Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

ဆာ​လံ 37 - မြန်​​​မာ့​​​စံ​​​မီ​​​သမ္မာ​​​ကျမ်း​​


ဉာဏ်ပညာပေးသောသွန်သင်ချက်
ဒါဝိဒ်​၏​ဆာလံ

1 ဆိုးညစ်​သော​အမှု​ကို​ပြု​သော​သူ​တို့​ကြောင့် စိတ်အနှောင့်အယှက်​မ​ဖြစ်​နှင့်​။ မတရားမှု​ပြု​သော​သူ​တို့​ကို​မ​ငြူစူ​နှင့်​။

2 အကြောင်းမူကား သူ​တို့​သည် မြက်ပင်​ကဲ့သို့ လျင်မြန်​စွာ​ညှိုးခြောက်​၍ စိမ်းလန်း​သော​မြက်နု​ကဲ့သို့ ညှိုးနွမ်း​ကြ​လိမ့်မည်​။

3 ထာဝရဘုရား​ကို​ယုံကြည်ကိုးစား​လျက် ကောင်း​သော​အမှု​ကို​ပြု​လော့​။ ပြည်​တော်​၌​နေထိုင်​၍ သစ္စာတရား​၌​ကျက်စား​လော့​။

4 ထာဝရဘုရား​၌ မွေ့လျော်​ခြင်း​ရှိ​လော့​။ သို့ပြုလျှင် သင်​၏​စိတ်နှလုံး​ဆန္ဒ​များ​ကို သင့်​အား​ဖြည့်ဆည်း​ပေး​တော်မူ​လိမ့်မည်​။

5 သင်​ပြုမူကျင့်ကြံ​သော​အမှုအရာ​ကို ထာဝရဘုရား​ထံ​အပ်နှံ​၍ ကိုယ်တော်​ကို ယုံကြည်ကိုးစား​လော့​။ သို့ပြုလျှင် ကိုယ်တော်​စီရင်​ဆောင်ရွက်​တော်မူ​လိမ့်မည်​။

6 ကိုယ်တော်​သည် သင်​၏​ဖြောင့်မတ်​ခြင်း​ကို အလင်း​ကဲ့သို့​လည်းကောင်း​၊ သင်​၏​တရားမျှတ​ခြင်း​ကို မွန်းတည့်​နေ​ကဲ့သို့​လည်းကောင်း ထွန်းလင်း​စေ​တော်မူ​လိမ့်မည်​။

7 ထာဝရဘုရား​ရှေ့​တော်​၌ တိတ်ဆိတ်​စွာ​နေ​၍ ကိုယ်တော်​ကို​ငံ့လင့်​လော့​။ မိမိ​ပြု​သော​အမှု​၌ အောင်မြင်​သော​သူ​ကြောင့်​လည်းကောင်း​၊ ကောက်ကျစ်​သော​အကြံအစည်​များ​ကို ကြံစည်​သော​သူ​ကြောင့်​လည်းကောင်း စိတ်အနှောင့်အယှက်​မ​ဖြစ်​နှင့်​။

8 အမျက်​ကို​ပြေ​စေ​လော့​။ အမျက်ဒေါသ​ကို​စွန့်ပယ်​လော့​။ စိတ်အနှောင့်အယှက်​မ​ဖြစ်​နှင့်​။ ၎င်း​သည် ဆိုးကျိုး​ကို​သာ​ဖြစ်စေ​တတ်​၏​။

9 အကြောင်းမူကား ဆိုးညစ်​သော​အမှု​ကို​ပြု​သော​သူ​တို့​သည် ဖယ်ရှား​ခြင်း​ခံ​ကြ​ရ​လိမ့်မည်​။ ထာဝရဘုရား​ကို​စောင့်မျှော်​သော​သူ​တို့​မူကား ပြည်​တော်​ကို​အမွေဆက်ခံ​ရ​ကြ​လိမ့်မည်​။

10 ခဏမျှကြာ​လျှင် ဆိုးယုတ်​သော​သူ​သည် ရှိ​တော့​မည်​မ​ဟုတ်​။ သင်​သည် သူ​၏​နေရာ​ကို​စေ့စေ့ရှာ​လျှင်လည်း သူ​သည်​ရှိ​တော့​မည်​မ​ဟုတ်​။

