ဆာ​လံ 75 - မြန်​​​မာ့​​​စံ​​​မီ​​​သမ္မာ​​​ကျမ်း​​

ဆိုးယုတ်သူတို့ကို ဘုရားသခင်တရားစီရင်တော်မူခြင်း

ဂီတမှူး​အတွက်​၊ “​မ​ဖျက်ဆီး​ပါ​နှင့်​” သံစဉ်​၊ အာသပ်​၏​ဆာလံ​သီချင်း

¹ အို ဘုရားသခင်​၊ အကျွန်ုပ်​တို့​သည် ကိုယ်တော်​၏​ကျေးဇူးတော်​ကို​ချီးမွမ်း​ကြ​ပါ​၏​။ ကိုယ်တော်​၏​နာမ​တော်​သည် နီး​သည်​ဖြစ်၍ ကိုယ်တော်​၏​ကျေးဇူးတော်​ကို​ချီးမွမ်း​ကြ​ပါ​၏​။ လူ​တို့​သည် ကိုယ်တော်​၏​အံ့ဖွယ်​သော​အမှု​တို့​ကို ပြောကြား​ကြ​ပါ​၏​။

² “​ငါ​ရွေးချယ်​သတ်မှတ်​ထား​သော​အချိန်​၌ ငါ​သည် သမာသမတ်​ရှိ​စွာ​တရားစီရင်​မည်​။

³ မြေကြီး​နှင့် မြေကြီး​ပေါ်၌ နေထိုင်​သော​သူ​အပေါင်း​တို့​သည် စိုးရိမ်​တုန်လှုပ်​ကြ​သောအခါ ငါ​သည် မြေကြီး​၏​တိုင်​တို့​ကို တည်ငြိမ်​စေ​၏​။(​စေလာ)

⁴ ဝါကြွား​သော​သူ​တို့​အား ‘​မ​ဝါကြွား​ကြ​နှင့်​’ ဟူ၍​လည်းကောင်း​၊ ဆိုးယုတ်​သော​သူ​တို့​အား ‘​ချို​မ​ထောင်​ကြ​နှင့်​။

⁵ အထက်ကောင်းကင်​ထိ​တိုင်အောင် သင်​တို့​ချို​မ​ထောင်​ကြ​နှင့်​။ မောက်မာ​စွာ​မ​ပြောဆို​ကြ​နှင့်​’ ဟူ၍​လည်းကောင်း ငါ​မိန့်ဆို​၏​။​”

⁶ အကြောင်းမူကား ချီးမြှောက်​ခြင်း​သည် အရှေ့​အရပ်​၊ အနောက်​အရပ်​၊ သို့မဟုတ် တောကန္တာရ​အရပ်​မှ​လာ​သည်​မ​ဟုတ်​။

⁷ တရားစီရင်​သော​အရှင်​ကား ဘုရားသခင်​ပေတည်း​။ ထို​အရှင်​သည် တစ်ဦး​ကို​နှိမ့်ချ​၍ တစ်ဦး​ကို​ချီးမြှောက်​တော်မူ​၏​။

⁸ အကြောင်းမူကား ထာဝရဘုရား​၏​လက်​တော်​၌​ခွက်ဖလား​ရှိ​၍ ၎င်း​ထဲတွင် သမအောင်​ရောစပ်​ထား​သည့် အမြှုပ်ထ​နေ​သော​စပျစ်ဝိုင်​ရှိ​၏​။ ကိုယ်တော်​သည် ထို​စပျစ်ဝိုင်​ကို​သွန်ချ​တော်မူ​၍ ကမ္ဘာမြေကြီး​ပေါ်ရှိ​ဆိုးယုတ်​သော​သူ​အပေါင်း​တို့​သည် ၎င်း​၏​အနည်​ကို​ပင် အကုန်အစင် သောက်​ကြ​ရ​လိမ့်မည်​။

⁹ ငါ​မူကား ကိုယ်တော်​အကြောင်း​ကို အစဉ်အမြဲ​ပြောကြား​၍ ယာကုပ်​၏​ဘုရားသခင်​ကို သီဆိုချီးမွမ်း​မည်​။

¹⁰ “​ဆိုးယုတ်​သော​သူ​တို့​၏​ဦးချို​ရှိသမျှ​တို့​ကို ငါ​ပိုင်းဖြတ်​မည်​။ ဖြောင့်မတ်​သော​သူ​တို့​၏​ဦးချို​သည် ချီးမြှောက်​ခြင်း​ခံရ​လိမ့်မည်​။​”