ဆာ​လံ 11 - မြန်​​​မာ့​​​စံ​​​မီ​​​သမ္မာ​​​ကျမ်း​​

ထာဝရဘုရား၌ခိုလှုံခြင်း

ဂီတမှူး​အတွက်​၊ ဒါဝိဒ်​၏​ဆာလံ

¹ ငါ​သည် ထာဝရဘုရား​ကို​ခိုလှုံ​၏​။ သင်​တို့​သည် ငါ​၏​စိတ်ဝိညာဉ်​အား “​ငှက်​ကဲ့သို့ သင်​၏​တောင်​ပေါ်သို့ ထွက်ပြေး​လော့​”​ဟု မည်သို့​ဆို​နိုင်​မည်နည်း​။

² ကြည့်ရှု​လော့​။ ဆိုးယုတ်​သော​သူ​တို့​သည် စိတ်နှလုံး​ဖြောင့်မှန်​သော​သူ​တို့​ကို မှောင်ကြီးမည်းကြီး​ထဲမှ​ပစ်ခတ်​ရန် လေးကြိုး​ပေါ်တွင် မြား​ကို​တင်​၍ ချိန်ရွယ်​ထား​ကြ​ပြီ​။

³ အခြေအမြစ်​တို့​ပြိုပျက်​သောအခါ ဖြောင့်မတ်​သော​သူ​သည် မည်သို့​ပြု​နိုင်​မည်နည်း​။

⁴ ထာဝရဘုရား​သည် မိမိ​၏​သန့်ရှင်း​သော​ဗိမာန်တော်​၌ စံနေ​တော်မူ​၏​။ ထာဝရဘုရား​၏​ပလ္လင်​တော်​သည် ကောင်းကင်ဘုံ​၌​ရှိ​၏​။ ကိုယ်တော်​သည် မျက်စိ​တော်​ဖြင့်​ကြည့်ရှု​၍ မျက်ခမ်း​တော်​ဖြင့် လူသား​တို့​ကို စစ်ဆေး​တော်မူ​၏​။

⁵ ထာဝရဘုရား​သည် ဖြောင့်မတ်​သော​သူ​ကို စစ်ဆေး​တော်မူ​၏​။ သို့သော် ကိုယ်တော်​၏​စိတ်ဝိညာဉ်​သည် ဆိုးယုတ်​သော​သူ​နှင့် ရက်စက်ကြမ်းကြုတ်မှု​ကို​နှစ်သက်​သော​သူ​အား မုန်း​တော်မူ​၏​။

⁶ ကိုယ်တော်​သည် မီးခဲ​တို့​ကို ဆိုးယုတ်​သော​သူ​တို့​အပေါ် ရွာကျ​စေ​တော်မူ​လိမ့်မည်​။ မီး​၊ ကန့်​နှင့် ပူလောင်​သော​လေ​သည် သူ​တို့​ခွက်ဖလား​အတွက် ဝေစု​ဖြစ်​လိမ့်မည်​။

⁷ အကြောင်းမူကား ထာဝရဘုရား​သည် ဖြောင့်မတ်​တော်မူ​၏​။ ကိုယ်တော်​သည် ဖြောင့်မတ်​ခြင်း​ကို နှစ်သက်​တော်မူ​၏​။ ဖြောင့်မှန်​သော​သူ​သည် မျက်နှာ​တော်​ကို​ဖူးမြင်​ရ​လိမ့်မည်​။