် ပိတ်ထားပြီး လမ်းခရီးကို ကွေ့ကောက်စေတော်မူပြီ။ 10 ကိုယ်တော်သည် ငါ့ကို ချောင်းမြောင်းနေသောဝက်ဝံ၊ ကွယ်ရာ၌ပုန်းနေသောခြင်္သေ့ကဲ့သို့ ဖြစ်စေတော်မူပြီ။ 11 ငါ့ကို လမ်းလွဲစေ၍ အပိုင်းပိုင်းဆွဲဖြတ်တော်မူပြီ။ ငါ့ကို အထီးကျန်စေတော်မူပြီ။ 12 ကိုယ်တော်သည် လေးကိုတင်ပြီး ငါ့ကိုပစ်မှတ်ထား၍ မြားဖြင့်ချိန်ရွယ်တော်မူပြီ။ 13 ကိုယ်တော်၏မြားတို့သည် ငါ့နှလုံးသားကို ထိုးဖောက်လေပြီ။ 14 ငါသည် ငါ့လူမျိုးတို့တွင် နေ့စဉ် ပြက်ရယ်ပြုစရာ၊ သီချင်းဆိုစရာ ဖြစ်လေပြီ။ 15 ကိုယ်တော်သည် ငါ့ကို ခါးသောဟင်းရွက်ဖြင့် ဝအီစေတော်မူပြီ။ ဒေါနရည်ဖြင့် မူးစေတော်မူပြီ။ 16 ငါ့သွားတို့ကို ကျောက်စရစ်များဖြင့် ကျိုးစေတော်မူပြီ။ ငါ့ကို ပြာပုံထဲတွင် လူးစေတော်မူပြီ။ 17 ငါ့စိတ်ဝိညာဉ်သည် ငြိမ်သက်ခြင်းကင်းလျက် ကောင်းစားခြင်းကိုလည်း မေ့လျော့လေပြီ။ 18 သို့ဖြစ်၍ “ငါ့ခွန်အား ကုန်ခန်းပြီ။ ထာဝရဘုရားထံတော်မှ ငါ့မျှော်လင့်ခြင်း ကုန်ဆုံးပြီ”ဟု ငါဆိုရ၏။ 19 အကျွန်ုပ်ခံရသောဖိစီးနှိပ်စက်မှု၊ ဆင်းရဲဒုက္ခတို့ကို သတိရတော်မူပါ။ အကျွန်ုပ်သောက်ရသော ဒေါနရည်၊ အဆိပ်ရည်တို့ကိုလည်း သတိရတော်မူပါ။ 20 ထိုအရာတို့ကို အမြဲတမ်းအမှတ်ရလျက် ငါ့စိတ်ဝိညာဉ်သည် ညှိုးငယ်ရပါပြီ။ 21 သို့သော် ပြန်၍ဆင်ခြင်ကြည့်သောအခါ ငါ၌ မျှော်လင့်ချက်ရှိလာပါပြီ။ 22 ထာဝရဘုရား၏မေတ္တာကရုဏာတော်ကြောင့် ငါတို့သည် ပျက်စီးခြင်းသို့မရောက်ပါ။ ကိုယ်တော်၏သနားစုံမက်ခြင်းသည်လည်း အဆုံးမရှိပါ။ 23 နံနက်တိုင်း ကရုဏာတော်အသစ်ကို ခံစားရပါ၏။ သစ္စာတော်သည် ကြီးမြတ်တော်မူပါ၏။ 24 “ထာဝရဘုရားသည် ငါ၏ဝေစုဖြစ်တော်မူ၏”ဟု ငါ့စိတ်ထဲ၌ဆိုလျက် ကိုယ်တော်ကို မျှော်လင့်ကိုးစားပါမည်။ 25 ထာဝရဘုရားကို စောင့်မျှော်သောသူ၊ ထာဝရဘုရားကို ရှာသောသူကို ကိုယ်တော်ကောင်းစားစေတော်မူပါ၏။ 26 ထာဝရဘုရား၏ကယ်တင်ခြင်းကို ငြိမ်ဝပ်စွာမျှော်လင့်စောင့်စားသောသူသည် ကောင်းကျိုးကို ခံစားရ၏။ 27 လူသည် ငယ်ရွယ်စဉ်အခါ ထမ်းပိုးထမ်းသည်မှာ ကောင်းပေ၏။ 28 သူ့အပေါ် ထမ်းပိုးကို တင်တော်မူသည်ဖြစ်၍ သူသည် တစ်ယောက်တည်း ငြိမ်ဝပ်စွာထိုင်နေစေ။ 29 မျှော်လင့်ချက်ရှိကောင်းရှိနိုင်သည်ဖြစ်၍ သူသည် မျက်နှာကို မြေမှုန့်၌အပ်ပါစေ။ 30 ရိုက်လိုသောသူအား ပါးကိုလှည့်ပေး၍ ကဲ့ရဲ့ပြစ်တင်သမျှကိုခံပါစေ။ 31 အကြောင်းမူကား ဘုရားရှင်သည် အစဉ်စွန့်ပစ်တော်မူမည်မဟုတ်။ 32 ဝမ်းနည်းကြေကွဲစေတော်မူသော်လည်း မေတ္တာကရုဏာကြီးမားတော်မူသည်နှင့်အညီ သနားစုံမက်တော်မူလိမ့်မည်။ 33 ကိုယ်တော်သည် လူသားတို့ကို ဒုက္ခဝေဒနာခံစားစေလိုသောသဘော၊ ဝမ်းနည်းကြေကွဲစေလိုသောသဘောရှိတော်မမူ။ 34 မြေကြီးပေါ်ရှိ အကျဉ်းသားတို့ကို နှိပ်ကွပ်ခြင်း၊ 35 အမြင့်ဆုံးသောအရှင်ရှေ့မှောက်တွင် မတရားသဖြင့်စီရင်ခြင်း၊ 36 အမှုကိစ္စများကို တရားမျှတစွာမစီရင်ခြင်း စသည်တို့ကို ဘုရားရှင် နှစ်သက်တော်မမူ။ 37 ဘုရားရှင် မမိန့်မှာဘဲ မည်သူသည် နှုတ်မြွက်သည့်အတိုင်း ဖြစ်လာတတ်သနည်း။ 38 အမြင့်ဆုံးသောအရှင် နှုတ်မြွက်သည့်အတိုင်း အကောင်း၊ အဆိုး ဖြစ်လာတတ်သည်မဟုတ်လော။ 39 လူ၊ အသက်ရှင်သောလူသည် အဘယ်ကြောင့် မိမိအပြစ်အတွက် စောဒကတက်ရသနည်း။ 40 ကိုယ့်အကျင့်အကြံများကို ဆင်ခြင်သုံးသပ်၍ ထာဝရဘုရားထံ ပြန်လှည့်ကြစို့။ 41 ကောင်းကင်ဘုံရှိ ထာဝရဘုရားထံ ငါတို့စိတ်နှလုံးပါလျက် လက်ကို ချီကြစို့။ 42 ငါတို့ အပြစ်ကျူးလွန်မိပြီ၊ ပုန်ကန်မိပြီ။ ကိုယ်တော်သည် ငါတို့ကို ခွင့်လွှတ်တော်မမူ။ 43 ပြင်းစွာအမျက်ထွက်လျက် ငါတို့ကို လိုက်၍ မညှာမတာကွပ်မျက်တော်မူပြီ။ 44 အထံတော်သို့ ငါတို့ဆုတောင်းသံမရောက်အောင် ကိုယ်တော်သည် ကိုယ့်ကိုယ်ကိုယ် တိမ်တိုက်ဖြင့် ကာထားတော်မူပြီ။ 45 ကိုယ်တော်သည် ငါတို့ကို လူမျိုးတကာအလယ်တွင် အညစ်အကြေး၊ အမှိုက်သရိုက် ဖြစ်စေတော်မူပြီ။ 46 ရန်သူအပေါင်းတို့သည် ငါတို့ကိုဆန့်ကျင်ပြောဆိုကြပါပြီ။ 47 ငါတို့သည် ကြောက်မက်ဖွယ်ဘေးနှင့် ကြုံရပြီ။ မြေတွင်းထဲသို့ ကျလေပြီ။ အထီးကျန်ခြင်း၊ ပျက်စီးခြင်းသို့ရောက်ပါပြီ။ 48 ငါ့လူမျိုးသမီးပျို ပျက်စီးသောကြောင့် ငါ့မျက်စိမှ မျက်ရည်ချောင်းစီးရလေပြီ။ 49-50 ကောင်းကင်ဘုံမှ ထာဝရဘုရား