ဆာ​လံ 20 - မြန်​​​မာ့​​​စံ​​​မီ​​​သမ္မာ​​​ကျမ်း​​

အောင်ပွဲရရန် ဆုတောင်းခြင်း

ဂီတမှူး​အတွက်​၊ ဒါဝိဒ်​၏​ဆာလံ

¹ ဆင်းရဲဒုက္ခ​ရောက်​သော​ကာလ​၌ ထာဝရဘုရား​သည် သင့်​ကို​ထူး​တော်မူ​ပါစေသော​။ ယာကုပ်​၏​ဘုရားသခင်​နာမ​တော်​သည် သင့်​ကို​လုံခြုံ​စွာ​စောင့်ရှောက်​ပါစေသော​။

² ကိုယ်တော်​သည် သင့်​အတွက်​ကူညီမစမှု​ကို သန့်ရှင်းရာဌာန​တော်​ထဲမှ​စေလွှတ်​၍ သင့်​ကို ဇိအုန်​မှ ဖေးမ​တော်မူ​ပါစေသော​။

³ သင်​၏​ပူဇော်သက္ကာ​အားလုံး​ကို​အောက်မေ့​၍ သင်​၏​မီးရှို့ရာယဇ်​ကို လက်ခံ​တော်မူ​ပါစေသော​။(​စေလာ)

⁴ ကိုယ်တော်​သည် သင်​၏​စိတ်​အလိုဆန္ဒ​ကို ဖြည့်ဆည်း​ပေး​၍ သင်​၏​အကြံဉာဏ်​ရှိသမျှ​တို့​ကို ပြည့်စုံ​စေ​တော်မူ​ပါစေသော​။

⁵ ငါ​တို့​သည် သင်​၏​အောင်မြင်​ခြင်း​ကြောင့် ရွှင်လန်း​စွာ​ကြွေးကြော်​၍ ငါ​တို့​ဘုရားသခင်​၏​နာမ​တော်​၌ အောင်လံ​ကို​စိုက်ထူ​ကြ​မည်​။ ထာဝရဘုရား​သည် သင်​တောင်းလျှောက်​သမျှ​တို့​ကို ပြည့်စုံ​စေ​တော်မူ​ပါစေသော​။

⁶ ထာဝရဘုရား​သည် မိမိ​ဘိသိက်ပေး​ထား​သော​သူ​ကို ကယ်တင်​တော်မူ​ကြောင်း ယခု​ငါ​သိ​၏​။ ကိုယ်တော်​သည် သူ့​အား လက်ယာ​လက်​တော်​၏​အစွမ်းတန်ခိုး​တော်​များ​ဖြင့် ကယ်တင်​တော်မူ​၏​။ မိမိ​၏​သန့်ရှင်း​သော​ကောင်းကင်ဘုံ​မှ သူ့​ကို​ထူး​တော်မူ​၏​။

⁷ အချို့​တို့​သည် စစ်ရထား​များ​အတွက်​၊ အချို့​တို့​သည် မြင်း​များ​အတွက် ဂုဏ်ယူဝင့်ကြွား​ကြ​၏​။ ငါ​တို့​မူကား ငါ​တို့​၏​ဘုရားသခင် ထာဝရဘုရား​၏​နာမ​တော်​အတွက် ဂုဏ်ယူဝင့်ကြွား​ကြ​၏​။

⁸ သူ​တို့​သည် ခွေယိုင်​လဲကျ​သွား​ကြ​၏​။ ငါ​တို့​မူကား ထ​၍​ခိုင်မြဲ​စွာ​ရပ်​နေ​ကြ​၏​။

⁹ အို ထာဝရဘုရား​၊ ဘုရင်မင်းကြီး​ကို ကယ်တင်​တော်မူ​ပါ​။ အကျွန်ုပ်​တို့​ခေါ်​သောအခါ အကျွန်ုပ်​တို့​ကို​ထူး​တော်မူ​ပါ​။