တောလည် 32 - မြန်မာ့စံမီသမ္မာကျမ်းဂျော်ဒန်မြစ်အရှေ့ဘက်ခြမ်းတွင်အခြေချခြင်း 1 ရုဗင်သားမြေး၊ ဂဒ်သားမြေးတို့၌ တိရစ္ဆာန်မြောက်မြားစွာရှိ၏။ ယာဇာပြည်နှင့်ဂိလဒ်ပြည်ကို တိရစ္ဆာန်တို့အတွက် စားကျက်ကောင်းသောအရပ်ဖြစ်သည်ကို တွေ့မြင်လျှင် 2 ဂဒ်သားမြေး၊ ရုဗင်သားမြေးတို့သည် မောရှေ၊ ယဇ်ပုရောဟိတ်ဧလာဇာနှင့် လူထုခေါင်းဆောင်တို့ထံသို့လာ၍ 3 “အတရုတ်၊ ဒိဘုန်၊ ယာဇာ၊ နိမရ၊ ဟေရှဘုန်၊ ဧလာလေ၊ ရှေဘံ၊ နေဗော၊ ဗောနစသော 4 အစ္စရေးလူထုတို့၏ရှေ့မှောက်၌ ထာဝရဘုရားတိုက်ခိုက်သိမ်းပိုက်တော်မူခဲ့သောနယ်မြေတို့သည် တိရစ္ဆာန်အတွက် သင့်တော်သောမြေဖြစ်၏။ သခင်၏အစေအပါးတို့၌လည်း တိရစ္ဆာန်ရှိပါ၏။ 5 အကျွန်ုပ်တို့သည် သခင်၏ရှေ့၌ မျက်နှာရပါလျှင် ဤပြည်ကို သခင်၏အစေအပါးတို့အား ပိုင်ဆိုင်ရာမြေအဖြစ်ပေးပါ။ ဂျော်ဒန်မြစ်တစ်ဖက်သို့ အကျွန်ုပ်တို့မကူးပါရစေနှင့်”ဟု လျှောက်ကြ၏။ 6 မောရှေကလည်း ဂဒ်သားမြေး၊ ရုဗင်သားမြေးတို့အား “သင်တို့၏အမျိုးသားချင်းတို့ စစ်တိုက်သွားနေစဉ် သင်တို့ ဤအရပ်၌ နေခဲ့ကြမည်လော။ 7 အစ္စရေးအမျိုးသားအား ထာဝရဘုရားပေးတော်မူသောပြည်သို့ သူတို့ ကူးသွားရမည်ကို သူတို့ စိတ်ပျက်အောင် အဘယ်ကြောင့် လုပ်ကြသနည်း။ 8 ထိုပြည်ကိုကြည့်ရှုရန် သင်တို့၏ဖခင်တို့ကို ကာဒေရှဗာနာအရပ်မှ ငါစေလွှတ်သောအခါ သူတို့သည်လည်း ဤသို့ပြုခဲ့ကြ၏။ 9 သူတို့သည် ဧရှကောလချိုင့်ဝှမ်းတိုင်အောင်သွား၍ ထိုပြည်ကို ကြည့်ရှုခဲ့သော်လည်း ထာဝရဘုရားပေးတော်မူသောပြည်သို့ အစ္စရေးအမျိုးသားတို့ ဝင်လိုသောစိတ်မရှိအောင် လုပ်ကြ၏။ 10 ထိုနေ့၌ ထာဝရဘုရားသည် အမျက်ထွက်၍ 11 ‘အီဂျစ်ပြည်မှထွက်လာသောသူတို့သည် ငါ့နောက်သို့လုံးလုံးမလိုက်သောကြောင့် ထိုပြည်ကို အာဗြဟံ၊ ဣဇက်၊ ယာကုပ် တို့အား ပေးမည်ဟု ငါကျိန်ဆိုခဲ့သော်လည်း အသက်နှစ်ဆယ်အရွယ်နှင့် အထက်ရှိသောသူတို့သည် ထိုပြည်ကို မြင်ရလိမ့်မည်မဟုတ်။ 12 သို့သော် ကေနက်အမျိုး၊ ယေဖုန္နာ၏သား ကာလက်နှင့် နုန်၏သား ယောရှုတို့သည် ထာဝရဘုရားနောက်သို့လုံးလုံးလိုက်သောကြောင့် ထိုပြည်ကို မြင်ရလိမ့်မည်’ဟု ကျိန်ဆိုတော်မူ၏။ 13 ထာဝရဘုရားသည် အစ္စရေးလူမျိုးတို့ကို အမျက်ထွက်၍ မိမိရှေ့တော်၌ ဆိုးသောအမှုကိုပြုသောမျိုးဆက်အားလုံးသေကုန်သည်အထိ သူတို့ကို တောကန္တာရထဲ၌ အနှစ်လေးဆယ်ပတ်လုံး လှည့်လည်စေတော်မူ၏။ 14 မျိုးဆက်သစ်အပြစ်သားတို့၊ သင်တို့သည် သင်တို့ဖခင်များ၏နေရာကို ယူ၍ အစ္စရေးလူမျိုးတို့အပေါ် ထာဝရဘုရား၏ပြင်းထန်သောအမျက်တော်ကို