ဆာ​လံ 128 - မြန်​​​မာ့​​​စံ​​​မီ​​​သမ္မာ​​​ကျမ်း​​

ထာဝရဘုရားကိုကြောက်ရွံ့သောမိသားစု

အတက်လမ်း​သီချင်း

¹ ထာဝရဘုရား​ကို ကြောက်ရွံ့​သော​သူ​၊ ကိုယ်တော်​၏​လမ်း​တော်​များ​အတိုင်း အသက်ရှင်​လျှောက်လှမ်း​သော​သူ​ရှိသမျှ​တို့​သည် မင်္ဂလာ​ရှိ​ကြ​၏​။

² သင်​သည် မိမိ​လက်​ဖြင့် လုပ်ဆောင်​ရရှိ​သော အသီးအပွင့်​ကို အမှန်ပင် စား​ရ​လိမ့်မည်​။ သင်​သည် မင်္ဂလာ​ရှိ​၍ ကောင်းကျိုးချမ်းသာ​ကို ခံစား​ရ​လိမ့်မည်​။

³ သင့်​အိမ်​တွင် သင်​၏​မယား​သည် အသီး​များစွာ​သီး​သော​စပျစ်ပင်​ကဲ့သို့ ဖြစ်​လိမ့်မည်​။ သင်​၏​သားသမီး​တို့​သည်​လည်း သံလွင်​ပျိုးပင်​များ​ကဲ့သို့ သင့်​စားပွဲ​ပတ်လည်​၌​ရှိ​နေ​လိမ့်မည်​။

⁴ ကြည့်ရှု​လော့​။ ထာဝရဘုရား​ကို ကြောက်ရွံ့​သော​သူ​သည် ထိုကဲ့သို့ ကောင်းချီးမင်္ဂလာ​ခံစား​ရ​လိမ့်မည်​။

⁵ ထာဝရဘုရား​သည် သင့်​ကို ဇိအုန်​မှ ကောင်းချီးပေး​တော်မူ​ပါစေသော​။ သင်​သည် အသက်ရှင်​သမျှ​ကာလ​ပတ်လုံး ဂျေရုဆလင်​မြို့​၏​ကောင်းကျိုးချမ်းသာ​ကို တွေ့မြင်​ရ​ပါစေသော​။

⁶ သင့်​သားသမီး​တို့​၏​သားသမီး​များ​ကို​လည်း တွေ့မြင်​ရ​ပါစေသော​။ အစ္စရေး​လူမျိုး​၌ ငြိမ်သက်​ခြင်း​ရှိ​ပါစေသော​။