ဆာလံ 114 - မြန်မာ့စံမီသမ္မာကျမ်းအစ္စရေးလူမျိုးကို လွတ်မြောက်စေတော်မူသောဘုရားသခင် 1 အစ္စရေးလူမျိုးသည် အီဂျစ်ပြည်မှ၊ ယာကုပ်၏အမျိုးအနွယ်သည် တိုင်းတစ်ပါးဘာသာစကားပြောဆိုသောလူမျိုးထံမှ ထွက်လာသောအခါ 2 ယုဒသည် ကိုယ်တော်၏သန့်ရှင်းရာဌာနတော်၊ အစ္စရေးသည် ကိုယ်တော်အုပ်စိုးသော နိုင်ငံတော်ဖြစ်လာ၏။ 3 ပင်လယ်သည် မြင်၍ထွက်ပြေးလေ၏။ ဂျော်ဒန်မြစ်သည် နောက်သို့ပြန်လှည့်လေ၏။ 4 တောင်တို့သည် သိုးထီးကဲ့သို့လည်းကောင်း၊ တောင်ကုန်းတို့သည် သိုးသငယ်ကဲ့သို့လည်းကောင်း ခုန်ပေါက်ကြ၏။ 5 အချင်းပင်လယ်၊ သင်သည် အဘယ်ကြောင့်ထွက်ပြေးရသနည်း။ အချင်းဂျော်ဒန်မြစ်၊ သင်သည် အဘယ်ကြောင့် နောက်သို့ပြန်လှည့်ရသနည်း။ 6 အချင်းတောင်တို့၊ သင်တို့သည် အဘယ်ကြောင့် သိုးထီးကဲ့သို့လည်းကောင်း၊ အချင်းတောင်ကုန်းတို့၊ သင်တို့သည် အဘယ်ကြောင့် သိုးသငယ်ကဲ့သို့လည်းကောင်း ခုန်ပေါက်ကြသနည်း။ 7 အချင်းမြေကြီး၊ အရှင်၏ရှေ့တော်တည်းဟူသော ယာကုပ်၏ဘုရားသခင့်ရှေ့တော်၌ တုန်လှုပ်လျက်နေလော့။ 8 ကိုယ်တော်သည် ကျောက်ဆောင်ကို ရေအိုင်အဖြစ်သို့လည်းကောင်း၊ မာကျောသောကျောက်ကို စမ်းရေတွင်းအဖြစ်သို့လည်းကောင်း ပြောင်းလဲစေတော်မူ၏။ |
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative
Global Bible Initiative