11 စိတ်နှိမ့်ချ​သော​သူ​တို့​မူကား ပြည်​တော်​ကို​အမွေဆက်ခံ​ရ​၍ ကြွယ်ဝ​သော​ငြိမ်းချမ်း​ခြင်း​၌ မွေ့လျော်​ရ​ကြ​လိမ့်မည်​။

12 ဆိုးယုတ်​သော​သူ​သည် ဖြောင့်မတ်​သော​သူ​အပေါ် မကောင်း​ကြံစည်​ကာ သူ့​ကို​ကြည့်​လျက် အံကြိတ်​တတ်​၏​။

13 သို့သော် သူ​၏​နေ့ရက်​ရောက်လာ​တော့​မည်​ကို ဘုရားရှင်​သည် သိမြင်​တော်မူ​၍ သူ့​ကို​ရယ်မော​တော်မူ​၏​။

14 ဆိုးယုတ်​သော​သူ​တို့​သည် အဖိနှိပ်​ခံရ​သော​သူ​နှင့် နွမ်းပါး​သော​သူ​ကို လဲကျ​စေရန်​လည်းကောင်း​၊ ဖြောင့်မှန်​စွာ​ပြုမူကျင့်ကြံ​သော​သူ​တို့​ကို သတ်ဖြတ်​ရန်​လည်းကောင်း ဓား​ကို​ထုတ်​၍ လေး​ကို​တင်​ကြ​၏​။

15 သူ​တို့​၏​ဓား​သည် သူ​တို့​၏​နှလုံး​ကို​ထိုးဖောက်​၍ သူ​တို့​၏​လေး​များ​သည် ချိုးဖဲ့​ခြင်း​ခံရ​လိမ့်မည်​။

16 ဖြောင့်မတ်​သော​သူ​၏​အနည်းငယ်​သော​ဥစ္စာ​သည် ဆိုးယုတ်​သော​သူ​တို့​၏​များစွာ​သော စည်းစိမ်ဘဏ္ဍာ​ထက် ပို၍​ကောင်း​၏​။

17 အကြောင်းမူကား ဆိုးယုတ်​သော​သူ​တို့​၏​လက်ရုံး​သည် ချိုးဖဲ့​ခြင်း​ခံရ​လိမ့်မည်​။ သို့သော် ထာဝရဘုရား​သည် ဖြောင့်မတ်​သော​သူ​တို့​ကို ထောက်မ​တော်မူ​၏​။

18 ထာဝရဘုရား​သည် အပြစ်တင်စရာမရှိ​သော​သူ​တို့​၏ နေ့ရက်​များ​ကို​သိ​တော်မူ​၏​။ သူ​တို့​၏​အမွေ​သည် အစဉ်အမြဲ​တည်​လိမ့်မည်​။

19 သူ​တို့​သည် ဆိုးရွား​သော​ကာလ​၌ အရှက်ကွဲ​ကြ​ရ​လိမ့်မည်​မ​ဟုတ်​။ အစာခေါင်းပါး​သော​နေ့​၌​လည်း ဝလင်​ရ​ကြ​လိမ့်မည်​။

20 ဆိုးယုတ်​သော​သူ​တို့​မူကား ပျက်စီး​ကြ​ရ​လိမ့်မည်​။ ထာဝရဘုရား​၏​ရန်သူ​တို့​သည် မြက်ခင်းပြင်​၏​အသရေ​ကဲ့သို့​ဖြစ်​ကြ​၏​။ သူ​တို့​သည် ပျောက်ပြယ်​သွား​ကြ​လိမ့်မည်​။ မီးခိုး​ကဲ့သို့ ပျောက်ပြယ်​သွား​ကြ​လိမ့်မည်​။

21 ဆိုးယုတ်​သော​သူ​တို့​သည် ချေးငှား​ပြီး ပြန်​မ​ဆပ်​တတ်​ကြ​ပေ​။ ဖြောင့်မတ်​သော​သူ​တို့​မူကား သနား​၍ ပေးကမ်း​တတ်​ကြ​၏​။

