Biblia Todo Logo
အွန်လိုင်း သမ္မာကျမ်းစာ
- ကြော်ငြာတွေ -

ဆာ​လံ 33 - မြန်​​​မာ့​​​စံ​​​မီ​​​သမ္မာ​​​ကျမ်း​​


ဖန်ဆင်းရှင်ထာဝရဘုရားကို ချီးမွမ်းခြင်း

1 ဖြောင့်မတ်​သော​သူ​တို့​၊ ထာဝရဘုရား​ထံသို့ ရွှင်လန်း​စွာ​ကြွေးကြော်​ကြ​လော့​။ ချီးမွမ်း​ခြင်း​သည် ဖြောင့်မှန်​သော​သူ​တို့​နှင့် သင့်လျော်​ပေ​၏​။

2 စောင်း​တီး​၍ ထာဝရဘုရား​ကို​ချီးမွမ်း​ကြ​လော့​။ ဆယ်​ကြိုး​တပ်​စောင်းပြား​တီး​၍ ကိုယ်တော်​ကို​သီဆိုချီးမွမ်း​ကြ​လော့​။

3 ကိုယ်တော်​ထံသို့ သီချင်း​အသစ်​ကို​သီကျူး​ကြ​လော့​။ ဝမ်းမြောက်​စွာ​ကြွေးကြော်​သော​အသံ​နှင့်တကွ ကျွမ်းကျင်​စွာ​တီးခတ်​ကြ​လော့​။

4 အကြောင်းမူကား ထာဝရဘုရား​၏​နှုတ်ကပတ်တော်​သည် ဖြောင့်မှန်​၏​။ ကိုယ်တော်​ပြု​တော်မူ​သော​အမှု​ရှိသမျှ​တို့​သည် သစ္စာ​နှင့်​ပြည့်စုံ​ကြ​၏​။

5 ကိုယ်တော်​သည် ဖြောင့်မတ်​ခြင်း​နှင့် တရားမျှတ​ခြင်း​တို့​ကို နှစ်သက်​တော်မူ​၏​။ ကမ္ဘာမြေကြီး​သည် ထာဝရဘုရား​၏ မေတ္တာကရုဏာ​တော်​နှင့်​ပြည့်ဝ​လျက်​ရှိ​၏​။

6 ကောင်းကင်​သည် ထာဝရဘုရား​၏ နှုတ်ကပတ်တော်​အားဖြင့်​လည်းကောင်း​၊ ကောင်းကင်တန်ဆာ​ရှိသမျှ​တို့​သည် နှုတ်​တော်​မှ​ထွက်သက်လေ​အားဖြင့်​လည်းကောင်း ဖန်ဆင်း​ခြင်း​ခံရ​၏​။

7 ကိုယ်တော်​သည် ပင်လယ်​ရေ​များ​ကို တာတမံ​ကဲ့သို့​စုဝေး​စေ​၍ နက်ရှိုင်း​သော​ရေထု​များ​ကို သိုလှောင်​တိုက်​ထဲ၌ ထား​တော်မူ​၏​။

8 မြေကြီးသား​အပေါင်း​တို့​သည် ထာဝရဘုရား​ကို​ကြောက်ရွံ့​ပါစေ​။ ကမ္ဘာလောက​၌​နေထိုင်​သော​သူ​အပေါင်း​တို့​သည် ကိုယ်တော်​ကို ကြောက်ရွံ့ရိုသေ​ကြ​ပါစေ​။

9 အကြောင်းမူကား ကိုယ်တော်​မြွက်ဆို​တော်မူ​သောအခါ ထို​အတိုင်း​ဖြစ်​၏​။ ကိုယ်တော်​အမိန့်ပေး​တော်မူ​သောအခါ ထို​အတိုင်း​တည်​လျက်​နေ​၏​။

10 ထာဝရဘုရား​သည် တိုင်းနိုင်ငံ​တို့​၏​အကြံဉာဏ်​ကို ပယ်ဖျက်​၍ လူမျိုး​တို့​၏​အကြံအစည်​များ​ကို ဟန့်တား​တော်မူ​၏​။

11 ထာဝရဘုရား​၏​အကြံဉာဏ်​သည် အစဉ်အမြဲ​တည်​၍ ကိုယ်တော်​၏​စိတ်နှလုံး​အကြံအစည်​တို့​သည် မျိုးဆက်​အစဉ်အဆက်​တည်​၏​။

