ဆာ​လံ 8 - မြန်​​​မာ့​​​စံ​​​မီ​​​သမ္မာ​​​ကျမ်း​​

ထာဝရဘုရား၏ဘုန်းအသရေတော်၊ လူ၏ဂုဏ်ကျက်သရေ

ဂီတမှူး​အတွက်​၊ “​ဂီတိ​” သံစဉ်​၊ ဒါဝိဒ်​၏​ဆာလံ

¹ အကျွန်ုပ်​တို့​၏​အရှင် ထာဝရဘုရား​၊ ကိုယ်တော်​၏​နာမ​တော်​သည် ကမ္ဘာမြေ​တစ်ခွင်လုံး​၌ ကြီးမြတ်​လှ​ပါ​၏​။ ကိုယ်တော်​သည် မိမိ​၏​ဘုန်းကျက်သရေ​ကို ကောင်းကင်​ပေါ်မှာ တည်​စေ​တော်မူ​၏​။

² ကိုယ်တော်​ကို​ရန်ဖက်ပြု​သူ​များ​ကြောင့် ကလေးသူငယ်​များ​နှင့်​နို့စို့ကလေးငယ်​များ​၏​နှုတ်​တွင် အစွမ်းသတ္တိ​ကို​တည်​စေ​တော်မူ​၏​။ ဤသည်ကား ရန်သူ​နှင့် လက်တုံ့ပြန်​သူ​တို့​ကို တိတ်ဆိတ်​စေရန်​ဖြစ်​၏​။

³ ကိုယ်တော်​၏​လက်ချောင်း​တို့​ဖြင့်​ပြု​တော်မူ​သော ကိုယ်တော်​၏​ကောင်းကင်​ကို​လည်းကောင်း​၊ ကိုယ်တော်​တည်​တော်မူ​သော လ​နှင့်​ကြယ်​များ​ကို​လည်းကောင်း အကျွန်ုပ်​ကြည့်ရှုဆင်ခြင်​သောအခါ

⁴ လူ​သည်​မည်သို့သော​သူ​ဖြစ်၍ ကိုယ်တော်​သည် သူ့​ကို​အောက်မေ့​တော်မူ​ရ​သနည်း​။ လူ့​သား​သည် မည်သို့သော​သူ​ဖြစ်၍ ကိုယ်တော်​သည် သူ့​ကို​ကြည့်ရှု​တော်မူ​ရ​သနည်း​။

⁵ ကိုယ်တော်​သည် သူ့​ကို​ဘုရားသခင်​ထက် ခေတ္တခဏ​နိမ့်ကျ​စေ​ပြီးလျှင် ဘုန်း​တော်​နှင့်​ဂုဏ်တော်​တို့​ဖြင့် သူ့​ကို​သရဖူ​ဆောင်း​စေ​တော်မူ​၏​။

⁶ သူ့​အား ကိုယ်တော်​၏​လက်​တော်​ဖြင့် ပြုလုပ်​သော​အရာ​များ​ကို​အုပ်စိုး​စေ​၍ အရာ​ခပ်သိမ်း​တို့​ကို​သူ​၏​ခြေ​အောက်​၌ ချထား​တော်မူ​ပြီ​။

⁷ ထို​အရာ​တို့​တွင် သိုး​နွား​အားလုံး​နှင့် တောတိရစ္ဆာန်​များ​အပြင်

⁸ မိုးကောင်းကင်​ငှက်​များ​၊ ပင်လယ်​ငါး​များ​နှင့် သမုဒ္ဒရာ​ရေကြောင်း​တို့​၌ ကူးခပ်သွားလာ​သည့် သတ္တဝါ​များ​ပါ​၏​။

⁹ အကျွန်ုပ်​တို့​၏​အရှင် ထာဝရဘုရား​၊ ကိုယ်တော်​၏​နာမ​တော်​သည် ကမ္ဘာမြေ​တစ်ခွင်လုံး​၌ ကြီးမြတ်​လှ​ပါ​၏​။