22 အကြောင်းမူကား ကိုယ်တော်​၏​ကောင်းချီးမင်္ဂလာ​ကို ခံစား​ရ​သော​သူ​တို့​သည် ပြည်​တော်​ကို​အမွေဆက်ခံ​ရ​ကြ​လိမ့်မည်​။ ကိုယ်တော်​၏​ကျိန်​ခြင်း​ကို​ခံရ​သော​သူ​တို့​မူကား ဖယ်ရှား​ခြင်း​ခံရ​ကြ​လိမ့်မည်​။

23 ထာဝရဘုရား​သည် လူ​၏​ခြေလှမ်း​များ​ကို မြဲမြံ​စေ​၍ သူ​သွား​ရာ​လမ်း​ကို နှစ်သက်​တော်မူ​၏​။

24 ထာဝရဘုရား​သည် သူ့​ကို မိမိ​လက်​တော်​ဖြင့် ထောက်မ​တော်မူ​သောကြောင့် သူ​သည်​လဲကျ​လျှင်လည်း ပြန်မထ​နိုင်​တော့​သည့်​အဖြစ်​သို့ ရောက်​လိမ့်မည်​မ​ဟုတ်​။

25 ငါ​သည် လူငယ်​တစ်​ဦး​ဖြစ်​ခဲ့​ပြီး ယခု​အသက်ကြီး​လေ​ပြီ​။ သို့သော် ဖြောင့်မတ်​သော​သူ​သည် စွန့်ပစ်​ခြင်း​ခံရ​သည်​ကို​လည်းကောင်း​၊ သူ​၏​သားမြေး​တို့​သည် အစာ​တောင်းရမ်း​နေ​ကြ​ရ​သည်​ကို​လည်းကောင်း မ​တွေ့​မ​မြင်​ဖူး​ပေ​။

26 သူ​သည် အစဉ်အမြဲ​သနား​တတ်​၍ ချေးငှား​ပေး​တတ်​၏​။ သူ​၏​သားမြေး​တို့​သည်​လည်း ကောင်းချီးမင်္ဂလာ ဖြစ်​ကြ​၏​။

27 မကောင်းမှု​မှ​ဖယ်ခွာ​၍ ကောင်း​သော​အမှု​ကို​ပြု​လော့​။ သို့ပြုလျှင် အစဉ်အမြဲ​နေထိုင်​ရ​လိမ့်မည်​။

28 အကြောင်းမူကား ထာဝရဘုရား​သည် တရားမျှတမှု​ကို​နှစ်သက်​တော်မူ​၏​။ မိမိ​၏​သန့်ရှင်း​သူ​တို့​ကို​လည်း စွန့်ပစ်​တော်​မ​မူ​။ သူ​တို့​သည် အစဉ်အမြဲ​စောင့်ရှောက်​တော်မူ​ခြင်း​ကို ခံရ​ကြ​လိမ့်မည်​။ ဆိုးယုတ်​သော​သူ​၏​သားမြေး​တို့​မူကား ဖယ်ရှား​ခြင်း​ခံ​ကြ​ရ​လိမ့်မည်​။

29 ဖြောင့်မတ်​သော​သူ​တို့​သည် ပြည်​တော်​ကို​အမွေဆက်ခံ​ရ​၍ ၎င်း​တွင် ထာဝစဉ်​နေထိုင်​ရ​ကြ​လိမ့်မည်​။

30 ဖြောင့်မတ်​သော​သူ​၏​နှုတ်​သည် ဉာဏ်ပညာ​စကား​ကို​မြွက်ဆို​တတ်​၏​။ သူ​၏​လျှာ​သည်​လည်း တရားမျှတ​သော​စကား​ကို​ပြောဆို​တတ်​၏​။

31 သူ့​ဘုရားသခင်​၏​တရားတော်​သည် သူ့​စိတ်နှလုံး​ထဲ၌​ရှိ​သည်​ဖြစ်၍ သူ​သည် ခြေ​ချော်​ခြင်း​ရှိ​မည်​မ​ဟုတ်​။