12 ထာဝရဘုရား​ကို မိမိ​ဘုရား​အဖြစ်​ကိုးကွယ်​သော​တိုင်းနိုင်ငံ​နှင့် ကိုယ်တော်​၏​အမွေခံ​အဖြစ် ကိုယ်တော်​ရွေးချယ်​သော​လူမျိုး​သည် မင်္ဂလာ​ရှိ​၏​။

13 ထာဝရဘုရား​သည် ကောင်းကင်ဘုံ​မှ အောက်​သို့​ကြည့်​၍ လူသား​အပေါင်း​တို့​ကို မြင်​တော်မူ​၏​။

14 ကိုယ်တော်​သည် ကမ္ဘာမြေ​ပေါ် နေထိုင်​သော​သူ​အပေါင်း​တို့​ကို မိမိ​စံပယ်​ရာ​အရပ်​မှ ကြည့်ရှု​တော်မူ​၏​။

15 သူ​တို့​အားလုံး​၏​စိတ်နှလုံး​ကို ပုံဖော်ဖန်ဆင်း​၍ သူ​တို့​ပြု​သော​အမှု​အားလုံး​တို့​ကို သိရှိနားလည်​တော်မူ​၏​။

16 ရှင်ဘုရင်​သည် စစ်သည်​အလုံးအရင်း​ကြောင့် ကယ်တင်​ခြင်း​ခံရ​သည်​မ​ဟုတ်​။ စစ်သူရဲ​သည် ကြီးမား​သော​ခွန်အား​ကြောင့် လွတ်မြောက်​ခွင့်​ရ​သည်​မ​ဟုတ်​။

17 မြင်း​သည် အောင်ပွဲ​အတွက် အချည်းနှီး​သော​မျှော်လင့်ချက်​ဖြစ်​၏​။ ၎င်း​၏​ကြီးမား​သော​ခွန်အား​က​လည်း မ​ကယ်ယူ​နိုင်​။

18 ကြည့်ရှု​လော့​။ ထာဝရဘုရား​သည် မိမိ​ကို​ကြောက်ရွံ့​သော​သူ​တို့​နှင့် မိမိ​မေတ္တာကရုဏာ​တော်​ကို မျှော်လင့်ကိုးစား​သော​သူ​တို့​၏​စိတ်ဝိညာဉ်​ကို ကြည့်ရှု​တော်မူ​၏​။

19 ထိုသို့​ကြည့်ရှု​တော်မူ​ခြင်း​မှာ သူ​တို့​၏​စိတ်ဝိညာဉ်​ကို သေ​ခြင်း​မှ​ကယ်နုတ်​ရန်​နှင့် ငတ်မွတ်ခေါင်းပါး​သည့်​ကာလ​၌ သူ​တို့​ကို​ဆက်၍​အသက်ရှင်​စေရန်​ဖြစ်​၏​။

20 ငါ​တို့​၏​စိတ်ဝိညာဉ်​သည် ထာဝရဘုရား​ကို​စောင့်မျှော်​၏​။ ကိုယ်တော်​သည် ငါ​တို့​ကို​ကူညီမစ​သော​အရှင်​၊ ငါ​တို့​၏​ဒိုင်းလွှား​ဖြစ်​တော်မူ​၏​။

21 အကြောင်းမူကား ငါ​တို့​သည် ကိုယ်တော်​၏​သန့်ရှင်း​သော​နာမ​တော်​ကို ယုံကြည်ကိုးစား​ကြ​သောကြောင့် ငါ​တို့​၏​စိတ်နှလုံး​သည် ကိုယ်တော်​၌​ဝမ်းမြောက်​ခြင်း​ရှိ​၏​။

22 အို ထာဝရဘုရား​၊ အကျွန်ုပ်​တို့​သည် ကိုယ်တော်​ကို​မျှော်လင့်ကိုးစား​ကြ​သည်​နှင့်အညီ ကိုယ်တော်​၏​မေတ္တာကရုဏာ​တော်​သည် အကျွန်ုပ်​တို့​အပေါ်​သက်ရောက်​ပါစေသော​။

MYANMAR STANDARD BIBLE©

Copyright © 2012, 2014, 2017, 2021 by Global Bible Initiative

Global Bible Initiative
ကြှနျုပျတို့နောကျလိုကျပါ:



ကြော်ငြာတွေ