ငုံ့ကြည့်၍ မြင်တော်မမူမချင်း ငါ့မျက်ရည်သည် မပြတ်မစဲစီးဆင်းလေပြီ။ 51 မြို့သမီးပျိုအပေါင်းတို့၏အဖြစ်ကို မြင်ရသောကြောင့် ငါ့စိတ်နှလုံးကြေကွဲရပြီ။ 52 ရန်သူတို့သည် အကြောင်းမရှိဘဲ ငါ့ကို ငှက်ကဲ့သို့ လိုက်ဖမ်းကြပါ၏။ 53 ငါ့ကို မြေတွင်းထဲပစ်ချပြီး သေကြောင်းကြံကြပြီ။ ကျောက်တုံးဖြင့် ပစ်ပေါက်ကြပြီ။ 54 ရေသည် ငါ့ဦးခေါင်းအထိ လွှမ်းမိုးလာသဖြင့် “ငါသေရတော့မည်”ဟု ငါဆိုမိပြီ။ 55 အို ထာဝရဘုရား၊ အကျွန်ုပ်သည် တွင်းနက်ထဲမှနေ၍ ကိုယ်တော်၏နာမတော်ကို ဟစ်ခေါ်ပါ၏။ 56 အကျွန်ုပ်အသံကို ကိုယ်တော်ကြားတော်မူပါပြီ။ “အကျွန်ုပ်အကူအညီအော်ဟစ်တောင်းဆိုသောအခါ နားတော်ကို ပိတ်ထားတော်မမူပါနှင့်။” 57 အကျွန်ုပ်ဆုတောင်းသောအခါ ကိုယ်တော်သည် အနားသို့လာ၍ “မကြောက်နှင့်”ဟု မိန့်တော်မူ၏။ 58 အို ထာဝရဘုရား၊ ကိုယ်တော်သည် အကျွန်ုပ်၏အမှုကိစ္စကို ရင်ဆိုင်ဖြေရှင်းပေး၍ အကျွန်ုပ်၏အသက်ကို ရွေးနုတ်တော်မူပါပြီ။ 59 အို ထာဝရဘုရား၊ အကျွန်ုပ် မတရားသဖြင့်ခံရသည်ကို ကိုယ်တော်မြင်တော်မူပါပြီ။ အကျွန်ုပ်အမှုကို စီရင်တော်မူပါ။ 60 အကျွန်ုပ်ကို အဘယ်မျှလောက် အငြိုးထား၍ အဘယ်မျှလောက် မကောင်းကြံစည်နေသည်ကို ကိုယ်တော်သိတော်မူပါပြီ။ 61 အို ထာဝရဘုရား၊ သူတို့၏ကဲ့ရဲ့ပြစ်တင်ခြင်း၊ မကောင်းကြံစည်ခြင်းအလုံးစုံကို ကိုယ်တော် ကြားသိတော်မူပါပြီ။ 62 အကျွန်ုပ်ကို ရန်ပြုသောသူတို့သည် တစ်နေ့လုံး တီးတိုးပြောဆို၍ အကျွန်ုပ်ကို မကောင်းကြံစည်ကြပါ၏။ 63 ကြည့်ရှုတော်မူပါ။ သူတို့ထိုင်လေရာ၊ ထလေရာ၌ အကျွန်ုပ်အကြောင်းကိုသာ လှောင်ပြောင်သီဆိုကြပါ၏။ 64 အို ထာဝရဘုရား၊ သူတို့ပြုသောအမှုအတိုင်း အကျိုးအပြစ်ကို ပြန်ဆပ်ပေးတော်မူပါ။ 65 သူတို့၏စိတ်နှလုံးကို မာကျောစေတော်မူပါ။ ကျိန်ခြင်းအမင်္ဂလာသည် သူတို့အပေါ်သက်ရောက်ပါစေ။ 66 အမျက်ထွက်လျက် သူတို့ကို လိုက်တော်မူပါ။ ထာဝရဘုရားပိုင်တော်မူသောကောင်းကင်အောက်မှ သူတို့ကို သုတ်သင်ဖယ်ရှင်းတော်မူပါ။ |
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative
Global Bible Initiative