ဆာ​လံ 43 - မြန်​​​မာ့​​​စံ​​​မီ​​​သမ္မာ​​​ကျမ်း​​

ကူညီမစတော်မူရန်ဆုတောင်းခြင်း

¹ အို ဘုရားသခင်​၊ အကျွန်ုပ်​၌ အပြစ်​မ​ရှိ​ကြောင်း​စီရင်​တော်မူ​ပါ​။ ဘုရားတရားမဲ့​သော​လူမျိုး​ကို​ဆန့်ကျင်​လျက် အကျွန်ုပ်​၏​အမှုကိစ္စ​ကို ရင်ဆိုင်ဖြေရှင်း​ပေး​တော်မူ​ပါ​။ လိမ်လည်လှည့်ဖြား​၍ မတရားမှု​ပြု​သော​သူ​၏​လက်​မှ အကျွန်ုပ်​ကို​လွတ်မြောက်​စေ​တော်မူ​ပါ​။

² အကြောင်းမူကား ကိုယ်တော်​သည် အကျွန်ုပ်​၏​မှီခို​ရာ​ဘုရားသခင်​ဖြစ်​တော်မူ​၏​။ အဘယ်ကြောင့် အကျွန်ုပ်​ကို ငြင်းပယ်​တော်မူ​သနည်း​။ အကျွန်ုပ်​သည် အဘယ်ကြောင့် ရန်သူ​တို့​၏​ဖိနှိပ်မှု​ထဲ၌ ဝမ်းနည်း​ပူဆွေး​လျက်​သွားလာ​ရ​ပါ​သနည်း​။

³ ကိုယ်တော်​၏​အလင်း​နှင့် ကိုယ်တော်​၏​သမ္မာတရား​ကို စေလွှတ်​တော်မူ​ပါ​။ ၎င်း​တို့​သည် အကျွန်ုပ်​ကို ကိုယ်တော်​၏ သန့်ရှင်း​သော​တောင်​တော်​သို့​လည်းကောင်း​၊ ကိုယ်တော်​၏​ကိန်းဝပ်​တော်မူ​ရာ တဲ​တော်​သို့​လည်းကောင်း ဦးဆောင်​လမ်းပြ​လျက် ခေါ်ဆောင်​သွား​ကြ​ပါစေသော​။

⁴ ထိုအခါ အကျွန်ုပ်​သည် ဘုရားသခင်​၏​ယဇ်ပလ္လင်​တော်​သို့​လည်းကောင်း​၊ အကျွန်ုပ်​၏​ဝမ်းမြောက်​ရွှင်လန်း​ခြင်း​ဖြစ်​တော်မူ​သော ဘုရား​ထံသို့​လည်းကောင်း သွား​ပါ​မည်​။ အို ဘုရားသခင်​၊ အကျွန်ုပ်​၏​ဘုရားသခင်​၊ အကျွန်ုပ်​သည် စောင်း​တီး​၍ ကိုယ်တော်​ကို ချီးမွမ်း​ပါ​မည်​။

⁵ အို ငါ​၏​စိတ်ဝိညာဉ်​၊ သင်​သည် အဘယ်ကြောင့်​ညှိုးငယ်​သနည်း​။ ငါ့​အထဲ​၌ အဘယ်ကြောင့် မငြိမ်မသက်​ဖြစ်​သနည်း​။ ဘုရားသခင်​ကို​မျှော်လင့်ကိုးစား​လော့​။ ငါ​သည် ငါ့​ကို​ကယ်တင်​တော်မူ​သော​အရှင်​၊ ငါ​၏​ဘုရားသခင်​ကို ထပ်၍​ချီးမွမ်း​မည်​။