32 ဆိုးယုတ်​သော​သူ​သည် ဖြောင့်မတ်​သော​သူ​ကို စောင့်ကြည့်​၍ သူ့​ကို​သတ်​ရန်​ရှာကြံ​တတ်​၏​။

33 သို့သော် ထာဝရဘုရား​သည် သူ့​ကို ထို​ဆိုးယုတ်​သော​သူ​၏​လက်​ထဲ၌ စွန့်ပစ်​ထား​တော်မူ​မည်​မ​ဟုတ်​။ သူ​သည် တရားစီရင်​ခြင်း​ခံရ​သောအခါ​၌​လည်း အပြစ်​ရှိ​သည်​ဟု​စီရင်​ခြင်း​ခံရ​မည်​မ​ဟုတ်​။

34 ထာဝရဘုရား​ကို​စောင့်မျှော်​၍ ကိုယ်တော်​၏​လမ်း​ကို စောင့်ထိန်း​လော့​။ သို့ပြုလျှင် သင်​သည် ပြည်​တော်​ကို​အမွေဆက်ခံ​ရ​ရန် ကိုယ်တော်​သည် သင့်​ကို​ချီးမြှောက်​တော်မူ​လိမ့်မည်​။ ဆိုးယုတ်​သော​သူ​တို့​ဖယ်ရှား​ခြင်း​ခံရ​သည်​ကို သင်​မြင်​ရ​လိမ့်မည်​။

35 ဆိုးယုတ်​၍​ကြမ်းကြုတ်​သော​သူ​သည် မူရင်း​ဒေသ​ပေါက် စိမ်းလန်း​သော​အပင်​ကဲ့သို့ ပြန့်ကား​ကြီးထွား​နေ​သည်​ကို ငါ​မြင်​ရ​၏​။

36 သို့သော် သူ​သည်​ကွယ်ပျောက်​သွား​၏​။ ကြည့်ရှု​လော့​။ သူ​မ​ရှိ​တော့​ပေ​။ သူ့​ကို ငါ​ရှာ​သော်လည်း မ​တွေ့​ရ​တော့​ပေ​။

37 အပြစ်တင်စရာ​မ​ရှိ​သော​သူ​ကို မှတ်သားဆင်ခြင်​လော့​။ ဖြောင့်မှန်​သော​သူ​ကို ကြည့်ရှု​လော့​။ အကြောင်းမူကား ငြိမ်းချမ်း​ခြင်း​ဆောင်ကြဉ်း​သူ​အတွက် အနာဂတ်​ရှိ​၏​။

38 သို့သော် အပြစ်ကျူးလွန်​သော​သူ​တို့​သည် အတူတကွ​ဖျက်ဆီး​ခြင်း​ခံ​ကြ​ရ​လိမ့်မည်​။ ဆိုးယုတ်​သော​သူ​တို့​၏​အနာဂတ်​သည် ဖယ်ရှား​ခြင်း​ခံ​ကြ​ရ​လိမ့်မည်​။

39 ဖြောင့်မတ်​သော​သူ​ကို​ကယ်တင်​ခြင်း​အကြောင်း​သည် ထာဝရဘုရား​ထံ​တော်​မှ​လာ​၏​။ ဆင်းရဲဒုက္ခ​ရောက်​သော​အချိန်​တွင် ကိုယ်တော်​သည် သူ​တို့​၏​မှီခို​ရာ​ဖြစ်​တော်မူ​၏​။

40 ထာဝရဘုရား​သည် သူ​တို့​ကို​ကူညီမစ​၍ ကယ်တင်​တော်မူ​၏​။ သူ​တို့​သည် ကိုယ်တော်​၌​ခိုလှုံ​ကြ​သောကြောင့် ကိုယ်တော်​သည် သူ​တို့​ကို ဆိုးယုတ်​သော​သူ​တို့​၏​လက်​မှ လွတ်မြောက်​စေ​တော်မူ​၏​။ ကယ်တင်​တော်မူ​၏​။

MYANMAR STANDARD BIBLE©

Copyright © 2012, 2014, 2017, 2021 by Global Bible Initiative

Global Bible Initiative
ကြှနျုပျတို့နောကျလိုကျပါ:



ကြော်ငြာတွေ