ဆာ​လံ 47 - မြန်​​​မာ့​​​စံ​​​မီ​​​သမ္မာ​​​ကျမ်း​​

ကျွန်ုပ်တို့၏ရှင်ဘုရင် ဘုရားသခင်

ဂီတမှူး​အတွက်​၊ ကောရ​သား​တို့​၏​ဆာလံ

¹ လူမျိုး​အပေါင်း​တို့​၊ လက်ခုပ်တီး​ကြ​လော့​။ ရွှင်လန်း​စွာ​ကြွေးကြော်​သော​အသံ​ဖြင့် ဘုရားသခင်​ထံသို့ ဝမ်းမြောက်​စွာ​ကြွေးကြော်​ကြ​လော့​။

² အကြောင်းမူကား အမြင့်ဆုံး​သော​အရှင် ထာဝရဘုရား​သည် အံ့ဩဖွယ်​အရှင်​၊ ကမ္ဘာမြေ​တစ်ခွင်လုံး​ကို​အုပ်စိုး​သော ကြီးမြတ်​သည့်​ရှင်ဘုရင်​ဖြစ်​တော်မူ​၏​။

³ ကိုယ်တော်​သည် လူမျိုးတကာ​တို့​ကို ငါ​တို့​အောက်​၌​လည်းကောင်း​၊ တိုင်းသူပြည်သား​တို့​ကို ငါ​တို့​၏​ခြေဖဝါး​အောက်​၌​လည်းကောင်း ငြိမ်ဝပ်​ပိပြား​စေ​တော်မူ​၏​။

⁴ ကိုယ်တော်​သည် မိမိ​ချစ်​တော်မူ​သည့် ယာကုပ်​၏​ဂုဏ်ယူဝင့်ကြွားစရာ​တည်းဟူသော ငါ​တို့​၏​အမွေ​ကို ငါ​တို့​အတွက်​ရွေးချယ်​တော်မူ​၏​။(​စေလာ)

⁵ ဘုရားသခင်​သည် ဝမ်းမြောက်​စွာ​ကြွေးကြော်​သော အသံ​နှင့် တက်သွား​တော်မူ​၏​။ ထာဝရဘုရား​သည် တံပိုးမှုတ်သံ​နှင့် တက်သွား​တော်မူ​၏​။

⁶ ဘုရားသခင်​ကို သီဆိုချီးမွမ်း​ကြ​လော့​။ သီဆိုချီးမွမ်း​ကြ​လော့​။ ငါ​တို့​၏​ရှင်ဘုရင်​ကို သီဆိုချီးမွမ်း​ကြ​လော့​။ သီဆိုချီးမွမ်း​ကြ​လော့​။

⁷ အကြောင်းမူကား ဘုရားသခင်​သည် ကမ္ဘာမြေ​တစ်ခွင်လုံး​၏​ရှင်ဘုရင်​ဖြစ်​တော်မူ​၏​။ အလိမ္မာ​သီချင်း​ဖြင့် သီဆိုချီးမွမ်း​ကြ​လော့​။

⁸ ဘုရားသခင်​သည် လူမျိုးတကာ​တို့​ကို​စိုးစံ​တော်မူ​၏​။ ဘုရားသခင်​သည် မိမိ​၏​သန့်ရှင်း​သော ပလ္လင်​တော်​ပေါ်၌​ထိုင်​တော်မူ​၏​။

⁹ လူမျိုးတကာ​တို့​၏​မင်းအရာရှိ​တို့​သည် အာဗြဟံ​၏​ဘုရားသခင်​ပိုင်​တော်မူ​သော လူမျိုး​တော်​အဖြစ် စုဝေး​လာ​ကြ​၏​။ အကြောင်းမူကား ကမ္ဘာမြေကြီး​၏​ဒိုင်းလွှား​တို့​ကို ဘုရားသခင်​ပိုင်​တော်မူ​၏​။ ကိုယ်တော်​သည် ချီးမြှောက်​ခြင်း​ကို အထူး​ခံရ​တော်မူ​၏​။