ထပ်တိုးစေကြသည်တကား။ 15 သင်တို့သည် နောက်တော်သို့ မလိုက်ကြလျှင် ဤလူမျိုးကို တောကန္တာရထဲ၌ နောက်တစ်ဖန်ထပ်၍စွန့်ပစ်တော်မူလိမ့်မည်။ သို့ဖြစ်လျှင် သင်တို့သည် ဤလူအပေါင်းတို့ကို ဖျက်ဆီးရာရောက်မည်”ဟု ဆိုလေ၏။ 16 ထိုအခါ ဂဒ်သားမြေး၊ ရုဗင်သားမြေးတို့သည် မောရှေထံသို့ ချဉ်းကပ်လာ၍ “အကျွန်ုပ်တို့သည် ဤအရပ်၌ အကျွန်ုပ်တို့၏တိရစ္ဆာန်များအတွက် ခြံခတ်၍ အကျွန်ုပ်တို့၏ကလေးများအတွက် မြို့တို့ကို တည်မည်။ 17 သို့သော် အကျွန်ုပ်တို့သည် အစ္စရေးအမျိုးသားတို့ကို သူတို့နေထိုင်မည့်အရပ်သို့ ရောက်သည်အထိ လက်နက်ကိုင်စွဲလျက် သူတို့၏ရှေ့မှသွားပါမည်။ အကျွန်ုပ်တို့၏ကလေးများကိုကား ဤပြည်သားတို့ရန်မှကင်းလွတ်ဖို့ ခံတပ်မြို့များ၌ နေထိုင်စေရမည်။ 18 အစ္စရေးအမျိုးသားတို့ကိုယ်စီ အမွေမြေမရမချင်း အကျွန်ုပ်တို့သည် ကိုယ့်အိမ်သို့ပြန်မလာပါ။ 19 အကျွန်ုပ်တို့၏အမွေမြေသည် ဂျော်ဒန်မြစ်အရှေ့ဘက်ခြမ်း၌ ကျသောကြောင့် ဂျော်ဒန်မြစ်တစ်ဖက်ကိုလွန်၍ သူတို့နှင့်အတူ အမွေမြေကိုမယူပါ”ဟု ပြန်လျှောက်ကြ၏။ 20 မောရှေကလည်း သူတို့အား “သင်တို့သည် သင်တို့၏စကားအတိုင်း ထာဝရဘုရားရှေ့တော်၌ စစ်တိုက်ရန်လက်နက်ကိုင်စွဲမည်၊ 21 လက်နက်ကိုင်စွဲသူအပေါင်းတို့သည်လည်း ထာဝရဘုရားရှေ့တော်၌ ဂျော်ဒန်မြစ်ကိုကူးမည်၊ ထာဝရဘုရားသည် ရန်သူကို မိမိရှေ့မှ နှင်ထုတ်၍ 22 ထိုပြည်သည် ထာဝရဘုရားရှေ့တော်၌ ရှုံးနိမ့်သည်အထိ စစ်တိုက်ကြမည်ဆိုလျှင် သင်တို့သည်လည်း ထာဝရဘုရားရှေ့၊ အစ္စရေးလူမျိုးတို့ရှေ့၌ အပြစ်တင်ခြင်းကင်းလျက် ဤအရပ်သို့ ပြန်လာခွင့်ရှိမည်။ ထာဝရဘုရားရှေ့တော်၌ ဤအရပ်သည် သင်တို့ပိုင်ဆိုင်ရာဖြစ်မည်။ 23 ထိုသို့မပြုလျှင် သင်တို့သည် ထာဝရဘုရားကိုပြစ်မှားပြီဖြစ်၍ သင်တို့အပြစ်အတွက် သင်တို့ ခံရမည်ဟု သိမှတ်ကြလော့။ 24 သင်တို့နှင့် သင်တို့ကလေးများအတွက် မြို့ကိုတည်၍ သင်တို့၏သိုးများအတွက် ခြံခတ်ကြလော့။ သင်တို့ နှုတ်ထွက်သည့်အတိုင်းလည်း ပြုကြလော့”ဟု ဆိုလေ၏။ 25 ဂဒ်သားမြေး၊ ရုဗင်သားမြေးတို့ကလည်း မောရှေအား “သခင်၏အစေအပါးတို့သည် သခင်မိန့်မှာသည့်အတိုင်းပြုပါမည်။ 26 အကျွန်ုပ်တို့၏မယားနှင့်သားသမီးများ၊ အကျွန်ုပ်တို့၏သိုးနွားတိရစ္ဆာန်ရှိသမျှတို့သည် ဤအရပ်၊ ဂိလဒ်ပြည်ရှိမြို့တို့၌ နေရစ်ကြလိမ့်မည်။ 27 စစ်လက်နက်စွဲကိုင်သော သခင်၏အစေအပါးအပေါင်းတို့မူကား သခင်မိန့်ဆိုသည့်အတိုင်း ထာဝရဘုရားရှေ့တော်၌ ကူးသွား၍ စစ်တိုက်ကြပါမည်”ဟု ပြန်လျှောက်ကြ၏။ 28 ထို့ကြောင့် မောရှေက ဂဒ်သားမြေး၊ ရုဗင်သားမြေးတို့နှင့်ပတ်သက်၍ ယဇ်ပုရောဟိတ်ဧလာဇာ၊ နုန်၏သား ယောရှုနှင့် အစ္စရေးအမျိုးသားတို့၏ဘိုးဘေးအမျိုးအနွယ်အကြီးအမှူးတို့အား 29 “ဂဒ်သားမြေး၊ ရုဗင်သားမြေးတို့တွင် ထာဝရဘုရားရှေ့တော်၌ စစ်တိုက်ရန်လက်နက်ကိုင်စွဲသူအပေါင်းတို့သည် သင်တို့နှင့်အတူ ဂျော်ဒန်မြစ်ကိုကူး၍ သင်တို့ရှေ့၌ရှိသောထိုပြည်ကို နှိမ်နင်းလျှင် သင်တို့သည် ဂိလဒ်ပြည်ကို ပိုင်ဆိုင်ရာမြေအဖြစ် သူတို့အားပေးရမည်။ 30 သူတို့သည် လက်နက်ကိုင်စွဲလျက် သင်တို့နှင့်အတူ ကူးမသွားလျှင် သင်တို့နှင့်အတူခါနာန်ပြည်၌သာ အမွေမြေကို ခံယူရမည်”ဟု ဆိုလေ၏။ 31 ဂဒ်သားမြေး၊ ရုဗင်သားမြေးတို့က “ထာဝရဘုရားမိန့်တော်မူသည့်အတိုင်း သခင်၏အစေအပါးတို့ ပြုပါမည်။ 32 အကျွန်ုပ်တို့သည် လက်နက်ကိုင်စွဲလျက် ထာဝရဘုရားရှေ့တော်၌ ခါနာန်ပြည်သို့ ကူးသွားပါမည်။ အကျွန်ုပ်တို့အတွက် ပိုင်ဆိုင်ရာအမွေမြေသည် ဂျော်ဒန်မြစ်တစ်ဖက်၌ ဖြစ်စေပါ”ဟု ပြန်လျှောက်ကြ၏။ 33 ထိုအခါ မောရှေသည် ဂဒ်သားမြေး၊ ရုဗင်သားမြေးများနှင့် ယောသပ်သား မနာရှေမျိုးနွယ်တစ်ဝက်အား အာမောရိလူမျိုးတို့၏ဘုရင်ရှိဟုန်မင်းကြီး၏နိုင်ငံ၊ ဗာရှန်ဘုရင်ဩဃမင်းကြီး၏နိုင်ငံတို့ကို မြို့များနှင့်တကွ မြေများ၊ မြို့ပတ်ပတ်လည်ရှိ နယ်မြေများကိုပေးလေ၏။ 34 ဂဒ်သားမြေးတို့သည် ဒိဘုန်၊ အတရုတ်၊ အာရော်၊ 35 အာတရုတ်ရှောဖန်၊ ယာဇာ၊ ယုဗ္ဗေဟ၊ 36 ဗက်နိမရ၊ ဗေသာရန်စသော ခံတပ်မြို့များနှင့် သိုးခြံများကို တည်ဆောက်ကြ၏။ 37 ရုဗင်သားမြေးတို့သည် ဟေရှဘုန်၊ ဧလာလေ၊ ကိရယသိမ်၊ 38 နေဗော၊ ဗာလမုန်၊ (အမည်ပြောင်းထားသောမြို့များ) စိဗမာစသော မြို့တို့ကို တည်ဆောက်ကြ၏။ သူတို့တည်ဆောက်သောမြို့တို့၏အမည်များကို အမည်အသစ်ဖြင့်မှည့်ခေါ်ကြ၏။ 39 မနာရှေ၏သားမာခိရ၏သားမြေးတို့သည် ဂိလဒ်ပြည်သို့ သွား၍ သိမ်းယူပြီးလျှင် ထိုပြည်၌နေထိုင်သော အာမောရိလူမျိုးတို့ကို နှင်ထုတ်ကြ၏။ 40 ထို့ကြောင့် မောရှေသည် မနာရှေ၏သားမာခိရအား ဂိလဒ်ပြည်ကို ပေးသဖြင့် သူတို့သည် ထိုပြည်၌ နေထိုင်ကြ၏။ 41 မနာရှေအမျိုးယာဣရသည်လည်း ဂိလဒ်ပြည်၏မြို့ငယ်များသို့ သွား၍ သိမ်းယူပြီးလျှင် ဟာဝုတ်ယာဣရဟု မှည့်ခေါ်လေ၏။ 42 နောဗာသည်လည်း ကေနတ်မြို့နှင့် ၎င်း၏မြို့ငယ်များသို့ သွား၍ သိမ်းယူပြီးလျှင် မိမိ၏အမည်ဖြင့် နောဗာမြို့ဟု မှည့်ခေါ်လေ၏။ |
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative
Global Bible Initiative